بلوچستان: جعفر ایکسپریس پر شدید فائرنگ، 500 مسافر سوار، ہسپتالوں میں ایمرجنسی نافذ

Posted on March 11, 2025March 11, 2025

بلوچستان: جعفر ایکسپریس پر شدید فائرنگ، 500 مسافر سوار، ہسپتالوں میں ایمرجنسی نافذ

کوئٹہ( چترال ٹائمزرپورٹ )بلوچستان میں ملک دشمنوں کی جانب سے بدامنی پھیلانے کا سلسلہ جاری ہے، تازہ واقعے میں صوبائی دارالحکومت کوئٹہ سے خیبرپختونخوا کے دارالحکومت پشاور جانے والی ٹرین (جعفر ایکسپریس) پر نامعلوم دہشتگردوں نے مچھ میں فائرنگ کی ہے، ٹرین میں 500 مسافر سوار ہیں۔ بلوچستان میں دہشتگردی کا تازہ واقعہ مچھ میں گڈا لار اور پیرو کنری کے درمیانی علاقے میں پیش آیا ہے، جہاں کوئٹہ سے پشاور جانے والی جعفر ایکسپریس پر فائرنگ کی گئی، جس کے نتیجے میں ٹرین ڈرائیور زخمی ہوگیا۔ریلوے ذرائع کا کہنا ہے کہ سبی کے تمام ہسپتالوں میں ایمرجنسی نافذ کردی گئی ہے اور سیکورٹی فورسز کی بھاری نفری طلب کرلی گئی ہے۔کنٹرولر ریلوے محمد کاشف جعفر ایکسپریس 9 بوگیوں پر مشتمل ہے، 500 کے قریب مسافر سوار ہیں، ٹرین کو 8نمبر ٹنل میں مسلح افراد نے روک لیا تھا، مسافروں اور عملے سے رابطے کی کوشش کی جارہی ہے۔دوسری جانب ریلوے ذرائع نے ’ڈان‘ کو بتایا کہ پشاور جانے والی جعفر ایکسپریس پر ضلع بولان کے علاقے مشقف کے قریب مسلح افراد نے حملہ کیا، ریلوے حکام نے کوئٹہ سے آنے والی مسافر ٹرین پر مسلح حملے کی تصدیق کی ہے۔ ریلوے حکام کے مطابق فائرنگ سے ٹرین کا ڈرائیور زخمی ہوا، سیکیورٹی فورسز موقع پر پہنچ گئیں اور بھاری فائرنگ کا سلسلہ جاری ہے۔

 

ترجمان بلوچستان حکومت کا کہنا ہے کہ کوئٹہ سے پشاور جانے والی جعفر ایکسپریس پر گڈالر اور پیرو کنری کے درمیان شدید فائرنگ کی اطلاعات ملی ہیں۔ترجمان بلوچستان حکومت شاہد رند کے مطابق سبی کے ہسپتالوں میں ایمرجنسی نافذ کردی گئی ہے، ایمبولینسز جائے وقوعہ کی جانب روانہ کردی گئی ہیں، پہاڑی اور دشوار گزار علاقہ ہونے کے باعث جائے وقوعہ تک رسائی میں مشکلات پیش آرہی ہیں، محکمہ ریلوے کی جانب سے امدادی ٹرین جائے وقوعہ پر روانہ کردی گئی ہے۔ترجمان نے کہا کہ سیکورٹی فورسز مذکورہ علاقے کی جانب روانہ ہوچکی ہیں، واقعے کی نوعیت اور ممکنہ دہشت گردی کے پہلوؤں کا جائزہ لیا جا رہا ہے، ابتدائی اطلاعات کے مطابق واقعہ دہشت گردی کا شاخسانہ ہو سکتا ہے، تاہم ابھی ابتدائی تحقیقات شروع کی جائیں گی۔حکومت بلوچستان نے تمام متعلقہ اداروں کو ہنگامی اقدامات کی ہدایت کی ہے،

 

کہا گیا ہے کہ تمام ادارے متحرک ہیں، عوام پرامن رہیں اور افواہوں پر کان نہ دھریں۔ادھر جعفر ایکسپریس پر فائرنگ کے بعد سول ہسپتال کوئٹہ میں بھی ایمرجنسی نافذ کر دی گئی ہے۔ترجمان محکمہ صحت بلوچستان ڈاکٹر وسیم بیگ سول ہسپتال کوئٹہ کا کہنا ہے کہ تمام کنسلٹنٹس، ڈاکٹرز، فارماسسٹس، اسٹاف نرسز اور پیرا میڈیکل اسٹاف کو ہسپتال میں طلب کرلیا گیا ہے۔دوسری جانب سوشل میڈیا پر ایک کالعدم تنظیم کی جانب سے جعفر ایکسپریس پر فائرنگ کے واقعہ کی ذمہ داری قبول کرنے کی اطلاعات زیر گردش ہیں، تاہم ان کی تصدیق نہیں ہوسکی۔واضح رہے کہ صوبہ بلوچستان اور خیبر پختونخوا حالیہ کچھ عرصے سے دہشتگردوں کے نشانے پر آگئے ہیں، تاہم سیکیورٹی فورسز نے اس دوران کئی اہم دہشتگردوں کو گرفتار کرکے کئی منصوبے ناکام بھی بنائے ہیں۔یاد رہے کہ رواں ہفتے حب میں جیولری شاپ پر فائرنگ کرکے 3 افراد کو قتل کیا گیا،

 

خضدار میں گاڑی پر فائرنگ کرکے جمعیت علمائے اسلام (ف) کے رہنماؤں غلام سرور اور مولوی امان اللہ کو گھات لگاکر نشانہ بنایا گیا، دہشتگردوں نے کوسٹل ہائی وے پر ایک درجن کے قریب باؤزر اور گاڑیاں نذر آتش کردی تھیں، اسی طرح خضدار کی تحصیل نال بازار میں دھماکے میں 4 افراد جاں بحق ہوگئے تھے۔سیکیورٹی ذرائع نے بتایا تھا کہ بلوچستان میں آپریشن کے بعد 4 دہشت گرد گرفتار کرلیے گئے تھے، افغانستان سے پاکستان میں دراندازی کے مزید شواہد سامنے آئے تھے۔پاک افغان سرحد کے قریبی علاقے ٹوبہ کاکڑی میں آپریشن کے دوران 4 دہشت گردوں کو گرفتار کیا گیا تھا، جن سے تفتیش میں افغانستان سے پاکستان میں دراندازی کے مزید شواہد سامنے آئے تھے۔سیکیورٹی ذرائع کا کہنا تھا کہ 5 مارچ 2025 کو گرفتار کیے گئے دہشت گردوں سے کلاشنکوفیں، دستی بم اور دیگر آتشیں اسلحہ برآمد ہوا، گرفتار دہشت گردوں نے دہشت گردی کی بڑی کارروائی کی منصوبہ بندی کا اعتراف کیا تھا۔

 

اخری اطلاع تک جعفر ایکسپریس سے متعدد یرغمالیوں کو شدت پسند پہاڑی علاقے میں لے گئے، سکیورٹی فورسز کا آپریشن جاری ہے
بلوچستان میں درۂ بولان کے علاقے ڈھاڈر میں جعفر ایکسپریس پر شدت پسندوں کے حملے کے بعد وزیرِ مملکت برائے داخلہ طلال چوہدری نے بتایا ہے کہ جعفر ایکسپریس پر حملے کے بعد بہت سارے مسافروں کو شدت پسند ٹرین سے لے کر پہاڑی علاقے میں لے گئے ہیں۔ دوسری جانب ریلوے کے ایک افسر نے بی بی سی کو تصدیق کی ہے کہ ٹرین پر حملے کے بعد یرغمال بنائے گئے مسافروں میں سے 80 کو چھوڑ دیا گیا ہے۔

 

 

چترال شندور روڈ کے لیے 347 ملین روپے ریلیز، ٹی ٹی آر ایف کا ریلیز فنڈ  ناکافی قرار دیتے ہوئے مذید فنڈریلیزکرنے کا مطالبہ 

