نوائے سُرود –  کہیں ہم مجرم تو نہیں ؟  – شہزادی کوثر

” اسراف جرم ہے اور غربت میں اسراف دہرا جرم ہے ” مختار مسعود کی زبانی انقرہ میں ایوان صدر کی گیلری میں بچھے ہوئےپرانے اور گھسے ہوئے قالین نے اہل پاکستان کے نام جو پیغام دیا تھا اس پر کوئی کان دھر کر عمل کرنے کی کوشش کرتا تو آج ہمارے ملک کا وہ حشر نہ ہوتا جو ہم اپنی آنکھو ں سے دیکھ کر بھی کچھ نہیں کر پا رہے ۔ زندہ قومیں عمل اور جرات سے پہچانی جاتی ہیں اشیا اور تعیش سے نہیں ۔  ہمارا رویہ اوپر سے نیچے تک ایسا دوغلا اور دکھاوے پر مبنی ہو گیا ہے کہ کہیں بھی صداقت اور اصلیت کی جھلک نظر نہیں آرہی۔ پاکستان وجود میں آنے سے لے کر آج تک ملک کو خوشحالی کے راستے پہ ڈالنے کے بجائےاسے بے رحمی سے لوٹنے کا جو سلسلہ شروع ہو چکا تھا اس پر بغیر کسی تعطل کے عمل جاری ہے ۔ کوئی نہیں بتا سکتا کہ اسے کب ایک صحیح اور ہمدرد حکمران نصیب ہو گا اورلٹے پٹے عوام کو منصف رہنما میسر ائیں گے۔

اس میں قصور بخت کا ہے ،حالات کا ہے یا عوام کا ۔۔۔ اس کا فیصلہ اگر کر بھی لیا جائے تو کوئی خاص فرق نہیں پڑے گا جتنی بے دردی کا مظاہرہ یہاں کیا گیا ہے اس کی مثال مشکل ہے۔ ملکی خزانے پر جتنا بوجھ غیر ضروری اور غیر اہم اخراجات کی مد میں ڈالا جارہا ہے اس سے سب واقف ہیں اگر غیر ملکی ٹھیکہ دار بھی پاکستان آئے تواسے سرکاری پروٹوکول کے ساتھ قیمتی تحائف دئیے جاتے ہیں تفریحی مقامات کی سیر کروائی جاتی ہے ، مہمان کے اعزاز میں دئیے جانے والے ظہرانہ اور عشائیہ پرسینکڑوں دیگر مہمانوں کو مدعو کر کے موجودہ قرضے میں اضافہ کرنے کی کوئی کسر نہیں چھوڑی جاتی۔ بے وقوفی اور اسراف کے کس کس انداز کو روایتی مہمان نوازی کے نام پر جائز قرار دیتے ہیں اس پر حیرت ہوتی ہے۔ وزیرخزانہ کا عہدہ ایسا ہے کہ اسے “مثل مار سر گنج” ملکی خزانے کی حفاظت کرنا پڑتی ہے لیکن ہمارے ہاں ریت ہی الگ ہے، خزانہ خالی کر کے “اپنی ” دولت بیرون ملک منتقل کرنے کا جو طریقہ صاحبان اختیار کو آتا ہے کوئی دوسرا اس کی دھول کو بھی نہیں پہنچ سکتا ۔اس وجہ سے ہر بچہ مقروض پیدا ہوتا ہے اس کی ناتواں کمر پر قرض کی اینٹ اس وقت رکھی جاتی ہے جب وہ اس کارگہ زیست میں اپنی آنکھ کھولتا ہے گزرتے وقت کے ساتھ سود کے اینٹوں کا نہ ختم ہونے والا ڈھیر اس کی کمر توڑ دیتا ہے ۔وہ غلامی کی نادیدہ زنجیروں میں تب تک جکڑا ہوا رہتا ہے جب تک اس کی سانسوں کی زنجیر ٹوٹ نہیں  جاتی  ،اپنی آخری ہچکی کے ساتھ ہی وہ دنیا کی آلائشوں کے ساتھ ذلت و غلامی کے اس طوق کو اتار پھینکتا ہے جو زندگی بھر اسے دوسری اقوام کے سامنے سر نگوں رہنے پر مجبور کرتا ہے ۔

