گزارشات ۔۔۔۔۔۔انتخاب : ……. آصفی چترالی
انتخاب یا نیویریک ای خدائی وا فطری عمل شیر ۔ تمام مخلوقاتان موژی انسانو نیویری اشرف کوریک ، تمام انسانان موژی انبیاء کرامان نیویری پیغمبار کوری ویشیک اچی انسانان موژی پھتو صاحب ایمانو صورتو نیویریک وا قیامتو انوس اعمالان بنیادا جام رویان نیویریک وا اخیرا جنتو درجو تقسیم کوری اہل جنتان نیویریک ہمیت سف انتخابہ شامل ۔
انتخابو عمل ادبی تخلیقاتہ دی برابر کارفرما شیر ۔ انتخابو صورتہ ای ادیب یا شاعر جماری جام ادب پارہ پروشٹہ انگوئے ۔ ادبی لحاظہ انتخابو مختلف صورت شینی ، ہتیتان جدا جدا ذکرو کوریک ضروری ۔
1: موضوعان نیویریک :
ای جام ادیب یا شاعر ہمیشہ ہموش دونی ادب نیویشیر کہ ہتوغو ہے ادب پارہ متعلقہ زبانو ادبہ اضافہ ثابت بار ۔ کیہ دی زبانو ادب تان ہتے ادبان وا شعران زندہ لاکھوئے کا کی ہیرا اضافہ کوریستانی ۔ لہذا اضافو ای خاص صورت ہیہ کہ تو ہتے موضوعاتان تن ٹچ کوروس کیاغ کی تہ سار پروشٹی ٹچ نوبتی شینی یا ٹچ بتی شیر مگر الگ پہلوا بتی شینی ۔ ہے بچے تو یکدم تان زبانو پروشٹو تخلیقاتان مطالعہ کوروس کوریکو ہش موبار کی ہے موضوعہ تہ سار پروشٹی ای شاعر تہ سار جام کیاغ نیویشی پیشور یا پروشٹو شاعر ای موضوعہ کیاغ کہ نیویشی اسور تو ہتوغو تان دہراو کوس ۔ لہذا موضوعان انتخاب نثر نگاران وا نظمو شعران بچے بو اہم اشناری شیر ۔
2 : خیالان نیویریک :
خیالان نویریکار مراد ای موضوعو یا ای قافیو پروشٹہ لکھی جو تروئے خیال تان ذہنہ گنیلی بوئے ۔ ہیرار اچی کیہ خیال کی ہے موضوعو یا ہے قافیو حوالو اویل تہ ذہنہ اوتی شیر ہے خیالو کیہ وخت دی حتمی موجوشے یعنی ہوروتے الفاظو صورت مودیت کوریکو ہیس اتیغین فورا تہ ذہنہ ہائے کہ ہیس بو عام خیال ممکن شیر پروشٹی بیان بیرو بوئے ۔ اتیغین دیتی کھوشش ہش کوریلی کہ کیہ خیال کی جام دونیکار اچی تہ ذہنہ گویان ہتوغو بیان کورے ۔ ہورو ای فائدہ ہاروش بوئے کی تو ای نوغ خیال پیش کوروس جوو فائدہ ہاروش کہ ہیس ملالہ ذہنی اتیرو خیال بکو وجہیں دتی ہیس کوڑوم بوئے وا قاریوت تہ شعرو مفہومہ توریکو بچے پھک زحمت دوئے ۔ ادب عالیہ تخلیق بکو صورت دی ہیہ شیر ۔ ادبہ نوغ خیال انگیکو بچے دی پرانو ادبو مطالعہ ضروری کوریکو کی پروشٹی پیش بیرو خیالو تو دانستہ طورا پیش ارو ہسے تہ چھوغی بویان اگر کی نادانستہ طورا پروشٹو خیالو پیش ارو ہیس دی کیہ ہنر نو ہوئے کوریکو ہیس ہے ادبہ پروشٹی پھار شوخسی شیر تہ ہے خیالو تنقید نگارو پروشٹہ کیہ اہمیت نوبوئے ۔ تہ خیال نوغ بکو سم جستہ جستہ ارفع و اعلی بیلیک ۔ موجودا دورو تقاصانتے لوڑی ہیہ خیالو دی کوریلی کہ اوا کیہ خیال کی بتیمان ہمو اہمیت و افادیت کیہ شیر ہش موبار کہ تہ خیال پچاس سال پروشٹی پھار بوغدو معاشرو یا انسانی ذہنو عکاسیو کوروئے ۔
