تحصیل میونسپل ایڈمنسٹریشن چترال کے ملازمین کا اپنے مطالبات کے حق میں ہڑتال، مطالبہ منظور نہ ہونے کی صورت میں صوبائی اسمبلی کے سامنے احتجاج کرنے کا اعلان

Posted on August 12, 2025

تحصیل میونسپل ایڈمنسٹریشن چترال کے ملازمین کا اپنے مطالبات کے حق میں ہڑتال، مطالبہ منظور نہ ہونے کی صورت میں صوبائی اسمبلی کے سامنے احتجاج کرنے کا اعلان

چترال ( نمائندہ چترال ٹائمز ) تحصیل میونسپل ایڈمنسٹریشن چترال کے ملازمین نے ٹی ایم اے اسٹاف کے تنخواہوں کی ادائیگی اکاونٹ فور کے ذریعے کرنے کے مطالبے کے حق میں ہڑتال کیا جبکہ مطالبہ منظور نہ ہونے کی صورت میں خیبر پختونخوا صوبائی اسمبلی کے سامنے احتجاج کرنے کا اعلان کردیا۔ ٹی ایم اے کے احاطے میں قائم ہڑتالی کیمپ میں مقامی میڈیا سے گفتگوکرتے ہوئے ٹی ایم اے ورکرز یونین کے صدر سیف الاعظم اور جنرل سیکرٹری محمد فرید ظاہر نے کہاکہ موجودہ سسٹم کے تحت صوبہ بھر میں ٹی ایم اے کے ملازمین کو بروقت تنخواہ نہ ملنے کی وجہ سے ہمیشہ مالی پریشانی میں مبتلا رہتے ہیں اور ان کے گھروں میں فاقوں کی نوبت آتی ہے جس کا واحد حل ملازمین کو اکاونٹ فور کے ذریعے تنخواہوں کی ادائیگی ہے۔ا نہوں نے یونین کے صوبائی صدر حاجی انور کمال مروت اور جنرل سیکرٹری سلمان ہوتی کی قیادت پر بھر پور اعتماد کا اظہارکرتے ہوئے کہاکہ چترال ٹی ایم اے کے ملازمین احتجاج کے اگلے مرحلے کے لئے صوبائی قیادت کی کال کا انتظارکریں گے جس پر لبیک کہتے ہوئے وہ کسی بھی قربانی سے دریغ نہیں کریں گے۔

تحصیل میونسپل ایڈمنسٹریشن چترال کے ملازمین تنخواہوں کی عدم ادائیگی کے باعث گزشتہ ایک مہینے سے احتجاج پر ، میونسپل سروسز معطل، چترال شہر دوبارہ گندگی کے ڈھیر میں تبدیل،

Posted on January 23, 2024

تحصیل میونسپل ایڈمنسٹریشن چترال کے ملازمین تنخواہوں کی عدم ادائیگی کے باعث گزشتہ ایک مہینے سے احتجاج پر ، میونسپل سروسز معطل، چترال شہر دوبارہ گندگی کے ڈھیر میں تبدیل، مختلف مقامات پر گندگی اور کوڑاکرکٹ کے باعث راہ گیروں کا گزرنا بھی مشکل ہوگیا

چترال ( نمائندہ چترال ٹائمز) تحصیل میونسپل ایڈمنسٹریشن ( ٹی ایم اے ) آفس لووئیر چترال کے آل ایمپلائیز کا گزشتہ سا ل سےتنخواہوں کی عدم ادائیگی اور فائر روڈ الاونسز نہ ملنے کی وجہ سے گزشتہ 28 دنوں سے ٹی ایم او کے دفتر جغور میں احتجاج جاری ہے- ملازمین ڈیوٹی چھوڑکر ٹی ایم اے افس کے سامنے احتجاج پر بیٹھے ہوئے ہیں۔پانچ مہینوں سے تنخواہوں سے محروم ہونے کی وجہ سے ٹی ایم اے ملازمین خصوصا لیبر طبقہ کے گھر کے چولھے بند ہیں، جس کے باعث وہ انتہائی کسمپرسی کی زندگی گزارنے پر مجبور ہیں، ٹی ایم اے اسٹاف کی ہڑتال کے باعث چترال شہر میں تمام میونسپل سروسز بھی بند ہیں، ملازمین کا کہنا ہے جب تک ہمارے مطالبات منظور نہ ہو جاتے تب تک احتجاج جاری رہے گی۔ ان کا مذید کہنا ہے کہ 2022-23کے فائر ووڈ الاونس بھی ابھی تک نہیں ملے ہیں۔ ٹی ایم اے اہلکاروں کی ہڑتال کے باعث چترال شہر کے مختلف مقامات پر گندی کے ڈھیر جمع ہونے کے ساتھ چترال بازار کے مختلف انٹری پوائنٹ پر کوڑا کرکٹ اور غلاظت کی بدبو سے عام راہگیروں کا گزرنا بھی انتہائی مشکل ہوگیا ہے۔ چترال کے مختلف مکاتب فکر نے اس بات پر انتہائی افسوس اور تشویش کا اظہار کیا کہ گزشتہ سال بھی تنخواہوں کی عدم ادائِیگی پر ٹی ایم اے ملازمین ایک مہینے سے زیادہ عرصے ہڑتال پر رہے ، اور وہ سلسلہ دوبارہ شروع کردیا گیا ہے جوکہ افسوسناک ہے جبکہ یہی وہ ادارہ ہے جو چترال شہر کی صفائِی ستھرائی اور گھر گھر پانی پہنچانے تک کا انتظام کرتاہے، مگر بدقسمتی سے ان کو تنخواہیں ٹائم پر نہیں ملتے، صوبائی حکومت کی طرف سے ان غریب اہلکاروں کا استحصال افسوسناک ہے۔ انھوں نے صوبائی حکومت خصوصا نگران وزیراعلیِ سے ٹی ایم اے ملازمین کی تنخواہیں جلد ریلیز کرکے میونسپل سروسز دوبارہ شروع کرانے کا مطالبہ کیا ہے۔