پاکستان دنیا کی ترقی یافتہ ممالک کی صف میں شامل ہونے کے خواب ہی دیکھ سکتا ہے ۔دولت و ترقی میں نوزائیدہ ممالک بھی آگے نکل چکے ہیں مگر اس کا طبقہ اشرافیہ سرکاری رہائش گاہوں ،سرکاری املاک،گاڑیوں کے استعمال،دیگر تعیش،ٹھاٹ باٹھ،اپنے عزیزوں اور دیگر غیر ملکی مہمانوں پر ناجائز خرچ کرنے میں پیش پیش ہیں ۔ ان سب کے اثرات بلند طبقے سے نچلے طبقے کی طرف بھی اتنی تیزی سے اتے ہیں کہ ہر کوئی دولت عیش و آرام،شوکت و شہرت کے پیچھے بھاگ رہا ہے ۔اس کے حصول کی تمام تر کوشش کرتے ہوئے اکثر اوقات شرعی اور قانونی حدود سے بھی متجاوز ہو جاتا ہے۔یہ سوچ ہمارے ذہنوں سے نکل چکی ہے کہ اپنی ضروریات کو پورا کرنے، اپنے خاندان کی کفالت اور اس کی تعلیم وتربیت کے لئے محنت درکار  ہے نہ کہ دوسروں کو دکھانے اور متاثر کرنے کے لئے کالا دھن جمع کرنے کی ضرورت ۔۔

ہمیں اپنی سوچ بدلنے کرنے کے ساتھ ساتھ خواص کے قدم اکھاڑنے کی ہمت چاہیئے جو پچھلے پچھتر سالوں سے جونک کی طرح ہماری رگوں سے خون چوس رہے ہیں ۔ہمیں بحیثیت عوام اپنا فرض ادا کرنا ہے ہم ان سے پوچھنے کا حوصلہ نہیں رکھتے یہ سب سے بڑی بد بختی ہے کہ حکمران سے سوال کرنے میں ہچکچاہٹ ہو ،جب عوام اپنے حکمران سے پوچھنے کے قابل ہوجائے کہ آپ کے پاس دو چادریں کہا ں سے آ گئیں ؟ تب صحیح معنوں میں عوام اپنا فرض پورا کرے گا ۔چادریں تو دور کی بات یہاں ملک کو کنگال کرنے والوں سے بھی کوئی نہیں پوچھتا بلکہ اسے تخت پہ بٹھایا جاتا ہے۔ ہم گونگے بہرے بنے لُٹ رہے ہیں اور آواز اٹھانے کی جسارت بھی نہیں کر پا رہے۔ طبقہ اشرافیہ سے کسی حاجت کی امیداور ضرورت کی بر آوری کی آس نے ہمیں بے دست و پا کر دیا ہے۔ ہماری حیثیت اپاہچ معذور گونگے کی ہے جو دیکھ تولیتا ہے لیکن کچھ کر پانے کی استطاعت نہیں رکھتا ۔ وہ دن کب آئے گا جب قوم جاگ اٹھے گی ؟  ہم جاگتے تو ہیں مگر صرف ملی نغموں میں ۔۔

غیرت و جرات کا پیکر بھی بن جاتے ہیں اپنے دشمن کو مٹی میں ملانا بھی جانتے ہیں لیکن اپنی قوم کی بنیادیں کھوکھلی کرنے والے دشمنوں سے یا تو واقعی بے خبر ہیں یا جا نتے بوجھتے چشم پوشی کر رہے ہیں ۔اگر واقعی ایسا ہے تو ہمیں جوابدہی کے لئے تیار بھی رہنا ہوگا۔ اگر ہم آزاد ہیں ،ایک قوم ہیں  تو قوم ہونے کا ثبوت بھی دینا ہوگا ۔ ٹی وی پر آکر ایک دوسرے کے خلاف زہر اگلنے اور گالم گلوچ سے اگر معاشی مسائل کا کوئی خاطر خواہ حل نکلتا یا غریب کو دو وقت کی روٹی مل جاتی یا بیمار کو آرام و سکون مل پاتاتو کوئی بات بھی تھی۔۔  ہم کہنے کو قوم ہیں لیکن صرف شاعری کی حد تک یا گنگنانے کے لئے۔۔۔ ہم ایک پرچم تلے جمع بھی ہو جاتے ہیں لیکن سچ پوچھیں تو ہمارے مفادات الگ الگ ہیں ،ہر کوئی ڈیڑھ اینٹ کی مسجد بنانے میں جتا ہوا ہے ،اتحاد و اتفاق سے کام لیتے تو پچھتر سالوں سے ہماری ایک ہی دُہائی نہ ہوتی بلکہ ہم نئے زمانے کا راگ الاپتے ہوئے ستاروں کی رہنمائی کر رہے ہوتے۔۔۔