Posted on January 7, 2025January 7, 2025

چترال شندور روڈ کے لیے 347 ملین روپے ریلیز، ٹی ٹی آر ایف کا ریلیز فنڈ  ناکافی قرار دیتے ہوئے مذید فنڈریلیزکرنے کا مطالبہ

 

اپرچترال ( نمائندہ چترا ل ٹائمز ) تورکھو تریچ یوسی روڈ فورم (ٹی ٹی آر ایف) نے منگل کو جاری ایک بیان میں کہا ہے کہ چترال شندور روڈ کے لیے جاری 347 ملین روپے نہ صرف ناکافی ہے بلکہ اس میگا پراجیکٹ کے لیے ’مونگ پھلی کے دانے‘ کے مترادف ہے۔

 

خیال رہے کہ وفاقی حکومت نے چترال شندور روڈ کے لیے پیر کو 347 ملین روپے جاری کر دیے تھے۔ٹی ٹی آر ایف نے کہا ہے کہ بار بار مطالبے کے باوجود حکومت کی جانب سے اس اہم میگا پراجیکٹ کے لیے اتنا کم فنڈز ریلیز کرنا ایک مذاق ہے۔ ٹی ٹی آر ایف نے نشاندہی کی ہے کہ ریلیز کردہ فنڈ تو ٹھیکیدار کے پہلے سے موجود لائبیلیٹیز میں ایڈجسٹ ہوں گے اور اس اہم منصوبے پر کام تو نہیں ہوگا۔

 

بیان میں کہا گیا ہے کہ 22 ارب روپے لاگت کے اس منصوبے کی تکمیل کی ڈیڈلائن 2024 تھی جو کہ گزر چکی ہے۔ ایسا لگتا ہے کہ وفاقی حکومت چترال میں ایک اور ’بونی بزند روڈ کی طرح کا بیمار منصوبہ پال رہی ہے جس کی اگلے 15 سال میں بھی تکمیل ممکن نہیں۔

 

ٹی ٹی آر ایف نے کہا کہ جس طرح مونگ پھلی کے دانوں کی طرح اس اہم منصوبے کے لیے فنڈ جاری کے جارہے ہیں ایسا لگتا ہے کہ تورکھو روڈ کی طرح یہاں بھی مونگ پھلی کے دانے جتنا فنڈ ریلیز کرکے ٹھییکدار کی جھوٹی سچی لائبیلیٹیز بنائی جاتی ہے اور پھر محکمے کے افسران، وزارت کے کرتا دھرتا اور ٹھیکیدار مل کر ان فنڈز کوایسے مدات میں ایڈجسٹ کرتے ہیں اور علمی، معیاری اور بروقت کام کے بجائے مصنوعی ہل جل ہوتی ہے اور پھر حسب روایت سردیا آجاتی ہے اور کنٹریٹر بھاگ جاتے ہیں۔

 

ٹی ٹی آر ایف نے وزیراعظم پاکستان شہباز شریف، وزیر منصوبہ بندی احسن اقبال، وزیر مواصلات علیم خان سے مطالبہ کیا ہے کہ اس اہم منصوبے کے لیے فوری اور مناسب فنڈ جاری کرکے اس پر کام کا دوبارہ آغاز کیا جائے۔

 

ٹی ٹی آر ایف نے یاد دہانی کی ہے کہ وزیراعظم کی شہرت ترقیاتی منصوبوں کو تیز رفتاری سے اور بروقت مکمل کرنے کی رہی ہے اور ہم امید کرتے ہیں کہ وزیراعظم چترال کے اس اہم منصوبے کے حوالے سے بھی اپنی شہرت کو برقرار رکھیں گے۔

 

ٹی ٹی آر ایف نے خبردار کیا ہے کہ اگر ان کے مطالبات پر کان نہیں دھرا گیا اور اس منصوبے پر کام فوری شروع نہیں کیا گیا تو پورے چترال میں لوگ سڑکوں پر آنے پر مجبور ہوں گے۔

 

 

 

 

 

 

 

 

 

 

گرم چشمہ؛ آغاخان یوتھ اینڈ سپورٹس بورڈ پرابیگ  کے زیراہتمام منعقدہ جوش گیمز کی اختتامی تقریب وبزرگ شہریوں کے لئے ثقافتی پروگرام کا انعقاد

Posted on December 3, 2024

گرم چشمہ؛ آغاخان یوتھ اینڈ سپورٹس بورڈ پرابیگ  کے زیراہتمام منعقدہ جوش گیمز کی اختتامی تقریب وبزرگ شہریوں کے لئے ثقافتی پروگرام کا انعقاد

 

 

گرم چشمہ ( رپورٹ فرہاد خان ) آغا خان یوتھ اینڈ سپورٹس بورڈ پرابیگ کی جانب سے نوجوانوں کے لئے منعقدہ جوش گیمز 2024 کی اختتامی تقریب آغا خان لوکل کونسل پرابیگ میں منعقد ہوئی ۔ جوش گیمز 2024 میں آغاخان لوکل کونسل پرابیگ کے تمام کلسٹر سے تعلق رکھنے والے نوجوانوں کے لئے کرکٹ اور ولی بال کے مقابلے منعقد کئے گئے جو کہ دو ہفتے تک جاری رہے۔ 01 دسمبر بروز اتوار کو ہونے والے فائنل مقابلوں اور اختتامی پروگرام کے مہمان خصوصی انریری سیکریٹری آغا خان ریجنل کونسل لوئر چترال سید علی شاہ تھے جبکہ صدر محفل کے فرائض پریذیڈنٹ نامدار لوکل کونسل پرابیگ محی الدین نے انجام دیئے۔اس پروگرام میں مختلف مکاتب فکر اوربزرگ شہریوں اورزندگی کے مختلف شعبوں سے تعلق رکھنے والے افراد نے بڑی تعداد میں شرکت کیں ۔ اختتامی پروگرام میں لوکل کونسل پرابیگ کے بزرگ شہریوں کے لئے ثقافتی ڈھول میوزک کا بھی اہتما کیا گیا تھا تاکہ انہیں اپس میں مل بیٹھنے کا موقع فراہم کیا جائے جہاں وہ اپنے ہم عمر افراد کے ساتھ مل کر ثقافتی میوزک کا لطف اٹھائیں، ایک دوسرے سے گھل مل جائیں اور مصروفیت کے اس دور میں دل بہلا سکیں ۔

 

چیرمیں لوکل یوتھ ایند سپورٹس بورڈ صدام حسین نے مہمانان گرامی، ریجنل و لوکل لیڈرشپ معززین علاقہ،کھلاڑیوں اور پروگرام میں شریک تمام افراد کو خوش امدید کہا جبکہ وائی ۔ایس۔ بی۔ جوش گیمز کے اعراض و مقاصد پر روشنی ڈالی۔ اُنہوں نے ادارے کی جانب سے علاقے کے نوجوانوں کے لئے جوش گیمز سمیت مختلف پروگرامات کا زکر کرتے ہوئے کہا کہ ہزہائی نس کی ہدایات کی روشنی میں نوجوانون کی فلاح و بہبود کے لیے کھیل کود جیسے صحت مندانہ سرگرمیوں کے زریعے ان کی جسمانی و دماغی صلاحیتوں کو پروان چڑھانے کا موقع فراہم کیا جاتا ہےجس میں مختلف گیمز و کیمپس کا انعقاد شامل ہے تاکہ وہ بہترین جسمانی صحت کے ساتھ ساتھ زندگی کے مختلف شعبوں میں بہترین کارکرگی کا مظاہرہ کرسکیں۔اُنہوں نے لوکل وائی ۔ایس۔بی۔ ممبران کو خصوصی شاباشی دیتے ہوئے جوش گیمز کے دوران ان کی بہترین خدمات پر ان کا شکریہ ادا کیا۔

 

