Chitral Times

Oct 19, 2021

ﺗﻔﺼﻴﻼﺕ

فلکو دیشو …………عنایت جلیل قاضی

شیئر کریں:

سورُم خان، تان دیہو ای نڑام جوان۔سملت پھار لاکی پھورین پیل پیل۔ پھور غیڑوچی مگم نو نگکین فقط کشیپی ماڑی۔بو تکھابور،سوت چھاغ ائھ نو بوئے۔بپ، متارو چھاربو بکین دِتی ناحق گانیرو زمین دی بو اوشونی،مگم سورم خانو تت افیونی بتی وا اچہ سورم خان بھونگو چے دروچھوغو عملی بتی زمینان بیزیمی بیزیمی کھولیکو کوری اسونی۔پُھک کہلی ساتی،پُھک مغرور بیکن دتی بہچیرو زمین دی ژا اونگی سرا پھنڈاڑ۔ پور سالی ہون گتی پُھک شیروان دی سٹھی بغائے۔ یومونو، استانن اف نو دریکو چوٹی چوٹی سنجیر،پتاری،غیراروم،تواریچا پت سف پولی بتی مظاتف ختان سورو نشیکو تاپ۔شومہ دارو پلیشکی نکی، بپ باشی کان لواشان پالئے پھوف۔حیران بکو بش لو ہیہ کہ سورم خانو اژغال ھاؤ بی بی دی فقط موشو نسکارین یو چھوری اسور۔شونجی پتین کوریکو نو بوئے مگم لو کہ پرائے ہش سریئر کہ کشمیرا سرویل ہیس چھینی اسیتائے۔ سورم خان،ہرو پروشٹہ چوغ دی کوریکو نو بوئے۔ ہیس دوری وارزک چھانی بیری پلاغی تچ۔یومونو وختہ چوٹک ختان،زہ دار،جنجالی بوک،شاؤ شاؤ پوشیکو گیاگ غوٹ گومت،ویجوشو لیش پائے سف ہے بختواروتین نصیب۔ سکور دی لو ہیہ کہ خیالی پختی انوسی ہو دوری پچور۔
.
سورم خانو ت کا، رارادو کہ پشاورا ای ہش ملنگ نسی اسک بیرائے کہ ہاتوسم چھوتیو سورم غیرئیکو ہنر شک بیرائے۔ہیہ لو کارہ توریکو، سورم خان دی وام خلس کوری فقیرو نسوت رہی ہوئے۔یومونو وخت موسم خراب۔مگم سورم خان راؤلیو باخین نسی بیکو ت تیار ہوئے۔ کہاکن گاڑتو نسی راؤلییا توریکو سومباہ کپنیو بو م پھا شک پھار نو لاکیتانی۔لش لش بتی شام تو دکو ڈریؤر، گاڑیو روپھیئے کیلنڈیرو گنی زیارتو خوٹیلوت بغائے مگم سورم خانو جیپو خڑاؤ ترابیح کورریکو وجہین حیرانو مان ہیرا بہچیتائے۔ ہرونیہ ہرو دیہار اسکوٹو ای صوبیدار، ہوروپوشی تان سم قوشوت آوائے۔پوسٹہ توریکو سپاہی صوبیداروت سولوٹ دِکو، سورم خانوت ہش سرئیاؤ اوشوئے کہ ہیت بومو نو، بلکہ ہورو ہردیو کوری پڑنگی دونیان۔دون بروناؤ اوشوئے مگم زمین ڈنگ اسمان ژنگ اوشوئے۔ قصہ مختصر، صوبیدار ہورو جم شیلی باسئے چھوچی گاڑتو نیزی پشاوروت ویشئیتائے۔
.