دنیا کا نظام ازل سے ایک ہی تسلسل سے رواں ہے ۔شب و روز کی تبدیلی ،موسموں کا تغیر۔ مہینوں اور سالوں کا ایک ہی میعاد مقرر میں بدل کر دنیا کا نیا نقشہ پیش کرنا ہمیں پیغام دیتا ہے کہ بدلاو نظام کائنات کا لازمی جزو ہے۔ماہ وسال اور بدلتے اوقات یقین دہانی کرواتے ہیں کہ اگر کسی چیز میں زندگی ہے تواس میں ٹھہراو کبھی نہیں ہو گا کیونکہ ٹھہراو کا مطلب ہے جمود،سکوت اور موت۔۔۔ اس کے بر عکس زندگی اپنے اندر تغیر کی ہزار داستانیں سموئے ہوئے ہے جن سے حیات انسانی میں رنگا رنگی اور خوب صورتی ہے۔ ہر گزرتا سمے ایک رفتار سے اپنی منزل کی طرف بڑھتا جا رہا ہے اس کی راہ میں کوئی بھی رکاوٹ حائل نہیں ہو سکتی چاہے آندھی ہو یا طوفان بادوباراں،سیلاب ہو یا زلزلہ، قدرت کی کوئی طاقت وقت کی رفتار کومدہم نہیں کر سکتی، وقت پہ کسی کا زور نہیں چلتا اور نہ ہی اسے لگام ڈال کر اپنے قبضے میں کرنا ممکن ہے۔ گویا وقت ایک منہ زور گھوڑا ہے جسے تازیانے اور لگام کی ضرورت نہیں پڑتی ، اسی رفتار کے ساتھ انسان کی عمر بھی گزرتی جا رہی ہے                                                                        

رو میں ہے رخش عمر کہاں دیکھیئے تھمے            

نے ہاتھ باگ پر ہے نہ پا ہے رکاب میں                

اسی گردش دوراں میں کیسے کیسے حالات کا سامنا کرنا پڑتا ہے ہر پل کے ساتھ تجربات کا ایک بڑا ذخیرہ وجود میں آتا ہے  اور آنے والی نسل اس تجربے کو بنیا د بنا کر اپنی زندگی کی عمارت کھڑی کرتی ہے ۔عروج و زوال کے بیسیوں افسانے نیلے اسمان تلے وجود میں اتے ہیں اور دھرتی کے سینے پہ کئی عبرت انگیز واقعات کی مہر ثبت ہوتی ہے ۔ وقت کی اس بہتی دھارا میں انسانی خدو خال سے لے کر پسند ،نا پسندیدگی،سوچ ،حالات ،نفسیات اور معیار تک بدل جاتے ہیں۔ سونے کا چمچ منہ میں لے کر پیدا ہونے والا تقدیر  کی گردش میں پس کر کاسئہ گدائی کا مستحق بنتا ہے اور کوئی خاک نشینی سے تخت نشینی کا حقدار بن جاتا ہے ۔

اپنے زور بازو سے زمانے کا رخ موڑنے کی صلاحیت رکھنے والا اس منزل پہ بھی پہنچتا ہے جب اس کے اعضا زوال پذیر ہونے لگتے ہیں ۔بینائی اتنی کمزور ہو جاتی ہے کہ اپنی اولاد کو پہچاننا بھی دشوار لگتا ہے ،ہاتھوں میں رعشہ کی وجہ سے پیالی نہیں پکڑی جا سکتی، پہاڑ کی چوٹییوں کو سر کرنے والا بغیر لاٹھی کے ایک قدم بھی نہیں اٹھا پاتا ۔ جس  چہرے پہ کبھی تابندگی کھیلا کرتی تھی وہ جھریوں سے اٹ جاتا ہے ، جس پیشانی پہ ماہتاب کا نور دمکتا تھا اس پہ گہری لکیروں کی دراڑیں پڑ جاتی ہیں ۔جن آنکھوں کی چمک میں خوشیوں کی نوید ہوتی تھی وہ چمک ماند پڑ جاتی ہے ،جن زلفوں پہ شب ہجراں کا گماں ہوتا تھا وہ چاندی کے تاروں میں ڈھل جاتے ہیں ۔۔۔۔   وقت کتنا ظالم ہے ۔زمین کا سینہ چیر کر جوئے شیر نکالے والے زندگی کی اس موڑ پہ پہنچ جاتے ہیں کہ اپنی ناک پہ بیٹھنے والی مکھی کو بھی نہیں اڑا سکتے ۔عظیم الشان محلات اور مضبوط قلعے بنا کر خود کو ناقابل شکست تسلیم کروانے والے وقت کے سامنے ہتھیار ڈالنے پر مجبور ہو جاتے ہیں ۔

