دروش گول جنگل میں لگی آگ بے قابو، قیمتی دیار کے درخت جل کرخاکستر، کروڑو ں کا نقصان
چترال ( نمائندہ چترال ٹائمز )دروش ٹاؤن کے نواحی علاقے دروش گول کے جنگل میں گذشتہ تین دنوں سے لگی آگ پر اب تک قابو نہیں پایا جا سکا جس کی وجہ سے قیمتی دیار کا جنگل تیزی سے راکھ کے ڈھیر میں بدل رہا ہے۔ تفصیلات کے مطابق چار دن قبل دروش جنگل میں نامعلوم وجوہات کی بناء پر آگ بھڑک اٹھی جسکی زد میں اگر سینکڑوں درخت جل کر راکھ بن گئے ہیں، آتشزدگی کے اس واقعے سے اس جنگلاتی علاقے میں قدرتی ماحول، چرند پرنداور جنگلاتی حیات کو نقصان پہنچا ہے جبکہ بیش قیمت دیار اور شاہ بلوط پر مشتمل جنگل راکھ کے ڈھیر میں تبدیل ہو رہا ہے،
دروش گول جنگل میں لگی آگ تیزی سے پھیل رہی ہے۔ مقامی رضاکار آگ بجھانے کی کوششوں میں مصروف ہیں۔ آگ بجھانے کے عمل میں شریک ایک مقامی شخص نےافسوس کا اظہار کرتے ہوئے کہا کہ اتنے بڑے واقعے کے حوالے سے متعلقہ محکمے کا رویہ بالکل لاپرواہی کا ہے، آگ لگنے کے پہلے ہی دن آسانی سے اس پر قابو پایا جا سکتا تھا مگر متعلقہ محکمہ کے لوگوں کی غفلت کی وجہ سے آگ مزید پھیل گیا، اب بھی محکمے کے تین یا چار بندے جائے وقوعہ کا چکر لگاتے ہیں جوکہ صرف تماش بینی کے سوا کچھ نہیں۔
دروش کے معروف سماجی شخصیت شہزادہ محمد ہشام الملک نے جنگل میں آتشزدگی پر افسوس کا اظہار کرتے ہوئے اعلیٰ حکام سے مطالبہ کیا ہے کہ اس قومی خزانے اور قدرتی ماحول کو بچانے کے لئے فوری طور اقدامات اٹھائے جائیں اور اسمیں مختلف ادارے ملکر خصوصی آپریشن کریں۔
یادرہے کہ اس سال جنگل میں آتشزدگی کا یہ پانچواں واقعہ ہے ۔ اس سے پہلے چار اور مقامات پر آگ لگی تھی جس پر بہت دنوں پر قابوپایا جاسکا تھا۔ علاقے کے مختلف مکاتب فکر نے خدشہ ظاہر کیاہے کہ جنگلات میں باربار آتشزدگی تخریب کاری کا شاخسانہ ہے ۔ لہذا حکومت کو چاہیے کہ ان تخریب کاروں کو پکڑ کر سخت سے سخت سزا دی جائے۔