سورم خان اوہتی شام بکو برخ چاغ بتی پشاوورا ٹیمان بازارا،زرین خانو قوشہ توریتائے۔ زرین خان،ٹیمان بازارہ ای مینو خوشدرک، یار باش بزمی موش۔ قوشہ چھور ستھار، ڈف،جیرکین خوا مخہ لاکھوئے۔ گرشپو وختہ چھترارتو بی استور غاڑ کورک،ریشو کھوٹئیک ھورو بو خوش کوروم۔ سورم خانو سم دی ہورو ملاقات ریشو کھوٹیکو ژغا بتی اوشوئے۔ویزین بکو قوشہ زبردست مشقولگی ہوئے وا تان تان علاقو مشہور ریشوان برا لو پرانی۔ زرین خان بشار گنیتائے خائے لال یو کھیوتین ھاؤ۔ سوروم خان ریکی اے برار ہایو ہزارخانیہ ای ملنگ بابااسک بیرائے،ہاتو سم چھوتیو سورم غیرئیکو ہنر شک بیرائے،ہاتو پوشاؤ گتی اسم کیہ مہ دی چھچھیرا؟چھوچی ہاتو نسی بیمان۔زرین خانو ہش کیہ عقل نو توری ناچتیو بڑا ہوسی،کھانجہ خشپ کوری ستھارو یو گنی سورم خانوت تاریتائے۔سورم خان تان بپو جم وختو یاد کوری ہیہ بشونو ڈونگیکہ پرائے،
جنگلو موژین مہ طاوؤس بغائے
اللہ کیانی بوم مہ انوس بغائے
.
چھوچی بیکو ہاسی بتی،زرین خانوت مینداری کوری، سورم خان فقیرو عشقہ نسائے۔ رشکہ کوری ہزار خانیہ توری بشار گنک شروع اریر، “بات سن یہاں کوئی ملنگ بابا ہے جو چھوتی کو سورم بناتا ہے” “دا سے وائی ہالیکہ زے پی پو ئے نہ شم،تم چترال کا ہے”،جی جی ہم چترال سے آیا ہے۔سورم سازیئک ملنگ کو ڈھونڈتا ہے۔ سو،سو،رم ملنگ: دہ سہ بلا دے۔اچھا تم ایک کام کرو، وہ جو سامنے والی گھر ہے نا، اس آدمی کا چوتھا بیوی چترال سے آیاہے،تم اسے بات کرے گی اوہ تم کو سمجھائے گا۔سورم خان ہے دورا ٹاخیکو ای پھونڈور بپ،چشمان پرش پراشہ تھاناؤ درے غیچی چکئے یو نیسائے۔ “ہا لیکہ سوک ئی؟بابا ہم چترال سے آیا ہے۔”تمہارا اشپہ شور بولو ہے”۔ یا خدایا دا سہ مصیبت دے۔ اے پنجرشہ جنئے، لیک راشہ چترال نہ استہ سوک اخپلوان راغیلی دے۔خڑیک کوری ای جوش چھوئے سالہ کومورو پردو اچہ سورو بیری نیزیاتئے کہ ” واقعی نامو قولہ، مس تھیسوم پنجرش بیروؤغون”۔ بے دوہ،بے دوہ،سلام کوری ریتائے کہ” اے مہ قیامتو برار تہ ہوش نو اریتم وا”۔سورم خان ریکی اے کائے اوا چھترارار گتی اسم،ہیہ ژغا ای ملنگ اسک بیرائے ہاتو سم ای ہنر شک بیرائے۔ ہاتو مشکی کسیمن۔کومورو بپو موختو غیری ملنگو برا بشار گنیتائے۔ بپ ریکی،دی وا ،ای فقیر پھار ہیرا ہے زیارتو نسہ نشیران ہاتو برا ہش مشہور۔