آغاخان ہائیر سکنڈری سکول کوراغ میں نعت خوانی کی روح پرورمحفل

Posted on June 2, 2019June 2, 2019

کوراغ (چترال ٹائمزرپورٹ‌) آغاخان ہائیر سکنڈری سکول کوراغ میں گزشتہ دن نعتیہ محفل کا انعقاد کیا گیا ۔ اس روح پرور محفل میں آغاخان ہائیر سکنڈری سکول کوراغ کی طالبات کے علاوہ ملحقہ دیہات کے گورنمنٹ اور پرائیویٹ سکولوں‌کے طالبات نے بھی شرکت کی . محفل میں والدین ، گورنمنٹ اور پرائیویٹ سکولوں کے پرنسپل ، اساتذہ اور ہیڈٹیچرز نے شرکت کی ۔

پروگرام کی صدارت آر ۔ ایس ۔ ڈی – یو کے سربراہ علی دانا خان نے کی ، جبکہ مہمان خصوصی کوراغ سے تعلق رکھنے والی بزرگ خاتون لعل نساء تھیں.
پروگرام کاآغاز تلاوت کلام پاک سے کیا گیا اور اسکے بعد حمد باری تعالیٰ پیش کی گئی۔
پرنسپل آغاخان ہائیر سکنڈری سکول کوراغ نے مہمانوں کا شکریہ اداکرنے کے ساتھ اس نعتیہ محفل کے اغراض و مقاصد پر روشنی ڈالتے ہوئے کہا کہ بحیثیت مسلمان اس مبارک مہینے میں آپؐ سے اپنی محبت و عقیدت کا اظہار کرنے ، نفسانفسی کے اس عالم میں نوجوان نسل کو دینی اقدار ، روایات اور مذہبی روایات او ر مذہبی امور کی انجام دہی کی اہمیت اور آفادیت سے روشناس کرانے کے ساتھ آغاخان ہائیر سکنڈری سکول کوراغ کی طالبات کے ساتھ اپنے علاقے کے دیگر سکولوں کی طالبات کو پلیٹ فارم مہیا کرنا تھاتاکہ طالبات کے اندر چھپی ہوئی صلاحیتوں کو اجاگر کیا جاسکے۔

بعد ازاں نعت خوانی کا سلسلہ شروع ہوااور طالبات نے عقیدتوں کے پھول نچھاورکیے کہ سارا ماحو ل زغفران زار ہوگیا اور ذکر مصطفٰی ؐ سے سماں بندھ گیا۔

“روزہ اور ہماری زندگی ” کے عنوان پر لکچر دیتے ہوئے اسلامیات کے لکچرر فدا محمد نے کہاکہ روزہ محض اپنے آپ کو کھانے اور پینے سے روکنے کا نام نہیں بلکہ اس کا مقصد اللہ تعالیٰ کا قرب اور تقویٰ ہے ۔ روزے سے ہمیں یہ سبق ملتا ہے کہ ایک مسلمان کی پوری زندگی اسلامی اصولوں کے مطابق بسر ہوسکے۔ رمضان کے مہینے سے ہمیں یہ سبق ملتا ہے کہ ہم ایک دوسرے کا سہارا بنیں اور ہماری وجہ سے کسی کی جان ، مال اور آبرو کو کوئی نقصان نہ پہنچے۔
پروگرام کی مہمان خصوصی لعل نساءنے اپنے خطاب میں کہا کہ طالبات کواسلامی اور معاشرتی اقدار کی مکمل پاسداری کرتے ہوئے تعلیم حاصل کرنی چاہیے۔
محفل کے صدر علی دانا خان نےنعتیہ محفل کے انعقاد پر آغاخان ہائیرسکندری سکول کوراغ کو خراج تحسین پیش کیا۔ انھوں نے کہا کہ آغاخان ایجوکیشن سروس دنیاوی تعلیم کے ساتھ روحانی پہلو پر بھی زور دیتی ہے تاکہ طلبہ کے دنیاوی ترقی کیساتھ روحانی ترقی کرسکیں اور دیانت داری سے ملک و قوم کی خدمت کرسکیں ۔