پروگرام کے مہمان خصوصی انریری سیکریٹری آغا خان ریجنل کونسل لوئر چترال سید علی شاہ نے تقریب سے خطاب کرتے ہوئے آغا خان لوکل کونسل پرابیگ کی جانب سے منعقد کردہ جوش گیمز و سینئر افراد کی دل جوئی کے لئے بہترین ثقافتی پروگرام پیش کرنے پر داد و تحسین پیش کیا اور کہا کہ آغا خان لوکل کونسل پرابیگ اس طرح کے بہترین پروگرام پیش کرنے میں ہراول دستے کا کردار ادا کررہا ہے اور یہ لوکل کونسل کے نوجوان قیادت کی بہترین صلاحتیوں کا مظہر ہے ۔اُنہوں نے والنٹئری خدمات پیش کرنے والے افراد کو داد و تحسین پیش کیا اور کہا کہ ادارے کی بہترین مفاد میں والنٹرز کا کردار انتہائی اہم ہے اور ادارے کی نیک نامی میں ان کا بہترین کردار ہے ۔

 

صدر محفل پریذیڈنٹ آغا خان لوکل کونسل پرابیگ محی الدین نے حاضرین اور خصوصا نوجوانوں سے مخاطب ہوتے ہوئے کہا کہ نوجوانان علاقہ کھیل جیسے صحت مندانہ سرگرمیوں میں زیادہ سے زیادہ حصہ لیتے ہوئے معاشرے کا ایک بہترین و زمہ دار فرد ہونے کا ثبوت دیں گے اور معاشرتی برائیوں سے اجتناب برتے ہوئے معاشرے کی نیک نامی میں اپنا کردار ادا کریں گے ۔ اُنہوں نے منشیات کی لغنت سے بچنے کی تلقین کرتے ہوئے کمیونٹی کےتمام افراد پر زور دیا کہ وہ معاشرے میں بڑھتے ہوئے ان خرابات و جرائم کی بیخ کنی میں اپنا کردار ادا کریں اور نوجوان نسل کو بگڑنے سے بچانے کی ہر ممکن کوشش کریں ۔ انہون نے ثقافتی ڈھول میوزک کو مثبت طریقے سے جاری رکھنے جبکہ ان میں شامل مختلف خرابات کو جڑ سے اکھاڑ پھینک کر اپنی ثقافت کو بہترین انداز میں اگے لے جانے کی تاکید کی تاکہ روایتی بہترین موسیقی کو پرواں چڑھایا جاسکے۔

 

 

پروگرام کے آخر میں کرکٹ و ولی بال کے فائنل میچ کے جیتنے والے اور رنراپ کھلاڑیوں میں ٹرافی و میڈلز تقسیم کئے گئے۔ یاد رہے کہ جوش گیمز میں پرابیگ لوکل کونسل سے تعلق رکھنے والے سولہ سال سے تیس سال عمرکے نوجوانوں کے کرکٹ کے دس ٹیم جبکہ ولی بال کے کل چھ ٹیموں کے مابین مقابلے ہوئے۔ جبکہ تیس سال سے زائد سنیرز کھلاریوں کے کرکٹ کے چھ ٹیموں نے اس گیمز میں شرکت کیں۔

 

نوجوانوں کے کرکٹ میچ کا فائنل میچ برزین اور اوغوتی کے مابین کھیلا گیا جس میں اوغوتی کرکٹ ٹیم نے برزین کو ہرا کر فائنل معرکہ اپنے نام کرلیا۔ جبکہ والی بال مقابلے میں پرابیگ اے نے پرابیگ بی کو ہرا کر ٹائٹل اپنے نام کرلیا۔ اسی طرح سینئرز کرکٹ مقابلے کا فائنل لوکل کونسل پرابیگ کرکٹ ٹیم اور پرابیگ کلسٹر ٹیم کے مابین کھیلا گیا جس میں پرابیگ لوکل کونسل کی ٹیم نے دلچسپ مقابلے کے بعد پرابیگ کلسٹر کو ہرا کر فائنل مقابلہ جیت لیا۔ پروگرام کے آخر میں ثقافتی ڈھول میوزک کا اہتمام کیا گیا جس میں علاقے کے بزرگ شہریوں ، نوجوانوں اور بچوں نے بہترین ڈانس کا مظاہرہ کیا اور روایتی موسیقی کے اس محفل سے لطف اندوز ہوئے۔

 

پروگرام میں جوش گیمز کے دوران تعاون کرنے والے والنٹیرز، وائی ۔ایس۔ بی۔ کے ممبران ، مقامی پولیس فورس کے اے۔ایس۔ آئی ، کھیلوں کے ایمپائرز اور دیگر میں شیلڈ ، میڈلز و سرٹفیکیٹ تقسیم کئے گئے جبکہ ڈھول میوزک گروپ کے فنکارون کو چترالی ثقافتی ٹوپی (کھپوڑ) کے تحفے پیش کئے گئے۔

 

 

 

 

 

 

 

 

 

خیبر پختونخوا کی سیاسی جماعتیں اور سیاسی قائدین مل بیٹھیں اور صوبہ کو آگ سے نکالیں اور وفاق سے صوبہ کا حق لینے کیلئے مشترکہ کردار دا کریں، گورنر خیبرپختونخوا 

Posted on November 27, 2024

خیبر پختونخوا کی سیاسی جماعتیں اور سیاسی قائدین مل بیٹھیں اور صوبہ کو آگ سے نکالیں اور وفاق سے صوبہ کا حق لینے کیلئے مشترکہ کردار دا کریں، گورنر خیبرپختونخوا

 

پشاور ( چترال ٹائمزرپورٹ ) گورنر خیبر پختونخوا فیصل کریم کنڈی نے کہا ہے کہ امن و امان صوبے کا اہم مسئلہ ہے، ضم ضلع کرم میں اکتوبر سے اب تک 150 سے زائد افرادشہید ہو چکے ہیں،ضم ضلع کرم کا آج دورہ کروں گا وزیر اعلیٰ خیبر پختونخوا کو بھی دعوت دیتا ہوں کہ وہ میرے ساتھ ضلع کرم چلیں، ضلع کرم کے مسائل کو سیاسی قیادت وہاں کے لوگوں کے ساتھ مل بیٹھ کر حل کر سکتی ہے، ماہ دسمبر کے پہلے ہفتہ میں گورنر ہاؤس میں کل جماعتی کانفرنس کا انعقاد کر رہے ہیں، وزیر اعلٰی کو بھی اے پی سی میں شرکت کی دعوت دیتا ہوں،اس حوالے سے تمام صوبائی سیاسی قائدین سے رابطے کر رہا ہوں، خیبر پختونخوا کی سیاسی جماعتیں اور سیاسی قائدین مل بیٹھیں اور صوبہ کو آگ سے نکالیں اور وفاق سے صوبہ کا حق لینے کیلئے مشترکہ کردار دا کریں، وفاق بھی بڑے بھائی کے ناطے صوبہ میں دہشتگری کے خاتمے کیلئے موثر کردار دا کرے۔

 

گورنر ہاؤس پشاور میں پریس کانفرنس سے خطاب کرتے ہوئے گورنر خیبر پختوبخوانے صوبہ میں جاری بدامنی اور بالخصوص ضلع کرم میں افسوس ناک واقعات پر تشویش کا اظہار کرتے ہوئے کہا کہ اکتوبر سے لیکر اب تک ضلع کرم میں وزیر اعلیٰ اور نہ ہی کوئی اور قیادت وہاں گئی ہے، خیبرپختونخوا اس وقت جل رہا ہے لیکن صوبائی حکومت اسلام آباد کو جلانے میں لگی ہوئی ہے، انہوں نے کہا کہ ہلال احمر خیبرپختونخوا اور ہلال احمر ضم اضلاع نے ہنگو، دو آبہ اور ٹل میں امدادی کیمپس قائم کئے ہوئے ہیں۔: 500 خاندانوں کو خوراک اور ضروری اشیاء ہلال احمر پاکستان نے پہنچائی ہے، عالمی اداروں سے بھی اپیل کرتا ہوں کہ وہ ہلال احمر کیساتھ ملکر ضلع کرم سے نقل مکانی کرنیوالے متاثرین کی بحالی و آبادکاری کیلئے معاونت کریں، افسوس ہوا کہ صوبائی پی ڈی ایم اے سے امداد طلب کی تو ان کے پاس کچھ موجود نہیں تھا، ایمرجنسی کی صورت میں پی ٹی ایم اے کہتی ہے اپنے لئے بھی کچھ بندوست کریں اور ہمارے لئے بھی، یہ کیسا ریلیف کا ادارہ ہے۔