ایسی ہستیاں بھی زوال کا شکار ہو گئیں جن کے سامنے دنیا گھٹنے ٹیکا کرتی تھی ۔تاریخ عالم ایسے ناموں سے بھری پڑی ہے جنہوں نے اپنی شجاعت ،طاقت واختیار اور ذہانت سے کارہائے نمایاں انجام دیئے لیکن گزرتے پل کے ساتھ یہ سب کچھ ریت کی دیوار ثابت ہوئی۔ عروج وزوال کے اسی کھیل سے یہ نظام قائم ہے۔ ہر شخص اپنے حصے کا کام کرنے کا پابند ہو کر دنیا میں آتا ہے شیکسپئیر کے بقول ہر شخص اداکار ہے ،دنیا کے اسٹیج پہ اپنی اداکاری کا جوہر دکھا کر روانہ ہوتا ہے لیکن یہ اس اداکار پہ ہی منحصر ہے کہ وہ اپنے کردار میں کتنی جان ڈالتا ہے اور لوگوں کے ذہنوں پراس کا کتنا  اثر ثبت کرپاتا ہے۔ دینا کے اس اسٹیج پہ بچپن۔ لڑکپن، جوانی ،ادھیڑ عمر اور سب سے مشکل مرحلہ بڑھاپا ہے جن سے بہت سے لوگوں نے گزرنا ہوتا ہے۔ جو لوگ اس منزل پہ پہنچ چکے ہیں اگر ان کی زندگی با مقصد اور کامیاب گزری ہے تو انہیں ایک طرف خوشی اور دوسری جانب رنج بے سبب کا دکھ بھی ہوتا ہے۔ خوشی کے پیچھے وجہ ان کی مسلسل محنت کامیابی اولاد کی خوشحالی ،تندرستی اور کامل ایمان ہے،لیکن دامن گیر ہونے والے رنج کی وجہ اور کچھ نہیں صرف یہ بات ہوتی ہے کہ                                                                                          

جھک جھک کے ڈھونڈتا ہوں جوانی کدھر گئی۔۔۔                  

جب وہ جان محفل ہوا کرتے تھے ان کے آگے پیچھے لوگوں کا ہجوم ہوتا تھا ،عہدہ اختیار ،طاقت ۔توانائی حسن ،جوانی ہر نعمت سے مالا مال تھے اور اب ہر چیز ساتھ چھوڑ گئی۔ دوست احباب دوسرے آگے پیچھے پھرنے والے اب سلام تک کرنا گوارا نہیں کرتے ،ہم عمر اور ہم نوالہ دنیا چھوڑ گئے، جوان لوگ پاس بیٹھنا نہیں چاہتے، اولاد اپنے کاموں اور دنیا داری کے پیچھے بھاگ رہی ہے ،پاس بیٹھ کر بات کرنے اور دل بہلانے والا کوئی نہیں۔ صبح سے شام تک اپنے کمرے کی دیواریں تکتے تکتے یہ قابل رحم ہستیاں اس انتظار میں ہوتی ہیں کہ اب کوئی آ کر پاس بیٹھے گا ہم پر توجہ دے گا ۔میرے بیٹے اپنے دیدار سے میری بے نور آنکھوں کی تشنگی دور کریں گے ۔لیکن بچے ماں باپ کو وقت دینا بھول جاتے ہیں۔جن کی دعاوں کی برکت سے دنیا کی آسائشیں حاصل ہوئی ہیں اب ان ہاتھوں کے لمس کو ہی فراموش کر دیتے ہیں ۔