آغاخان ہائیر سکنڈری سکول کوراغ میں نعتیہ محفل

Posted on June 11, 2018

کوراغ(ریان ملک ) آغاخان ہائیر سکنڈری سکول کوراغ میں گزشتہ دن آغاخان ہاسٹل بونی اور آغاخان ہاسٹل کوراغ کے اشتراک سے ایک نعتیہ محفل کا انعقاد کیا گیا ۔ محفل کا مقصد نفسانفسی کے اس دور میں نوجوان طبقہ کو دینی اقدار، روایات اور مذہبی امور کی انجام دہی کی اہمیت اور افادیت سے روشناس کرانا تھا۔ اس محفل میں اساتذہ اور طالبات سمیت کوراغ کمیونٹی کی خواتین نے شرکت کی۔ محفل کا آغاز جماعت ہشتم کی طالبہ مبشرہ زاہد نے تلاوت کلام پاک سےہوا۔ اس کے بعد جماعت نہم کی طالبہ حسنیٰ ولی نے حمدیہ کلام پیش کیا۔ پھر بارہویں جماعت کی طالبہ ثریا کوثر نے مہمانوں کو خوش آمدید کہا۔
بعدا ازاں نعت خوانی میں طالبات نے بھر پور حصہ لیااور ایسی خوش الحانی سے بارگاہِ رسالت میں عقیدتوں کے پھول نچھاور کیے کہ سارا ماحول ذکرِ مصطفیٰ صلی اللہ علیہ وآلہ وسلم سے رنگین ہوگیااور سامعین بے ساختہ سر دھننے پر مجبور ہوگئے۔بیچ بیچ میں سامعین سے رمضان المبارک سے متعلق سوالات پوچھے گئے ، جس کا مقصد اس مبارک مہینے کی اہمیت اور تقدس کے بارے میں سامعین کو آگاہ کرنا تھا۔
تقریب سے خطاب سے کرتے ہوئے اسلامیات کے لیکچر ر فدا محمد نے کہا کہ رمضان کا مبارک مہینہ ا عالمِ انسانیت بالخصوص مسلمانوں کے لیے اللہ تعالیٰ کی طرف سے عطیہ خداوندی ہے۔ اس مہینے میں مسلمانوں پر روزے فرض کیے گئے ،روزے کا مذہبی مقصد انسان کی پرہیز گاری ہے اور پرہیز گاری یہ ہے کہ مسلمان اللہ تعالیٰ کی موجودگی کا احسا س رکھتے ہوئے اس کے عذاب سے ڈرتے رہیں اور اپنے اعمال کو اس کے منشا کے مطابق بنائیں۔ جس طرح بندۂ مومن صبح صادق سے لے کر مغرب تک اللہ تعالیٰ کی عطاکردہ اپنی حلال کمائی سے حاصل کردہ نعمتوں کے کھانے اور استعمال سے اپنے آپ کو محض اس لیے روکے رکھتا ہے کہ اس مخصوص وقت میں ایسا کرنے کے لیےخدا کا حکم ہے۔اس سے یہ بات ظاہر ہوتی ہے کہ ہمیں اللہ تعالیٰ کے حکم کی تعمیل کرتے ہوئے اپنے آپ کو ہر اس کام سے روکنا چاہیے جس سے اللہ تعالی ٰ نے ہمیں منع کیا ہے۔ مزید براں ہم روزے کے دنوں میں تو گناہوں سے اپنے آپ کو روکنے کی کوشش کرتے ہیں، مگر رمضان کے اختتام پر ہمارے رویے میں عجیب تبدیلی ہمارے ایمان پر سوالیہ نشان بن جاتاہے۔ بعض اوقات روزے کی حالت میں بھی ہمارے صبر کا پیمانہ لبریز ہوجاتا ہےجو اس کے مقاصد کے منافی ہے۔ لہذا جب روزہ رکھاجائے تو اس کی اصل روح کے مطابق اس کا اہتمام بھی کیا جائے۔ آخر میں فدامحمد نے مہمانوں کا شکریہ ادا کیا۔
پروگرام کے بعد افطا ر پارٹی اور مغرب کی نماز کے بعد عشائیہ کا اہتمام کیا گیاتھا۔ نظامت کے فرائض عاصمہ خلیل اور ارم علی عدنان نے انجام دیئے۔