چترال میں امریکن شہری نے کشمیر مارخور کا ٹرافی شکار کیا ، جس کیلیے انھوں نے ایک لاکھ پانچ ہزار امریکن ڈالر کے عوض پرمٹ حاصل کیا تھا
چترال ( نمایندہ چترال ٹایمز ) امریکن شہری نے چترال شہر کے نواحی گاوں شاشا کنزروینسی میں ۹ سالہ مارخور کا ٹرافی شکار کیا ہے ، جواس سال کا پہلا شکار تھا، جس کی سینگوں کا سائز 45 انچ تھا۔ مریکن شکاری مسٹر کلیپر ٹوڈکیون ( Klimper Todd Kevin ) نے اس ٹرافی ہنٹنگ کیلیے ایک لاکھ پانچ ہزار امریکن ڈالر (دو کروڑ پینتالیس لاکھ ستر ہزار روپے پاکستانی ) کے عوض محکمہ جنگلی حیات خیبرپختونخوا سے پرمٹ حاصل کیا تھا ۔
ڈی ایف او وایلڈ لایف چترال رضوان اللہ نے چترال ٹایمز ڈاٹ کام کو بتایا کہ خیبر پختونخواہ کے محکمہ جنگلی حیات کی جانب سے کمیونٹی کی شراکت داری کے ذریعے تحفظ کے موثر اقدامات کی وجہ سے خطرے سے دوچار کشمیر مارخور کی آبادی چترال میں اچھی طرح پروان چڑھ رہی ہے۔ مقامی کمیونٹی نے تحفظ میں بڑھ چڑھ کر حصہ لیا ہے۔جس کی وجہ سے چترال میں کشمیر مارخور کی آبادی بڑھ رہی ہے۔
یادرہے کہ ٹرافی ہنٹنگ سے حاصل ہونے والی رقم کا ۸۰فیصد مقامی کمیونٹی کو دیا جاتا ہے جو وہ علاقے کی مشترکہ مفاد میں استعمال کرتے ہیں۔ جبکہ بیس فیصد سرکاری خزانے میں جمع ہوتی ہے۔
