صوبائی ترقیاتی ورکنگ پارٹی کے سولہویں اجلاس; تیس ارب روپے کی سکیموں کی منظوری دی گئی۔
ُپشاور (چترال ٹائمز رپورٹ) منگل کو صوبائی ترقیاتی ورکنگ پارٹی (PDWP) کے سولہویں اجلاس میں تیس ارب روپے کی سکیموں کی منظوری دی گئی۔یہ منظوری ایڈیشنل چیف سیکرٹری محکمہ منصوبہ بندی و ترقی خیبرپختونخوا شہاب علی شاہ کی زیر صدارت پی ڈی ڈبلیو پی کے اجلاس میں دی گئی۔ منظور شدہ منصوبوں میں قابل ذکر منصوبہ جنوبی وزیرستان بروَند میں ایجوکیشن سٹی منصوبے کا قیام ہے۔ جدید طرز تعمیر اور بین الاقوامی معیار کا حامل یہ منصوبہ ہر قسم کی سہولیات سے آراستہ ہوگا۔ ایجوکیشن سٹی میں بہترین تعلیمی اداروں کے ساتھ ساتھ رہائشی سہولیات، کھیلوں کے میدان،تفریحی پارکس، سائنس اور ٹیکنالوجی کے پارکس، اسپورٹس کمپلیکس اور ہاسٹل بھی ہوں گے۔ اجلاس میں پی ڈی ڈبلیو پی اور متعلقہ محکموں کے اراکین نے شرکت کی۔ فورم نے صوبے کی ترقی کے لیے صنعتوں، اعلیٰ تعلیم، سی اینڈ ڈبلیو، صحت، کھیل اور سیاحت، تواناء سماجی بہبود اور پبلک ہیلتھ انجینئرنگ کے شعبوں سے متعلق ستائیس منصوبوں کی منظوری دی۔
منظور شدہ منصوبوں میں ضلع مردان محلہ پیر خیل یونین کونسل شہباز گڑھی اور ضلع بنوں صداخیل اور صول گاؤں، چشمہ الگد کشو سپین تنگی پیرباخیل، خلیف خیل، خیصور میں سیلاب سے بچاؤ اور حفاظت کے کام کی تعمیر، سوات ایکسپریس وے (فیز-II) کی تعمیر کے لیے وائیبلٹی گیپ فنڈ کی فراہمی، یوٹیلٹی شفٹنگ اور آبادکاری، ضلع نوشہرہ میں خیبرپختونخوا یونیورسٹی آف ٹیکنالوجی کا قیام، ضم شدہ اضلاع کے نوجوانوں کیلئے سکلز ڈویلپمینٹ، ضلع سوات میں زمونگ کور کے لیے زمین کی تعمیر اور خریداری، اضلاع بونیر، صوابی اور مالاکنڈ میں ہاکی ٹرف کی فراہمی، ضم شدہ اضلاع کے طلباء کے لئے مفت تعلیم کے لئے گرانٹ، دینی مدارس کے طلباء کی صلاحیت کی تعمیر اور ہنر کی ترقی اور یہی منصوبہ ضم شدہ اضلاع ک دینی مدارس کے طلبہ کیلئے، سڑکوں کے شعبے میں ترقی کیلئے ضلع کرک تخت نصرتی اور بانڈہ داؤد شاہ میں سڑک کی تعمیر و بحالی، ضلع مانسہرہ چکیہ جنگلاں سندر قلاتیاں روڈ اور شاہ خیل پیران روڈ کی بہتری/چوڑائی اور بحالی، انڈس ہائی وے (N-55) کو ہکلہ یارک ڈیرہ اسماعیل خان موٹر وے (M- 14) کے ساتھ بنوں لنک روڈ پر ملانے کی فیزیبیلٹی سٹڈی اور تفصیلی ڈیزائن ضلع جنوبی وزیرستان میں مختلف لنک سڑکوں کی تعمیر اور بلیک ٹاپنگ تحصیل برمل گھرلانہ چلغوزہ جنگل تک 7 کلومیٹر سڑک کی تعمیر، ضلع سوات خوازہ خیلہ بائی پاس اور چپریال بائی پاس روڈ کی فزیبلٹی اسٹڈی اور تعمیر، ٹانک میں گلا جان کوٹ سے نصیب خیل جانی خیل اور آرزی خیل سے نازان خیل تک بیس کلومیٹر سڑک کی تعمیر، ضلع دیر بالا سلطان خیل، چاپر اور کارو درہ وغیرہ سڑکوں کی تعمیر، بحالی اور کشادگی، اور آر سی سی پل کی تعمیر، ضم شدہ اضلاع میں پلوں کی تعمیر کے مد میں پرانگ ٹنگا پر آر سی سی پل، پشاور میں سنٹرل پولیس آفس کی تعمیر، گجو خان میڈیکل کالج صوابی کے لیے مقصد سے بنائی گئی عمارت کی تعمیر، ضلع چارسدہ یونین کونسل گنڈھیری 02 اور یونین کونسل ہری چند 02 وغیرہ میں سینیٹیشن اسکیم شامل ہیں۔