محکمہ ابتدائی و ثانوی تعلیم خیبر پختونخوا کے تحت نئے بھرتی کیے گئے 16,000 اساتذہ میں تقرریوں کے آرڈرز تقسیم کرنے کی تقریب، وزیراعلیٰ کی بطور مہمان خصوصی شرکت

پشاور ( نمائندہ چترال ٹائمز ) وزیراعلیٰ نے نئے بھرتی ہونے والے اساتذہ کو دلی مبارکباد پیش کرتے ہوئے کہا کہ آج یہاں موجود ہر استاد میرٹ، قابلیت اور اپنی محنت کے بل بوتے پر اس مقام تک پہنچا ہے، جو اس بات کا واضح ثبوت ہے کہ صوبے میں سفارش کلچر کا خاتمہ ہوچکا ہے اور شفافیت کو عملی طور پر یقینی بنایا گیا ہے۔ وزیراعلیٰ نے اس موقع پر مزید کہا کہ تقریب میں تقرریوں کے حکمنامے وصول کرنے والوں میں مختلف سیاسی وابستیگیاں والے افراد کی موجودگی سے ثابت ہوتا ہے کہ بھرتیوں میں کسی قسم کی مداخلت نہیں ہوئی بلکہ صرف اور صرف میرٹ کو بنیاد بنایا گیا ہے۔

انہوں نے کہا کہ تحریک انصاف کے چیئرمین عمران خان کے وژن کے مطابق صوبائی حکومت نے سفارش کلچر ختم کر کے میرٹ، انصاف اور شفافیت کے اصولوں کو مضبوطی سے نافذ کیا ہے۔ وزیراعلیٰ نے واضح کیا کہ اگر میرٹ اور شفافیت کے خلاف کسی قسم کی شکایت سامنے آئی تو متعلقہ ذمہ دار کے خلاف سخت اور بھرپور کارروائی عمل میں لائی جائے گی۔اپنی گفتگو میں وزیراعلیٰ سہیل آفریدی نے اساتذہ کے معاشرتی کردار پر زور دیتے ہوئے کہا کہ صوبے کے لاکھوں بچوں کا مستقبل اساتذہ کرام کے ہاتھوں میں امانت ہے۔ انہی بچوں نے آگے چل کر ملک و صوبے کی باگ ڈور سنبھالنی ہے، مختلف مناصب پر فائز ہونا ہے اور پاکستان کی ترقی میں اپنا کردار ادا کرنا ہے۔

انہوں نے کہا کہ ایک مضبوط قوم کی بنیاد معیاری تعلیم اور باصلاحیت اساتذہ پر ہوتی ہے، اور حکومت اس مشن کی تکمیل کے لیے تمام تر وسائل بروئے کار لا رہی ہے۔وزیراعلیٰ نے اس موقع پر اس عزم کا اعادہ کیا کہ صوبائی حکومت تعلیم کے شعبے کو مضبوط بنانے کے لیے بھرپور اقدامات کر رہی ہے اور اساتذہ کی پیشہ ورانہ تربیت، جدید نصاب، اسکولوں کی بہتری اور سہولیات کی فراہمی پر خصوصی توجہ دی جا رہی ہے۔ انہوں نے کہا کہ ہمارا مشترکہ ہدف اس صوبے اور ملک کو عظیم بنانا ہے، اور یہ سفر باصلاحیت، دیانت دار اور محنتی اساتذہ کے بغیر ممکن نہیں۔

قبل ازیں وزیر اعلیٰ نے ضلع پشاور اور خیبر سے مختلف مضامین میں نمایاں کارکردگی کا مظاہرہ کرنے والے اساتذہ کرام میں تقرریوں کے آرڈرز تقسیم کیے۔ تقریب کے دوران محکمہ تعلیم کی جانب سے بریفنگ میں بتایا گیا کہ صوبے میں اساتذہ کی 16 ہزار خالی آسامیوں پر بھرتی کا عمل تیزی سے جاری ہے، جن میں 10 ہزار 417 مردانہ اور 5 ہزار 753 فیمیل اساتذہ کی آسامیاں شامل ہیں۔ بھرتیوں کے جاری عمل کے پہلے مرحلے کی تکمیل پر آج صوبہ بھر میں تقرریوں کے حکمنامے تقسیم کیے جا رہے ہیں جبکہ باقی ماندہ آسامیوں پر بھی بھرتی کا عمل جلد مکمل کر لیا جائے گا۔