انٹر کالجیٹ گیمز خیبرپختونخوا کا آغاز, دو سو نوے سرکاری کالجز کے تقریباً پندرہ ہزار کھلاڑی حصہ لیں گے

Posted on November 14, 2022

 انٹر کالجیٹ گیمز خیبرپختونخوا کا آغاز,  دو سو نوے سرکاری کالجز کے تقریباً پندرہ ہزار کھلاڑی کرکٹ، والی بال، فٹبال اور بیڈمنٹن میں حصہ لیں گے آٹھ سو خواتین بیڈمنٹن، کرکٹ اور والی بال کھیلے گی، ڈائریکٹر جنرل سپورٹس

پشاور (چترال ٹائمز رپورٹ) سیکرٹری محکمہ کھیل و امور نوجوانان خیبرپختونخوا مشتاق احمد نے کہا ہے کہ صوبائی حکومت صوبے میں کھیلوں کی سہولیات کی فراہمی اور کھیلوں کے فروغ کے لئے عملی اقدامات اٹھارہی اور اس سلسلے میں صوبائی حکومت نے خیبرپختونخوا کے نوجوانوں کیلئے کھیلوں کی سرگرمیوں کا سلسلہ شروع کیا ہے، ان خیالات کا اظہار انھوں نے تین روزہ انٹر کالجیٹ گیمز خیبرپختونخوا کے حوالے سے حیات آباد سپورٹس کمپلیکس پشاور میں منعقدہ افتتاحی تقریب سے بحیثیت مہمان خصوصی خطاب کرتے ہوئے کیا، افتتاحی تقریب میں ڈائریکٹر جنرل سپورٹس خالد خان سمیت دیگر اعلی حکام اور کھلاڑیوں کی کثیر تعداد نے شرکت کی۔

 

سیکرٹری مشتاق احمد نے تقریب سے خطاب کرتے ہوئے کہا کہ صوبائی حکومت مختلف کھیلوں کی سرگرمیوں کے انعقاد اور سہولیات کی فراہمی پر خطیر رقم خرچ کر رہی ہے یہی وجہ ہے کہ حکومت خیبرپختونخوا ڈسٹرکٹ اور تحصیل لیول تک سٹیٹ آف دی آرٹس سہولیات فراہم کر رہی ہے۔انھوں نے کہا کہ اچھی ذہانت اور دماغ کیلئے صحت مند جسم انتہائی ضروری ہے جس کے لئے کھیلوں کی سرگرمیاں ناگزیر ہیں۔ انھوں نے نوجوانوں پر زور دیا کہ وہ ہر قسم کے کھیلوں کی سرگرمیوں میں حصہ لیں، با صلاحیت کھلاڑی آگے آئیں، صوبائی حکومت انکو ہرممکن سپورٹ فراہم کرے گی۔کیونکہ کھلاڑی بین الاقوامی سطح پر ملک کی پہچان ہوتے ہیں، مشتاق احمد نے اپنے خطاب میں مزید کہا کہ سپورٹس ایک انڈسٹری بن چکی ہے۔ پوری دنیامیں میں سپورٹس مین کی عزت ہوتی ہے۔

 

افتتاحی تقریب سے ڈائریکٹر جنرل سپورٹس خالد خان نے بھی خطاب کرتے ہوئے کہا کہ سکول کرکٹ ٹورنامنٹ، انٹر یونیورسٹی گیمز کے بعد انٹر کالجیٹ گیمز کا آغاز کر رہے ہیں۔پاکستان کی تاریخ میں خیبرپختونخوا میں پہلی بار انٹر کنسٹیچونسی کرکٹ ٹورنامنٹ بھی شروع کئے گئے ہیں،انھوں نے گیمز کے حوالے سے تفصیلات بتاتے ہوئے کہا کہ انٹر کالجیٹ گیمز میں صوبے کے 290 سرکاری کالجز کے تقریباً پندرہ ہزار کھلاڑی حصہ لیں گے۔ انٹر کالجیٹ گیمز میں کرکٹ، فٹبال، والی بال اور بیڈمنٹن کے مقابلے ہونگے، انھوں نے کہا کہ مذکورہ گیمز میں تقریباً اٹھ سو خواتین کھلاڑی فٹبال،والی بال اور بیڈمنٹن کھیلیں گی،بعدازاں سیکرٹری مشتاق احمد نے انٹر کالجیٹ گیمز کا باقاعدہ آغاز کیا۔

