گزارشات ۔۔۔۔۔ قدیم رجحانات: ……….آصفی

1: حسن و عشق(مجازی):
ہایہ رجحان برصغیرا غزلو انتہائی قدیم رجحان کہ ہسے روایت غیری تا ہنوذ جاری شیر ۔ غزلو شعرار علاوہ قدیم دورو نظمو شعران دی کی ابتدائی شاعریو لوڑین بوین برابر عشقیہ غزل غیچی گونیان ۔ ہیہ رجحان روایت غیریکین غزلو تعریف ” حسنو عشقو مضمونان شعریہ اظہار ” رے دی کورونو بتی شیر ۔ ہیہ رجحانو ای خوبی ہیہ کی ہیہ باقی تمام رجحانات ہموغار کم یا زیادہ متاثر خور ہیہ سفوسار لوٹ رجحان ۔ موجودہ مادی دورا دی ہیہ رجحانو اہمیت برابر تسلیم کورونو بویان وا پاک و ہندو تمام زبانیں ہمو نمائندگی جاری شیر ۔ ہیہ رجحانو موضوعات حسن، عشق، حسنو بے رخیو چے بےوفائی وا توغو سنگ دلی ۔حسنو ستم گری ، ہرجائی پن، نزاکت ، نازونخرا، جدائی، ملاقات، تنہائی، اداسی، امید، ناامیدی وغیرہ شینی ۔
2: عشق حقیقی: ہیہ رجحان عشق مجازیوتے قریب رجحان ۔ ہیہ دی قدیمار ئی متعارف ۔ ہیہ بندہ خدایو محبوب گنی غزلہ مضمون بتیر ۔ پھتی اساتذہ شعرا ای سعرو شعرو مضمونہ تن مجازی وا حقیقی مضامین دی بوتاو اسونی وا الگ الگ دی ۔ پھتی اصحابن مطابقہ مجازی لش لش بتی حقیقیہ تبدیل بوین ۔ مثالو ہش دونیان کی کیہ وخت کی انسان ای شیلی تصویرو(پینٹینگو) شیلیار متاثر بوین تھے فوران ہیہ بشارو کوین کی ہمو کا ساوزے سور ہے قسمہ تان انسان حسن انسانیار متاثر بتی خالقو ویشکی رجوع کوئے رینیان ۔ اصطلاحات ہوں دی تقریبان عشق مجازیو تان ۔ ہمو موضوعان موژی دیدارو طلب، وصلو آرزو، دائمی ہجر، حسن حقیقی ، ۔ ہمو بچے مضمون بوتاوا انتہائی احتیاط کوریلی نیز ہیہ شاعریو بچے سنجیدہ وا پختہ عمر بک ضروری وا بعض ژاغین ہش دی شیر کی ہے انسان عملی زندگیہ عاشق خدا بائے یعنی ہورو شعر ہورو ہردیو ہواز بانی ۔ ہمو زبان انتہائ شائستہ وا پاکیزہ بیلی ۔ اندازہ بےتکلفی جائز شیر ۔
3: تصوف: تصوف یعنی “روحانی پاکیزگی” دی غزلو قدیمارئی ای اہم رجحان بتی گتی شیر ۔ تصوفو رجحان عشق حقیقیو غون انتہائ محتاط وا نازک رجحان ۔ ہمو مضامینان موژی فنا فی اللہ ، اللہو ذاتو جلوہ، کائناتو نفی کورک ، صرف عبد معبودو رشتہ، ذکرو فکر ، توحیدو بار بار اقرار وغیرہ شینی ۔ عشق حقیقیہ بےتکلفی شیر ہیہ نکی ہتیرا عشقو عام اصطلاحات استعمال بونی ہیہ نو ۔ مثالو طورا اقبالو بال جبریلو غزلیات عشق الہی وا میر دردو شاعری تصوف ۔
4:انسان: غالب ہیہ رجحانو باقاعدہ جاری اریر ۔ ہیہ رجحان دی ہتوغو زماناری تاحال جاری شیر ۔ ہیہ انسان، انسانو اہمیت، افادیت، رویہ وغیرہ شینی ۔ ہیہ رجحان انسانو بطور انسان مطالعہ کوین وا تمام انسانان موژی ہم آہنگیو بچے نسلی ، مذہبی، لسانی وا علاقائی امتیازاتار توری نسی اتوغو ذاتو وا کردارو تشکیلو فکرو دویان ۔