اہم عہدوں پر بدعنوان قیادت، گلگت بلتستان کے مستقبل کے لیے ایک سنگین خطرہ – تحریر: اقبال عیسیٰ خان

گلگت بلتستان محض ایک جغرافیائی اکائی نہیں بلکہ بے پناہ قدرتی وسائل، اسٹریٹجک اہمیت اور باصلاحیت انسانی سرمائے کا مرکز ہے۔ تاریخ بتاتی ہے کہ ایسے خطے اگر درست قیادت سے محروم ہو جائیں تو ان کی اہمیت نعمت کے بجائے بوجھ بن جاتی ہے۔ آج گلگت بلتستان اسی نازک موڑ پر کھڑا ہے، جہاں اہم اور فیصلہ ساز عہدوں پر بدعنوان قیادت اس کے مستقبل کو سنگین خطرات سے دوچار کر رہی ہے۔

ایک تجزیہ نگار کی نظر سے دیکھا جائے تو بدعنوان قیادت کا سب سے پہلا نقصان پالیسی سازی میں ظاہر ہوتا ہے۔ پالیسیاں عوامی ضرورت اور طویل المدتی وژن کے بجائے ذاتی فائدے، سیاسی وفاداریوں اور وقتی مفاہمتوں کی بنیاد پر ترتیب دی جاتی ہیں۔ اس کا نتیجہ یہ نکلتا ہے کہ ترقیاتی منصوبے محض اعداد و شمار بن کر رہ جاتے ہیں۔ بجٹ تو خرچ ہو جاتا ہے مگر اثرات زمین پر دکھائی نہیں دیتے، اور یوں عوامی اعتماد مسلسل کمزور ہوتا چلا جاتا ہے۔
عالمی تجربات اس حقیقت کی تصدیق کرتے ہیں۔ ایشیا، افریقہ اور لاطینی امریکہ کے کئی ممالک نے اس وقت ترقی کی راہ اپنائی جب انہوں نے بدعنوان قیادت کے خلاف سخت فیصلے کیے، اداروں کو خودمختار بنایا اور احتساب کو یقینی بنایا۔ اس کے برعکس، وہ ریاستیں جہاں بدعنوانی کو نظر انداز کیا گیا، وہاں سیاسی عدم استحکام، معاشی جمود اور سماجی انتشار نے جنم لیا۔ گلگت بلتستان کے لیے یہ عالمی اسباق محض مطالعہ کا موضوع نہیں بلکہ عمل کی فوری دعوت ہیں۔

بدعنوان قیادت اداروں کو افراد کے تابع کر دیتی ہے۔ میرٹ کمزور پڑتا ہے، سفارش مضبوط ہو جاتی ہے، اور نظام رفتہ رفتہ اپنی افادیت کھو دیتا ہے۔ اس صورتحال کا سب سے بڑا نقصان نوجوانوں کو اٹھانا پڑتا ہے۔ جب تعلیم، محنت اور صلاحیت کے باوجود دروازے بند نظر آئیں تو مایوسی جنم لیتی ہے، اور یہی مایوسی ہجرت، بے روزگاری اور سماجی بے چینی کی شکل اختیار کر لیتی ہے۔ کوئی بھی معاشرہ اس طرح اپنی بہترین افرادی قوت کو ضائع کرنے کا متحمل نہیں ہو سکتا۔

ایک اور تشویشناک پہلو عوام اور ریاستی اداروں کے درمیان اعتماد کا بحران ہے۔ جب انصاف طاقتور کے لیے مخصوص اور قانون کمزور کے لیے سخت ہو جائے تو ریاست کی اخلاقی بنیادیں متزلزل ہو جاتی ہیں۔ گلگت بلتستان جیسے حساس اور سرحدی خطے میں یہ عدم اعتماد نہ صرف داخلی استحکام بلکہ قومی مفادات کے لیے بھی خطرے کی گھنٹی ہے۔

تاہم تصویر کا دوسرا رخ بھی موجود ہے۔ دنیا کی کامیاب قومیں ہمیں یہ سبق دیتی ہیں کہ تبدیلی کا آغاز ہمیشہ شعور سے ہوتا ہے۔ جب عوام سوال پوچھنے لگیں، شفافیت کا مطالبہ کریں اور قیادت کو جواب دہ بنائیں تو نظام خود کو درست کرنے پر مجبور ہو جاتا ہے۔ گلگت بلتستان کو آج ایسی قیادت درکار ہے جو اختیار کو اعزاز نہیں بلکہ ذمہ داری سمجھے، جو ذاتی مفاد کے بجائے اجتماعی مستقبل کو ترجیح دے، اور جو اداروں کو کمزور نہیں بلکہ مضبوط بنائے۔
یہ کالم کسی فرد یا جماعت کے خلاف نہیں بلکہ ایک طرزِ فکر کے خلاف ہے۔ بدعنوانی کوئی تقدیر نہیں بلکہ ایک رویہ ہے، اور رویے بدلنے کے لیے اجتماعی ارادہ درکار ہوتا ہے۔ اگر آج ہم نے درست سمت کا انتخاب کر لیا تو گلگت بلتستان نہ صرف اپنے چیلنجز پر قابو پا سکتا ہے بلکہ ایک روشن، باوقار اور مستحکم مستقبل کی بنیاد رکھ سکتا ہے۔