 

انہوں نے کہا کہ وفاقی حکومت کو منصوبہ بندی کرنی چاہے کہ ریاست پر بار بار حملہ آوروں کو روکا جائے، پولیس اور رینجرز کے جوانوں کو شہید کیا گیا ہے،احتجاج کو روکنے کیلئے رکاوٹیں کھڑی کرنے سے معمولات زندگی اور ر کاروبار شدید متاثر ہوئے لیکن ہر ہفتے لوگ جارہے ہے اور وہاں احتجاج کرتے ہیں، مقدمت بھی درج کئے جاتے ہیں لیکن سمجھ نہیں آتی کہ پھر وہ مقدمات کہاں چلے جاتے ہیں، ملک کو درست سمت پر لے جانے کیلئے باہر سے کوئی نہیں آئے گئے ہم نے خود اپنے حالات ٹھیک کرنا ہوگے،

 

 

 

مستوج بروغل روڈ کی تعمیر کے لئے علاقے کے عوام سراپا احتجاج، ہزاروں لوگوں کا بریپ کے مقام پر احتجاجی مظاہرہ، مستوج بروغل روڈ تعمیر نہ ہونے کی صورت میں چرس کی کاشت دوبارہ شروع کرینگے۔  مقرریں

Posted on October 21, 2024

مستوج بروغل روڈ کی تعمیر کے لئے علاقے کے عوام سراپا احتجاج، ہزاروں لوگوں کا بریپ کے مقام پر احتجاجی مظاہرہ، مستوج بروغل روڈ تعمیر نہ ہونے کی صورت میں چرس کی کاشت دوبارہ شروع کرینگے۔  مقرریں

 

 

مستوج( نمائندہ چترال ٹائمز ) اپر چترال کے عوام مستوج سے لے کر بروغل تک سڑک کی تعمیر کا منصوبہ منظور کرانے کے لئے لنگوٹی کس کر میدان میں کود پڑے۔ مستوج سے لے کر بروغل تک عوام نے تحریک برائے مستوج بروغل روڈ تنظیم کے جھنڈے تلے جمع ہوکر سڑک کی تعمیر کے لئے باقاعدہ جدوجہد کرکے حکومت کو اس طرف راغب کرنے کا اعلان کیا۔ بریپ کے مقام پرہزاروں افراد جمع ہوکر حکومت کے سامنے مطالبہ پیش کرنے کے بعد اس منصوبے کو اپنے لئے موت وحیات قرارد یا ا ور اس کی خاطر کسی بھی قربانی دینے کے عزم کا اظہار کیا۔ مستوج، لاسپورا ور یارخون یونین کونسلوں کے نمائندوں نے حکومت پر واضح کیاکہ یہ مکمل طور پر ایک غیر سیاسی پلیٹ فارم ہے کیونکہ سڑک کا نہ ہونا اس علاقے کی پسماندگی اور عوام کی غربت کا بنیاد ی سبب ہے۔

 

 

احتجاجی جلسے سے مہمان خصوصی معروف ماہرتعلیم شیرولی خان اسیر،صدرمحفل ضلعی صدرپی ٹی آئی اپرچترال شہزادہ سکندرالملک،مستوج بروغل روڈ تحریک کے صدر سید مختارعلی شاہ ایڈوکیٹ،سراج علی خان ایڈوکیٹ،عزیزاحمد،کرم علی سعدی،احمدمحمدعلی ،(ر)منیجرشیرنادر ،محمدشریف ،قاری احتشام الحق،محمدوزیر،میررحیم خان ،رحمت ولی ،ظاہرالدین،موسی نبی،تنویراحمد،شیرنواز،احمدخان اوردوسروں نے خطاب کرتے ہوئے کہاکہ سابق ریاست چترال کے دور میں یہ علاقے بھنگ کی کاشت اور پیدوار کے لئے مشہور تھا جسے بعد میں عوام نے حکومت کی طرف سے متبادل وسائل کی فراہمی کے وعدوں پر ختم کردیا لیکن حکومت نے اس عہد کو پورا نہیں کیا اور کوئی متبادل روزگار کے ذرائع فراہم نہیں کئے۔؎

 

 

وادی یارخون کے باسیوں کاکہناہے کہ پاکستان بننے سے پہلے اور بعد میں جرنیل ایوب خان کے دور تک چترال میں چرس لوگوں کا ذرائع معاش ہوا کرتا تھا۔ لوگ کاشت کرتے تھے اور فروخت کرکے پیسہ کماتے تھے۔ لیکن حکومتی وعدہ لفظوں کی حد تک رہا جو شر مندہ تعبیر نہ ہو سکا۔ انہوں نے کہاکہ مستوج سے لے کر بروغل کے قرمبرہ تک یہ علاقہ سیاحوں کے لئے جنت سے کم نہیں مگر سڑک نہ ہونے کی بنا پر یہاں سیاحت بالکل نہ ہونے کے برابر ہے جبکہ پوری دنیا میں بروغل کا قرمبرہ جھیل مشہور ہے۔ اگر اس منصوبے کو حکومت نے فوری طور پر خصوصی اور ہنگامی بنیادوں پر منظوری نہیں دی تو علاقے کے عوام احتجاج کے طور پر بھنگ کا کاشت دوبارہ کرنے پر مجبور ہوں گے اور پرزور عوامی تحریک برپا کریں گے۔

 

 

انہوں نے کہاکہ بروغل پاس سے لے کر مستوج تک یہ علاقہ ایک تاریخی اہمیت کا حامل ہے اور زمانہ قدیم میں سنٹرل ایشیاء سے سفر حج کے قافلے بھی یہیں سے گزرتے تھے اور یہی تجارتی راستہ بھی تھا۔ یہ علاقہ دھاتی اور غیر دھاتی معدنیات سے ڈھکا ہوا ہے لیکن ٹرانسپورٹیشن کا انتظام نہ ہونے کی وجہ سے اس سے فائدہ اٹھانا ممکن نہیں ہے اور ہم خزانے کا مالک ہونے کے باوجود غریب چلے آرہے ہیں۔

 

 

مقریرین نے کہاکہ مستوج سے بروغل تک کا علاقہ زرعی لحاظ سے کئی خصوصیات کا حامل ہے اور خصوصاً سیب اس علاقے کی پہچان ہیں اور حال ہی میں چیر ی کے باغات بھی لگائے جارہے ہیں جبکہ بروغل اور اپر یارخون میں لوگ کاشت کاری نہیں کرتے بلکہ علاقے کی موسمی حالات کو سامنے رکھتے ہوئے یاک پال کر نقد رقم حاصل کرتے ہیں۔

 

 

وادی یارخون نے مکینوں نے درجنوں گاڑیوں اورسینکڑوں موٹرسائیکلوں میں ریلی کی شکل میں آکرہزاروں کی تعداد میں جلسے میں شرکت کی ۔حاضرین نے عہدکیاکہ مستوج بروغل روڈ کے خواب کوحقیقت میں بدلنے کے لئے جانوں کی قربانی سے بھی دریغ نہیں کریں گے۔

 

 

انہوں کہاکہ مستوج بروغل روڈ جغرافیائی لحاظ سے انتہائی اہمیت کاحامل ہے اس روڈ کے بننےسے افغانستان ،تاجکستان ،چائنا اوردوسرے ہمسایہ ممالک کے ساتھاقتصادی اور تجارتی روابط مزیدمستحکم ہوگا۔اوران دورافتادہ اور پسماندہ علاقوں کے غربت میں بھی کمی آئے گی۔مظاہرین نے مستوج بروغل روڈپرباقاعدہ کام شروع کرنے تک اپنے پرامن احتجاجی مظاہرہ جاری رکھنے کااعلان کیا۔

 

 

 

 

