چترال میں امریکی شکاری کا کشمیر مارخور کا ٹرافی شکار، سینگوں کا سائز 49 انچ ریکارڈ، 7 کروڑ 56 لاکھ روپے کے عوض پرمٹ حاصل کیا تھا
چترال (نمائندہ چترال ٹائمز) ایک امریکی شکاری نے گزشتہ روز چترال ٹاؤن کے نواحی کنزرویشن ایریا توشی شاشا کمیونٹی مینیجڈ گیم ریزرو میں کشمیر مارخور کا ٹرافی شکار کیا۔ شکار کیے گئے مارخور کے سینگوں کا سائز 49 انچ ریکارڈ کیا گیا ہے۔
وائلڈ لائف ڈیپارٹمنٹ کے مطابق یہ ایک منفرد ٹرافی شکار ہے، کیونکہ پہلی مرتبہ کسی شکاری نے مارخور کو اس کے سینگوں کے بجائے اس کی خوبصورت ایریا کی بنیاد پر منتخب کیا۔ حکام کا کہنا ہے کہ یہ اقدام ٹرافی ہنٹنگ کے حوالے سے ایک مثبت مثال سمجھا جا رہا ہے، جو قدرتی حسن اور جنگلی حیات کے تحفظ کے شعور کو اجاگر کرتا ہے۔
محکمہ وائلڈ لائف کے مطابق امریکی شکاری نے اس ٹرافی کے لیے تقریباً 7 کروڑ 56 لاکھ روپے ادا کر کے شکار کا پرمٹ حاصل کیا۔ اس رقم کا 80 فیصد حصہ مقامی کمیونٹی کی فلاح و بہبود، ترقیاتی منصوبوں اور قدرتی وسائل کے تحفظ پر خرچ کیا جائے گا، جبکہ باقی رقم حکومتی خزانے میں جمع ہوگی۔
حکام اور مقامی عمائدین کا کہنا ہے کہ کمیونٹی بیسڈ ٹرافی ہنٹنگ پروگرام سے نہ صرف جنگلی حیات کے تحفظ کو فروغ مل رہا ہے بلکہ مقامی آبادی کے لیے معاشی فوائد بھی پیدا ہو رہے ہیں، جس سے علاقے میں پائیدار ترقی ممکن ہو رہی ہے۔