آغا خان ایجنسی فار ہیبی ٹاٹ اور AKHSP کے تعاون سے گرم چشمہ میں آئسولیشن سینٹرپر کام جاری
گرم چشمہ ( چترال ٹائمز رپورٹ) کرونا وائرس کی وبا سے بچاؤ اور احتیاطی تدابیر کے سلسلے میں اے کے ڈی این کے مختلف ادارے چترال کے مختلف علاقوں میں عوام کو ریلیف دینے کا سلسلہ جاری رکھے ہوئے ہیں۔ حالیہ دنوں چترال میں کرونا کے مصدقہ کیسز میں اضافے کی بنا پر آغا خان ہیلتھ سروس اور آغا خان ایجنسی فار ہے بی ٹاٹ نے چترال کے عوام کو ریلیف دینے کے سلسلے میں اپنی کوششوں کو تیز کردیا ہے اس سلسلے میں چترال کے مختلف علاقوں میں آئی سولیشن سینٹر کی تعمیر کاکام زور و شور سے جاری ہے۔
گرم چشمہ میں 20 بستروں پر مشتمل آئی سو لیشن سینٹر کی تعمیر شروع کی گئی ہے جو 20 مئی تک مکمل کیا جائے گا۔ آئی سو لیشن سینٹر میں 10 بیڈز خواتین کے لئے اور دس بیڈ مردوں کے لئے مخصوص ہوں گے۔ آئی سو لیشن سینٹر کے لئے چھ عدد باتھ اور چار عدد واشن بیسن بھی تعمیر کئے جارہے ہیں۔ تاکہ کسی ایمرجنسی کی صورت میں مریضوں کو بروقت ہر سہولت فراہم کی جاسکے اور ہسپتال کے عملے کو بھی اپنے فرائض کی انجام دہی میں کسی پریشانی کا سامنا نہیں کرنا پڑے۔
آئسولیشن سنٹرکی تعمیر پر علاقے کے عمائدین نے آغاخان ایجنسی فار ہے بی ٹاٹ اور آغاخان ہیلتھ سروس کے بروقت اقدام کی تعریف کی ہے۔ اور اس امید کا اظہار کیا کہ جس طرح اے کے ڈی این اس سے پہلے پسماندہ علاقے کی ترقی میں بھر پور کردار ادا کرچکا ہے۔ وہ انہی روایات کو برقرار رکھتے ہوئے وباء کے دنوں میں بھی علاقے کے عوام کو ریلیف دینے میں اپنا کردار ادا کرے گی۔
