کالاش ویلیز ڈویلپمنٹ اتھارٹی کا اجلاس، متعدداہم فیصلے اور اتھارٹی کی لوگو کی منظوری دیدی گئی

پشاور ( چترال ٹائمزرپورٹ ) کالاش ویلیز ڈویلپمنٹ اتھارٹی کی خصوصی اتھارٹی کا ساتواں اجلاس گزشتہ دن اتھارٹی کے چیئرمین شہزادہ مقصود الملک کی زیر صدارت پشاور میں منعقد ہوا۔ اجلاس میں بورڈ کے ممبران ممبر صوبائی اسمبلی چترال ٹوفاتح الملک علی ناصر،سرتاج احمد، وزیر زادہ، محمد علی، ڈاکٹر زہرہ حسین کے علاوہ سجاد خان ڈائریکٹر کلچر اینڈ ٹورازم اتھارٹی، دولت خان، سیکشن آفیسر محکمہ سیاحت، حنیف احمد ٹی ایم او چترال، عبدالمجید، غیرت بیگ اور زین مصطفیٰ نے بھی اجلاس میں شرکت کی۔ ڈی جی کالاش ویلیز ڈویلپمنٹ اتھارٹی منہاس الدین نے اتھارٹی کے ممبران کو تفصیلی پریزنٹیشن دی۔ ایجنڈا کے مختلف آئٹمز پر بحث کے بعد درج ذیل فیصلے کیے گئے:

فورم نے KVDA کے لیے آفیشل لوگو کی منظوری دے دی۔ یہ فیصلہ کیا گیا کہ KVDA کو مختلف مفاد عامہ کے منصوبوں یعنی دفاتر، ڈمپنگ سائٹس وغیرہ کے لیے وادیوں میں زمین خریدنے کی اجازت دی جائے۔
سروس بائی لاز کو فورم کے سامنے پیش کیا گیا، جس میں KVDA سروس بائی لاز کی مکمل جانچ کے لیے ایک محکمانہ کمیٹی تشکیل دینے کا فیصلہ کیا گیا۔ کمیٹی کی سفارشات اتھارٹی کے آئندہ اجلاس میں پیش کی جائیں گی۔

بلڈنگ بائی لاز بھی فورم کے سامنے پیش کیے گئے، جس میں مجوزہ بلڈنگ بائی لاز کے حوالے سے تمام اسٹیک ہولڈرز کی ایک ورکشاپ منعقد کرنے کا فیصلہ کیا گیا۔ ماہرین کی ایک محکمانہ کمیٹی مجوزہ بلڈنگ بائی لاز کی بھی چھان بین کرے گی۔ کمیٹی کی سفارشات اتھارٹی کے آئندہ اجلاس میں پیش کی جائیں گی۔
یہ فیصلہ کیا گیا کہ KVDA مقامی ثقافت کو دنیا کے سامنے اجاگر کرنے کے لیے ٹورازم ایکسپو اسلام آباد میں کالاش کمیونٹی کی شرکت کی سہولت فراہم کرے گا۔ ایکسپو مئی کے آخری ہفتے میں منعقد کی جائے گی۔

فورم نے کالاش وادیوں سے متعلق مفاد عامہ کے مختلف منصوبوں کی نمائش کے لیے ایک ڈونر کانفرنس بلانے کا بھی فیصلہ کیا۔
کالاش کی وادیوں کو انٹیگریٹڈ ٹورازم زونز (ITZ’s) میں شامل کرنے کی تجویز پر تفصیلی تبادلہ خیال کیا گیا۔ فورم نے کالاش کی وادیوں کو انٹیگریٹڈ ٹورازم زونز (ITZ’s) میں شامل کرنے پر اصولی طور پر اتفاق کیا۔ اس سے ثقافتی تحفظ، سیاحت کے فروغ اور معاش میں بہتری کی کوششوں میں اضافہ ہوگا۔

اجلاس میں فیصلہ کیا گیا کہ کیلاش وادیوں کو مربوط ٹورازم زونز میں شامل کرنے کے حوالے سے ہز ہائینس فتح الملک علی ناصر، ایم پی اے-پی کے-2، جناب وزیر زادہ، ڈی جی کے وی ڈی اے اور کلچر اینڈ ٹورازم اتھارٹی کے ماہرین پر مشتمل کمیٹی اپنی سفارشات پیش کرے گی۔

کالاش ثقافت کے تحفظ، پائیدار انفراسٹرکچر ڈویلپمنٹ، چینلائزیشن، گوٹ فارمنگ اور پنیر بنانے کے حوالے سے مختلف منصوبوں کی تجاویز پر بھی تبادلہ خیال کیا گیا۔ ان منصوبوں کی منظوری تمام ضابطہ اخلاق کی تکمیل کے بعد دی جائے گی۔ اجلاس کے اختتام پر چیئرمین شہزادہ مقصود الملک نے تمام اتھارٹی ممبران کا شکریہ ادا کیا۔

لواری ٹنل ، چوبیس گھنٹے میں دس گھنٹے آمدورفت کے لئے بند ہوگا،اعلامیہ جاری

چترال ( نمائندہ چترال ٹائمز ) نیشنل ہائی وے اتھارٹی ، (این ایچ اے) نے لواری ٹنل سے آمدورفت کے لئے ٹائمنگ شیڈول جاری کردیا ہے، لواری ٹنل کے چیف اپریٹنگ آفیسر کے دفتر سے جاری اعلامیہ کے مطابق صبح ۴بجے سے صبح ۷بجے تک ٹنل سے آمدورفت جاری رہےگا، اس کے بعد دو گھنٹے کا وقفہ ہوگا اور ٹنل ۹ بجے تک بند رہیگا، اسی طرح صبح ۹ سے ۱۲ بجے تک ، سہ پہر ۲ بجے سے پانچ بجے تک اور شام ۷ بجے رات ۱۰ بجے تک ٹنل سے آمدورفت کی اجازت ہوگی ، باقی اوقات میں ٹنل بند رہے گی، تاہم اسی دوران ایمبولینس، سرکاری گاڑیوں ، ایمرجنسی سروس اور این ایچ اے والوں کے لئے پابندی کا اطلاع نہیں ہوگا۔

چترال میں نانبائیوں کی ہڑتال کا سلسلہ چوتھے روز میں داخل، چترال شہر کے ہوٹلوں میں دروش سے روٹی منگواکر گاہکوں کو فراہم کرنے کا سلسلہ جاری

چترال (نمائندہ چترال ٹائمز) چترال میں نانبائیوں کی ہڑتال کا سلسلہ چوتھے روز میں داخل ہوگئی ہے جوصوبائی حکومت کی مقرر کردہ نرخ 200گرام کو 30روپے میں فروخت کرنے کے خلاف شٹرڈاون ہڑتال شروع کردیا ہے۔ نابنائیوں کی اس ہڑتال سے عوام کو تاہم روٹی کی عدم دستیابی سے ذیادہ تکلیف کا سامنا نہیں ہے کیونکہ ریسٹوران کے مالکان نے اس کا حل ڈھونڈتے ہوئے دروش بازار سے روٹی منگواکر اپنے کسٹمرز کو فراہم کرنے کا سلسلہ شروع کردیا ہے جبکہ اس کے ساتھ ساتھ توے پر پکائی ہوئی پتیری روٹی بھی دستیاب ہے۔ چترال کے عوامی حلقوں نے ضلعی انتظامیہ پر زوردیا ہے کہ وہ نانبائیوں کی دباؤ میں ہرگز نہ آئے اور اس مقرر کردہ ریٹ کو برقرار رکھے۔ انہوں نے اس حیرانگی کا اظہار کیا ہے کہ اگر 40کلومیٹر کے فاصلے پر واقع دروش میں 200گرام روٹی 30روپے میں دستیاب ہے تو چترال شہر اور مضافات میں کیوں نہیں۔

دریں اثنا نان بائیوں کی ہڑتال کی وجہ سے مسافر رہائشیوں اور ہوسٹل میں رہنے والے طلباو طالبات کو تکلیف کا سامنا کرنا پڑرہاہے، ان کا کہنا ہے کہ گزشتہ چار دنوں سے چاول پر گزارا کیا جارہاہے،انھوں نے ضلعی انتظامیہ سے بازار میں روٹی کی دستیابی کو یقینی بنانے کا مطالبہ کیا ہے۔

بانی پی ٹی آئی عمران خان کی رہائی کے لئے پی ٹی آئی کارکنوں کا احتجاجی ریلی اور جلسہ

چترال (نمائندہ چترال ٹائمز)بانی پی ٹی آئی عمران خان کی رہائی کے لئے نماز جمعہ کے بعد شاہی قلعہ چترال سے پی ٹی آئی کے کارکنوں کا ایک احتجاجی جلوس برامد ہوا جوکہ پی آئی اے چوک پہنچ کر جلسے کی شکل اختیار کرلی جس سے پارٹی قائدین حیات الرحمن، نذیر احمد، نوید احمد بیگ، سجاد احمد، قاسم خان اور دوسروں نے خطاب کیا۔ انہوں نے ایک سوچے سمجھے منصوبے کے تحت بانی پی ٹی آئی کو پابند سلاسل بنانے پر حکومت کو سخت تنقیدکا نشانہ بنایا اور کہاکہ حقیقی آزادی کا شعور قوم کو مل گئی ہے اور بہت جلد یہ حکمران بھاگ جانے پرمجبور ہوں گے۔

ممبر این ایچ اے، نارتھ زون کا دورہ چترال، شندور چترال روڈ پر کام کی رفتار تیز کرنے کی ہدایت

چترال ( چترال ٹائمزرپورٹ ) این ایچ اے نارتھ زون کے ممبر مرشد امین خٹک کا دورہ چترال۔ ڈپٹی کمشنر لوئر چترال محمد عمران خان نے ضلع میں جاری این ایچ اے کے پراجیکٹس اور ان کی کارکردگی و مسائل سے متعلق تفصیلی بریفنگ دی۔

اس موقع پر انتظامی افسران , لائن ڈیپارٹمنٹس کے افسران , نیس پاک کے ذمہ داران اور محکمہ این ایچ اے افسران بھی اجلاس میں شریک تھے۔

اجلاس میں علاقے میں جاری سڑکوں کی تعمیر, درپیش مسائل , اور ناقص کام کو ہٹا کر معیار کے مطابق کام کے حوالے امور کا تفصیلی جائزہ لیا گیا۔
ممبر نارتھ نے التوا کے شکار پروجیکٹس کی فوری تعمیر , شندور چترال روڈ پہ کام کی رفتار تیز کرنے اور پلوں و رابطہ سڑکوں کی بلیک ٹاپنگ کا عمل ترجیحی بنیادوں پہ کرانے کے احکامات جاری کیے۔ ڈپٹی کمشنر نے این ایچ اے کے ایمرجنسی حالات میں کارکردگی کو سراہا۔

اس موقع پر ضلعی انتظامیہ کی طرف سے حالیہ برفباری اور بارشوں کے دوران بہترین خدمات کے اعتراف میں انتظامی افسران اور متعلقہ اداروں کے افسران میں اعزازی اسناد بھی تقسیم کی گئیں۔

ڈسٹرکٹ پولیو اریڈیکیشن کمیٹی (ڈپیک) کا اجلاس، این آئی ڈی کو کامیاب بنانے کے لئے تمام انتظامات کا تفصیلی جائزہ لیا گیا