بزمِ درویش ۔ شرم نہیں آتی – حصہ دوئم۔ تحریر:پروفیسر محمد عبداللہ بھٹی

Posted on October 3, 2024October 3, 2024

بزمِ درویش ۔ شرم نہیں آتی – حصہ دوئم۔ تحریر:پروفیسر محمد عبداللہ بھٹی

ستر سالہ بوڑھا پیر اپنی بیس سالہ نو جوان خوبصورت مریدنی کے ہمراہ میرے سامنے بیٹھا تھا اور مجھ سے فرمائش کر رہا تھا کہ اِس کو شادی کے لیے راضی کریں اور ساتھ ہی نکاح کے انتظامات بھی کریں میں حیرت سے کبھی بوڑھے پیر صاحب کو اور کبھی خوبرو جوان مریدنی کو دیکھ رہا تھا پیر صاحب پچھلی چند ملاقاتوں میں روحانیت تصوف عشق الٰہی کے بہت بڑے دعوے دار تھے آج ان کے اندر کا بھیڑیا سامنے آگیا تھا پیر صاحب ہوس بھری نظروں سے اپنی مرید کو دیکھتے کبھی میری طرف میں پیر صاحب سے کسی ایسے عمل کی بلکل بھی توقع نہیں کرر ہا تھا جوان لڑکی سے چالیس سال بڑا بوڑھا پیر شادی کا تقاضہ کر رہا تھا پیر صاحب کے انگ انگ سے ہوس بد کرداری چھلک رہی تھی میں تنقیدی نظروں سے پیر صاحب اور رحم بھری نظروں سے جوان معصوم لڑکی کو دیکھ رہا تھا جس کو پیر صاحب نے اپنی لچھے دار باتوں میں خوب الجھا کر شادی کے لیے راضی کیا تھا

 

پیر صاحب بتانے لگے کہ یہ لڑکی لاہور کے کالج میں زیر تعلیم ہے ہاسٹل میں رہتی ہے اِس کے تمام اخراجات میں پورے کر تا ہوں اِس طرح لڑکی بیچاری پیر صاحب کی احسان مند بھی تھی یہی مجبوری تھی جو پیر صاحب کیش کرانے پر اُتر آئے تھے میں جو پیر صاحب کی کمپنی اور گفتگو کو پہلے انجوائے کیا کرتا تھا آج مجھے پیر صاحب سے گھن آرہی تھی کہ یہ بھی بد کردار نکلا ایک معصوم جوان بچی کو ٹریپ کر کے میرے پاس لے آیا ہے پیر صاحب فرمانے لگے لڑکی کو روحانیت تصوف کا بہت شوق ہے میں نے اِس کو آپ کی کتابیں بھی دی ہیں اِس کو آپ سے ملنے کا بہت شوق تھا میں نے اِس کو آپ کا موبائل نمبر بھی دے دیا ہے یہ آپ کو کال کر لیا کرے گی آپ نے اِس کے سوالوں کے جوا ب دینے ہیں اور اگلے مہینے ہمارے نکاح کا بندوبست کریں بہت ساری باتیں کرنے کے بعد پیر صاحب چلے گئے لیکن میرے دماغ کو سوالوں کی فیکٹری بنا گئے بلکہ میں بہت افسردہ ہو گیا تھا کہ یہ بھی بد کردار عورت باز ہی نکلا ساتھ ہی میرے دل میں یہ خواہش بار بار جنم لے رہی تھی کہ کسی طرح اِس معصوم بچی کو پیر کے پنجرے سے بچانے کی کو شش کرو اگلے دن پیر صاحب کا مجھے فون آیا پروفیسر صاحب آپ ہمارے یار ہیں آپ کے ذمے جو کام لگایا ہے

 

اِس کو ایمانداری سے پورا کرنا ہے تو میں تجسس بھرے لہجے میں بولا پیر صاحب آپ ستر سال کے بوڑھے شخص وہ جوان لڑکی آپ کیسے اِیسی لڑکیوں کو اپنے جال میں پھانستے ہیں تو پیر صاحب نے زور دار قہقہ لگایا اور بولے یار تم خشک مزاج ہو ابھی جوان بھی ہو تم تو بیکار زندگی گزار رہے ہو بھلا جوان لڑکی کے بغیر بھی کوئی زندگی ہو تی ہے جب اللہ تعالی نے ہمیں مریدوں کی فوج دی ہے تو ہم کیوں نہ اِن سے فائدہ اٹھائیں پروفیسر صاحب آپ کو بھی وہ راز طریقہ بتاتا ہو ں جس کے ذریعے میں جوان لڑکیوں کو قابو کرتا ہوں میں حیرت سے بولا جی فرمائیں تو بوڑھا پیر بولا ہمارے پاس جو عورتیں آتی ہیں بہت ساری تو خود ہی راضی ہو جاتی ہیں جو راضی نہیں ہوتیں ان پر زور لگانا پڑتا ہے اُس کے بھی بہت سارے طریقے ہیں جو کبھی مل کر بتاؤں گا اِس لڑکی کا طریقہ یہ ہے کہ میرے مریدوں میں اگر کوئی لڑکی جو ابھی بچی ہو ئی ہے میں اُس کے خاندان کی کمزوری کو دیکھتا ہوں اگر وہ غریب ہیں تو کام آسان ہو جاتا ہے میں اپنی مرضی کا شکار دیکھ کر انہیں کہتا ہوں یہ بچی بہت عقل مند ذہین ہے اِس کو خوب تعلیم دلاؤ لاہور یا ملتان میں اچھی یونیورسٹی کالج میں داخل کراؤ فیس اور ہاسٹل کا خرچہ میں دوں گا

 

پھر اِس بچی کو پیسے دینے کے بہانے میں جا کر ملتا ہوں اُس کو تحفے کھانے کھلاتا ہوں بار بار مل کر اپنی لچھے دار باتوں سے قابو کر تاہوں یہ عورت کی فطرت ہے جو اُس کی بہت کیئرکرتا ہے اچھا رویہ اُس کی مدد خواہش پوری کرتا ہے یہ آٹو میٹک طور پر اُس شخص سے متاثر اور قریب ہو جاتی ہے اِس طرح میں اپنے مقصد میں کامیاب ہو جاتا ہوں روپے کی مجھے کمی نہیں میں اپنی دولت کے بل بوتے پرجوان بچیوں کو تعلیم کا جھانسہ دے کر قابو کر تا ہوں پھر لونڈی ازم کنیز بنا کر اپنا من خوش کرتا ہوں جو لونڈی ازم پر تیار نہ ہو اُس کو نکاح کا ڈرامہ کر کے اپنی خواہش پوری کر تا ہوں پیر صاحب اپنی گندی بد کرداری والی باتیں اور طریقہ واردات بتا رہے تھے مجھے بہت دکھ کہ کس طرح یہ اپنے مریدوں کی غربت خرید کر اپنی ہوس پوری کر تا ہے میں نے فیصلہ کیا کہ جس لڑکی کو یہ میرے پاس لے کر آیا ہے اُس کو اِس کے چنگل سے آزاد کر انا ہے اِس کے لیے مجھے بار بار اُس لڑکی سے ملنا تھا اب میں اُس لڑکی کے فون کا انتظار کر نے لگا چند دن بعد ہی اُس بچی کا فون آگیا

 

اُس نے کہا سر میں آپ سے ملنا چاہتی ہوں تو میں نے کہابیٹی آپ میری بیٹیوں کی طرح ہو آجاؤ پھر وہ مقررہ وقت پر آگئی تو میں نے اُس کی تاریخ پیدائش جان کر پوری مہارت علم الاعداد دست شناسی کو استعمال میں لاتے ہوئے اس کی شخصیت کے بارے میں فطرت مزاج کے بارے میں بتایا تو وہ قائل ہو گئی کہ مجھے تھوڑی بہت روحانیت آتی ہے دوسرا میں نے اُس پہلی ملاقات میں ہی کہہ دیا کہ تم میری بیٹی ہو میں تمہاری بہت عزت احترام کرتا ہوں چند ملاقاتوں کے بعد ہی لڑکی کا دماغ بدلنا شروع ہو گیا اُسے اصل اور نقل روحانیت کا فرق واضح ہو گیا تو ایک دن میں نے اُسے کہا دیکھو بیٹی تم پیر صاحب کے جال سے نکل آؤ تو وہ بولی میں پہلے بھی اُس کے قابو میں نہیں آئی تھی لیکن اپنے تعلیمی اخراجات کی وجہ سے چپ تھی تو میں نے کہا اللہ تمہارے اخراجات پورے کرے گا تم اُن کی فکر نہ کرو اِس طرح لڑکی نے پیر صاحب کو مکمل انکار کر دیا پیر صاحب نے اُس کو بہت قابو کر نے کی کو شش کی اِس دوران پیر صاحب کو شک پڑگیا کہ میں نے لڑکی کا دماغ صاف کیا ہے لہذا آج پیر صاحب اپنی ناکامی اور لڑکی کے انکار کا غصہ مجھ پر نکالنے آگئے تھے