  پیسے کے عشق میں اللہ کی ان رحمتوں سے غافل ہو جاتے ہیں جو ماں باپ کی شکل میں ان کے گھر کے کسی کمرے میں منتظر ہوتے ہیں ۔ اولاد کو سوچنا چاہیے کہ نظرانداز کرنے کا دکھ کتنا شدید ہوتا ہے اوران  کمزور دلوں پہ کیا گزرتی ہوگی جو اولاد کی خوشی کی خاطر اپنی ضرورتوں کوبھی قربان کر چکے ہیں۔ اب ان کی جوانی اور توانائی تو واپس نہیں آسکتی لیکن اولاد کی صورت دیکھ کر جو روشنی ان کی آنکھوں میں پیدا ہوتی ہے اسے انہیں محروم کرنا اولاد کی سیاہ بختی ہے۔ وہ اپنا زمانہ گزار چکے لیکن زندگی کی کچھ مہلت انہیں ملی ہے ان کی حیثیت چراغ سحری کی سی ہے کہ کسی بھی لمحے تیز ہوا کا جھونکا اسے بجھا سکتا ہے ،ناتوانی کی وجہ سے ان کا دل ذود رنج اور شکستہ ہو جاتا ہے کہ بہت معمولی بات بھی انہیں ناگوار گزر سکتی ہے  کیونکہ انہیں اس بات کا شدید احساس ہوتا ہے ۔۔۔۔                                  

محسن ہمارے ساتھ عجب حادثہ ہوا                    

ہم رہ گئے ہمارا زمانہ گزر گیا                         

بے عملی اور جمود کی وبا

فطرت کی طبیعت میں کہیں بھی ٹھراو نہیں ہے۔ بہتے پانی کی رفتار اگرچہ  یکساں نہیں ہوتی،کہیں جوئے بار کی صورت میں اپنی شوریدہ سری اور جوش وخروش کا مظاہرہ پتھروں سے سر ٹکرا کر کرتا ہے ،کہیں کناروں  پراپنی بے قرار لہروں کے تھپیڑوں سے ہنگامہ برپا کرتا ہے ۔کسی جگہ جھرنا بن کر اپنی مدہر آواز کا جادو جگاتا ہے اور کہیں بے صدا ہو کے بہتا ہے لیکن اس کی  گہرائیوں میں جو شور موجزن ہوتا ہے اسے ہر کوئی نہیں سن پاتا۔ خاموش بہتے سمندر میں بلا خیز ہنگامہ ارائیوں کی کئی داستا نیں پوشیدہ ہوتی ہیں ۔سر بہ فلک پہاڑوں کی صدائے بے آواز کتنے لوگوں کے لئے ترقی کا سندیسہ لئے آتی ہے تو کوئی ان سے عزم وحوصلے کی کہانی خاموش سرگوشیوں میں سن لیتا ہے۔

گھٹاوں کی با معنی جنبش ہو یا باد بہاری کے جھونکوں کی کومل سرسراہٹ،انسان کو یقین و ایمان اور استقلال کی دولت سے مالامال کرنے کے لیئے کافی ہے۔کائنات کی کسی تخلیق کو سکون وسکوت میسر نہیں۔ ہر صبح سورج نئی تازگی اور یقین سے آتا ہے جیسے کسی کے نقش پا کی تلاش میں ہو،چاند اپنی منزل کی جستجو میں کتنے ہی صحراوں کی خاک چھانتا اور بیابانوں میں گھومتا رہتا ہے جیسے کسی بھی لمحے وہ اپنے مطلوب کو پا لے گا۔ حرکت و عمل کا درس کائنات کے ہر گوشے اور زمانے کے ہر سمے میں  چھپا ہوا ہے۔ سمجھنے والے اپنے مقصد کے حصول کے لیے اسے اپنا رہبر بنا لیتے ہیں ،لیکن کتنے ہی ہم میں سے ایسے ہیں جو حد نظر تک پھیلی ہوئی امید کی ان کرنوں اور منزل کے نشانات کو نہیں پہچان پاتے۔ حالانکہ یہی عناصرایمان کے لیئے دل کو روشن  کرتے ہیں ۔جوش ملیح آبادی نے کہا ہے۔۔۔۔                                                                