چترال (نمائندہ چترال ٹائمز) 29اپریل سے شروع ہونے والی نیشنل امیونائزیشن ڈیز کی تیاریوں کے سلسلے میں ڈسٹرکٹ پولیو اریڈیکیشن کمیٹی (ڈپیک) کا اجلاس ڈی سی لویر چترال محمد عمران خان کے زیر صدارت منعقدہوا جس میں ڈی پی او لویر چترال افتخار شاہ، ڈسٹرکٹ ہیلتھ افیسر ڈاکٹر فیاض رومی، اسسٹنٹ کمشنر چترال ڈاکٹر عاطف جالب، کوارڈینیٹر ای پی آئی ڈاکٹر فرمان نظار اور دوسروں نے شرکت کی۔ اس موقع پراین آئی ڈی کو کامیاب بنانے کے لئے تمام انتظامات کا تفصیلی جائزہ لیا گیا۔ ڈی سی چترال نے کہاکہ پولیو جیسی مہلک بیماری کو وطن عزیز کے خوبصورت چہرے سے ختم کرنا ہماری سب سے بڑی ذمہ داری ہے جس کے لئے ہم کسی بھی قربانی سے دریغ نہیں کریں گے۔ انہوں نے کہاکہ اس مہم کے دوران کسی طرح بھی تساہل یا غفلت کو برداشت نہیں کیا جائے گا۔

سی ڈی ایم وفد کا ڈپٹی کمشنر اپر چترال سے ملاقات، چترال شندور روڈ کی موجودہ ناگفتہ بہ صورت حال بارے تفصیلی گفتگو

چترال (نمائندہ چترال ٹائمز ) چترال ڈویلپمنٹ مومنٹ ( سی ڈی ایم ) کی ایک وفد سینئرنائب صدر لیاقت علی کی قیادت میں ڈپٹی کمشنر اپرچترال محمد عرفان الدین سے ان کے دفتر میں ملاقات کی ۔ وفد میں عنایت اللہ اسیر اور برہان شاہ ایڈوکیٹ ودیگر شامل تھے۔ ملاقات میں اپرچترال کی سڑکوں خصوصا زیر تعمیر چترال شندور روڈ  اور حالیہ بارشوں کے بعد اس سڑک کی ناگفتہ بہہ صورت حال کے حوالے تفصیلی میٹنگ ہوئی، اس موقع پر ایڈیشنل ڈپٹی کمشنر جنرل اپر چترال فدا الکریم اور اسسٹنٹ کمشنر مستوج شاہ عدنان بھی موجود تھے۔ وفد نے این ایچ اے ٹھیکہ دار کی طرف سے سڑک کی تعمیر میں غیرپروفیشنل طریقے سے بلاسٹنگ کے نتیجے میں روزانہ کی بنیاد پر پہاڑی ملبے کا گرنا ، لینڈ سلائڈنگ اور دیواروں کی غیرمعیاری تعمیر کے سبب ایک ہی بارش میں زمین بوس ہونے اور قومی خزانے کو نقصان پہنچنے کے ساتھ اس روڈ پر سفر کرنے والے مسافروں اور خصوصا سیاحوں کو درپیش مسائل سے ڈپٹی کمشنر کو اگاہ کیا۔ وفد نے ڈپٹی کمشنر سے استدعا کی کہ ممبر این ایچ اے چترال کے دور ے پر ہے لہذا اس کے ساتھ میٹنگ کرکے چترال کے سڑکوں کے حوالے سے مسائل کو اُٹھایا جائے،جس پر ڈپٹی کمشنرنے اس حوالے سے کل ایک اعلیِ سطح اجلاس ڈپٹی کمشنر لوئیرچترال کےدفتر میں بلانے کی یقین دہانی کرائی۔ ملاقات میں اپر چترال کے دیگر مسائل پر بھی تفصیلی گفتگو ہوئی، وفد کے اراکین نے ڈپٹی کمشنر کی طرف سے چترال کے مسائل کے حل میں دلچسپی لینے اور سنجیدہ کوشش کرنے پر ان کا شکریہ اداکیا۔

لویر چترال میں حفاظتی ٹیکے کا عالمی ہفتے کے حوالے سے آگہی واک

چترال ( نمائندہ چترال ٹائمز)لویر چترال میں حفاظتی ٹیکے کا عالمی ہفتے کا آغاز آگہی واک سے کردیا گیا جوکہ مختلف راستوں سے ہوتا ہوا ویمن اینڈ چلڈرن ہسپتال میں احتتام پذیر ہوا۔ اسسٹنٹ کمشنر چترال ڈاکٹر عاطف جالب، ڈسٹرکٹ ہیلتھ افیسر ڈاکٹر فیاض رومی، چلڈرن اسپیشلسٹ ڈاکٹر گلزار احمد، کوارڈنیٹر ای پی آئی ڈاکٹر فرمان نظار کے علاوہ ڈاکٹر آصف، ڈاکٹر شبیر، ڈاکٹر اسد، ڈاکٹر امجد کے علاوہ سول سوسائٹی کے نمائندے اور ہیلتھ ڈیپارٹمنٹ کے اہلکار کثیر تعداد میں شریک ہوئے۔ اس سے قبل ایک آگہی سیمینار میں مقررین ڈاکٹر گلزار، ڈاکٹر فیاض، ڈاکٹر آصف اور ڈاکٹر فرمان نے اس سال کے ہفتہ ویکسنیشن کے موضوع’حفاظتی ٹیکے سب کے لئے انسانی طور پرممکن ہے” پر اپنے خیالات کا اظہار کرتے ہوئے کہاکہ چترال جیسے علاقے سے ٹیکہ جات کی وجہ سے ہی کئی مہلک بیماریوں کا قلع قمع ہوگیا ہے اور چترال کو گزشتہ کئی دہائیوں سے پولیو فری ہونے کی وجہ صرف اور صرف یہی ٹیکہ جات ہیں۔ انہوں نے کہاکہ وقت گزرنے کے ساتھ ساتھ اب ان مہلک بیماریوں کی تعداد 12ہوگئی ہے جن کے خلاف مفت حفاظتی ٹیکے کا انتظام گھر گھر کردیا جارہاہے۔

انہوں نے کہا 30اپریل تک جاری رہنے والی اس مہم کا مقصد اس بات کو یقینی بنانا ہے کہ دو سال سے کم عمر کا کوئی بچہ بغیر ٹیکہ کے نہ رہ جائے۔ا نہوں نے کہاکہ محکمہ صحت کی طر ف سے والدین کو یہ سہولت دی گئی ہے کہ جن کے گھر نزدیک ہسپتال سے 30منٹ کی پیدل مسافت پر ہو، وہ بچوں کو ہسپتال لاکر حفاظتی ٹیکے لگوایا کریں اوراس سے دور رہنے والوں کے لئے مہینے میں ایک بار ویکسنیشن ٹیم ہر ایک محلے کا وزٹ کرتی ہے اور والدین پر یہ ذمہ داری عائد ہوتی ہے کہ وہ اس ٹیم سے فائدہ اٹھائے۔ انہوں نے کہاکہ بچے کی پیدائش کے وقت چترال اور دروش کے ہسپتالوں میں ٹی بی اور پولیو کے خلاف خصوصی ٹیکہ جات لگانے کا انتظام موجود ہے جس کے لئے چوبیس گھنٹے اسٹاف ڈیوٹی پر مامور ہے۔ ڈاکٹروں نے بچوں کے والدین اور سرپرستوں پر زور دیاکہ وہ اپنے بچوں کو حفاظتی ٹیکہ جات لگوانے کا خصوصی اہتمام کریں اور یہ کارڈ بھی اپنے ساتھ محفوظ رکھیں۔

اکاہ چترال کی جانب سے ونٹرائزاڈشیلٹر ٹینٹ ضلعی انتظامیہ اپر چترال کے حوالے کئے گئے

اپرچترال (چترال ٹائمزرپورٹ ) اپر چترال کے ہیڈکوارٹر بونی میں منعقدہ ایک تقریب کے دوران آغا خان ایجنسی فار ہیبیٹاٹ کے اسٹاف نے آر پی ایم والی محمد خان کی ہدایت پر حالیہ بارشوں اور برف باری سے متاثر ہونے والے خاندانوں کی مدد کے لئے ونٹرائزاڈشیلٹر ٹینٹ ضلعی انتظامیہ اپر چترال کے حوالے کیا۔ ضلعی انتظامیہ کی نمائندگی کرتے ہوئے شاہ عدنان اسسٹنٹ کمشنر مستوج نے امدادی سامان وصول کیا۔تقریب میں زندگی کے مختلف شعبوں سے تعلق رکھنے والے افراد نے شرکت کی۔ تقریب کو بریفنگ دیتے ہوئے منیجر ایمرجنسی منیجمنٹ آغا خان ایجنسی فار ہیبیٹاٹ پاکستان جاوید احمد نے کہا کہ AKAHP ہنگامی حالات سے نمٹنے کے لئے چترال کے دونوں اضلاع میں ونٹرائزاڈشیلٹر ٹینٹ کے ساتھ ساتھ بنیادی ضروریات کے اسٹور قائم کرچکا ہے اس سلسلے میں اپر چترال کے مختلف مقامات پر 100 سے زا ئد اسٹاک پائلز اب تک قائم کئے جاچکے ہیں۔ جس میں سینکڑوں کی تعداد میں فوری اور بنیادی ضرورت کی چیزیں اسٹور کئے گئے ہیں۔ AKAHP اپنی روایات برقرار رکھتے ہوئے ہمیشہ کی طرح ضلعی انتظامیہ اپر چترال کے شانہ بشانہ متاثرین کی مدد کررہا ہے اسی سلسلے میں آج یہ ونٹرائزاڈشیلٹر ٹینٹ انتظامیہ کے حوالے کررہے ہیں۔

تقریب سے خطاب کرتے ہوئے تحصیل ناظم مستوج سردار حکیم نے کہا کہ اے کے ڈی این نے چترال کی ترقی میں گراں قدر خدمات انجام دیئے ہیں ہم انتظامیہ سے گزارش کرتے ہیں کہ وہ AKAHP کے عوامی پروجیکٹس کی تکمیل میں ان کے لئے آسانیاں پیدا کرے تاکہ AKAHP ہمیشہ کی طرح اپنے نوبل کام کو انجام دینے میں کامیاب ہوسکے۔ ممتاز اسکالر حمیدالدین نے آغا خان ریجنل کونسل کی نمائندگی کرتے ہوئے کہا کہ نعمتیں انسان کو مختلف شکل میں ملتی ہیں میں AKAHP اور AKDN کو بھی ایک نعمت کے طور پر دیکھتا ہوں۔ہمیں اس نعمت کی قدر کرنی چاہئے۔

ضلعی انتظامیہ کی نمائندگی کرتے ہوئے اے سی شاہ عدنان نے اختتامی کلمات میں AKAHP کے ہر ایمرجنسی میں بہترین کردار ادا کرنے کی روایت کو سراہا اور امید کا اظہار کیا کہ یہ سلسلہ آئندہ بھی جاری رہے گا۔

تقریب کے شرکاء میں ،حمید الدین، چیئرمین AKRCAB ریجنل کونسل اپر چترال، یوسف حیات،پریذیڈنٹ لوکل کونسل بونی، محی الدین، پریذیڈنٹ لوکل کونسل مستوج ، شیر افگن، پی اے ٹو ڈپٹی اسپیکر اور AKAHP کے اسٹاف شامل تھے۔