پنجرش ریکی اے برار پھار ہیرا ای زیارت شیر ہے،ہیرا اسک بیرائے۔ برارئے تاتین چایو دی ست کو رکو دی نو بومن،ہیہ بپ نو خوشئیر رے،اشروان موخو ڈوکو ہش یو لاکیتائے کہ لکہ ملکھونو چھانہ پراژ غارو سورایور توریتائے۔ سورم خان مینہ داری کوری ریتائے کہ” کائے ہیہ بپ تہ اشپاشورا؟پنجرش شار استونی ریتائے کہ” نو لہ برار ہیہ مہ موش”۔ہیہ لوو دتی پنجرشو بلوؤر غیچھار اشرو،خور دی تیز ہونی وا سورم خان دی تان ژانہ، تان نصیبو چے نن تتانتے کیڑے رے،اجازت گنی رہی ہوئے۔بپ نو خوشئے مونییاؤ پنجرشو زوقھئے گنی اوائے۔
.
سورم خان نشان دیرو ژغا توریتائے۔ ای درویش نشی اسور۔کپال رودوس،زب چوڑچوڑ،مگم نورانی موخ فقط ڑپ ڑپھو کوین۔سورم خان سلام اریر۔فقیر پھوک کوری تو موختو کیہ لوڑیتائے،سورم خان ٹُک ٹُک رونزیکہ پرائے۔ سورم خانو چے ملنگ بابو موژی کیہ مشقولگی کہ ہوئے،ہاتو خلاصہ ہیہ
ملنگ بابا:تو کورار وا کھیو تین گتی اسوس؟
سورم خان: ملنگ بابا اوا چھترارار گتی اسوم وا تسار ای ہنر چھچھاؤ گتی اسوم، تو واقعی چھوتیار سورم ساؤ زیکو بوسا؟
ملنگ بابا: درونگار شار استونی: دی اوا جوانیہ ہش کوریکو باؤ تم
سورم خان: بابا ہیہ ہنرو مہ نو چھچھیئے سا؟
ملنگ بابا:سورم خانو دش دش لوڑی ریتائے،ہو چھچھی تو کیاغ کوس؟
سورم خارن:اوا تان لوٹ بپو غون دولتمند بوم
ملنگ بابا: ہاہاہاہاہا،درونگار ہوسی ہوسی بریکی نسائے۔ھاھاھاھاھا،کہ دولتمند ہو تھے کیاغ بوئے؟
سورم خان: دنیو ہر ای نعمتو گنیم ژیبوم ِ، پیم:
ملنگ بابا: تھے کیاغ بوئے؟
سورم خان: اوا خوشان بوم متے سکون بوئے
ملنگ بابا:ٹہخ کوری ہوسی ریتائے، او،تو دراصلہ دولت نو بچوم کہ سکون مشکیسان،سکون
سورم خان ای نوجوان اوشوئے، مالی لحاظہ بو کمزور۔پلوم پلوم روئے پروشٹی بیکو،ہوتین سخت نواہچ سرییاؤتائے۔ملنگو لوان کار کوری ہیس کورکوسُک بغائے۔ملنگ دتی تو زاڑئے ریتائے کہ خائے تھے سکون مشکسان۔سورم خان ریتائے کہ دی لہ بابا اصل اشناری سکون وا۔
ملنگ دوڑ دوڑ، درونگا ہوسیتائے۔ہوسی ہوسی ملنگو غیچھ غیچھا اشرو ہونی۔ملنگ جلالہ گتی استائے، وا ہش ہیبت ناک بتی استائے کہ تو پوشی قالپ اوژ باو اشوئے۔
.
اوا تہ چھوتیاری سورم ساؤ زیکو ژاغا،انساناری بندہ ساؤز یکو ہنرو کی تہ چچھیئم کیچہ بوئے؟تاکہ خوشان ہل بیکو طریقو لے، پورا پورا سکون لیس؟

