چترال کے عوام پیار کی زبان کے علاوہ اور کچھ نہیں جانتی …شاہد خان افریدی
چترال (نمائندہ چترال ٹائمز)پاکستان کرکٹ ٹیم کے سابق کپتان شاہد خان افریدی نے کہا ہے کہ چترال کے عوام پیار کی زبان کے علاوہ اور کچھ نہیں جانتی اور انہی اوصاف کی وجہ سے چترال کرونا کے مہلک وائرس سے اب تک پاک ہے۔ انہوں نے وہ ایک عرصے سے چترال اور اس سے ملحق علاقوں کو دیکھنا چاہتے تھے لیکن موقع نہیں ملا تھا اور اب لاک ڈاؤن کے بحران کے موقع پر انہیں یہاں اپنے بھائیوں سے ملنا نصیب ہوا اور اللہ کا شکر ہے کہ وہ خالی ہاتھ نہیں آرہے بلکہ کچھ لے کر آگئے ہیں جس میں کمشنر ملاکنڈ ڈویژن اور فورسز کا بھرپور تعاون حاصل رہا۔ شاہد افرید ی کے کہاکہ چترال کے عوام نے انہیں جوعزت دی ہے، وہ بہت کم جگہوں میں مل سکتا ہے اور اس موقع پر اپنی خوشی کو وہ الفاظ میں بیان کرنے سے قاصر ہے۔ انہوں نے کہاکہ وہ حکومت سے درخواست کریں گے کہ کھیلوں کے حوالے سے یہاں دستیاب ٹیلنٹ کو ترقی دینے میں کوئی کسر نہ چھوڑے اور بذات خود وہ چترال کے ساتھ ایک مستقل تعلق جوڑ کر یہاں کرکٹ، ایجوکیشن اور ہیلتھ کے میدان میں کچھ کرنے کا ارادہ رکھتے ہیں۔
ان خیالات کا اظہارانھوں نے جمعرات کے روز شاہد خان افریدی فاونڈیشن کے زیراہتمام چترال کے پریڈ گراونڈ میں کرونا وائر س کی وجہ سے لاک ڈاؤن کے متاثرہ 500خاندانوں میں فوڈ پیکج تقسیم کرنے کی تقریب سے خطاب کرتے ہوئے کہی۔ تقریب میں کمشنر ملاکنڈ ڈویژن ریاض خان محسود، ڈپٹی کمشنر چترال لویر نوید احمد، ڈسٹرکٹ پولیس افیسر وسیم ریاض خان، کمانڈنٹ چترال سکاوٹس کرنل علی ظفر اورڈپٹی کمشنر اپرچترال شاہ سعود ودیگربھی موجود تھے۔ شاہد افریدی نے متاثرین میں فوڈ پیکج تقسیم کرتے ہوئے انہوں نے نہایت نظم وضبط کا مظاہر ہ کرنے اور سماجی فاصلہ برقرار رکھنے کے اصول پر عمل پیر ا ہونے پر چترالی عوام کو تعریف کی۔
اس سے قبل کمشنر ملاکنڈ ڈویژن ریاض خان محسودنے کہاکہ شاہد افریدی وہ واحد شخصیت ہیں جوکہ ان حالات میں کراچی سے آکر سوات سے لے کر چترال تک عوام کی خدمت کررہے ہیں۔ انہوں نے کہاکہ شاہد افریدی قومی ہیرو ہیں جن کے اس جذبے کو دیکھ کر مخیر حضرات آگے آکر اس کارخیر میں حصہ لیتے ہوئے عوام کو درپیش مصائب میں کمی لائیں گے۔ انہوں نے کہاکہ کرونا کے عالمی وبا کے حوالے سے دنیا کے سامنے کامیابی اور ناکامی کی دونوں مثالیں موجود ہیں اور چین کی کامیابی میں ان کا نظم وضبط اور حکومتی احکامات پر مکمل عملدرامد کا ہاتھ ہے۔ا نہوں نے چترالی عوام پر زور دیاکہ وہ ڈسپلن کا ایسا مظاہرہ کریں کہ پورے پاکستان کے لئے مثال ہو۔ کمشنر ملاکنڈ نے کہاکہ مختلف پروگرامات کے تحت متاثرہ عوام کے ساتھ امداد کا سلسلہ جمعرات کے دن سے ہوگیا ہے۔
ڈپٹی کمشنر چترال لویر نوید احمد نے کہاکہ چترال کو کرونا وائرس سے پاک رکھنے میں چترال کے عوام کاتعاون اور مثبت روئیے کا ہاتھ ہے جوکہ اس سلسلے میں وضع کردہ اختیاط پر عمل کرتے ہیں۔ انہوں نے کہاکہ چترال میں داخل ہونے والے ہر ایک کو چودہ دنوں تک قرنطینہ میں رکھاجاتا ہے تاکہ متاثرعلاقوں سے یہاں وائرس کے پھیلنے کا خطرہ باقی نہ رہے۔ انہوں نے شاہد افریدی فاونڈیشن کی طرف سے چترالی عوام کی امداد کو سراہتے ہوئے کہاکہ ضلعی انتظامیہ ہر ایک مخیر کو امدادی اشیاء کی ترسیل اور تقسیم کے سلسلے میں مکمل تعاون کرنے کو تیار ہے۔