تحصیل کونسل چترال کا حالیہ بارشوں کے نتیجے میں ہونے والے نقصانات کی اسیسمنٹ کی تاریخ میں کم ازکم دس دن کی توسیع کا مطالبہ، موجودہ طریقہ کار پر بھی عدم اطمینان کا اظہا ر

چترال (نمائندہ چترال ٹائمز) تحصیل کونسل چترال کے اجلاس میں ضلعی انتظامیہ کی طرف سے حالیہ بارشوں کے نتیجے میں ہونے والے نقصانات کی اسیسمنٹ کی تاریخ میں کم ازکم دس دن کی توسیع کا مطالبہ کرتے ہوئے موجودہ طریقہ کار پر بھی عدم اطمینان کا اظہا رکیا گیا اور مطالبہ منظور نہ ہونے کی صورت میں ڈی سی ہاؤس کی گھیراؤ کرکے دھرنے دینے کی دھمکی دے دی۔ کونسل کے رکن فخر اعظم کے زیر صدارت اجلاس میں منعقد اجلاس میں اراکین کونسل نے اسیسمنٹ ٹیم میں ویلج کونسل کے چیرمین صاحبان کو ان بورڈ نہ لینے اور انہیں یکسر انداز کرنے پر سخت برہمی کا اظہار کیا اور کہاکہ گراس روٹ لیول پر عوام کی نمائندگی کرنے والے چیرمین تحصیل کونسل اور ویلج چیرمینوں کو بے وقعت بنانا کسی بھی طور پر قابل قبول نہیں ہے اور تحصیل کونسل کے متفقہ قرارداد کے باوجود ڈی سی لویر چترال کا اسیسمنٹ کی تاریخ میں توسیع کا نوٹیفیکیشن نہ کرنا قابل مذمت ہے۔ لوٹ کوہ سے تعلق رکھنے والے اراکین نواب خان اور شرف دین جبکہ ایون کے محمد رحمن نے ضلعی انتظامیہ کے روئیے کے خلاف ایوان سے واک آؤٹ کیا اور ایوان کی کاروائی ڈیڑھ گھنٹے تک معطل رہی۔ اجلاس دوبارہ شروع ہونے کے بعد اراکین کونسل نے اس بات پر زور دیاکہ بلدیاتی نمائندوں کو ان کا حق دیا جائے اور ڈی سی چترال کو چاہئے کہ وہ صرف ایم پی اے کی احکامات پر ہی عمل کرنے کا وطیرہ ترک کردے۔ اجلاس میں تحصیل چیرمین شہزادہ امان الرحمن بھی موجود تھے۔

 200گرام روٹی کو 30روپے میں سپلائی کرنا ہمارے بس میں نہیں ہے۔ روٹی کا پرانا نرخ بحال کیاجائے۔ تندومالکان کا پریس کانفرنس

چترال (نمائندہ چترال ٹائمز )چترال شہر اور مضافات کے سینکڑوں تندورمالکان نے حکومت سے پرزور مطالبہ کیا ہے کہ چترال کی علاقائی مشکلات اورحالات کو پیش نظر رکھ کر روٹی کا پرانا نرخ بحال کردے تاکہ وہ اپنا کام دوبارہ شروع کرسکیں جبکہ 200گرام روٹی کو 30روپے میں سپلائی کرنا عملی طور پر ان کے بس میں نہیں ہے جس میں انہیں روزانہ کے حساب سے ہزاروں روپے کا نقصان ہورہا ہے۔ بدھ کے روز چترال پریس کلب میں ایک پریس کانفرنس سے نانبائی یونین کے صدر بشیر احمد، نائب صدر محمد ابراہیم، جنرل سیکرٹری محمد وسیع اور ممبران عبدالبصیر، عبدالستار، سعادت خان نے کہاکہ چترال کو پشاور اور دیگر شہروں کی طرح نہ سمجھاجائے کیونکہ یہاں تک کرایہ صوبے کے دیگر اضلاع کے مقابلے میں کئی گنا ذیادہ ہے اور تندور میں استعمال ہونے والی شاہ بلوط کی لکڑی کی قیمت ایک ہزار روپے فی من کو چھورہی ہے اور ان حالات میں 180گرام روٹی 40روپے میں ممکن ہے لیکن انتظامیہ نے ان کی مشکلات کو سمجھے بغیر جو ریٹ ان پر مسلط کیا ہے، وہ ناقابل برداشت ہے۔ انہوں نے زور دے کرکہاکہ وہ اپنے تندوروں کو گزشتہ کئی دنوں سے بند انتظامیہ سے ٹکر لینے کے لئے نہیں بلکہ اس بنا پر کیا ہے کہ وہ روزانہ ہزاروں روپے کا خسارہ برداشت کرنے کی طاقت نہیں رکھتے۔ انہوں نے پبلک اور مسافر حضرات سے بھی معذرت کا اظہار کیاکہ روٹی کی عدم دستیابی پر ان کو مشکل پیش آرہی ہے۔ انہوں نے کہاکہ ضلعی انتظامیہ نے ان کے کئی ساتھیوں کو جیل بھیج دیا ہے جوپانچ ہزار روپے فیس دینے کے بھی قابل نہیں تھے۔ انہوں نے اپنے مسائل بیان کرتے ہوئے کہاکہ وہ ہزاروں روپے کرایہ دینے کے ساتھ ساتھ کئی کئی کاریگروں کو تنخواہ بھی دے رہے ہیں جبکہ موسم سرما کے چار مہینوں کے دوران وہ پہلے سے خسارے میں چلتے ہیں اور اب نئی نرخنامہ سے ان کی برداشت جواب دے گئی ہے۔

تھانہ لٹکوہ کے حدود میں فریقین کے درمیان 30 سال پرانا تنازعہ خوش اسلوبی سے حل

چترال ( چترال ٹائمزرپورٹ ) ڈی۔پی۔او لوئر چترال افتخار شاہ کی خصوصی ہدایات پر عوام کے درمیان معمولی تنازعات کو معتبرات علاقہ کی موجودگی میں باہمی صلح اور اتفاق رائے سے حل کیا جارہا ہے۔
ایس۔ڈی۔پی۔او سرکل لٹکوہ تمیزالدین اور انچارچ ڈی۔ار۔سی لٹکوہ HC جاوید اکبر کی کاوشوں سے علاقہ منور گرم چشمہ سے تعلق رکھنے والے دو فریقین کے درمیان 30 سال پرانا جائداد کا تنازعہ معتبرات علاقہ کی موجودگی میں باہمی مشاورت سے حل کیا گیا۔شعبہ اطلاعات و تعلقات عامہ ڈسٹرکٹ لوئر چترال پولیس کی طرف سے جاری پریس ریلیز کے مطابق ڈسپیوٹ ریزولیشین کونسل ممبران اور معتبرات علاقہ کی موجودگی میں دونوں فریقین کے افراد تنازعے کو ہمیشہ کے لئے ختم کرکے ایک دوسرے کے ساتھ بغل گیر ہوگئے۔

چترال لوئیر میں ٹریفک پولیس متحرک ، 200سے زیادہ گاڑیوں کے کالے شیشے یا اسٹیکرز اُتاردیئے گئے، عوام کی طرف سے پذیرائی

لوئر چترال (چترال ٹائمزرپورٹ ) ڈی۔پی۔او لوئر چترال افتخار شاہ کے خصوصی احکامات پر ٹریفک قوانین کی خلاف ورزی کرنے والوں کے خلاف کاروائیاں جاری ہے۔انچارچ ٹریفک وارڈن پولیس لوئیرچترال فضل کریم کی سربراہی میں ٹریفک وارڈن نے سٹی چترال، کوغذی, دروش ودیگر مقامات پر ناکہ بندی کرکے غیر قانونی طور پر لگائے گئے کالے شیشوں کو گاڑیوں سے ہٹاکر ٹریفک قوانین کی خلاف ورزی کرنے پر موقع پر چالان کیاگیا، زرائع کے مطابق گزشتہ چند دنوں کے اندر بلا تفریق200سے زیادہ گاڑیوں کے کالے شیشے یا کالے اسٹیکر اُتاردیئے گئے، اورساتھ غیرنمونہ نمبرپلیٹ اور پریشر ہارن بھی گاڑیوں سے ہٹادیئے گئے، ٹریفک پولیس نے کم سن موٹرسائیکلسٹ اور بیغیر ہیلمنٹ بائک چلانے والوں کے خلاف بھی متحرک ہے یہی وجہ ہے کہ چترال میں موٹرسائکل حادثات میں نمایاں کمی آئی ہے ،
یہاں یہ بات بھی قابل ذکر ہے کہ چترال ٹریفک پولیس ٹریفک قوانین کی پاسداری اوراپنی ڈیوٹی سرانجام دینے کے ساتھ گزشتہ بارش اور برفباری میں مسافروں خاص کر مختلف مقامات پر پھنسی ہوئی سیاحوں کے گاڑیوں کو آرپار کرنے میں بھی پیش پیش رہے، جس کو سراہا گیا،

چترال سے امسال 76مردوخواتین حج بیت اللہ کی سعادت حاصل کرینگے، حجاج کرام کے لئے تربیتی پروگرام کاانعقاد

چترال (نمائندہ چترال ٹائمز) چترال لوئیر اور اپر کے حجاج کرام جو اس سال حج بیت اللہ کی سعادت حاصل کرنے جارہے ہیں کی تربیت کے لئے وزارت مذہبی امور اسلام آباد کی طرف سے گورنمنٹ سینٹنل سکول چترال میں ایک تربیتی پروگرام منعقد ہوا۔ جس میں اپر اور لوئیر چترال سے کل 76مردو خواتین حجاج کرام نے شرکت کی۔ پروگرام میں وزارت مذہبی امور کی طرف سے پاک رسول، محمد صدیق، منظور احمد ودیگر نے شرکت کی۔ ماسٹر ٹرینرحج شاہی خطیب چترال مولانا خلیق الزمان نے حجاج کرام کو خوش آمدید کہا اور کامیاب حجاج کرام کو مبارکباددی۔ اورحج کے جملہ مسائل کے حوالے سے حجاج کرام اگاہ کیا۔
شاہی خطیب نے کہاکہ جتنے بھی حجاج یہاں سے جارہے ہیں وہ صرف حاجی ہی نہیں بلکہ سب پاکستان کے سفیر بھی ہیں، لہذا انتہائی نظم وضبط کے ساتھ اپنے مناسک حج کو مکمل کریں، جس سے نہ صرف اپکی حج قبول ہوگی بلکہ پاکستان کا نام بھی روشن ہوگا۔ حج کے موقع پر سعودی عملہ سے تعاون کریں اور وزارت مذہبی امورپاکستان کے ہدایت پر بھی مکمل عمل کریں، اس موقع پر پروجیکٹر کے زریعے سے حجاج کرام کو باقاعدہ تربیت دی گئی۔ یہ پروگرام دوسرا اوراخری تربیتی پروگرام تھا۔

پاکستان پوسٹ کا ایک اور کمال، نصف صدی سے قائم چترال کے تین ڈاک خانے بند کردیئے گئے