.سورم خان انگہ پنگ بتی،اپک ہوری بہچتائے۔لوؤ پروشٹی التی ملنگ ریتائے کہ،
انسانو خواہش کیاوت کہ انسانو وجود وچے عمرو سار درونگ ہونی تھے ہیس انسان تھے بوئے مگم بندہ نو بوئے۔تو دی تان خواہشان تان وجودار اوچے عمرار درونگ بیکو مو لاکے،تھے تو دی انسانار بندہ غیروس وا خوشانی اوچے سکون لیس۔سورم خان ملنگو لوان کوری پُھک پریشان بکو،ملنگ یکدم ہوش کوری ریتائے کہ قرآن شریفہ لوڑے،اللہ خواہشاتن موژو پڑغڑاسین رویانتین انسان ، وا محبتو ووریا مڑاغ رویانتین مہ بندہ راسور۔دنیا کندوری روئے ہانی،دولت بڑاسیتانی،علیشان ختومان سوزیتانی مگم بوغاوا کیاغ تان سم اوانی۔ آیا: ہیت سف خوشان اوشونیا؟وا تو دی خوشان بوس۔
.
ملنگ بابا تان لوو پراژگئے ریتائے کہ کلہ پت کہ تو چھوتیاری سورم ساوزیکو سفرا بہچتاؤ،ہرونیہ پت خوشانی تہ موڑار اوشٹورینی، وا تو بِپون کاسس۔ملنگ بابا،کانو ای چھو چھو چوٹھو سورا بوما روغ دیتی ریتائے کہ گئے اوا ہانسین انسانری بندہ بکو نسخو تہ چھچھیم۔
طریقہ ہیہ کہ تان خواہشتان تان قدر حوالار اوچے عمرار توری نسیکو مولاکے۔ کیاغ کہ لیتاؤ شکر کورے،وا کھیو کہ الیتاؤ ہاتے بچین افسوس مو کورے۔کا کہ مشکی ہائے ہاتوت دِتی روخسے۔ دنیا خش خالی گتی استاؤ خش خالی بیس،تھے بو بڑاسیکو کوشش موکورے۔ کوس کہ خدائے پھار لاکی اسور ہاتو سم تو حساب موکورے۔بے وخت وا بلا ضرورت فروسکی گری دی فساد پیداکوئے۔ کا کہ تسار بشار ارینی فروسک لوؤ دیت کہ نو ارینی پھک بتی ہل بوس۔ کوستے کیاغ دِکہ خوشانی شیر مگر گانِکہ غم شیر۔ دولتوکی روپھیتاؤ تو دی روپھوس، چھوغان موژی کہ ہل ہو تو دی چھوغ بوس۔ اللہ کہ راضی ہوئے،کل عالم راضی،اللہ کہ خفہ ہوئے درست دنیا خفہ، وا اللہو نعمتان خل بیر، ذندہ گیار خوشانی ختم بونی۔ تو تان بیروانتین بو کہ پوشیکہ پراؤ یا ہیتان موڑار دِچھِکہ پراؤ،تھے ہوش کوریکی اللہ تسار ناراض بتی اسور۔کا کہ تاتین نقصان تارئے اسونی،یا کوسارکہ نقصان توریکو امکان شیر، ہیتان سار تان سورو دودیری کورے مگم بدلہ گانِکو کوشش مو کورے،کوریکو اللہ جم بدلہ دیاک واگنک اسور۔ کیاوت کہ دشمنو بچین تہ ژنی رحم پیدا ہوئے،تھے ہوش کوریکی اللہ تسار راضی بتی اسور۔گیرزیکہ(ہجرتہ) کیاوت دی نقصان نکی۔
.
ملنگ بابا سورم خانو کوٹھوا ہوست لکھی ریتائے کہ دی بوغے مگم ای کامہ اشناریان خیالو لاکھے۔
اویلو: تو کیاوت دی کوس مو پیسے،بلکہ شکانتے موقع دیت۔اللہ کیاوت دی تان مخلوقان بق نو پیسور بلکہ مخلوق اللہو پیسونی
جوو: کاکہ تہ پیسی بغائے بیکو لاکے،مگم کہ اچی ہائے دواہتو ہاتوت باند موکورے۔اللہ کیاوت اچی گیاک بندوت تان دروازو باند نوکوروئے۔تودی کہ ہش اَرو تہ دروازاہمیشہ رونق بہچور۔ رویانتے اسقانی پیدا کورے اللہ تاتین اسقان کوئے۔روین سم خوشانی بوژے اللہ تہ خوشان کوئے۔روین سم مدد کورے اللہ تہ سم مدد کوروئے۔
.
ہیہ قسمہ ملنگ بابا سورم خانو چھوتی قالپو سورم غیرئے استائے۔ ہورو لالچی پرکھندہ خیالاتان نیکیو چے جمیو رہا پیسی استائے۔ سورم خان فقط سورمو پھولوک جوان بتی اچی تان دیہا توریتائے۔کوریکو کہ ہورو زندہ گیار غربت ختم بتی فقر گتی اوشوئے۔زندگیو انداز بدل بتی اشوئے وا دیہو سف رؤ ے ہورو بدل بیرو طبیتو پوشی حیران ہونی۔ ہیس روین سم مدد کوریکہ سفان سار پروشٹی وا روئے دی ہورو ہر ای دردا شامل۔یقینان انسانار بندہ بیک مشکل کوروم مگم صحی کوروم۔


شیئر کریں: