ڈسٹرکٹ بار ایسوسی ایشن لویر چترال کے عہدیداروں کی تقریب حلف برداری، ڈسٹرکٹ اینڈ سیشن جج نے حلف لیا، ایم این اے عبد الطیف کی بطور مہمان خصوصی شرکت
چترال ( نمائندہ چترال ٹائمز ) ڈسٹرکٹ بار ایسوسی ایشن لویر چترال کے عہدیداروں کی حلف برداری کی تقریب بدھ کے روز ڈسٹرکٹ بار روم میں منعقد ہوئی جس میں ڈسٹرکٹ اینڈ سیشن جج لویر چترال خالد خان نے عہدیداروں سے حلف لیا جبکہ چترال سے قومی اسمبلی کے رکن عبداللطیف مہمان خصوصی تھے۔ حلف اٹھانے والوں میں صدر مومن الرحمن، نائب صدر وقاص احمد، جنرل سیکرٹری صدام حسین اور دوسرے شامل تھے۔ اس موقع پر ڈسٹرکٹ اینڈ سیشن جج نے کہاکہ بار اور بینج کو چاہئے کہ وہ مشترکہ طورپر اس بات کو اپنا موٹو بنالیں کہ وہ انصاف کی حصول کے لئے عدالت آنے والے سائلیں کو پوری پوری عزت دے دیں۔ انہوں نے زور دے کرکہاکہ دوسروں کو عزت اور ان کا مقام دینے سے ہی انسان دوسروں کے سامنے معزز اور محترم ہوتا ہے اور اس پیشے سے مختلف صورتوں میں منسلک افراد کو اس بنیادی اصول کو ہمیشہ سامنے رکھنا چاہئے۔
اپنے خطاب میں مہمان خصوصی ایم این اے عبداللطیف نے انصاف کی فراہمی کی اہمیت بیان کرتے ہوئے کہاکہ سولائزیشن یا تہذیب ہی اس چیز کا نام ہے کہ معاشرے میں انفرادی اور اجتماعی طور پر سب کے حقوق برابر اور یکساں ہیں۔ انہوں نے کہاکہ تہذیب یافتہ معاشرہ ہونے کا مطلب ہی یہ ہے کہ اس میں افراد کا آپس میں اور ریاست کے ساتھ حقوق کے حوالے لکیر یں کھینچی ہوئی ہوتی ہیں جس سے کوئی باہر نہیں نکلتا اور کوئی ریاست ناکام اس وقت ہوتا ہے جب اس میں ظلم ہو اور مساوات موجود نہ ہو۔ انہوں نے کہاکہ ہمارا المیہ یہ ہے کہ ہم نے جوڈیشری کو اپنا تابع بناکر انصاف کی تشریح اپنی مرضی سے کروانا چاہتے ہیں جبکہ انہوں نے امریکہ میں جوڈیشری کا حوالہ دیتے ہوئے کہاکہ وہاں پر جوڈیشری سب سے مقدم ہے اور جج اپنی مرضی سے ہی ریٹائرمنٹ پر جاتا ہے۔
انہوں نے کہاکہ جب ججوں کی تقرری میں خصوصی اختیارات اور ڈسکریشن کا عمل دخل ہوتو اس کے نتیجے میں انصاف کا حصول ممکن نہیں رہتا۔ انہوں نے وکلاء برادری پر زور دیا کہ وہ اس سلسلے میں اپنا کردار پوری طرح ادا کرے۔ اس سے قبل ڈسٹرکٹ بار ایسوسی ایشن کے نومنتخب صدر مومن الرحمن ایڈوکیٹ نے اپنی ترجیحات کا ذکر کرتے ہوئے کہاکہ بار اور بینچ کے درمیان آئیڈیل تعلق کار قائم رکھا جائے گا تاکہ انصاف کی سستی فراہمی کی راہ ہموار
ہوسکے۔ انہوں نے کہاکہ قوموں کی ترقی کا راز عدل وانصاف کی فراہمی میں مضمر ہے اور اپنے وکلاء برادری کے سامنے ہمیشہ اس زریں اور عالمگیر اصول کو رکھے گا۔