3: الفاظان انتخاب :
شہیلی خیال کروئے رنگہ جام شیرین شربتو مثال وا جام الفاظ شیشو تھونک گلاسو مثال ۔ کیچہ کی کروئے شربتو شیشو تھونک گلاسو درے پیکو دہرا مزا کورویان ۔ ہے قسمہ تان شہیلی خیالو جام الفاظہ بیان کوریکو دی کلامو مزا دہرا بوئے ۔ الفاظان انتخابہ بعض حضرات کوتاہ بینی پشئے ہیہ لوو دونیان کہ تان ٹور کھوارا شاعری بیلی ۔ اردو وا فارسی الفاظان استعمال نوبیلی ۔ ہیتان رائے دی سہی کہ شاعرو ای خصوصیت وا صفت ہمو جوشونو بوئے کہ ہسے ٹور کھوارا نیویشی سور رے مگر ہیہ خو ای صفت ہوئے نو ۔ کیچہ کی ہیہ ای صفت ہاروش تان کیہ شاعر کی اردو کھوار یا فارسی کھوار شہیلی آمیزش پاشئتائے ہسے دی ہتوغو خصوصیت وا صفت جوشونو بوئے لہذا اسپہ ہیہ لوو ہوش کوریلی کہ ہیہ کیہ خاص تنقیدی معیار نو بلکہ ای صفت ۔ الفاظ چاہے تان زبانو ہونی یا خور زبانار ئی گنیتاو لو اتیتان انتخابو چے حسن ترتیبو شیر ۔ ہیرا تہ فنکاری پشیلی بوئے کہ تو ای خیالو پیش کوریکو بچے کیہ کیہ لفظان ئی گنیتاو وا ہتیتان کیہ ترتیبہ شعرا یا جملہ اویتاو ۔ الفاظان معیارو حوالہ ہارونی گزارش کوروم کہ ہتیت بول چالو بو عام الفاظ موبانی ، بیہودہ الفاظ موبانی ، متروک مو بانی وا خاص ای دیہو یا معاشرو بچے تان مانوس موبانی کوریکو زبان (کھوار) کافی وسیع علاقہ بولونجیرو لہذا تہ کلام ہاروش الفاظہ بار کہ ہسے کیہ دی ژاغہ وا کیہ دی دورا نامانوس موبار ۔ تہ الفاظ فصیح بانی کہ کلام شیلی غیچی گوئے بلیغ بانی کہ کیا خیالو کی تو بیان کوریک مشکھیسان ہتیت اتوغو پورا پورا بیان کوریکو قدرت لاکھانی ۔
4:شعران انتخاب :
ہر شاعر یا ادیب تان ادب پارو اویلو تنقید نگار تان بوئے لہذا کھوشش کوریلی کہ ای کلام تیار بکار اچی ہتے سورا نظر ثانی کوری ای جو شعران یا بندان نیویری اچی گانیسی ہیہ تاکہ پنگہ چھوئے ہے اجو کمزور بند یا شعر اسپہ پورا کلامو متاثر نوکورونی ۔ شعران انتخابو سورا اسپہ کلام مزید کشید بتی خالص حالتہ ناقدو وا قاریو پروشٹہ بیر ۔
5: کلامان انتخاب :
کیہ وخت کی کتاب بوتیکو مرحلہ ہائے ہتے وختہ ہے مرحلو انتہائی نازک وا پیچیدہ جوشی بار بار تان کلامان نیمیک ضروری کیہ کلام کہ معمولی مقدارا دی فرق پاشیتائے اتوغو ژار اچی نیزیلی ۔ ہے اچی نیساک کلامان موژی ذاتی حولہ نویشیرو کلام ، حادثاتی حوالو کلام ، زمانی کلام ، عامیانہ کلام ، طنزو مزاحہ نیویشیران موژی ابتذالو شکار غیر سنجیدہ کلام ۔ ابتدائی دورو سادہ کلام وغیرہ شامل شینی ۔