ہم ایسے اہل نظر کو ثبوت حق کے لیئے                       

اگر رسول نہ آتے تو صبح کافی تھی                           

گویا حرکت و عمل ہی خالق کا عرفان حاصل کرنے اور مخلوق کو سمجھنے میں مددگار ہوتی ہے جس کے لیئے سکوت سے زیادہ تڑپ اور سکون سے زیادہ تگ ودو کی ضرورت ہے۔ علامہ اقبال کی نظر میں بھی قرار موت کے مترادف ہے۔ جو انسان محنت سے جی چرا کر تن آسانی میں مبتلا ہو جائے ،عمل سے فرار اختیار کرنے کے طریقے ڈھونڈے ،اپنے متلاطم جذ بات کو تھپک کر سلا دے تو اس کا صفحہ ہستی سے حرف غلط کی طرح مٹنا یقینی ہو جاتا ہے ۔وجود عالم اور وجود کائنات میں کہیں بھی بے عملی کا ثبوت نہیں ملتا ۔ روز ازل سے ہی کارخانہ قدرت جس ذمہ داری کی انجام دہی میں لگا ہوا ہے اس میں پل بھر کے لیئے بھی تعطل یا جمود کا کوئی لمحہ نہیں آیا ،زندگی کا اصل جوہر اس کی روانی میں پوشیدہ ہے جس انسان کے لیئے اس دنیا کی تخلیق ہوئی اسے کیسے زیب دے گا کہ وہ ہاتھ پاوں توڑ کر بیٹھے،یا کاہلی کا شکار ہو کراپنے مقصد سے بے خبر ہو جائے ۔

دنیا جتنی تیزی سے ترقی کر رہی ہے ۔ذہن انسانی نئی دنیاوں کی کھوج میں لگا ہوا ہے کائنات کے سینے میں دفن رازوں کو افشا کیا جا رہا ہے تو کچھ ایسے بھی نوجوان دیکھنے کو ملتے ہیں جن کی زندگی کا مقصد دریا کے کنارے کسی پتھر سے ٹیک لگا کر بےہودہ سی وڈیو دیکھے  یا چنار کی ٹھنڈی چھاوں میں بیٹھ کر تصور جاناں میں ڈبکیاں لگائے  غریب والدین نے خون پسینے کی کمائی سے موبائل خرید کر دیا ہوتا ہے کہ میرا لعل آن لائن کلاس لے رہا ہے اس کی پڑھائی کا کوئی نقصان نہیں ہونا چاہییے  لیکن وہ اس بات سے بے خبر ہوتے ہیں کہ ان کا ”لعل”  لال دوپٹے کے سپنوں میں کھویا ہوا ہے۔ جو وقت پڑھنے لکھنے اور مستقبل سنوارنے کا ہوتا ہے وہ ٹک ٹاک  ویڈیو اور وٹس ایپ کی جادوئی دنیا میں کھو کر برباد کر رہا ہے۔

حالات کی ستم ظریفی کہیں یا نسل نو کی سیاہ نصیبی کہ ان کا مستقبل بے یقینی کے سمندر میں ڈانواں ڈول کشتی کی مانند ہچکولے کھا رہا ہے۔آنے والے وقت اور درپیش حالات کے بارے میں وثوق سے کچھ نہیں کہا جا سکتا  لیکن ا پنی آنکھوں سے نوجوانوں کے برباد ہوتے مستقبل کو دیکھ کر دل رنجورہے۔ محنت کرنے کا وقت ویڈیو گیمز کی نذر ہو رہا ہے اور بقیہ اوقات کھانے پینے اور سونے میں بیت جاتے ہیں۔ ان میں بے عملی اور جمود کی ایسی وبا پھوٹ پڑی ہےجس کا علاج ضروری ہے،ورنہ خاکم بدہن اپنے اجداد کے نام پر کلنک کا ٹیکہ ثابت ہونے کا اندیشہ ہے۔ آنے والے دنوں سے امید وابستہ کرنا مثبت سوچ کی علامت سمجھی جاتی ہے لیکن موجودہ حالات کے پیش نظر کچھ سمجھ نہیں آرہا ۔اس صورت حال سے سب واقف ہیں اپنے بچوں کے مستقبل کی فکر سب کو ہے لیکن عملا کوئی بھی کچھ نہیں کر پا رہا ،کوئی ایسا طریقہ کار اپنانے کی اشد ضرورت ہے کہ نوجوان اپنی زندگی کو با مقصد کاموں میں لگا دیں اپنے سامنے ایک نصب العین رکھیں اور اس کے حصول کی کوشش میں لگ جائیں تا کہ ہم انے والے زمانے کی مشکلات کو اپنے زوربازو سے آسانیوں میں بدل سکیں ۔  

بے عملی اور جمود کی وبا