چترال (نمائندہ چترال ٹائمز) پاکستان پوسٹ نے عوامی خدمت میں کمال کا مظاہر ہ کرتے ہوئے چترال بھر میں تین ایسے ڈاک خانے بند کردیا جوکہ گزشتہ نصف صدی سے قائم تھے جن میں اپر چترال میں دراسن جبکہ لویر چترال میں کوغوزی اور عشریت کے ڈاک خانے شامل ہیں جبکہ اس سے چترال کے مختلف ڈاک خانوں میں کلاس فور کی درجنوں اسامیوں پر غیر مقامی افراد کو بھرتی کرنے کے بعد انہیں ان کے مقامی اضلاع میں تعینات کردئے گئے ہیں جس سے چترال میں پوسٹل نظام پہلے ہی ابتر حالت میں تھی۔ چترال میں تین ڈاک خانہ جات کے خاتمے پر عوام میں بے چینی پید ا ہوگئی ہے کیونکہ یہی ادارہ چترال جیسی دورافتادہ اور پسماندہ علاقے کے چپے چپے میں ترسیل ڈاک کی سہولت فراہم کرتی تھی۔ چترال میں ڈاک خانہ جات کی بندش اور گزشتہ سال پی ڈی ایم حکومت کے دور میں کلاس فور ملازمین اور دوسرے کم اسکیل کے ملازمین کی بھرتی میں چترال میں خالی اسامیوں پر چترال سے تعلق رکھنے والے امیدواروں کو یکسر نظرانداز کرکے دوسرے اضلاع سے امیدواروں کو بھرتی کرنے کے بعد یہاں پر ڈیوٹی سرانجام دینے کے لئے نہ بھیجنے پر چترال کے عوام شدید احتجاج کررہے ہیں۔

انہوں نے وزیر اعظم شہازشریف سے پرزور مطالبہ کیا ہے کہ چترال کے عوام کے ساتھ دشمنی کا مظاہرہ کرنے والے پاکستان پوسٹ کے پوسٹ ماسٹرجنرل سمیت دوسرے افسران کے خلاف فی الفور کاروائی کی جائے اور چترال کے ڈاک خانہ کے تین قدیمی شاخوں کو بند کرنے کے ظالمانہ فیصلے کو فوری طور پر منسوخ کرنے کے ساتھ ساتھ چترال کے مختلف ڈاک خانہ جات میں خالی اسامیوں کو پر کیا جائے تاکہ یہاں محکمہ ڈاک کا نظام درست ہوسکے۔ اپر چترال کے گاؤں وریجون میں منعقدہ ایک احتجاجی جلسے سے خطاب کرتے ہوئے وی سی چیرمین عبدالرفیع، پی پیپی کے جنرل سیکرٹری حمید جلا ل اور دوسروں نے کہاکہ دراصل پاکستان پوسٹ کے اعلیٰ افسران اپنی غلطیوں پر پردہ ڈالنے کے لئے دراسن سمیت دوسرے علاقوں میں گزشتہ پانچ دہائیوں سے قائم ڈاک خانے بند کررہے ہیں تاکہ چترال کے نام پر بھرتی کردہ ملازمین کو وہاں پر پوسٹنگ کا جواز مل سکے۔ انہوں نے کہاکہ دراسن پوسٹ آفس پر تریچ سے لے کر کوشٹ تک 55ہزار آبادی اور آٹھ یونین کونسلوں کا دارومدار تھا اور وہ اس سہولت کو ایک افسر کی بیک جنبش قلم ختم کرنے کے فیصلے کو کبھی بھی قبو ل نہیں کریں گے۔

محکمہ ایلمنٹری اینڈ سیکنڈری ایجوکیشن کے زیراہتمام چترال لوئیر میں داخلہ مہم کے سلسلے میں اگہی واک اور تقریب

چترال ( نمائندہ چترال ٹائمز ) چترال میں محکمہ ایلمنٹری اینڈ سیکنڈری ایجوکیشن اور ہیلویٹاس کے زیر انتظام انرولمنٹ واک کا اہتمام کیا گیا جس کی قیادت اسسٹنٹ کمشنر چترال ڈاکٹر عاطف جالب، ڈسٹرکٹ ایجوکیشن افیسر لویر چترال محمود غزنوی، ڈپٹی ڈی ای او شاہد حسین، ایس ڈی ای او شہزاد ندیم اور ہیلویٹاس نامی این جی او کے فیلڈ افیسر اظہر اقبال نے کی جوکہ مختلف بازار وں سے گزر کر گورنمنٹ پرائمری سکول میں احتتام پذیر ہوا۔

بعدازاں منعقدہ ایک تقریب سے خطاب کرتے ہوئے ڈاکٹر عاطف جالب نے کہاکہ سرکاری تعلیمی ادارے کوالٹی ایجوکیشن میں اب کسی طرح بھی پیچھے نہیں ہیں جہاں اساتذہ کرام کی قابلیت، پیشے سے لگن اور محنت کا جذبہ داد دینے کے قابل ہے۔ انہوں نے کہاکہ نوجوان نسل کی تعلیم وتربیت پر حکومت کی طرف سے زبردست انوسٹمنٹ ہورہی ہے جس کا بھر پور فائدہ اٹھاتے ہوئے اپنے بچوں اور بچیوں کو پبلک سیکٹر کے سکولوں میں داخل کرنے کی ضرورت ہے۔

اس سے قبل ڈی ای او محمود غزنوی نے کہاکہ یکم مارچ سے شروع ہونے والی داخلہ مہم نہایت کامیابی سے جاری ہے جوکہ 30اپریل تک جاری رہے گا جبکہ ضلع لویر چترال کے لئے مقرر کردہ ٹارگٹ کا بڑا حصہ اچیو کرلیا گیا ہے۔ انہوں نے کہاکہ ضلع لویر چترال میں مقررہ ہدف 5416میں سے 2700بچے داخل ہوچکے ہیں جن میں سے 1300طلباء پرائیویٹ سکولوں سے آئے ہیں۔ انہوں نے کہاکہ یہ ٹارگٹ اس سال نامساعد موسمی حالات اور سکولوں کی بندش کے باوجود حاصل کی گئی ہے جوکہ اس بات کا مظہر ہے کہ عوام کا پبلک سیکٹر سکولوں پر اعتماد بحال ہورہا ہے جواپنے بچوں کو پرائیویٹ سکولوں سے سرکاری سکولوں میں لارہے ہیں۔

ڈپٹی ڈی ای او شاہدحسین نے کہاکہ گزشتہ سال لویر چترال کا ضلع کارکردگی کے لحاظ سے صوبہ بھر میں ٹاپ تھری پوزیشن پر رہا اور گزشتہ سال انرولمنٹ بھی مقررہ ہدف سے ذیادہ رہا جوکہ خوش آئندبات ہے۔

ہیلویٹاس کے فیلڈ افیسر اظہر اقبال نے 1980ء میں قائم اس تنظیم نے ملک میں افغان مہاجرین کے بچوں اور بچیوں کو نان فارمل اور فارمل تعلیم دلانے کی کوششوں میں مصروف ہے اور اس سال انرولمنٹ مہم میں مدد فراہم کرنے میں مصروف ہے۔ اس موقع پر متعدد بچوں اور بچیوں کی سکول میں داخلے کے حوالے سے رجسٹریشن بھی کی گئی۔

حالیہ بارشوں کے نتیجے میں رمبور کالاش ویلی میں بھی متعدد گھرمنہدم، متاثرین کی مدد کی جائے۔ زرمس گل کالاش

چترال (نمائندہ چترال ٹائمز ) چترال کے کالاش ویلی رمبور میں حالیہ بارشوں کے دوران کئی گھر منہدم اور کئی کو جزوی طور پر نقصان پہنچا ہے ۔ جبکہ برساتی نالوں میں آنے والے سیلاب سے کئی مکانات ،باغات اور کھڑی فصلوں کو نقصان پہنچا ہے ۔ کالاش ویلی رمبور کی معروف سوشل ایکٹی وسٹ اور کونسلر زرمس گل نے میڈ یا سے بات کرتے ہوئے بتایا ۔ کہ رمبور شیخاندہ میں تین گھر منہدم ہوئےہیں۔ اس طرح سنٹر رمبور میں جبار خان ،غازی خان ، سردار خان ، منیجر ،اقبال ،صوتی خان ، اوچوک گول میں کالاش خاتون سیچین گل ،زرمس گل ، غلام خان تعلیم خان کے مکانات و زمینات اور فصلوں کو نقصان پہنچا ہے ۔ جبکہ کالاشگرام گاوں میں برزنگی خان کالاش ، بہرام خان ،تلامان خان ،عبداللہ اور ڈازو خان کے مکانات ،مویشی خانوں ، زمینات اور فصلوں کو شدید نقصان پہنچا ہے ۔ نہری نظام مکمل طور پرمتاثر ہوچکا ہے ۔ اور بعض گھر انتہائی طور پر غیر محفوظ ہو چکے ہیں ۔

انہوں نے حالیہ ایمرجنسی حالات میں موبائل نیٹ ورک کی ناقص کارکردگی پر انتہائی افسوس کا اظہار کرتے ہوئے کہا ۔ کہ کالاش ویلی رمبور میں رابطے کا واحد ذریعہ ٹیلی نار موبائل نیٹ ورک ہے ۔ لیکن حالیہ ایمرجنسی حالات میں یہ سروس بری طرح ناکام ہوچکی ہے ۔ اور لوگوں کو معلومات کے حصول میں شدید مشکلات کا سامنا کرنا پڑا ۔ زرمس گل نے ٹیلی نار کمپنی سے پر زور مطالبہ کیا ۔ کہ ٹاور میں تیل کی فراہمی کو یقینی بنایا جائے ۔ اور موبائل سروس پر لوگوں کا اعتماد بحال کیا جائے ۔ زرمس گل نے ڈپٹی کمشنر چترال اور متعلقہ اداروں سےپر زور مطالبہ کیا ۔ کہ رمبور کےمتاثرین کو ریلیف اورمالی امداد فراہم کیا جائے۔ تاکہ وہ اپنے مکانات ، زمینات کے بحالی کوممکن بناسکیں ، اور برساتی نالوں میں سیلاب روکنے کیلئے چیک ڈیم و زمینات کو کٹاو سے بچانے کیلئے حفاظتی بند تعمیر کئے جائیں ۔ انہوں نے صوبائی حکومت اور وفاقی حکومت سے بھی رمبور متاثرین کی مدد کرنے کی اپیل کی ۔

خیبرپختونخوا حکومت کی ڈونرز کانفرنس میں عالمی مالیاتی اداروں کی جانب 1.8ارب ڈالر کے وعدے ضم شدہ اضلاع دیر اور چترال کے ترقی کیلئے کیے گئے ہیں. مشیر خزانہ خیبرپختونخوا مزمل اسلم