 

جب پیر صاحب خوب آگ اگل چکے تو میں بولا پیر صاحب ہمیں شرم نہیں آتی کہ یہ مرید لوگ غلاموں کی طرح ہماری خدمت کرتے ہیں بہترین چیزیں ہمیں گفٹ دیتے ہیں والدین سے زیادہ ہماری عزت کرتے ہیں سر جھکائے غلاموں کی طرح کھڑے رہتے ہیں اللہ رسول ؐ کے بعد ہمیں عزت اور مقام دیتے ہیں لیکن ہمیں بلکل شرم نہیں آتی اِن کی دولت کو تو لوٹتے ہیں اِن کی عزتوں کو بھی اپنی ذاتی جاگیر سمجھ کر استعمال میں لاتے ہیں یہ بھول جاتے ہیں کہ رب کائنات کا یہ نظام ہے کہ یہاں جو کاشت کرو گے وہی کاٹو گے ہمیں شرم نہیں آتی آپ پیر صاحب چلے جائیں آج کے بعد میرے پاس آنے کی ضرورت نہیں تو پیر صاحب ناراض ہو کر چلے گئے تو میں نے لمبے لمبے سانس لئے آسمان کی طرف دیکھا اور التجا کی اے میرے رب تم ناراض نہ ہونا مجھے کسی کے ناراض ہونے کی فکر نہیں ہے۔

 

 

\

امریکا کے لیے پاکستان پوسٹ کے پارسلز کی بکنگ بند

Posted on August 5, 2024August 5, 2024

امریکا کے لیے پاکستان پوسٹ کے پارسلز کی بکنگ بند

اسلام آباد(چترال ٹائمزرپورٹ)ڈائریکٹر جنرل پاکستان پوسٹ نے انکوائری رپورٹ میں انکشاف کیا ہے کہ امریکا کے لیے پاکستان پوسٹ کے پارسلز کی بکنگ بند کر دی گئی ہے۔انکوائری رپورٹ میں کہا گیا ہے کہ امریکی شپنگ کمپنیوں کو معاوضے کی عدم ادائیگی کے باعث بکنگ بند ہوئی۔رپورٹ کے مطابق آرڈر کینسل ہونے سے پاکستانی مصنوعات کی امریکا میں تجارت بند ہونے لگی ہے، امریکا کے لیے پارسلز کی بکنگ بند ہونے سے لاکھوں ڈالرز کا نقصان ہو رہا ہے۔اس حوالے سے تاجر برادری کا کہنا ہے کہ امریکا کے سوا برطانیہ اور دیگر ممالک کو پارسلز اور ڈاک کی بکنگ جاری ہے۔ تاجروں نے حکومت سے مطالبہ کرتے ہوئے کہا کہ پاکستان پوسٹ کے ذریعے امریکا کے لیے سامان کی ترسیل یقینی بنائے۔

 

 

بیوروکریسی میں بڑے پیمانے پر تبادلے، ڈپٹی کمشنرزاپراور لوئیر چترال تبدیل، عبد الاکرم ڈپٹی کمشنرکوہاٹ تعینات

Posted on July 18, 2024July 18, 2024

بیوروکریسی میں بڑے پیمانے پر تبادلے، ڈپٹی کمشنرزاپراور لوئیر چترال تبدیل، عبد الاکرم ڈپٹی کمشنرکوہاٹ تعینات

چترال ( نمائندہ چترال ٹائمز ) صوبائی حکومت نے بڑے پیمانے پر بیوروکریسی کے تبادلوں اور تعیناتیوں کے احکامات جاری کی ہے، چترال کے دونوں اضلاع کے ڈپٹی کمشنرز کو بھی تبدیل کردیا گیاہے، ایڈیشنل سیکریٹری ایلمینٹری ایجوکیشن عبدالاکرام ڈپٹی کمشنرضلع کوہاٹ تعینات ہوئے ہیں۔  حسیب الرحمن خان خلیل ڈپٹی کمشنر اپر چترال جبکہ محسن اقبال ڈی سی لوئیر چترال تعینات ہوئے ہیں،اسی طرح ایڈیشنل ڈپٹی کمشنر ڈی آئی خان  طارق محمود ڈپٹی کمشنر لوئیر کوہستان تعیات ہوئے ہیں، باقی کی تفصیل ذیل ہے۔

 

 

 

 

 

اب تک پنجاب سے چترال لائی جانے والی 3492ٹن گندم کی خریداری براہ راست کسانوں سے کی جاچکی ہے، 3900 روپے فی 40کلوگرام گندم کی قیمت خرید ہے جبکہ قیمت فروخت اب بھی 4600روپے فی 40کلوگرام برقرار ہے۔ڈی ایف سی ارشد حسین،

Posted on May 25, 2024May 26, 2024

اب تک پنجاب سے چترال لائی جانے والی 3492ٹن گندم کی خریداری براہ راست کسانوں سے کی جاچکی ہے، 3900 روپے فی 40کلوگرام گندم کی قیمت خرید ہے جبکہ قیمت فروخت اب بھی 4600روپے فی 40کلوگرام برقرار ہے۔ڈی ایف سی ارشد حسین،

چترال ( نمائندہ چترال ٹائمز ) لویر چترال میں محکمہ خوراک کی طرف سے گندم کی خریداری کا عمل شروع ہوچکا ہے اور اب تک پنجاب سے یہاں لائی جانے والی 3492ٹن گندم کی خریداری براہ راست کسانوں سے کی جاچکی ہے۔چترال شہر میں واقع دنین کے مین گودام میں مقامی میڈیا کو تفصیلات بتاتے ہوئے ڈسٹرکٹ فوڈ کنٹرولر ارشد حسین اور اسسٹنٹ فوڈ کنٹرولر ریاض احمدنے کہاکہ اس سال صوبائی حکومت نے براہ راست کسانوں سے گندم خریدنے کا فیصلہ کیاتھا جس کے تحت کسان اپنے گندم کی پیدوار کو محکمہ خورا ک کی کسی بھی گودام میں پہنچائے گا جہاں کوالٹی کی چھان بین کے بعد اس سے گندم خریدا جارہا ہے۔ انہوں نے کہاکہ صوبائی حکومت نے ہر ضلع کی سطح پر ضلعی انتظامیہ، محکمہ زراعت اور دوسرے اسٹیک ہولڈروں پر مشتمل پروکیورمنٹ کمیٹی تشکیل دی ہے جوکہ کوالٹی اور کوانٹٹی دونوں پر نظر رکھتے ہیں۔ انہوں نے کہاکہ چترال میں 3900روپے فی 40کلو گرام یعنی 97روپے فی کلوگرام کے حساب سے گندم کی قیمت خرید مقرر کی گئی ہے۔ انہوں نے کہاکہ عوام میں پائی جانے والی ایک غلط فہمی کی نشاندہی کرتے ہوئے کہاکہ 3900 روپے فی 40کلوگرام گندم کی قیمت خرید ہے جبکہ قیمت فروخت اب بھی 4600روپے فی 40کلوگرام برقرار ہے۔ ڈی ایف سی نے کہا کہ تاریخ میں پہلی مرتبہ ضلعی لیول پر کسان سے براہ راست گندم خریدی جارہی ہے جس سے صوبائی خزانے کو مجموعی طور پر اربوں روپے کی بچت ہوگی جبکہ چترال جیسے دورافتادہ اضلاع میں گندم کی ٹرانسپورٹیشن کی سوفیصد بچت ہورہی ہے۔ انہوں نے کہاکہ اس وقت چترال کے لئے گندم کی پروکیورمنٹ کی حد 9000ٹن مقرر کی گئی ہے۔ اس موقع پر کمیٹی کے رکن محکمہ زراعت کے ڈپٹی ڈائرکٹر رفیق احمد نے کہاکہ گندم کی کوالٹی کو سائنسی خطوط پر چیک کیاجارہاہے جبکہ گندم کے دانوں کے اندر نمی کی موجودگی کا پتہ لگانے کے لئے بھی مشین استعمال کی جارہی ہے۔ کمیٹی کے ممبر اور فلور ملز ایسوسی ایشن کے صدر گل بہار خان بھی اس موقع پر موجود تھے اور گندم کی خریداری کے طریقہ کار پر اطمینان کا اظہار کیا۔