فیصلہ عوام کے ہاتھ میں ہے۔ تاریخ یہی بتاتی ہے کہ قومیں نعروں سے نہیں، کردار، احتساب اور بااصول قیادت سے بنتی ہیں۔ گلگت بلتستان کے مستقبل کا سوال بھی یہی ہے کہ کیا ہم بدعنوانی کو معمول سمجھ کر قبول کریں گے، یا ایک بہتر کل کے لیے آج کھڑے ہوں گے۔ فیصلہ آج کرنا ہوگا، کیونکہ وقت کسی کا انتظار نہیں کرتا۔

گلگت بلتستان: طاقت کا توازن اور پائیدارامن – خاطرات : امیر جان حقانی

ہم سب اچھی طرح جانتے ہیں کہ گلگت بلتستان ہماری ماں دھرتی ہے۔ یہاں کے پہاڑ، جنگلات ، دریا، وادیاں اور بستیاں ہمارے مشترکہ جذبات، مسائل اور مفادات کی گواہ ہیں۔ میں یہ بات درجنوں نہیں، بلکہ سینکڑوں بار مختلف زاویوں، مکالموں اور تحریروں میں بیان کر چکا ہوں۔ میرے بیشتر کالمز اور کئی تقاریر اسی موضوع پر گواہ ہیں، اور گلگت بلتستان میں قیامِ امن پر میں نے پانچ سو صفحات پر مشتمل تحقیقی مقالہ بھی تحریر کیا۔

لیکن آج ایک بار پھر، پوری ایمانداری، درد اور خلوصِ نیت کے ساتھ یہ بات دہرانا چاہتا ہوں کہ

“اگر گلگت بلتستان میں پائیدار امن مطلوب ہے تو اس خطے میں طاقت کا توازن (Balance of Power) قائم کرنا ناگزیر ہے۔”

طاقت کے توازن کے بغیر یہ خطہ کبھی بھی حقیقی امن کا گہوارہ نہیں بن سکتا۔

طاقت کے توازن کی ضرورت

میں نے اس موضوع پر ہر برادری کو نہایت اخلاص کے ساتھ مخاطب کیا ہے،
اسماعیلی بھائیوں کو بھی، اہلِ تشیع کو بھی، اور اہلِ سنت کو بھی۔

اسماعیلی برادری سے میں نے ہمیشہ یہ عرض کیا کہ آپ تعلیم، صحت اور جدید شعبوں میں دوسری برادریوں کو ساتھ لے کر چلیں۔
جب جب تقریر و تحریر کے ذریعے یہ بات کہی تو تعریف ضرور ہوئی، واہ واہ کے تبصرے بھی آئے، لیکن عملی طور پر وہ اپنی کمیونٹی کو ہی آگے لے کر بڑھے۔

انہوں نے تعلیم، صحت، اور جدید سکلز میں نمایاں ترقی تو کی، لیکن دوسرے طبقات کو پروجیکٹ سطح پر شامل نہیں کیا۔ نتیجہ یہ ہوا کہ ایک طرف ترقی تھی، مگر دوسری طرف فاصلے بڑھ گئے۔

اہلِ تشیع برادری کو، انہیں کالمز میں ، میں نے کئی بار توجہ دلائی کہ 1990ء سے 2017ء تک گلگت بلتستان میں درجنوں امن معاہدے اور ضوابطِ اخلاق طے پائے۔ لیکن افسوس کہ ان امن معاہدات پر عملدرآمد اور ترویج کے لیے وہ برادری، جو سب سے منظم اور بڑی ہے، آگے نہ بڑھ سکی۔ یہی وہ کوتاہی تھی جس نے خطے میں طاقت کا بیلنس بگاڑا اور بدامنی نے جنم لیا۔

اہلِ سنت برادری کو میں نے اپنی بیسیوں تحریروں میں یہ باور کرانے کی کوشش کی کہ ترقی، تعلیم، صحت، جدید سکلز، اتحاد و تنظیم اور اجتماعی شعور کے بغیر کوئی قوم آگے نہیں بڑھ سکتی۔ لیکن بجائے “لبیک” کہنے کے، مجھے تنقید اور طعن و تشنیع کا نشانہ بنایا گیا۔
سچ کہوں تو بعض لوگوں نے مجھے گالی بنا کر رکھ دیا۔
حالانکہ میرا مقصد ہمیشہ اصلاح، توازن اور خیرخواہی رہا ہے۔

میں آج پھر، دکھ، خلوص اور سچائی کے ساتھ اپنی تینوں برادریوں سے مخاطب ہوں

1. میرے اسماعیلی بھائیو!