رواں ماہ صوبے میں انٹر کالجیٹ گیمز اور ٹیلنٹ ہنٹ مقابلوں کا آغاز کیا جائے گا، صوبائی وزیر کھیل

Posted on November 7, 2022November 7, 2022

رواں ماہ صوبے میں انٹر کالجیٹ گیمز اور ٹیلنٹ ہنٹ مقابلوں کا آغاز کیا جائے گا، صوبائی وزیر کھیل و امور نوجوانان
کھیلوں کے فروغ کے لئے مختلف پلیٹ فارمز پر کھیلوں کے مقابلوں کا انعقاد خوش آئند ہے، عاطف خان۔

پشاور (چترال ٹائمز رپورٹ) خیبرپختونخوا کے وزیر برائے کھیل و امور نوجوانان، سائنس و انفارمیشن ٹیکنالوجی اور خوراک عاطف خان نے کہا ہے کہ صوبائی حکومت نوجوانوں کو تعلیم کیساتھ ساتھ کھیلوں کے مواقع بھی فراہم کر رہی ہے۔ انھوں نے مختلف کھیلوں میں صلاحیت رکھنے والے کھلاڑی اور تخلیقی صلاحیت کے حامل نوجوانوں پر زور دیا کہ وہ آگے بڑھیں اور اپنی صلاحیتوں کا لوہا منوا کر صوبے و ملک کا نام روشن کریں اس سلسلے میں رواں ماہ انٹرکالجیٹ گیمز اور ٹیلنٹ ہنٹس پروگرام کاآغاز کیا جارہا ہے۔ان خیالات کا اظہار انہوں نے محکمہ کھیل وامور نوجوانان کے جاری منصوبوں پر پیش رفت بارے جائزہ اجلاس کے دوران کیا جس میں سیکرٹری محکمہ کھیل وامور نوجوانان، ڈائریکٹر جنرل سپورٹس، ڈائریکٹر یوتھ افیئرز سمیت دیگر متعلقہ حکام نے شرکت کی۔ صوبائی وزیر کو متعلقہ حکام نے مختلف منصوبوں پر پیش رفت بارے آگاہ کرتے ہوئے بتایا کہ 14 نومبر سے صوبے میں انٹر کالجیٹ گیمز کا آغاز کیا جارہا ہے جن میں لڑکوں اور خواتین کے لئے کرکٹ، والی بال، فٹبال اور بیڈمنٹن کے مقابلے منعقد کئے جائیں گے۔

 

لڑکوں کے کھیلوں کے مقابلے پشاور جبکہ خواتین کے مقابلے چارسدہ سپورٹس کمپلیکس میں ہونگے، اجلاس کو مزید بتایا گیا کہ صوبے کے 290 سرکاری کا لجز کے تقریباً پندرہ ہزار مختلف کھیلوں کے کھلاڑی ان مقابلوں میں حصہ لیں گے اسکے علاوہ صوبے میں فوٹوگرافی،ویڈیو گرافی،نعت،قرات، تھیمیٹک آ رٹ اورگرافک ڈیزائننگ وغیرہ پر مشتمل ٹیلنٹ ہنٹ مقابلے بھی شروع کئے جائیں گے۔اجلاس سے خطاب کرتے ہوئے صوبائی وزیر کھیل عاطف خان نے کہا کہ کھیلوں کے فروغ کے لئے مختلف پلیٹ فارمز پر کھیلوں کے مقابلوں کا انعقاد خوش آئند ہے اس سے نہ صرف نوجوان اپنی صلاحیتوں کا لوہا منوائیں گے بلکہ اس سے ایک صحمند معاشرہ بھی جنم لے گا، انھوں نے کہا کہ طلبہ اور نوجوانوں پر تعلیم کیساتھ ساتھ کھیلوں کے شعبے میں بھی سرمایہ کاری کر رہے ہیں جس سے وہ بھرپور فائدہ اٹھا کر ملک و قوم کا نام روشن کر سکیں گے۔عاطف خان نے کہا کہ نوجوانوں کو سہولیات کی فراہمی اولین ترجیحات میں شامل ہے اور اس سلسلے میں بھرپور اقدامات بھی اٹھا رہے ہیں کیونکہ نوجوان اس ملک کا قیمتی اثاثہ ہیں جنھوں نے مستقبل میں اس ملک کی باگ ڈور بھی سنبھالنی ہے۔