گلگت بلتستان: چترال کے کھلاڑیوں کا کمال، نلتر ونٹر اسپورٹس میں میڈلز کی برسات
گلگت بلتستان ( نمائندہ چترال ٹائمز)پاکستان ونٹر اسپورٹس فیڈریشن اور پی اے ایف کے تعاون سے نلتر، گلگت بلتستان میں منعقدہ ونٹر اسپورٹس مقابلہ جات 2026 میں سرائے شندور ہرچین لاسپور کی ٹیم نے شاندار کارکردگی کا مظاہرہ کرتے ہوئے نہ صرف خیبرپختونخوا بلکہ چترال کا نام بھی روشن کر دیا۔ آئس ہاکی کے سنسنی خیز مقابلوں میں سرائے شندور ٹیم نے غیر معمولی کھیل پیش کرتے ہوئے فائنل تک رسائی حاصل کی اور دفاعی چیمپئن جی بی اسکاؤٹس کے خلاف سخت مقابلے کے بعد سلور میڈل اپنے نام کیا۔
یہ پہلا موقع ہے کہ خیبرپختونخوا کی کوئی ٹیم ونٹر اسپورٹس کے اس بڑے ایونٹ کے فائنل تک پہنچی، جسے کھیلوں کے حلقوں میں ایک تاریخی کامیابی قرار دیا جا رہا ہے۔ سرائے شندور ہرچین لاسپور کی ٹیم نے ہندوکش سنو اسپورٹس کلب کے پلیٹ فارم سے ایونٹ میں شرکت کی اور شاندار کارکردگی کے ذریعے صوبے کی نمائندگی کو ایک نئی شناخت دی۔
میڈیا سے گفتگو کرتے ہوئے سرائے شندور آئس ہاکی ٹیم کے سرپرست انور آصف اقبال یفتالی نے بتایا کہ ٹیم کی عمدہ کارکردگی کے نتیجے میں چھ کھلاڑیوں کو جی بی اسکاؤٹس اور پاکستان ایئر فورس کی جانب سے کھیلوں کی بنیاد پر ملازمتوں کی آفرز موصول ہوئی ہیں، جو نہ صرف ٹیم بلکہ پورے خطے کے لیے ایک بڑی کامیابی اور اعزاز ہے۔ انہوں نے ہندوکش سنو کلب کے چیئرمین شہزادہ حسام الملک کا خصوصی شکریہ ادا کرتے ہوئے کہا کہ ان کی فراہم کردہ سہولتوں اور پلیٹ فارم نے کھلاڑیوں کو اپنی صلاحیتیں دکھانے کا موقع فراہم کیا۔
آصف اقبال یفتالی نے کہا کہ یہ کامیابی لاسپور اور چترال میں آئس ہاکی اور اسکیئنگ کے فروغ کے لیے کی جانے والی مسلسل محنت کا نتیجہ ہے۔ واضح رہے کہ وہ شندور کی تاریخ میں پہلی بار آئس ہاکی متعارف کرانے اور اس کھیل کی بنیاد رکھنے میں مرکزی کردار ادا کرتے آ رہے ہیں۔
دوسری جانب ونٹر اسپورٹس مقابلہ جات 2026 میں خیبرپختونخوا کی دیگر ٹیموں نے بھی شاندار کارکردگی دکھائی۔ چترال ایڈوینچر اسکول کی ٹیموں نے آصف مراد اور علی نواز کی قیادت میں مختلف مقابلوں میں متعدد میڈلز اپنے نام کیے۔ مردوں کے کرلنگ مقابلوں میں خیبرپختونخوا کی ٹیم نے برونز میڈل حاصل کیا، جس میں ذوالفقار علی، حسنین کریم، آفاق افضل اور شفیق عالم نے نمایاں کردار ادا کیا۔
خواتین کے مقابلوں میں بھی خیبرپختونخوا کی کھلاڑیوں نے بہترین کھیل پیش کیا۔ آئس ہاکی میں مجموعی طور پر چھ سلور میڈلز جیتے گئے جبکہ اسپیڈ اسکیٹنگ میں ثانیہ حسین نے گولڈ میڈل حاصل کر کے صوبے کا نام روشن کیا۔ ریلے مقابلوں میں طیبہ رحمت اور علینہ بہادر نے سلور میڈل حاصل کیا، جبکہ خواتین کی کرلنگ ٹیم نے برونز میڈل جیتا جس میں مشودہ اکبر، طیبہ رحمت، علینہ بہادر اور علیزہ شامل تھیں۔
ونٹر اسپورٹس مقابلہ جات 2026 میں مجموعی طور پر خیبرپختونخوا کی ٹیم نے ایک گولڈ، آٹھ سلور اور آٹھ برونز میڈلز حاصل کیے، جس پر کھلاڑیوں، کوچز اور منتظمین کو کھیلوں کے حلقوں کی جانب سے بھرپور خراجِ تحسین پیش کیا جا رہا ہے۔ ماہرین کے مطابق یہ کامیابی صوبے میں ونٹر اسپورٹس کے فروغ اور نوجوان کھلاڑیوں کے لیے ایک روشن مستقبل کی نوید ہے۔