جنت نظیر خطہ گلگت بلتستان میں طاقت کے توازن اور امن کے قیام کے لیے ضروری ہے کہ آپ تعلیم، صحت اور جدید سکلز میں دیگر برادر کمیونٹیز کو عملاً شامل کریں۔ یہ کام آپ کو اپنے پچاسویں امام کی رہنمائی، مشاورت اور سرپرستی میں بڑے پیمانے پر کرنا چاہیے۔

2. اہلِ تشیع کے اکابرین اور نوجوانو!

آپ چونکہ گلگت بلتستان کی سب سے منظم اور بڑی برادری ہیں، لہٰذا امن معاہدات و ضوابط کی ترویج، تنفیذ اور عملی شکل دینے میں پہل آپ کو کرنی چاہیے۔ آپ کو امن کی خاطر جتھوں کی یرغمالیت سے نکل کر ایک بہترین اور منظم کمیونٹی کا ثبوت دینا ہوگا

3. اہلِ سنت کے علماء، نوجوانو اور بزرگو!

آپ تعلیم، صحت اور جدید سکلز میں اسماعیلی کمیونٹی سے سیکھیں، اور اتحاد، سیاسی آگہی اور تجارت کے حوالے سے اہلِ تشیع کا طرزِ عمل اپنائیں۔یہی باہمی سیکھنے اور اشتراک کا راستہ، توازن اور استحکام کی ضمانت بن سکتا ہے۔

اگر ہم نے تعلیمی، معاشی اور سماجی بنیادوں پر طاقت کا توازن قائم کر لیا، تو گلگت بلتستان میں سیاسی استحکام بھی آئے گا،اور یہی استحکام امن و خوشحالی کی ضمانت بنے گا۔

لیکن اگر ہم نے اس پہلو کو نظرانداز کیا، تو یاد رکھئے یہ خطہ ہمیشہ بدامنی، تقسیم اور عدم استحکام کا شکار رہے گا، اور ہم سب تباہی اور محرومی کے دائرے میں گھومتے رہیں گے۔

لہٰذا، آئیے سنجیدگی سے غور کریں، کیونکہ ہر فیلڈ میں طاقت کا توازن ہی گلگت بلتستان کے امن، ترقی اور بقا کی کنجی ہے۔

میں جانتا ہوں ،آپ سب اس وقت ذہنی و قلبی تناؤ کے دور سے گزر رہے ہیں، یہ ماننا پڑے گا کہ حالات نے اضطراب اور بےچینی کی چادر تانی ہوئی ہے۔
مگر خدارا، کبھی سکون دل سے بیٹھ کر غور کرنے میں کیا مضائقہ ہے؟

یہ خطہ، یہ وقت، یہی موقع شاید ہمیں سوچنے، سمجھنے اور سنبھلنے کا اشارہ دے رہا ہے۔

کیا میرا یہ درد محض الفاظ کا جادو ہے، یا واقعی سچائی کی ایک چمک اس میں موجود نہیں؟

گلگت بلتستان: وفاداری کے بدلے میں انصاف کی ضرورت – خاطرات: امیرجان حقانی

گلگت بلتستان کے لوگوں کے لیے ایک اہم سوال یہ ہے کہ ان کا وطن کہاں ہے؟ اگرچہ وہ خود کو پاکستان کا حصہ تصور کرتے ہیں اور پاکستان کے ساتھ اپنی وابستگی اور محبت کا اظہار کرتے ہیں، لیکن حقیقت یہ ہے کہ گلگت بلتستان ان کا اصل وطن ہے۔ یہ وہ سرزمین ہے جہاں وہ پیدا ہوئے، پلے بڑھے، اور جہاں ان کے آباواجداد کی قبریں ہیں۔ یہ وہ جگہ ہے جہاں کی مٹی، دریا، پہاڑ اور ہوائیں ان کی شناخت کا حصہ ہیں۔گلگت اور بلتستان کے لوگوں کا ہزاروں سال سے اپنی وطن مالوف کیساتھ گہرا تعلق اور جذباتی وابستگی ہے۔اور یہ وابستگی کسی مفاد یا معاہدہ کا مرہون منت نہیں، یہ مکمل فطری ہے۔