بجلی تقسیم کار کمپنیوں کی صارفین پر مزید 51 ارب روپے کا بوجھ ڈالنے کی درخواست

Posted on May 7, 2024

بجلی تقسیم کار کمپنیوں کی صارفین پر مزید 51 ارب روپے کا بوجھ ڈالنے کی درخواست

اسلام آباد(سی ایم لنکس) بجلی تقسیم کار کمپنیوں نے صارفین سے 51 ارب 88 کروڑ روپے اضافی وصول کرنے کی درخواست کردی جس کے بعد بجلی مزید مہنگی ہونے کا خدشہ پیدا ہوگیا۔ درخواست رواں مالی سال کی تیسری سہ ماہی ایڈجسٹمنٹ کی مد میں میں کی گئی ہے، نیپرا 17 مئی کو اس درخواست کی سماعت کرے گی۔بجلی تقسیم کار کمپنیوں نے درخواست میں کیسپٹی چارجز کی مد میں 31 ارب 34 کروڑ روپے وصول کرنے کی درخواست کی ہے جس میں آپریشنز اینڈ مینٹی ننس کی مد میں 5 ارب 57 کروڑ روپے مانگے گئے۔درخواست منظور ہونے کی صورت میں بجلی مہنگی ہونے کا اطلاق کے الیکٹرک صارفین پر بھی ہوگا تاہم منظوری کا حتمی فیصلہ نیپرا سماعت کے بعد ہوگا۔

ترسیل کے ترقیاتی اور مرمتی کاموں کی وجہ سے پیسکو سوات سرکل میں بجلی کی فراہمی مختلف تاریخوں میں بند رہے گی

Posted on November 14, 2023

ترسیل کے ترقیاتی اور مرمتی کاموں کی وجہ سے پیسکو سوات سرکل میں بجلی کی فراہمی مختلف تاریخوں میں بند رہے گی

پشاور (چترال ٹائمز رپورٹ) بجلی کی ترسیل کے ترقیاتی اور مرمتی کاموں کی وجہ سے سوات سرکل کے مختلف گرڈ سٹیشنز سے بجلی کی فراہمی 16 نومبر سے 30نومبر 2023 کے درمیان مختلف تاریخوں کو صبح آٹھ بجے سے دوپہرتین بجے تک معطل رہے گی۔ پیسکو کہ جانب سے جاری کردہ تفصیلات کے مطابق ٹرانسمیشن لائن کی سالانہ مرمت کی وجہ سے 132 کے وی جی ایس ایس امانکوٹ/مینگورہ، 132کے وی جی ایس ایس خوازہ خیلہ، 132کے وی جی ایس ایس مدین، 132کے وی جی ایس ایس بٹ خیلہ، 132کے وی جی ایس ایس چکدرہ،132کے وی جی ایس ایس درگئی، 132کے وی جی ایس ایس تیمر گرہ/سادھو،132 کے وی جی ایس ایس لال قلعہ، 132 کے وی منڈہ، 66کے وی تیمر، 132 کے وی جی ایس ایس شانگلہ /بشام، 33کے وی تھا کوٹ، 33کے وی پٹن اور 132کے وی جی ایس ایس ڈگر بونیر سے بجلی کی فراہمی16 نومبر سے 30نومبر 2023 کے درمیان مختلف تاریخوں کو صبح آٹھ بجے سے دوپہرتین بجے تک معطل رہے گی۔

 

چیئرمین پی ٹی آئی کا اٹک سے اڈیالہ جیل منتقل نہ ہونے کا فیصلہ

Posted on September 26, 2023

چیئرمین پی ٹی آئی کا اٹک سے اڈیالہ جیل منتقل نہ ہونے کا فیصلہ

اٹک( چترال ٹایمزرپورٹ)پاکستان تحریک انصاف (پی ٹی آئی) کے چیئرمین اور سابق وزیراعظم نے اٹک جیل سے اڈیالہ جیل منتقل نہ ہونے کا فیصلہ کیا ہے۔ذرائع کے مطابق چیئرمین تحریک انصاف نے اٹک سے اڈیالہ جیل منتقلی نہ کرنے کا عدالت کے سامنے بیان دے دیا، چیئرمین تحریک انصاف نے اپنے بیان میں کہا کہ اڈیالہ جیل منتقل نہیں ہونا چاہتا۔سابق وزیراعظم کا کہنا تھا کہ میں اٹک جیل میں ایڈجسٹ ہو گیا ہوں، میں اپنے وکلا سے کہوں گا کہ اڈیالہ جیل میں منتقلی کی درخواست واپس لے لیں۔

 

اسحاق ڈار کیخلاف آمدن سے زائد اثاثہ جات کا ریفرنس کھل گیا

اسلام آباد( چترال ٹایمزرپورٹ)نیب ترامیم کالعدم ہونے کے بعد سابق وزیر خزانہ اسحاق ڈار کے خلاف آمدن سے زائد اثاثہ جات کا ریفرنس کھل گیا۔احتساب عدالت نے سابق وزیر خزانہ اسحاق ڈار کو 10 اکتوبر طلب کرلیا۔ اسحاق ڈار کی 10 اکتوبر کو طلبی کے سمن جاری کر دیے گئے۔احتساب عدالت کے جج محمد بشیر نے احکامات جاری کیے۔نیب آرڈیننس کے بعد احتساب عدالت نے اسحاق ڈار کے خلاف کیس بند کر دیا تھا۔ اسحاق ڈار کے خلاف کیس کا ریکارڈ احتساب عدالت میں ہی موجود تھا۔

 

پاکستان نے اپنا جنگی بحری جہاز “پی این ایس طارق” برطانیہ کو دے دیا

کراچی(سی ایم لنکس)پاکستان نے جذبہ خیرسگالی کے تحت جنگی بحری جہاز“پی این ایس طارق”برطانیہ کے سپرد کر دیا۔ترجمان پاک بحریہ کے مطابق پاک بحریہ نے حکومتی منظوری کے بعد جنگی بحری جہاز پی این ایس طارق برطانیہ کے حوالے کیا۔پی این ایس طارق کی حوالگی کی تقریب لندن میں پاکستانی ہائی کمیشن میں منعقد ہوئی جس کے مہمان خوصی چیف آف دی نیول اسٹاف ایڈمرل محمد امجد خان نیازی تھے۔رائل برطانوی بحریہ کے سابق فرسٹ سی لارڈ اور چیف آف دی نیول اسٹاف ایڈمرل لارڈ ایلن ویسٹ نے بطور گیسٹ آف آنر تقریب میں شرکت کی۔برطانیہ نے پاکستان سے ایمیزون یا طارق کلاس ٹائپ 21 جنگی جہاز کی حوالگی کی استدعا کی تھی۔ پاک بحریہ میں شامل ٹائپ 21 ایمیزون کلاس فریگیٹس 70، 80 کی دہائیوں میں برطانوی شاہی بحریہ کا حصہ رہے۔ ایمیزون کلاس فریگیٹس نے 1982ء میں برطانیہ، ارجنٹائن فاک لینڈ جنگ میں حصہ لیا۔برطانیہ، پاکستان سے جہاز حاصل کر کے فاک لینڈ جنگ کی یادگار کے طور پر رکھنا چاہتا ہے۔ جہاز گلاسگو کے کلائیڈ میری ٹائم ہیری ٹیج سنٹر میں رائل اور پاکستانی بحری افواج کے مشترکہ بحری ورثے کی علامت کے طور پر نمائش کے لیے رکھا جائے گا۔پاک بحریہ میں شامل“پی این ایس طارق”برطانوی ٹائپ 21 ایمیزون یا طارق کلاس سیریز کا آخری جہاز ہے۔ پاکستان نے 90 کی دہائی کے اوائل میں برطانیہ سے 6 ایمیزون کلاس ٹائپ 21 فریگیٹس حاصل کیے۔پاک بحریہ میں جہاز ایچ ایم ایس ایمبسکیڈ کا نام مجاہد اسلام طارق بن زیاد سے منسوب پی این ایس طارق رکھا تھا۔ برطانوی ساختہ ٹائپ 21 طارق کلاس فریگیٹس نے 30 سال تک پاک بحریہ میں کلیدی خدمات سرانجام دیں۔