پشاور (چترال ٹائمزرپورٹ) خیبر پختونخوا کے مشیر خزانہ مزمل اسلم نے کہا ہے کہ خیبر پختونخواحکومت کی جانب سے منعقدہ عالمی مالیاتی اداروں کی ڈونر کانفرنس بہت بڑی کامیابی ہے جس میں 1.8 ارب ڈالر کے وعدے ضم شدہ اضلاع دیر اور چترال کے ترقی کیلئے کیے گئے ہیں یہ صرف خیبرپختونخوا کی ترقی نہیں بلکہ پورے پاکستان کی ترقی اور کامیابی ہے اس ڈونرز کانفرنس میں ایشین ڈیویلپمنٹ بینک نے ایک ارب ڈالر، ورلڈ بینک نے 50 کروڑ ڈالر اور یورپی یونین نے 100 ملین ڈالر کی سرمایہ کاری کرنے کے وعدے کیے ہیں ان خیالات کا اظہار مشیر خزانہ خیبرپختونخوا مزمل اسلم نے پاکستان تحریک انصاف کے مرکزی ترجمان رؤف حسن اور رضوان کے ہمراہ اسلام اباد میں میڈیا بریفنگ کرتے ہوئے کیا۔ مشیر خزانہ مزمل اسلم نے اس ڈونرز کانفرنس کو مثبت کوریج پر پاکستان اور صوبے کی پرنٹ اور الیکٹرانک میڈیا کی کرکردگی کو بھی سراہا۔ مشیر خزانہ مزمل اسلم نے کہا کہ اس وقت ہر پاکستانی ملک کی معاشی مستقبل کے لیے پریشان ہے اور ان حالات میں 1.8 ارب ڈالر کی سرمایہ کاری کے وعدے اور عزائم عالمی مالیاتی اداروں کی جانب سے خیبرپختونخوا حکومت پر اعتماد اور بڑی کامیابی ہے۔

مزمل اسلم نے کہا کہ ڈونرز کانفرنس کی تعریف صرف اس لیے نہیں کی گئی کہ یہ خیبر پختونخوا اور پاکستان تحریک انصاف کی کامیابی تصور کی جائیگی حالانکہ یہ پورے ملک کے لیے انتہائی ضروری اور بہت بڑی کامیابی ہے۔ مشیر خزانہ نے کہا کہ یہ بتانا بہت ضروری ہے کہ یہ سستی مالی امداد اور قرضے ہیں یہ ان قرضوں جیسے نہیں ہیں کہ جو وفاقی حکومت اٹھ اور 10 فیصد سود پر لے رہے ہیں مشیر خزانہ نے میڈیا بریفنگ کرتے ہوئے کہا کہ صرف وفاق میں ایسا نہیں ہو رہا صوبے میں بھی ایئر ایمبولنس، 16 روپے روٹی سمیت متعدد ویڈیوز شوشے چھوڑے جا رہے ہیں جبکہ دوسری طرف خیبرپختونخوا حکومت نے سنجیدگی کا مظاہرہ کرتے ہوئے اتنی بڑی اور گیم چینجر ڈونر کانفرنس منعقد کیا۔ مشیر خزانہ نے دوسرے اہم ایشوز پر بات کرتے ہوئے کہا کہ وفاق خیبرپختونخوا کے فنڈز بروقت نہیں دے رہے جو این ایف سی کے علاؤہ ہیں تاکہ خیبرپختونخوا میں مالی بحران رہے اور ترقیاتی منصوبوں پر کام مکمل نہ ہوسکے۔ مشیر خزانہ نے کہا کہ اس سلسلے میں خیبرپختونخوا نے وفاق کو بارہ مختلف قسم کے خطوط ارسال کئے ہیں جن میں سے بڑے ایشو والا خط یہ ہے کہ جب فاٹا کا انظمام ہو رہا تھا تو وفاق 62 ارب روپے دے دیتا تھا اس سال 66 ارب روپے دیے ہیں جبکہ خیبر پختونخوا حکومت ضم شدہ اضلاع کے تنخواہوں کے اخراجات 96 ارب روپے ہیں۔

مشیر خزانہ نے کہا کہ وفاق جان بوجھ کر پیسے نہیں دے رہا اور این ایف سی کے اٹھ ارب کے لیے بھی خط لکھا ہے۔ مشیر خزانہ خیبرپختونخوا نے پریس کانفرنس کرتے ہوئے کہا کہ تیسرا خط ایف بی ار اور کیپرا کے درمیان ٹیکس بارے لکھا گیا ہے مشیر خزانہ نے کہا کہ وفاق خیبر پختونخوا کو صوبے کے اپنے ہائیڈل پاور منصوبوں کے پیسے بھی نہیں دے رہا جو ہم تین یا چار روپے میں دے رہے ہیں اور وفاق بجلی 30 روپے میں بیچ رہا ہے مشیر خزانہ نے کہا کہ ویلنگ طریقہ کار کے تحت وفاق پیہور جیسے منصوبوں کے لیے 27 روپے یونٹ چارجز کا کہہ رہے ہیں جو کہ صوبے کے ساتھ ناانصافی ہے اس کے لیے ہم اپنی ڈسٹریبیوشن کمپنی عالمی اداروں کے ساتھ مل کر بنائیں گے اگر یہ رویہ وفاق رکھتا ہے۔ مشیر خزانہ نے کہا کہ خیبر پختونخواہ پاکستان کا 42 فیصد آئل پیدا کرتا ہے جس کی لیوی وفاق نہیں دے رہا، مزمل اسلم نے کہا کہ وفاق نے ائل پر فیڈرل ایکسائز ڈیوٹی صفر کر دیا ہے تاکہ صوبوں کو پیسے نہ مل سکیں مشیر خزانہ نے کہا کہ وفاق خیبرپختونخواہ کے پن بجلی منافع کے پیسے بھی نہیں دے رہا تاکہ صوبے میں کسی قسم کا ترقیاتی کام نہ ہوسکیں۔

مزمل اسلم نے کہا کہ پاکستان کے تمام پاور کمپنیوں کو ٹیکس فری کیا گیا ہے لیکن خیبر پختونخواہ کے ہائیڈل منصوبوں پر ٹیکس لگایا گیا ہے جن پر وفاق کو خط لکھا گیا ہے۔ مشیر خزانہ نے کہا کہ صوبے میں صحت کارڈ کے مد میں 10 ارب روپے جاری کیے گئے ہیں جبکہ 10 ارب روپے رمضان پیکج دیا گیا ہے اور پولیس کے لیے سات ارب روپے بھی جاری کیے گئے ہیں مشیر خزانہ نے جزباتی انداز میں بات کرتے ہوئے کہا کہ صوبائی تعصب کو ختم کیا جانا چاہیے خیبر پختونخوا کے ساتھ امتیازی سلوک بند کیا جائے اور یہی تعصب اور چیک پوسٹوں کی باتیں وزیراعلی پنجاب بھی کر رہی ہے جو کہ نہیں ہونے چاہیے۔
۔۔۔۔۔۔۔

ایمرجنسی صورتحال کے پیش نظر چترال سمیت صوبے کے پندرہ اضلاع کے ڈی ایچ اوز اور ایم ایس کو ڈیوٹی سٹیشن چھوڑنے سے قبل ڈی جی ہیلتھ سے اجازت لینے کی ہدایات جاری

پشاور (چترال ٹائمزرپورٹ) ڈائریکٹر جنرل ہیلتھ سروسز خیبر پختونخوا ڈاکٹر شوکت علی کے دفتر سے جاری ہونے والے مراسلے کے مطابق محکمہ بحالی و آبادکاری کی جانب سے صوبے کے مختلف اضلاع میں 30 اپریل تک ایمرجنسی نافذ کئے جانے کے بعد ڈسٹرکٹ ہیلتھ افسران اور میڈیکل سپرنٹنڈنٹس کو ہدایات جاری کی گئیں ہے کہ وہ اپنے ڈیوٹی سٹیشن کو چھوڑنے سے قبل ڈائریکٹر جنرل ہیلتھ سروسز سے پیشگی اجازت ضرور لیں۔ مراسلے کے مطابق ضم شدہ اضلاع کے ڈی ایچ اوز او ضلعی ہیڈ کوارٹر ہسپتالوں کے میڈیکل سپرنٹنڈنٹس بھی اپنے ڈیوٹی سٹیشن چھوڑنے سے قبل ڈائریکٹر جنرل ہیلتھ سروسز کو مطلع کرینگے۔ مراسلے کے مطابق دیر اپر اور لوئر، سوات، چترال اپر اور لوئر، کوہستان اپر اور لوئر، کولئی پالس، مہمند، خیبر، باجوڑ، پشاور، چارسدہ، ٹانک اور ڈیرہ اسماعیل خان کے اضلاع میں صحت کی ایمرجنسی خدمات بروقت فراہم کرنے کیلئے ان اضلاع کے ڈی ایچ اوز اور ایم ایس اپنے ڈیوٹی سٹیشنز پر موجود رہیں۔ تمام ڈسٹرکٹ ہیلتھ افسران اور میڈیکل سپرنٹنڈنٹس ان ہدایات پر عملدرآمد کے پابند ہیں تاکہ صحت کی بروقت خدمات کی فراہمی کو یقینی بنایا جاسکے۔

تعلیمی اداروں میں مارکیٹکی ضروریات کے مطابق مضامین متعارف کرانا چا ہتے ہیں، صوبائی وزیر میناخان آفریدی
ای ٹرانسفر پالیسی سے کالجز میں اساتذہ کی کمی سمیت رانگ پوسٹنگ کا تدارک بھی ہوجائیگا، صوبائی وزیر کا اجلاس سے خطاب

پشاور (چترال ٹائمزرپورٹ)خیبرپختونخوا کے وزیر برائے اعلیٰ تعلیم میناخان آفریدی نے کہا ہے کہ موجودہ صوبائی حکومت تعلیمی اداروں میں معیاری تعلیم کے فروغ کیلیے تمام ممکن اقدامات اٹھارہی ہے اور تعلیمی اداروں میں ایسے مضامین متعارف کرنے جارہے ہیں جو مارکیٹ اورینٹیڈ ہو ں اور جسکی مارکیٹ کو ضرورت بھی ہو اس سے نہ صرف جدید دور کے تعلیمی نظام کے تقاضے پورے ہونگے بلکہ بہت بڑی حد تک بیروزگای پر قابو بھی پایا جا سکے گا۔ انہوں نے کہاکہ لڑکو کے ساتھ ساتھ لڑکیوں کی تعلیم کو عام کرنا اور گرلز کالجز کو معیاری تعلیم کے ساتھ تمام تر سہولیات مہیا کرنا ہماری حکومت کی اولین ترجیحات میں شامل ہے وہ جمعہ کے روز ہائیر ایجوکیشن ڈیپارٹمنٹ کے کمیٹی روم میں پشاور کے مختلف گرلز ڈگری کالجز کو درپیش مسائل کے حوالے سے منعقدہ اجلاس کی صدارت کررہے تھے اجلاس میں سیکرٹری اعلیٰ تعلیم ارشدخان، ایڈیشنل سیکرٹری، باچاخان گرلز ڈگری کالج، سٹی گرلز ڈگری کالج، حیات آباد کالج، فرنٹیر کالج کے پرنسپلز سمیت محکمہ کے دیگر افسران نے شرکت کی۔

