گلگت بلتستان میں ٹیکس کا نفاذ، انجمن تاجران سراپا احتجاج، جی بی کے تمام اضلاع میں شدید احتجاج ہوگا، مسعود الرحمن
گلگت بلتستان (نمائندہ چترال ٹائمز ) مرکزی انجمن تاجران گلگت بلتستان کے جنرل سیکریٹری مسعود الرحمان نے اپنے بیان میں حکومت کی جانب سے ٹیکس نوٹسز کے اجرا کو ظالمانہ اقدام قرار دیتے ہوئے شدید احتجاج کا اعلان کیا ہے۔ انہوں نے کہا کہ عوامی ایکشن کمیٹی کی طویل تحریک کے نتیجے میں حکومت نے ٹیکس معطل کرتے ہوئے ایک کمیٹی تشکیل دی تھی جس میں اسمبلی کے ممبران اور وزراء شامل تھے، لیکن حکومت نے اپنے ہی احکامات کی خلاف ورزی کی ہے۔
مسعود الرحمان نے کہا کہ اگر حکومت اپنی پالیسیوں کو درست نہ کیا تو اس کے خلاف پہلے سے زیادہ شدید احتجاج ہوگا۔ آئندہ ہفتے تمام اسٹیک ہولڈرز، بشمول مرکزی انجمن تاجران، ہوٹل ایسوسی ایشن، ٹرانسپورٹ ایسوسی ایشن، اور دیگر تنظیموں کے ساتھ مشاورت کے بعد ایک جامع لائحہ عمل طے کیا جائے گا، جس میں شٹر ڈاؤن ہڑتال، پہیہ جام، جلسے، جلوس اور ریلیاں شامل ہوں گی۔ یہ احتجاج گلگت بلتستان کے تمام دس اضلاع میں ہوگا۔
انہوں نے حکومت کو خبردار کیا کہ وہ فوری طور پر ٹیکس کے نفاذ کو واپس لے، بصورت دیگر شدید عوامی ردعمل کا سامنا کرنا پڑے گا۔