 

پاپولیشن ویلفیئر ڈیپارٹمنٹ کے اے ایس آر ایچ پراجیکٹ کے تحت ماہر نفسیات سے کونسلنگ کی مفت سہولت کی فراہمی

Posted on June 6, 2023June 6, 2023

پاپولیشن ویلفیئر ڈیپارٹمنٹ کے اے ایس آر ایچ پراجیکٹ کے تحت ماہر نفسیات سے کونسلنگ کی مفت سہولت کی فراہمی

چترال ( نمایندہ چترال ٹایمز) پاپولیشن ویلفئیر ڈیپارٹمنٹ لویر چترال ایڈولیسنٹ سیکسویل ریپروڈکٹیو ہیلتھ (اے ایس آر ایچ) پراجیکٹ کے تحت ژانگ بازار میں واقع ویمن اینڈ چلڈرن ہسپتال کے احاطے میں پہلی مرتبہ خاتون سائیکالوجسٹ عام اور خصوصی طور پر تولیدی صحت سے متعلق خواتین کو درپیش مسائل کے بارے میں کونسلنگ کے لئے موجود ہوتی ہے جس سے پیر سے ہفتے کے دن تک دفتری اوقات کار میں مفت مشورہ لی جاسکتی ہے۔ سوشل موبلائزر شہزادی پروین نے منگل کے روز چترال پریس کلب میں صحافیوں کو اورینٹیشن دیتے ہوئے کہاکہ ویمن اینڈ چلڈرن ہسپتال کے اندر ایک الگ سائڈ میں قائم اے ایس آر ایچ سنٹر میں تولیدی اور نفسیاتی صحت کے بارے میں ماہر نفسیات کی سروسز سے استفادہ کرنے کی ضرورت ہے تاکہ ہر لحاظ سے ایک صحت مند معاشرہ وجود میں آئے۔

 

انہوں نے پراجیکٹ کے مقاصد پر تفصیلی روشنی ڈالتے ہوئے کہاکہ نوعمری میں تولیدی مسائل کا درپیش آنا بہت ہی نازک اور حساس معاملہ ہے جس میں جسمانی صحت کے ساتھ ساتھ پیچیدہ نوعیت کے ذہنی ونفسیاتی مسائل بھی شامل ہوتے ہیں جوکہ دوررس اثرات کے حامل ہوتے ہیں۔ انہوں نے کہاکہ پاپولیشن ویلفئیر ڈیپارٹمنٹ نے اس اہمیت کے پیش نظر اے ایس آر ایچ پراجیکٹ لانچ کرکے عمومی طور پر تولیدی صحت اور خصوصی طور پر نوعمری میں تولیدی صحت کے مسائل کو حل کرنے کے لئے مختلف مقامات پراس نوعیت کے سہولت فراہم کررہی ہے جس کے بارے میں خاص وعام کو جامع معلومات کی فراہمی کو یقینی بنائی جارہی ہے۔ انہوں نے عوام پر زور دیا کہ اس سہولت سے فائدہ اٹھانے کے لئے وہ اپنے قرب وجوار میں ضرورت مند خواتین کو ویمن اینڈ چلڈرن ہسپتال آنے کی رہنمائی کرے۔ انہوں نے کہاکہ ڈسٹرکٹ پاپولیشن ویلفئیر افیسر لویر چترال اصغر خان کی خصوصی ہدایت پر ضلعے تمام پبلک سیکٹر اداروں میں اورینٹیشن سیشن کے لئے ذریعے اس سہولت کے بارے میں معلومات شئیر کی جارہی ہیں تاکہ کوئی بھی ضرورت مند خاتون اس سہولت سے محروم نہ رہے۔

پیٹرول کی قیمت میں اتنا زیادہ فرق تو نہیں پڑے گا لیکن کمی ضرور ہو گی، احسن اقبال

Posted on May 28, 2023May 28, 2023

پیٹرول کی قیمت میں اتنا زیادہ فرق تو نہیں پڑے گا لیکن کمی ضرور ہو گی، احسن اقبال

اسلام آباد(سی ایم لنکس)روس سے تیل پاکستان آنے پر پیٹرولیم مصنوعات کی قیمتوں میں کمی کے حوالے سے قیاس آرائیوں کا ایک نہ رکنے والا سلسلہ جاری ہے اور کہا جا رہا ہے کہ پاکستان میں پیٹرول کی قیمت 100 روپے کم ہو جائے گی۔انہی قیاس آرائیوں کے حوالے سے وفاقی وزیر احسن اقبال نے وائس آف امریکہ کو دیے گئے اپنے انٹرویو میں سوال کا جواب دیتے ہوئے کہاکہ پیٹرول کی قیمت میں 100 روپے تک کی کمی، اتنا زیادہ فرق تو نہیں پڑے گا لیکن پیٹرول کی قیمت ضرور کم ہو گی۔ان کا کہنا تھا کہ ابھی روسی تیل کی ایک کم مقدار پاکستان پہنچ رہی ہے، چھ ماہ یا سال بعد جب روس سے زیادہ تیل پاکستان آئے گا تو اس سے پاکستان میں پیٹرول کی قیمت میں کمی کرنے میں مدد ملے گی۔ان سے سوال کیا گیا تھا کہ کیا روس سے تیل آنے کے بعد پاکستان میں پیٹرول کی قیمت میں 100 روپے کمی کی جائے گی، جس پر انہوں نے تردید کر دی۔

 

آئندہ بجٹ میں عوامی ریلیف کیلئے اقدامات یقینی بنا رہے ہیں، تیل کی قیمتوں میں کمی کے اثرات کو عام آدمی تک پہنچانے کیلئے اقدامات کر رہے ہیں،وزیر اعظم محمد شہباز شریف

لاہور(چترال ٹائمزرپورٹ)وزیر اعظم محمد شہباز شریف نے کہا ہیکہ آئندہ بجٹ میں عوامی ریلیف کیلئے اقدامات یقینی بنا رہے ہیں،ملکی معیشت کو مشکل حالات سے استحکام کی طرف لے کر آئے،تیل کی قیمتوں میں کمی کے اثرات کو عام آدمی تک پہنچانے کیلئے اقدامات کر رہے ہیں۔ہفتہ کو وزیر اعظم آفس کے میڈیا ونگ سے جاری بیان کے مطابق وزیر اعظم سے وزیر مملکت برائے خزانہ عائشہ غوث پاشا نے ملاقات کی۔وزیرِ مملکت نے وزیرِ اعظم کو آئندہ بجٹ پر پیش رفت، عوامی ریلیف اور ملکی مجموعی اقتصادی صورتحال کے حوالے سے آگاہ کیا۔وزیرا عظم نے کہا کہ آئندہ بجٹ میں عوامی ریلیف کیلئے اقدامات یقینی بنا رہے ہیں،ملکی معیشت کو مشکل حالات سے استحکام کی طرف لے کر آئے،مشکلات کے باوجود معاشی ٹیم نے معیشت کے استحکام کیلئے محنت جاری رکھی جو لائقِ تحسین ہے،ملکی تاریخ کے سب سے بڑے سیلاب میں متاثرین کو مالی مدد و بحالی کی مد میں بڑا ریلیف پیکیج دیا۔وزیرِ اعظم نے کہاکہ تیل کی قیمتوں میں کمی کے اثرات کو عام آدمی تک پہنچانے کیلئے اقدامات کر رہے ہیں۔