اجلاس میں صوبائی وزیر کو کالجز کے پرنسپل نے گرلز کالجز کو درپیش مسائل کے بارے میں تفصیلی طور پر آگاہ کیا گیا جبکہ کالجز کے بی ایس پروگرامز اور مختلف ڈسپلن میں سٹوڈنٹس کی اینرولمنٹ کے بارے میں بھی بریفنگ دی گئی صوبائی وزیر کو گرلزڈگری کالجز میں سٹاف کی کمی سے بھی آگاہ کیا گیا اس موقع پر صوبائی وزیر نے متعلقہ حکام کو ہدایت کی کہ گرلز کالجز میں اساتذہ کی کمی کیلیے ایسا طریقہ کار بنایا جائے کہ جو فیمیل ٹیچر سپیشل چھٹی پر چلی جائے تو اس کالج کی پرنسپل کو اختیار دیاجائے کہ وہ پیپل فنڈ سے کسی ٹیچر کی خدمات کو فوری پر حاصل کرے انہوں نے کہا کہ ای ٹرانسفر پالیسی زیرغور ہے مذکورہ پالیسی متعارف ہونے سے کالجز میں اساتذہ کی کمی سمیت رانگ پوسٹنگ کا تدارک ہوجائیگا انہوں نے مذید کہا کہ اعلیٰ تعلیمی اداروں میں بہتری لانے کیلیے اصلاحات کمیٹی بنائی ہے جو تمام تعلیمی اداروں کی ڈیٹا کو اکٹھا کریگی اس ڈیٹا کی روشنی میں مستقبل کا لائحہ عمل طے کرینگے اور عملی اقدامات اٹھائینگے صوبائی وزیر میناخان آفریدی نے پرنسپلز کو مخاطب کرتے ہوئے اس بات پر زور دیا کہ معیاری تعلیم کی فروغ میں اپنا کردار ادا کریں اور اس ضمن میں کوئی سمجھوتہ نہ کیا جائے جبکہ نئے آئیڈیاز پر بھی کام کیا جائے کیونکہ سٹوڈنٹس ہمارا قیمتی اثاثہ ہیں۔

مسلم لیگ (ن)کی حکومت مشکل کی اس گھڑی میں چترال کے متاثرہ بہن بھائیوں کے ساتھ ہے اور ا ن کے مسائل کو حل کرنے میں کوئی کسر نہیں چھوڑ اجائے گا، وزیراعظم پاکستان کا ایم این اے غزالہ انجم کو یقین دہانی

چترال(نمائندہ چترال ٹائمز) پاکستان مسلم لیگ(ن) کے چترال سے تعلق رکھنے والی خاتون ایم این اے غزالہ انجم نے جمعہ کے روز وزیرا عظم اسلامی جمہوریہ پاکستان میاں شہباز شریف سے ان کے دفتر میں ملاقات کرکے چترال میں حالیہ بارشوں اور قدرتی آفات کے حوالے سے انہیں اہالیان چترال کی مشکلات سے آگاہ کیا۔ وزیر اعظم نے مشکلات ومسائل سے آگاہی حاصل کرنے کے بعد فوری طور پر این ڈی ایم اے کے حکام کو ہدایات جاری کردی کہ وہ ایم این اے غزالہ انجم سے تفصیلات لے کر بارش کے متاثرین کی دوبارہ آبادکاری اور انفراسٹرکچر ز کی بحالی کے لئے ایک جامع پلان مرتب کرے۔ وزیرا عظم نے غزالہ انجم کو یقین دلایاکہ مسلم لیگ (ن)کی حکومت مشکل کی اس گھڑی میں چترال کے متاثرہ بہن بھائیوں کے ساتھ ہے اور ا ن کے مسائل کو حل کرنے میں کوئی کسر نہیں چھوڑ اجائے گا۔ایم این اے غزالہ انجم نے چترالی عوام کی طرف سے وزیر اعظم کا شکریہ ادا کرتے ہوئے کہاکہ مسلم لیگ (ن) کے سربراہ میاں نواز شریف کا ہر دورحکومت چترال میں تعمیر وترقی کا دور ثابت ہوا اور قدرتی آفات میں بھی چترالی عوام کو بھر پور توجہ مل گئی جب 2015ء کے قیامت خیز زلزلے کے بعد چترال کے متاثریں میں وفاقی حکومت کی طرف سے 2ارب روپے کی خطیر رقم تقسیم ہوئی۔ملاقات میں پاکستان مسلم لیگ خیبرپختونخوا کے صدر اور وفاقی وزیرانجینئر امیرمقام بھی موجود تھے۔

لوئیرچترال پولیس کی بروقت کاروائی، لینڈ سلائیڈنگ میں پھنسی ہوئی غیر ملکی خاتون سیاح کو بروقت نکال کر محفوظ مقام پر منتقل کردیا

چترال ( چترال ٹائمزرپورٹ ) لوئر چترال پولیس کا فوری رسپانس بمبوریت روڈ میں لینڈ سلائیڈنگ میں پھنسی ہوئی غیر ملکی خاتون سیاح کو بروقت نکال کر ممکنہ حادثے سے بچالیا۔

تھانہ ایون کے حدود میں ایک غیر ملکی خاتون سیاح بمبوریت سے سٹی چترال آتے ہوئے بمبوریت روڈ (دوباژ) میں لینڈ سلائڈنگ آنے کی وجہ سے پھنس گئی تھی۔

ایس۔ایچ۔او تھانہ ایون SI منیرالملک نے واقعے کی اطلاع ملتے ہی فوراً اپنے جوانوں کے ہمراہ موقع پر پہنچ کر غیر ملکی سیاح کو وہاں سے نکال کر محفوظ مقام پر منتقل کیا۔

آغاخان ایجنسی فار ہیبیٹاٹ پاکستان کی جانب سے ایمرجنسی حالت سے نمٹنے کے لئے ٹینٹ ضلعی انتظامیہ لوئیر چترال کے حوالے

چترال (نمائندہ چترال ٹائمز) آغاخان ایجنسی فار ہیبیٹاٹ پاکستان کے ریجنل آفس چترال میں آج ایک تقریب کے دوران آر پی ایم آغاخان ایجنسی فار ہیبیٹاٹ پاکستان چترال ولی محمد خان نے ٹینٹ ڈپٹی کمشنر لوئر چترال کے حوالے کیا۔ یہ خیمے چترال جیسے شدید موسمی حالات والے علاقوں کو مدنظر رکھ کر تیار کئے گئے ہیں۔تقریب میں ڈی سی چترال لوئرمحمد عمران خان یوسفزئی، اے سی چترال ڈاکٹرمحمد عاطف جالب، صدر نامدار ریجنل کونسل لوئر چترال ظفر الدین، صدر پریس کلب چترال ظہیر الدین، آنریری ڈائریکٹر AKAHP محمد افضل،آر پی ایم AKAHP ولی محمد اور اسٹاف نے شرکت کی۔ اپنی بریفنگ کے دوران آر پی ایم ولی محمد نے ایمرجنسی حالات سے نمٹنے کے لئے AKAHPکی تیاریوں سے شرکاء کو آگاہ کرتے ہوئے کہا کہ AKAHP چترال میں موسم کی خرابی کے ساتھ ہی فوری طور پر ریجنل آفس میں موجود رایمرجنسی آپریشن سینٹر فعال کردیا گیا جہاں پر اسٹاف چترال کے تمام علاقوں کے حالات کے بارے میں 24 گھنٹے معلومات کا حصول یقینی بناتے ہیں اور انہی معلومات کے حساب سے متاثرین کے ساتھ مدد کا سلسلہ شروع کرتے ہیں۔

اس دفعہ بھی EOC فوری طور پر فعال کردیا گیا جس میں معلومات کے حصول اور ذمہ دار اداروں سے وہ معلومات شیئر کرنے کا سلسلہ ہنوز جاری ہے۔ انہو ں نے کہا کہ لوئر چترال کے تقریبا 62 مختلف مقامات پر ایمرجنسی حالات سے نمٹنے کے لئے AKAHP کے اسٹاک پائل ز موجود ہیں۔ جہاں 1200 سے زائد ٹینٹ اور دوسری بنیادی ضروریات کی چیزیں موجود ہیں۔ یہ اسٹاک لوئر چترال کے شاہ سلیم گبور سے لے کر ارندو اور اپر چترال کے بروغل جیسے علاقوں کے ساتھ ساتھ بونی اور چترال ٹاؤن جیسے علاقوں میں بھی مشکلات کے دوران علاقے کے عوام کے لئے دستیاب ہیں۔ انہوں نے کہا کہ AKAHP چترال میں ایمرجنسی ڈکلیئر ہونے کے بعد ضلعی انتظامیہ کو حسب روایت آج ٹینٹ حوالے کررہا ہے جومذکورہ اسٹاک کے علاوہ ہے۔

ڈی سی چترال نے تقریب سے اپنے خطاب میں کہا کہ AKAHP حسب روایت موجودہ حالات میں بھی ضلعی انتظامیہ کی بھرپور مدد کررہا ہے جو کہ انتہائی خوش آئند بات ہے۔ ان کا کہنا تھا کہ ہمیں چترال کے طول و عرض میں AKDN اور خصوصا AKAHP کے بنیادی انسانی ضروریات کے لئے فراہم کئے گئے سہولیات دیکھ خوشی بھی ہوتی ہے کہ AKAHP ہمیشہ انسانیت کی خدمت کو اولیت دیتے ہوئے چترال کے تمام علاقوں میں یکسان سہولیات فراہم کررہا ہے۔ تقریب کے تمام شرکاء نے ایمرجنسی حالات کے دوران چترال کے دونوں اضلاع میں AKAHP کی طرف سے انجام دیئے گئے خدمات کو سراہا اور توقع ظاہر کی آئندہ بھی یہ سلسلہ جاری رہے گا۔

 شندور کے مقام پر دو افراد کو قتل کرکے گاڑی لیکر فرار ہونے والے ملزمان بائیس سال بعد گلگت میں گرفتار

گلگت ( چترال ٹائمزرپورٹ ) گزشتہ دن سی ٹی ڈی آپریشنل ٹیم گلگت نے sip عارف جان کی سربراہی میں مقدمہ علت نمبر48/02 بجرائم 302 ت پ 17 حرا بہ تھانہ مستوج چترال خیبرپختونخوا کو مطلوب اشتہاری ملزمان شاہ زیب ولد منصور خان اور علیم اللہ ولد شیریں خان ساکنان سكوار ضلع گلگت کو سکوار میں ایک سرچ آپریشن کے دوران گرفتار کر کے سی ٹی ڈی تھانہ منتقل کیا ہے ۔

یاد رہے مجرمان مذکوران نے سال 2002 کو اپنے شریک مجرمان کے ہمراہ چترال سے ایک شخص کی گاڑی بنيت ڈکیتی بک کر کے گلگت لاتے ہوےراستے میں شندور کے مقام پر دو افراد گاڑی ڈرائیور عصمت خداولد خوش خدا اور شاگرد سکندر شاہ ولد فقیر محمد ساکنان چیوڈوک چترال
کو بے دردی سے قتل کر کے لینڈکروزر گاڑ ی کو لے کر فرار ہوے تھے ۔ بعد میں گاڑی کو گلگت سے برآمد کیا گیا تھا،جبکہ مجرمان کو سیشن عدالت چترال سے سزا بھی ہوئی ہے۔

پریس ریلیز کےمطابق مجرمان اشتہاری کی گرفتاری کیلئے 22 سال کمے دوران چترال پولیس کی ٹیم 2/3 بار گلگت آی ہوئی تھی جو کہ ناکام ہوئی ۔۔مجرمان اشتہاری کو گرفتار کرنے کے لئے IG گلگت بلتستان نے AIG CTD گلگت کو خصوصی ٹاسک دیا تھا۔

