خیبر پختونخوا حکومت نے ساٹھ سال یا زائد عمر کے شہریوں کو محکمہ سماجی بہبود کے ساتھ اپنی رجسٹریشن کرانے کی ہدایت کی ہے تاکہ وہ سینئر سٹیزن ایکٹ مجریہ 2014کے تحت حاصل مراعات سے مستفید ہوسکیں۔رجسٹریشن کرنے والے بزرگ شہریوں کو صحت کارڈز جاری کئے جائیں گے ۔اسپتالوں میں ان کے لئے الگ کاونٹراور وارڈ قائم کیا جائے گا۔ بیماری کی تشخیص، میڈیکل ٹیسٹوں ، آپریشنز اور ادویات کی خریداری میں بھی ان کے ساتھ خصوصی رعایت کی جائے گی۔ایکٹ کے تحت بزرگ شہریوں کی فلاح و بہبود کے لئے لائحہ عمل مرتب کرنے کے لئے چودہ رکنی کمیٹی قائم کی گئی ہے۔وزیرسماجی بہبود کی سربراہی میں اس کمیٹی میں مختلف محکموں کے انتظامی سیکرٹری، محکمہ سماجی بہبود کے افسران ، بزرگ شہریوں اور غیرسرکاری تنظیموں کے نمائندے شامل ہیں۔بزرگ شہریوں کو قانون کے تحت بہت سی مراعات دی جائیں گی عجائب گھروں، لائبریریوں، پارکوں اور تفریحی مقامات پر ان کا داخلہ مفت ہوگا۔نادار بزرگ شہریوں کے لئے وظائف مقرر کئے جائیں گے۔بزرگ شہریوں کے لئے مختلف شہروں میں کلب قائم کئے جائیں گے جہاں اخبارات و رسائل اور بزرگ شہریوں کی تفریح کا دیگر سامان مہیا کیا جائے گا۔ پیرانہ سالی کی زندگی بہتر طریقے سے گذارنے کے لئے انہیں تربیت دی جائے گی۔انہیں بزرگ شہریوں سے روابط قائم کرنے کے لئے پلیٹ فارم بھی فراہم کیا جائیگا۔ادب و ثقافت سے تعلق رکھنے والے افراد اورمساجد کے آئمہ کرام کے لئے وظائف مقرر کرنے کے علاوہ دینی مدارس کو انفراسٹرکچر بہتر بنانے کے لئے مالی معاونت کی فراہمی اور بزرگ شہریوں کی فلاح و بہبود کے اقدامات حکومت کے مستحسن فیصلے ہیں۔تاہم یہ سارے اچھے اقدامات اس وقت شروع کئے گئے جب حکومت کی آئینی مدت پوری ہونے میں صرف تین ماہ کا عرصہ رہ گیا۔وزراء نے الوداعی ملاقاتیں شروع کردی ہیں اور نگران حکومت کے قیام کے لئے صلاح مشورے جاری ہیں۔ عوامی فلاح و بہبود کے یہ منصوبے دو تین سال پہلے شروع کئے جاتے تو اب تک یہ اداروں کی بنیادیں مستحکم ہوچکی ہوتیں۔تاہم دیر آید ، درست آید کے مصداق عام شہریوں کی فلاح کے لئے شروع کئے گئے اقدامات قابل تقلید ہیں۔ ان اقدامات سے فلاحی معاشرے کے قیام میں مدد ملے گی۔اور قومی وسائل سے معاشرے کے پسماندہ طبقے بھی مستفید ہوسکیں گے جو اب تک حکمرانوں اور افسر شاہی کے لئے ہی مختص تھے۔خدشہ ہے کہ عوامی فلاح کے ان منصوبوں سے جن حلقوں کو ذاتی فوائد نہیں مل رہے۔ وہ انہیں التواء میں ڈالنے کی ہر ممکن کوشش کریں گے۔ کیونکہ اب تک یہی کچھ ہوتا رہا ہے۔ صوبائی حکومت اگر اپنے عوامی منصوبوں سے سیاسی فائدہ اٹھانا چاہتی ہے تو اسے افسر شاہی پر تکیہ کرنے کے بجائے ان منصوبوں کی نگرانی کا کام خود سنبھالنا ہوگا۔ تاکہ عوام تک بروقت ان کے ثمرات پہنچ سکیں۔اپنی حکومت کے آخری دنوں میں حکومت نے بہت سی ایسی سکیمیں شروع کی ہیں جن کے نتائج عام انتخابات سے قبل دکھائی دینے کے بہت کم ہی امکانات ہیں۔حکومت لامحالہ ان کا کریڈٹ لینے کی کوشش کرے گا۔ لیکن رائے دہندگان صرف ان منصوبوں کو کریڈٹ میں شمار کرتے ہیں جن کی نشانیاں زمین پر نظر آجائیں۔ارباب اختیار اگر چاہتے ہیں کہ سیاسی تبدیلی کے باوجود ان کے فلاحی منصوبے جاری رہیں تو اس کے لئے جامع قانون سازی ناگزیر ہے۔ مشاہدے میں آیا ہے کہ حکومت اپنے سیاسی مفاد کی خاطر کروڑوں کی لاگت کے منصوبے شروع کرتی ہے۔ حکومت بدلنے کی وجہ سے یہ ادھورے منصوبے ترک کئے جاتے ہیں اور قوم کے کروڑوں کے وسائل ضائع ہوجاتے ہیں۔ گذشتہ تیس چالیس سال کے دوران صوبے کے طول و عرض میں ایسے ادھورے منصوبوں کی تعداد سینکڑوں میں نہیں۔ بلکہ ہزاروں میں ہے۔ کہیں سکول کا ڈھانچہ بنا ہے۔ کہیں ڈسپنسری، بی ایچ یو یا آر ایچ سی پر آدھاکام ہوا ہے اور فنڈز کی بندش کے باعث بقیہ کام ادھورا چھوڑ دیا گیا۔ ترقیاتی منصوبے عوام کی فلاح و بہبود کے لئے شروع کئے جاتے ہیں۔ اور ہر حکومت کی بنیادی ذمہ داری عوامی بہبود ہے تو قومی وسائل سے شروع کئے گئے منصوبے سیاسی عناد کی بھینٹ کیوں چڑھ جاتے ہیں۔ ان کا بھی حساب کتاب ہونا چاہئے۔

ملک میں عام انتخابات کا سیزن شروع ہونے کے ساتھ سیاسی سرگرمیوں میں بھی تیزی آگئی ہے۔ مختلف مقامات پر شمولیتی جلسے ہورہے ہیں۔ اور اس قسم کے اکثر جلسوں میں دیگر جماعتوں کو مرغوب کرنے کے لئے اپنے ہی کارکنوں کو ٹوپیاں پہنا کر پارٹی میں شامل کرنے کے اعلانات کئے جاتے ہیں اور پارٹی قیادت کی طرف سے بیانات جاری کئے جاتے ہیں کہ فلاں لیڈر کی شمولیت سے ان کی پارٹی میں نئی جان پڑ گئی ہے اور آئندہ انتخابات میں کامیابی یقینی ہوگئی ہے۔ بعض پارٹیوں کی طرف سے یہ دعوے بھی سامنے آرہے ہیں کہ عوام دیگر تمام جماعتوں سے مایوس ہوکر ان کی طرف امید بھری نظروں سے دیکھ رہے ہیں۔کیونکہ عوامی مینڈیٹ سے اقتدار میں آنے والوں نے اپنے ووٹروں کو مایوسی کے سوا کچھ نہیں دیا۔مزے کی بات یہ ہے کہ حکومت پر لعن طعن کے تیر برسانے والے خود بھی حکومت کا حصہ رہے ہیں۔مخلوط حکومت میں نیکی اور بدی کی ذمہ داری اقتدار میں شریک تمام پارٹیوں پر مساوی طور پر عائد ہوتی ہے۔میرا اشارہ خیبر پختونخوا حکومت میں شامل چاروں اتحادی جماعتوں کی طرف ہے۔جہاں 2013سے اب تک تحریک انصاف کے ساتھ جماعت اسلامی، عوامی جمہوری اتحاد اور قومی وطن پارٹی اقتدار میں شریک رہی ہیں۔ حکومتی اتحاد میں شامل بڑی مذہبی جماعت نے جب اپنا وزن مذہبی پارٹیوں کے اتحاد ایم ایم اے کے پلڑے میں ڈالا ۔ تو عوام کو یہ نوید سنانے لگی ۔ کہ خالص سیاسی پارٹیوں نے عوام کو مایوس کیا تھا۔ تاہم دینی جماعتوں کا اتحاد امید کی نئی کرن بن کر افق پر جگمگانے لگا ہے۔ آئندہ حکومت ان ہی کی ہوگی اور وہ عوام کو مایوسیوں کے گرداب سے نکال کر ترقی کی شاہراہ پر گامزن کریں گے۔ کیونکہ ان کے پاس جو روڈ میپ ہے وہ کسی کے پاس نہیں۔اتحادی جماعت کے بدلتے تیور دیکھ کر تحریک انصاف نے بھی قومی سطح پر ہم خیال جماعتوں اور شخصیات سے رابطے شروع کردیئے ہیں۔ عمران خان نے مسلم لیگ ن کے ناراض رہنما اور سابق وزیرداخلہ چوہدری نثار کو پی ٹی آئی میں شامل ہونے کی دعوت دی ہے ۔لیکن ہمیں چوہدری صاحب کی دال یہاں گلتی نظر نہیں آرہی۔کیونکہ چوہدری صاحب ضرورت سے زیادہ سچ بولتے ہیں اور سیاست میں حد سے زیادہ سچ بولنا خطرناک گردانا جاتا ہے۔خان صاحب پیپلز پارٹی کو اپنا ہم خیال سمجھتے ہیں۔ لیکن پی پی پی اور پی ٹی آئی میں سیاسی اتحاد کی راہ میں زرداری سب سے بڑی رکاوٹ نظر آتے ہیں۔ پی ٹی آئی کے قائد شریف برادران کو منطقی انجام تک پہنچانے کے بعد زرداریوں سے نمٹنے کا اعلان پہلے ہی کرچکے ہیں۔اس لئے قومی سطح پر دوسری اور تیسری بڑی سیاسی قوت شمار کی جانے والی ان پارٹیوں کی جوڑی بنتی نظر نہیں آرہی۔کہتے ہیں کہ سیاست میں کوئی بات حرف آخر نہیں ہوتی۔ کل کے دوست آج کے حریف بنتے ہیں۔ اور آج کے حلیف کل خم ٹھونک کر مد مقابل آجائیں تو لوگ انگشت بدندان رہ جاتے ہیں اور سیاست دان کہتے ہیں کہ یہی تو جمہوریت کا اصل حسن ہے۔ سیاسی پارٹیوں کی طرف سے انتخابی اتحاد اور سیٹ ایڈجسٹمنٹ کے صلاح مشورے بھی ہورہے ہیں۔اور اس سیاسی جوڑ توڑ کو ملک و قوم کی ضرورت اور جمہوری کی بقاء سے تعبیر کیا جاتا ہے۔انتخابی سال کا ایک فائدہ تو یہ ہے کہ انتخابی مہم کے سلسلے میں ان کے منتخب نمائندے طویل روپوشی کے بعد منظر عام پر آجاتے ہیں۔ لوگوں کی غمی خوشی میں شرکت کرتے ہیں ۔ نماز جنازہ میں اگلی صف پر یہی سیاسی لیڈر اب نظر آنے لگے ہیں۔ سال دوسال پرانی فوتگیوں پر بھی فاتحے پڑھے جاتے ہیں۔ اور جہاں موقع ملے تو اپنی جیب سے دو چار ہزار روپے خرچ کرنے سے بھی نہیں ہچکچاتے۔ لیکن لوگ بھی بڑے چالاک ہوگئے ہیں۔وہ سیاست دانوں سے حتی الوسع مالی فائدہ اٹھانے کی کوشش کرتے ہیں۔ ان کا موقف ہے کہ موصوف کونسا اپنی جیب سے خرچ کر رہا ہے۔ یہ عوام کا مال ہی ہے جسے وہ پانچ سال تک جمع کرتا رہا۔ ہمارے سیاست دان سیدھے سادے ہیں۔ وہ سمجھتے ہیں کہ وہ عوام کے نجات دہندہ ہیں۔حالانکہ حقیقت اس کے برعکس ہے۔ عوام کسی سیاسی پارٹی کی طرف آس لگائے بیٹھے ہیں نہ کسی سیاسی ومذہبی اتحاد سے انہیں بھلے کی امید ہے۔ کیونکہ سیاسی اکھاڑے میں موجود ہر جماعت کو حکومت، سیاست اور خدمت کرنے کا موقع ملتا رہا ہے۔ کوئی بھی عوام کے اعتماد پر پورا نہیں اتر سکا۔جو لوگ پیسے لے کر سیاسی جلسوں میں شرکت کرتے ہیں۔ وہ دراصل سیاست دانوں سے انتقام لے رہے ہوتے ہیں۔ اس لئے بڑے جلسوں کو انتخابات میں کامیابی کی ضمانت قرار نہیں دیا جاسکتا۔ہمارے لیڈروں کو اب یقین کرلینا چاہئے کہ ان کے رائے دہندگان اب سیاسی طور پر کافی عاقل بالغ ہوچکے ہیں۔ انہیں شیشے میں اتار کر بوتل میں بند کرنا اب آسان نہیں رہا۔

مشہور مفکر تھامس مالتھس کہتے ہیں کہ اگر روئے زمین پر انسانی آبادی کابوجھ بڑھ جائے اور زمین کے وسائل اس آبادی کے لئے کم پڑنے لگیں تو آبادی کی شرح افزائش میں کمی کے لئے منصوبہ بندی ناگزیر ہوتی ہے۔ اگر انسان خود اپنی تعداد محدود رکھنے کا نہیں سوچیں گے تو قدرت کی طرف سے آفات کے ذریعے زمین پر انسانوں کا بوجھ کم کرنے کا اہتمام کیا جاتا ہے۔ زلزلے آتے ہیں جس میں سینکڑوں ہزاروں لوگ مارے جاتے ہیں۔ سیلاب اور سمندری طوفان آتے ہیں جس میں بڑی تعداد میں ہلاکتیں ہوتی ہیں یا پھر قوموں کے درمیان جنگیں چھڑ جاتی ہیں جس سے بڑے پیمانے پر ہلاکتیں ہوجاتی ہیں اور زمین پر بوجھ کم ہوتا ہے۔ضروری نہیں کہ ہم تھامس مالتھس کے اس نظریے کو پتھر کی لکیر سمجھ کر اسے درست تسلیم کریں۔ لیکن یہ نظریہ عقلی دلائل کی بنیاد پر قائم کیا گیا ہے۔ اس لئے اس نظریئے سے سرمنہ انحراف بھی نہیں کیا جاسکتا۔قیام پاکستان اور آج کے دور میں ملکی آبادی کا جائزہ لیں تو یہ حقیقت عیاں ہوتی ہے کہ سائنس اور ٹیکنالوجی سمیت ز ندگی کے کسی دوسرے شعبے میں ہم نے اگر غیرمعمولی ترقی نہ بھی کی ہو۔ لیکن آبادی بڑھانے میں ہم نے سب کو پیچھے چھوڑ دیا ہے۔ 1947میں مشرقی اور مغربی پاکستان کی مجموعی آبادی سات کروڑ تھی۔ جس میں موجودہ پاکستان کا حصہ ساڑھے تین کروڑ تھا۔ 1971میں ہماری آبادی چھ کروڑ اور مشرقی پاکستان کی سات کروڑ ہوگئی تھی۔ آج پاکستان کی آبادی سات گنا اضافے کے ساتھ 22کروڑ تک جاپہنچی ہے۔ جبکہ دو سے چار اور چار سے آٹھ کی شرح سے بڑھتی ہوئی آبادی کے مقابلے میں ہمارے وسائل میں بہت معمولی اضافہ ہوا ہے۔ ترقیافتہ قومیں باقاعدگی منصوبہ بندی کے تحت آگے بڑھتی ہیں۔ وہاں ہر آٹھ سے دس سال بعد مردم شماری ہوتی ہے۔ جس سے انہیں انسانی وسائل کا اندازہ ہوتا ہے اسی اندازے کو بنیاد بناکر پانچ سالہ ، دس سالہ اور بیس سالہ ترقیاتی منصوبے بنائے جاتے ہیں۔ قومی ترقی کے لئے جو بھی لائحہ عمل تیار کیاجائے۔ اس میں کوئی سیاسی مداخلت نہیں ہوتی۔ ہر حکومت اسی لائحہ عمل کی پیروی کو اپنی ترجیحات میں سرفہرست رکھتی ہے۔اگر ترقیاتی پروگرام کو پایہ تکمیل تک پہنچانے کے لئے قرضے بھی لئے جاتے ہیں۔ تو اس کی پائی پائی ترقی پر خرچ ہوتی ہے اور اس قرضے کو واپس کرنے کا شیڈول بنایا جاتا ہے۔جاپان، چین، تائیوان، جنوبی کوریا اور دیگر ممالک کی مثالیں ہمارے سامنے ہیں۔ یہ ممالک انیس سو ساٹھ کے عشرے میں پاکستان سے بھی امداد لیتے تھے۔ تاہم جامع منصوبہ بندی اور اس پر مخلصانہ عمل درآمد کی بدولت آج وہ ترقیافتہ ممالک کی صف میں کھڑے ہیں۔ جبکہ ہم ترقی معکوس کی جانب رواں دواں ہیں۔ جس کی بنیادی وجہ یہ ہے کہ ہم نے قومو ں کے ساتھ قدم ملاکر چلنے کی منصوبہ بندی ہی نہیں کی۔ سکول، اسپتال، سڑکیں، پل اور دیگر منصوبے عوامی ضرورت کے بجائے سیاسی فائدے کو سامنے رکھ کر بنائے جاتے ہیں۔ عوام کو روزگار کی فراہمی میں بھی سیاسی مفادات کو مقدم رکھا جاتا ہے۔ ہر سیاسی حکومت نے قومی اداروں میں اپنے سیاسی مفاد کے لئے تھوک کے حساب سے بھرتیاں کیں۔ پہلے اپنے عزیزوں، رشتہ داروں اور جاننے والوں کو کھپایا۔ پھر ان لوگوں کو بھرتی کیاجن سے سیاسی مفادات وابستہ ہوسکتے تھے۔ آج پاکستان ریلوے، پی آئی اے، سٹیل مل اور دیگر کئی منافع بخش ادارے ملازمین کی فوج ظفر موج کی وجہ سے خسارے میں جارہے ہیں اور قومی خزانے پر ناقابل برداشت بوجھ بن چکے ہیں۔انیس سال کے طویل وقفے کے بعد 2017میں ملک میں مردم شماری ہوئی ہے۔ جس سے یہ اعدادوشمار تو واضح ہوگئے ہیں کہ پاکستان میں کتنے شہریوں کو ایک ڈاکٹر، نرس، استاد، انجینئرکی خدمات میسر ہیں۔ اور بین الاقوامی معیار کیا ہے۔ بائیس کروڑ کی آبادی کو کتنے اسپتالوں، سکولوں، کالجوں، یونیورسٹیوں، فنی تربیت کے اداروں کی ضرورت ہے۔ کتنی آبادی کو بجلی، گیس، صاف پانی، تعلیم اور صحت کی مناسب سہولیات دستیاب ہیں۔قانون ساز اداروں میں آبادی کے تناسب سے کتنے منتخب ارکان ہونے چاہئیں۔ اگرچہ حالیہ مردم شماری کے نتائج پر بھی لوگوں کو تحفظات ہیں۔ تاہم کچھ ٹھوس معلومات اور اعدادوشمار اس مردم شماری کے طفیل حاصل ہوئے ہیں۔ اگر پاکستان کو ترقی کی راہ پر آگے لے جانا ہے تو مردم شماری کے نتائج کی بنیاد پر قومی منصوبہ بندی کرنی ہوگی۔قومی و صوبائی اسمبلی کی نشستوں کی تعداد بڑھانی ہوگی ۔ شہری اور دیہی علاقوں میں حلقہ بندیاں آبادی کے ساتھ رقبے ، جغرافیائی پوزیشن اور عوامی ضرورت کے مطابق ہونی چاہیں۔زمینی حقائق کو ماضی کی طرح نظر انداز کرکے سیاسی فائدے کو پیش نظر رکھ کر منصوبہ بندی کی گئی تو ہم آگے بڑھنے کے بجائے مزید پسماندگی کا شکار ہوجائیں گے۔