وزیراعظم نے گندم درآمد کرنے کا نوٹس لے لیا، تحقیقات کا حکم
وزیراعظم نے گندم درآمد کرنے کا نوٹس لے لیا، تحقیقات کا حکم
اسلام آباد(چترال ٹائمزرپورٹ )وزیراعظم شہباز شریف نے گندم درآمد کیے جانے کا نوٹس لیتے ہوئے تحقیقات کا حکم دے دیا۔ وزیراعظم میاں محمد شہباز شریف نے موجودہ حکومت کے پہلے ماہ کے دوران 6 لاکھ 91 ہزار میٹرک ٹن گندم درآمد کرنے کا نوٹس لے لیا اور فروری 2024 ء کے بعد گندم کی درآمد جاری رکھنے پر تحقیقات کا حکم دے دیا۔وزیراعظم نے گندم کی درآمد جاری رکھنے اور ایل سیز کھولنے کے ذمے داروں کے تعین کی ہدایت کرتے ہوئے سیکرٹری کابینہ ڈویڑن کی سربراہی میں کمیٹی کو 4 روز میں تحقیقات کرنیکا حکم دیا۔کمیٹی گندم کا وافر اسٹاک موجود ہونے کے باوجود درآمد جاری رکھنے کے ذمے داران کا تعین کرے گی۔
پاک چین دوستی آج خلاؤں کی سرحد بھی پار کر چکی، وزیرِاعظم شہباز شریف
اسلام آباد(سی ایم لنکس)پاکستان کا چاند کے لیے پہلا سیٹلائٹ بھجوانے پر وزیرِاعظم شہباز شریف نے قوم اور سائنسدانوں کو مبارک باد پیش کی ہے۔جاری کیے گئے بیان میں وزیرِ اعظم شہباز شریف نے کہا ہے کہ آئی کیوب قمر سیٹلائٹ خلاء میں پاکستان کا پہلا قدم ہے، جوہری میدان کی طرح یہاں بھی ہمارے سائنسدان اور انجینئرز اپنی صلاحیتیں منوا رہے ہیں۔ان کا کہنا ہے کہ انسٹیٹیوٹ آف اسپیس ٹیکنالوجی کی کور کمیٹی اورسپارکو سمیت تمام ٹیم کو دل کی گہرائیوں سے خراجِ تحسین پیش کرتا ہوں۔وزیرِ اعظم شہباز شریف کا کہنا ہے کہ پاک چین دوستی خوشبو کی سرحد سے آگے آج خلاؤں کی سرحد بھی پار کر چکی، 8 ممالک میں پاکستان کو قبول کیا جانا ہمارے سائنسدانوں اور ماہرین کی قابلیت کا اعتراف ہے۔انہوں نے کہا کہ یہ تکنیکی ترقی کے سفر کا بہت تاریخی لمحہ ہے، اس اہم کامیابی سے پاکستان خلاء کے با مقصد استعمال کے نئے دور میں داخل ہو گیا، یہ کامیابی سیٹلائٹ کمیونیکیشن کے شعبے میں پاکستان کی صلاحیتیں بڑھائے گی۔وزیرِ اعظم شہباز شریف نے کہا کہ اس کامیابی سے سائنسی تحقیق، اقتصادی ترقی اور قومی سلامتی کے لیے نئے مواقع پیدا ہوں گے، پاکستان کے بیٹوں نے ثابت کیا وہ خلاؤں کی بھی تسخیر کی صلاحیت، جذبہ، مہارت رکھتے ہیں۔ان کا مزید کہنا ہے کہ اللّٰہ تعالیٰ نے چاہا تو 28 مئی 1998ء کی طرح خلاؤں اور معاشی اوجِ کمال کو بھی پہنچیں گے، پاکستان کی سائنس و ٹیکنالوجی، جدید علوم اور ہنرمندی میں ترقی وقت اور ملک کی ضرورت ہے۔وزیرِ اعظم شہباز شریف نے یہ بھی کہا ہے کہ پوری کوشش اور توجہ ہے کہ اپنی نوجوان نسل کو جدید علوم و فنون، سائنس و ٹیکنالوجی میں آگے لے کر جائیں، کوشش ہے کہ پاکستان ایجادات کی دنیا میں بھی سب سے آگے ہو۔واضح رہے کہ پاکستان کا پہلا سیٹلائٹ مشن آئی کیوب قمر چاند کی جانب روانہ ہو گیا۔سیٹلائٹ پاکستانی وقت کے مطابق 2 بج کر 27 منٹ پر چین کی ہینان اسپیس لانچ سائٹ سے روانہ ہوا، جو 5 دن میں چاند کے مدار پر پہنچے گا۔