ٹیکسی ڈرائیور کے بیوہ کی مجرمان کی گرفتاری بارے پریس کانفرنس 

https://chitraltimes.com/2021/10/14/53583/

اپر چترال کے دورآفتادہ علاقہ کھوت میں ملبے تلے دب کر آٹھ سالہ بچہ جان بحق

اپرچترال ( نمائندہ چترال ٹائمز ) آج صبح تورکہو کے بالائی علاقہ کھوت میں ایک افسوسناک واقعہ پیش آیا ، جہاں استاد سردار علی خان کا آٹھ سالہ بیٹا شہان اللہ سکول جاتے ہوئے اپنے چچا کے گھر کے پاس سے گزر رہے تھے کہ اسی اثنا گھر کی چاردیواری بچے پر ا گری جس کی وجہ سے بچہ ملبے تلے موقع پر ہی جان بحق ہو گیا۔ یادرہے کہ حالیہ شدید بارشوں اور برفباری کے بعد لینڈ سلائیڈنگ اور کچے مکانات و چار دیواری کی گرنے کے واقعات چترال میں معمول بن گیاہے۔
شاہان کھوت کی مقامی  سکول میں دوسری جماعت کی سٹوڈنٹ تھا، بعد ازاں شاہان کی نماز جنازہ ادا کرکے سینکڑوں اشکبار آنکھوں کے سامنے سپرد خاک کردیا گیا۔

حالیہ بارشوں سے مختلف حادثات میں جاں بحق افراد کے ورثاءکو مالی امداد کی فراہمی شروع، چترال کے لئے دس لاکھ روپے جاری

پشاور (چترال ٹائمزرپورٹ ) وزیر اعلیٰ خیبر پختونخوا سردار علی امین گنڈاپور کی خصوصی ہدایت پر صوبے میں حالیہ بارشوں سے مختلف حادثات میں جاں بحق افراد کے ورثاءکو مالی امداد کی فراہمی کا عمل تیز کر دیا گیا ہے۔ اس سلسلے میں اب تک پی ڈی ایم اے کی طرف سے مختلف اضلاع میں جاں بحق ہونے والے افراد کے ورثاءکی مالی امدادی کےلئے پانچ کروڑ روپے جاری کردیے گئے ہیں۔مالی امداد کی مد میں ضلع نوشہرہ کیلئے دو کروڑ، لوئر دیر 50 لاکھ، سوات اور ملاکنڈ کیلئے 30، 30 لاکھ ، اپر دیر اور ٹانک کیلئے 20، 20 لاکھ جبکہ لوئر چترال، بٹگرام، کرک، پشاور اور چارسدہ کیلئے 10، 10 لاکھ روپے جاری کئے گئے ہیں۔اس کے علاوہ لوئر چترال میں عمومی امداد کی مد میں بھی ایک کروڑ روپے جاری کئے گئے ہیں۔ وزیر اعلیٰ علی امین گنڈاپور نے بارش سے متاثرہ خاندانوں کو ریلیف کی فراہمی کے سلسلے میں پی ڈی ایم اے اور دیگر متعلقہ اداروں کی طرف سے اٹھائے گئے اقدامات پر اطمینان کا اظہار کرتے ہوئے کہا کہ صوبائی حکومت بارشوں کے متاثرین کو تنہا نہیں چھوڑے گی، متاثرین کی امداد اور بحالی صوبائی حکومت کی سب سے پہلی ترجیح ہے۔ وزیر اعلیٰ نے واضح کیا کہ اس مقصد کے لئے تمام دستیاب وسائل بروئے کار لائے جا رہے ہیں۔ انہوں نے متعلقہ حکام کو ہدایت کی کہ تمام متاثرہ اضلاع میں جانی و مالی نقصانات کا بغور جائزہ لیا جائے اور تمام متاثرین کو امداد اور ریلیف کی فراہمی یقینی بنائی جائے۔ انہوں نے بارشوں سے متاثرہ انفراسٹرکچرز کی بحالی پر بھی کام تیز کرنے کی ہدایت کی ہے تاکہ عوام کو درپیش مسائل جلد سے جلد حل کیے جا سکیں اور لوگ اپنی نارمل زندگی کی طرف لوٹ سکیں۔ وزیر اعلیٰ کا کہنا تھا کہ کوئی بھی چیز انسانی جان کا نعم البدل نہیں بن سکتی تاہم صوبائی حکومت جاں بحق افراد کے لواحقین کے غم میں برابر کی شریک ہے اور دستیاب وسائل کے مطابق ان کی ہر ممکن مدد بھی کر رہی ہے۔ اللہ تعالیٰ جاں بحق افراد کو اپنے جوار رحمت میں جگہ دے اور ان کے لواحقین کو صبرِ جمیل عطا فرمائے۔

موجودہ نظام میں کسی بھی شفاف اور قابل لیڈر کی کوئی جگہ نہیں، اگر کوئی عمران خان جیسے لیڈر کے نام پر الیکشن میں حصہ لے گا تو اسے فارم 47 میں رد و بدل کرکے ہرادیا جائے گا۔ وزیراعلیٰ

پشاور ( چترال ٹائمز رپورٹ ) وزیر اعلیٰ خیبر پختونخوا سردار علی امین گنڈاپور نے کہا ہے کہ موجودہ نظام میں کسی بھی شفاف اور قابل لیڈر کی کوئی جگہ نہیں، اگر کوئی عمران خان جیسے لیڈر کے نام پر الیکشن میں حصہ لے گا تو اسے فارم 47 میں رد و بدل کرکے ہرادیا جائے گا۔ وزیراعلیٰ کا کہنا تھا کہ یہ نظام ایکسپوز ہوچکا ہے اور مزید ایکسپوز ہو رہا ہے۔ وہ بدھ کے روز اسلام آباد میں میڈیا سے گفتگو کر رہے تھے۔ علی امین گنڈا پور کا کہنا تھا کہ اب بھی وقت ہے کہ معاملات کو ٹھیک کیا جائے، جو غلطیاں ہوئی ہیں ان کی معافی تلافی کرکے ملک و قوم کی خاطر صحیح سمت اپنایا جائے، قوم کو مزید اندھیروں میں نہ دھکیلیں ۔ وزیراعلیٰ نے ماضی قریب کے سیاسی تجربات کا حوالہ دیتے ہوئے کہا کہ اس ملک میں پی ڈی ایم ون کا جو تجربہ کیا گیا اس کے نتائج سب کے سامنے ہیں، اس نے ملک کو تنزلی کی طرف دھکیل دیا۔ اس کے بعد نگران حکومت نے جو ملک کے حالات بنائے وہ بھی سب کے سامنے ہیں۔ اور اب پی ڈی ایم ٹو کے ذریعے ایک نیا تجربہ کیا گیا ہے۔ وزیراعلیٰ نے کہا کہ یہ قوم مزید تجربات کی متحمل نہیں ہو سکتی۔ ملک میں جو مہنگائی ، بے روزگاری اور معیشت کی صورتحال ہے یہ کسی صورت بھی ٹھیک نہیں ہے۔ اب بھی وقت ہے کہ ہوش کے ناخن لیں، تجربات سے باہر نکلیں اور ملک و قوم کا سوچیں، کروڑوں عوام اس وقت مسائل کا شکار ہیں ان کے مسائل حل کرنے پر کام کریں۔ انہوں نے اس موقع پر سیاسی قائدین اور کارکنوں کے گھروں پر چھاپے مارنے کے اقدام کی مذمت کرتے ہوئے واضح کیا کہ اگر آج کے دور میں آپ کسی کے گھر پر دھاوا بولیں گے اور غیر قانونی طور پر کسی کی فیملی کو ہراساں کروگے تو یہ بات ضرور سوچیں کہ تمھارا اپنا بھی گھر ہے اور تمھارا بھی ایک خاندان ہے۔ آج جو ہمارے ساتھ ہورہاہے کل ان کے ساتھ بھی ہو سکتا ہے۔ کسی کے خاندان اور عزت کو ذاتی انتقام کی بھینٹ نہیں چڑھانا چاہئیے جو اصلاح کیلئے تیار ہے یہ خوشی کی بات ہے اور ہمارا دین بھی یہی کہتا ہے تاہم جو اصلا ح کیلئے تیارنہیں وہ سزا کیلئے تیار ہو جائے۔ پنجاب حکومت کے حوالے سے ایک سوال کا جواب دیتے ہوئے کہا کہ وہ پنجاب حکومت تو ٹک ٹاک پر چل رہی ہے، حکومت کو چاہئیے کہ اگر کوئی فیصلہ کرے تو اس پر عملدرآمد بھی کرائے۔ وزیراعلیٰ کا کہنا تھا کہ خیبرپختونخوا میں روٹی کی قیمت کم کرنے کا فیصلہ کیا گیا ہے جس پر عملدرآمد کرکے دکھایا جائے گا۔

لویر چترال کے دروش ٹاؤن کے گاؤں شیشی آزوردام، زمین سرک گئی جس کے نتیجے میں تین گھر مکمل طور پر مٹی تلے دب گئے،ایک مسجد شہید، جبکہ 18گھر وں کو جزوی نقصان پہنچا

چترال (نمائندہ چترال ٹائمز) بدھ کی صبح لویر چترال کے دروش ٹاؤن کے گاؤں شیشی آزوردام،حفیظ آباد، جزیر دوری میں کئی دنوں کی مسلسل بارش کی وجہ سے زمین سرک گئی جس کے نتیجے میں تین گھر وں سمیت ایک جامع مسجد مکمل طور پر مٹی تلے دب گئے جبکہ 18گھر وں کو جزوی نقصان پہنچا۔ متاثرہ مقام کے قریب ایک شگاف پڑگیا ہے جس کا رخ مزید کئی گھرانوں کی طرف بتائی جاتی ہے۔ متاثرہ گھرانوں کے مکینوں کو ان کی مال مویشیوں سمیت محفوظ مقامات پر منتقل کردئیے گئے ہیں۔ چترال کی تاریخ میں لینڈ سلائڈنگ کا یہ پہلا واقعہ بتایا جاتا ہے جس سے سینکڑوں گھرانے بیک وقت متاثر ہورہے ہیں۔ درین اثنا چترال کے طول وعرض میں کئی دیہات سیلاب کی زد میں آگئے جن میں لویر چترال کے اورغوچ، شیشی کوہ جبکہ اپر چترال کے وادی اویر میں اوسان اوردوسرے گاؤں شامل ہیں۔ بارشوں کی وجہ سے چترال کے طول وعرض میں سوفیصد ندی نالوں میں سیلاب آنے کی اطلاع موصول ہور ہے ہیں جس سے بعض علاقوں میں موٹر گاڑیوں کی آمدورفت میں مشکلات پیش آنے کے ساتھ ابپاشی کی نہر یں بھی متاثرہورہی ہیں۔ گرم چشمہ روڈ اور کالاش ویلی روڈ کی بحالی پر کام جاری ہے جبکہ چترال کھول دی گئی ہے۔ شدید موسمی حالات اور سڑکوں کی بندش کے پیش نظر پشاور بورڈ نے 18اپریل سے شروع ہونے والی میٹرک کے امتحانات کے پہلے تین دن کے پرچوں کو موخر کردیا ہے۔ ڈی سی لویر چترال محمد عمران خان نے میڈیا کو بتایاکہ ضلعی انتظامیہ تمام وسائل بروئے کار لاتے ہوئے دن رات سڑکوں کی بحالی ا ور متاثریں کے مصائب میں کمی لانے میں کوشان ہے۔ انہوں نے کہا ہے کہ ضلعی انتظامیہ روڈز سمیت انفراسٹرکچرز کی بحالی اور متاثرین کو ریلیف پہنچانے میں کوئی کوتاہی برداشت نہیں کرے گی اور ڈی سی کے دفتر میں قائم کنٹرول روم دن رات متاثرین کی رابطے کے لئے دستیاب ہے۔