پاکستان کی ریاست سے ان کا تعلق ایک مفاداتی تعلق ہے، یہ تعلق ریاست پاکستان کے وجود ممیں آنے کے بعد بنا ہے۔ پاکستان ایک قومی ریاست ہے جس کا وجود 1947 کو ممکن ہوا ہے۔اور گلگت بلتستان کا پاکستان کے ساتھ ساتھ تعلق نومبر 1947 اور اگست 1948 کو کچھ امیدوں، مفادات اور ھمدردی اور دینی جذبے کی بنیاد پر قائم ہوا ہے۔

قومی ریاستوں کے ساتھ ان کے شہریوں اور یونٹس کا تعلق آئینی معاہدہ کے تحت طے پاتا ہے۔ اس معاہدے کے تحت ریاست اپنے شہریوں کے حقوق تسلیم کرتی ہے، اور بدلے میں شہری اپنی کچھ آزادیاں اور وفاداریاں ریاست کے ساتھ جوڑتے ہیں۔ تاہم، گلگت بلتستان کی ایک منفرد حیثیت ہے، کیونکہ وہ اب تک پاکستان کے آئینی ڈھانچے میں شامل نہیں ہے۔ یہ ایک معاہدہ کی غیر موجودگی کا نتیجہ ہے، جو گلگت بلتستان کے لوگوں کو تحریری حقوق سے محروم رکھتا ہے اور ان کی وفاداریوں کو تسلیم کرنے میں تاخیر کا باعث بنتا ہے۔ گلگت بلتستان کا پاکستان کے آئینی ڈھانچے میں شامل نہ ہونے کی کچھ وجوہات بین الاقوامی ہیں، کچھ انڈیا کی ہٹ دھڑمی ہے اور کچھ اپنوں کی بے رعنائیاں ہیں۔

اس صورتحال میں، یہ ریاست پاکستان کی ذمہ داری ہے کہ وہ گلگت بلتستان کے عوام کے دلوں کو جیتے اور ان کی خدمات اور قربانیوں کا اعتراف کرے۔ صرف وفاداری اور قربانیوں کی توقع کرنا اور بدلے میں لولی پاپ دینا ناانصافی ہے۔ گلگت بلتستان کے لوگ پاکستان کے لیے جانیں قربان کرتے ہیں، لیکن ان کے بدلے میں ان کے حقوق کی عدم تسلیم، ان کی قربانیوں کو بے وقعت بناتا ہے۔

ریاست پاکستان کو اس معاملے کو سنجیدگی سے لینا ہوگا اور گلگت بلتستان کے لوگوں کو وہ سہولیات اور مراعات فراہم کرنی ہوں گی جو وہ مستحق ہیں۔ یہ نہ صرف ان کے حقوق کا اعتراف ہوگا بلکہ ان کی وفاداریوں کا صحیح معنوں میں اعتراف بھی ہوگا۔ پاکستان کے ساتھ گلگت بلتستان کا تعلق مضبوط تر تبھی ہوسکتا ہے جب ریاست اپنے شہریوں کی فلاح و بہبود کو اولین ترجیح دے اور ان کے جذباتی تعلقات کو مدنظر رکھتے ہوئے ان کی ضروریات کا خیال رکھے۔

گلگت بلتستان کے لوگوں کی دلجوئی اور ان کی فلاح و بہبود کے لیے ضروری ہے کہ ان کو قانونی، آئینی اور عملی طور پر پاکستان کے شہری کے طور پر تسلیم کیا جائے۔ یہ ایک نہایت اہم اقدام ہوگا جو نہ صرف گلگت بلتستان کے لوگوں کو ان کا حق دلائے گا بلکہ ریاست پاکستان کی ساکھ کو بھی مستحکم کرے گا۔ اگر سردست ایسا کرنا ناممکن ہے تو بہترین سہولیات اور گڈ گورننس اور گلگت بلتستان کے لوگوں کی معیار زندگی بہتر بنانے میں تو انڈیا یا بین الاقوامی طاقتیں رکاوٹ نہیں، لہذا اس پر فوکس کیا جائے۔

یہ وقت ہے کہ ریاست پاکستان گلگت بلتستان کے عوام کے ساتھ اپنے تعلقات کو از سر نو دیکھے اور ان کو وہ مقام دے جو وہ حق رکھتے ہیں۔ صرف زبانی وفاداریوں کی توقع رکھنا اور ان کی خدمات کو نظرانداز کرنا ایک ایسی ناانصافی ہے جو ریاست کی ساکھ اور گلگت بلتستان کے عوام کی عزت نفس کو مجروح کرتی ہے۔ اس کے لیے فوری طور پر عملی اقدامات کی ضرورت ہے تاکہ دونوں طرف سے ایک مضبوط اور پائیدار رشتہ قائم ہو سکے۔

گلگت بلتستان؛  پچھتر سال کی ترقی دو سال میں . شاہ عالم علیمی