حالیہ بارشوں کے نتیجے میں ضلع لوئر اوراپر چترال میں بارش اوربرفباری کے بعد امدادی سرگرمیاں جاری، مختلف سڑکوں سے ملبہ ہٹانے کا کام جاری

چترال ( چترال ٹائمزرپورٹ ) وزیر اعلی خیبر پختونخوا کے خصوصی ہدایات پر ڈپٹی کمشنر لوئر چترال محمد عمران خان نے ایم پی اے فاتح الملک علی ناصر کے ہمراہ دروش میں مختلف علاقوں کا دورہ کر کے متاثرہ مکانات اور کلئیرنس اپریشن کا معائنہ کیا۔ڈپٹی کمشنر نے دروش گول نالے کے فوری صفائی کے احکامات جاری کیں ۔
افسران نے متاثرہ خاندانوں سے ملاقات کی ۔ واقعے پر افسوس کا اظہار کیا اور صوبائی حکومت کے پالیسی کے مطابق ضلعی انتظامیہ کی طرف سے متاثرین کے ساتھ ہر ممکن تعاون کی یقین دہانی کرائی۔

ضلعی انتظامیہ کی طرف سے متاثرین کو محفوظ مقام پہ منتقل کرکے امدادی سامان متاثرہ خاندان میں تقسیم کر دی گئی ہیں۔اور زخمیوں کے علاج معالجے کیلۓ بھی امدادی اقدامات اٹھاۓ گۓ ہیں۔ دریں اثنا مین چترال پشاور مین روڈ ٹریفک کیلے مکمل طور پہ بحال کر دیا گیا ہے۔ تاہم چترال بونی ، چترال گرم چشمہ ، چترال کالاش ویلی روڈمیں صفائی کا کام جاری ہے، اخری اطلاع تک چترال بونی روڈ کاربیتلی سے  موری لشٹ تک ملبہ ہٹاکر ہلکی ٹریفک بحال کردیا گیا ، انتظامیہ کے مطابق کل بدھ کے دن چترال بونی کے درمیان ٹریفک بحال ہوگی ۔

میٹنگ میں حالیہ تباہ کن بارشوں/برفباری اور اس کے نتیجے میں ہونے والے نقصانات کا تفصیلی جائزہ لیا گیا ۔ ڈپٹی سپیکر صاحبہ نے حالیہ بارشوں اور برفباری کی وجہ سے لوگوں کے تباہ شدہ مکانات کا جلد از جلد تخمینہ لگانے، تباہ شدہ انفراسٹرکچر سمیت سڑکوں کو فوری کھولنے، موبائل سروسز کی بحالی اور متاثرین کے ساتھ ہنگامی بنیادوں پر تعاون کرنے سے متعلق احکامات صادر کیں۔ بعد ازاں ڈپٹی سپیکر نے ڈپٹی کمشنر اپر چترال کے ہمراہ پولیس لائن تشریف لے گئ جہاں ڈپٹی کمشنر نےشہید حسین احمد کانسٹیبل اپر چترال پولیس کے نماز جنازہ میں شرکت کی اور ان کے گھروالوں سے تعزیت کی۔ ڈپٹی سپیکر نے شہید کانسٹبل کے بھائی سے ملی اور نوجوان کانسٹبل کے موت پر اظہار افسوس کی۔ ڈپٹی سپیکر نے شہید کانسٹبل کے موت کی شفاف تحقیقات کی ہدایت کی ۔

 وزیراعلیِ کی ہدایت پر پی ڈی ایم اے کی جانب سے سوات، مہمند، پشاور، لوئر چترال، لوئر کوہستان اور دیگر متاثرہ اضلاع کے لیے امدادی سامان روانہ کر دیا گیا

پشاور ( چترال ٹائمزرپورٹ ) وزیر اعلیٰ خیبر پختونخوا سردار علی امین خان گنڈاپور کی خصوصی ہدایات پر بارشوں سے متاثرہ اضلاع میں ریلیف سرگرمیاں جاری ہیں۔ اس سلسلے میں پی ڈی ایم اے کی جانب سے سوات، مہمند، پشاور، لوئر چترال، لوئر کوہستان اور دیگر متاثرہ اضلاع کے لیے امدادی سامان روانہ کر دیا گیا ہے۔امدادی سامان میں خیمے، کمبل، کچن سیٹس، ہائی جین کٹس، مچھردانیاں، میٹریسز اور فوری ضرورت کی دیگر اشیاءشامل ہیں۔ علاوہ ازیں وزیر اعلیٰ کی طرف سے متاثرین کے لئے اعلان کردہ مالی امداد کے چیکس بھی تقسیم کئے جارہے ہیں اور اب تک متاثرین میں مجموعی طور پر تین کروڑ روپے کی امدادی رقم تقسیم کی گئی ہے۔ مزید برآں وزیر اعلیٰ علی امین گنڈاپور نے پی ڈی ایم اے اور متعلقہ ضلعی انتظامیہ کو امدادی سرگرمیاں اور متاثرہ انفراسٹرکچر کی بحالی کا کام مزید تیز کرنے کی ہدایت کی ہے اور واضح کیا ہے کہ متاثرین کو بروقت امداد کی فراہمی یقینی بنائی جائے۔ وزیر اعلیٰ نے بارشوں سے مختلف حادثات کے نتیجے میں قیمتی انسانی جانوں کے ضیاع پر دلی افسوس کا اظہار کرتے ہوئے کہا ہے کہ جاں بحق افراد کے لواحقین کے غم میں برابر کے شریک ہیں اور ان حادثات میں زخمی ہونے والوں کی جلد صحت یابی کے لیے دعاگو ہیں، صوبائی حکومت آزمائش کی اس گھڑی میں متاثرین کو تنہا نہیں چھوڑے گی اورمتاثرین کی بحالی اور امداد کےلئے تمام دستیاب وسائل بروئے کار لائے جائیں گے۔ علی امین گنڈاپور نے تمام متعلقہ اضلاع کی انتظامیہ کو ہدایت کی ہے کہ متاثرہ اضلاع میں بند رابطہ سڑکوں کو کھولنے اور دیگر انفراسٹرکچر کی بحالی کے لئے فوری اقدامات کئے جائیں۔

چترال شہر سمیت مضافات میں چار دنوں کی بارش اور برف باری کے بعد آج دھوپ نکلی ہے، موسم ساز گار تاہم رابطہ سڑکیں بند ہیں

چترال ( نمائندہ چترال ٹائمز ) چترال ٹاوں سمیت اپر اور لوئیر چترال میں گزشتہ چاردنوں سے مسلسل بار ش اور برفباری کے بعد آج دھوپ نکل آئی ہے، اور موبائل نیٹ ورک بعض مقامات پر بحال ہوچکے ہیں، ساتھ بجلی کی ترسیل بھی صرف چترال ٹاون ایریا میں بحال ہوچکی ہے، باقی علاقوں میں معطل ہے، چترال بونی اور گرم چشمہ روڈ تاحال بند ہیں، ضلعی انتظامیہ لوئیر چترال کے مطابق دونوں سڑکوں کی بحالی پر ہیوی مشینری لگادی گئی ہے، اسی طرح چترال پشاور روڈ ٹریفک کے لئے بحال کردیا تھا مگر آج دوبارہ لینڈ سلائڈنگ کے باعث عارضی بند ہے، انتظامیہ کے مطابق بہت جلد دوبارہ کھول دیا جائیگا، ، حالیہ بارش اور برفباری کے نتیجے میں اپر اور لوئیر چترال میں درجنوں گھر مندم اورسینکڑؤں کو جذوی نقصان پہنچا ہے، جبکہ برفباری کےباعث کھڑی فصلوں اور باغات کو شدید نقصان پہنچا ہے۔ آج موسم صاف ہونے اور دھوپ نکلنے پر گھروں میں محصور لوگ باہر نکلے ہیں،سڑکوں کی بحالی کی نگرانی ڈپٹی کمشنر لوئیراور اپرچترال دونوں بذات خود کررہے ہیں۔

وزیر اعلی خیبر پختونخوا کا حالیہ بارشوں کے دوراں مختلف حادثات کے نتیجے میں چترال سمیت صوبے کے مختلف اضلاع میں ہونے والی جانی و مالی نقصانات پر افسوس کا اظہاراور متاثرہ خاندانوں کی مالی معاونت کا اعلان

پشاور ( چترال ٹائمز رپورٹ ) وزیر اعلی خیبر پختونخوا سردار علی امین خان گنڈاپور نے حالیہ بارشوں کے دوراں مختلف حادثات کے نتیجے میں چترال، دیر، سوات اور ایبٹ آباد سمیت صوبے کے مختلف اضلاع میں ہونے والی جانی و مالی نقصانات پر افسوس کا اظہار کرتے ہوئے متاثرہ خاندانوں کی مالی معاونت کا اعلان کیا ہے اور متعلقہ حکام کو اس سلسلے میں ضروری کاروائی عمل میں لانے کی ہدایت کی ہے۔ یہاں سے جاری اپنے ایک بیان میں وزیر اعلی نے ان حادثات کے نتیجے میں قیمتی انسانی جانوں کے ضیاع پر رنج و غم جبکہ سوگوار خاندانوں سے تعزیت اور دلی ہمدردی کا اظہار کیا ہے اور کہا ہے کہ صوبائی حکومت مشکل کی اس گھڑی میں متاثرہ خاندانوں کے ساتھ ہے، انہیں تنہا نہیں چھوڑا جائے گا اور ان کی ہر ممکن معاونت کی جائے گی۔ انہوں نے محکمہ ریلیف سے صوبے میں ہونے والی جانی و مالی نقصانات کی تفصیلی رپورٹ طلب کی ہے۔ وزیر اعلی نے ان حادثات میں زخمی ہونے والوں کی جلد صحت یابی کے لئے نیک خواہشات کا اظہار کرتے ہوئے متعلقہ ضلعی انتظامیہ کو ہدایت کی ہے کہ زخمیوں کو بہترین طبی امداد اور متاثرہ خاندانوں کو فوری ریلیف کی فراہمی کے لئے ترجیحی بنیادوں پر اقدامات اٹھائے جائیں۔ وزیر اعلی نے انتظامیہ کو مزید ہدایت کی ہے کہ بارشوں کے نتیجے میں لینڈ سیلائیڈنگ کی وجہ سے بند سڑکوں اور دیگر انفراسٹرکچر کی بحالی کے لئے بھی ہنگامی بنیادوں پر اقدامات اٹھائے جائیں اور ضلعی انتظامیہ کے حکام بحالی اور امدادی سرگرمیوں کی خود نگرانی کریں۔

دریں اثنا وزیر اعلی خیبر پختونخوا سردار علی امین گنڈاپور نے سینئر صحافی اور کالم نگار افضل حسین بخاری کے انتقال پر افسوس کا اظہار کرتے ہوئے لواحقین سے تعزیت کی ہے۔ یہاں سے جاری اپنے تعزیتی بیان میں وزیر اعلی نے سوگوار خاندان کے ساتھ دلی ہمدردی کا اظہار کرتے ہوئے مرحوم کی مغفرت اور پسماندگان کے لئے صبر جمیل کی دعا کی ہے۔