گلوبل اسماعیلی سویک ڈے کے موقع پر آغا خان ہائیرسیکنڈری سکول چترال میں تقریب اورآرٹ کی نمائش
گلوبل اسماعیلی سویک ڈے کے موقع پر آغا خان ہائیرسیکنڈری سکول چترال میں تقریب اورآرٹ کی نمائش
چترال ( چترال ٹائمزرپورٹ ) 28 ستمبر 2024 کو آغا خان ہائیر سیکنڈری سکول چترال میں گلوبل اسماعیلی سیوک ڈے “Spotlighting activities that will help safeguard and care for the environment.” کے تھیم کے تحت منایا گیا۔ اس دن کا مقصد نہ صرف ماحولیاتی تحفظ کے بارے میں آگاہی پیدا کرنا تھابلکہ طلباء کو سماجی اور ماحولیاتی ذمہ داریوں کے حوالے سے احساس دلانا بھی تھا۔ سکول کے تمام اساتذہ اور طلباء اس ایونٹ میں شامل ہوئے. جب کہ سین لشٹ جماعت خانہ کے رضا کار بھی اس کا حصہ بنے۔ تقریب میں مہمان کی حیثیت سے ظفر الدین، صدر ریجنل کونسل اور عبدالمجید، فارسٹ آفیسر ضلع چترال لوئر نے بھی شرکت کی۔
سرگرمیوں کا آغاز طلباء کی جانب سے آرٹ ورک کی نمائش سے ہوا، جس میں طلباء نے اپنے فن پاروں کے ذریعے ماحولیاتی تحفظ سے متعلق حقائق کو حاضرین کے سامنے پیش کیا.
اس کے بعد سکول کی اسمبلی میں گلوبل اسماعیلی سیوک ڈے کی اہمیت پر پرنسپل نے خطاب کیا اور اس دن کی افادیت کو اجاگر کرتے ہوئے ماحولیاتی تحفظ کی ضرورت پر زور دیا۔
بعدازاں دسویں جماعت کے طلباء اپنے اساتذہ کی قیادت میں سکول کے قرب و جوار میں صفائی مہم کا آغاز کیا. کمیونٹی سنٹر سین لشٹ کے رضا کار اور بوائے سکاؤٹس کے اہلکاروں نے بھی اس مہم میں طلباء کا ساتھ دیا. اس کے ساتھ ہی پلاسٹک بوتلوں کی تخلیقی نمائش بھی کی گئی، جس میں طلباء نے اس بات کا مظاہرہ کیا کہ کس طرح ہم روزمرہ کی اشیاء کو دوبارہ استعمال کے قابل بنا کر آلودگی کا باعث بننے والے فضلہ کو کم کر سکتے ہیں۔
آوٹ ڈور سرگرمیوں کا اختتام سکول کے احاطے میں پودے لگانے کے ساتھ ہوا، جس میں اساتذہ، طلباء، مہمانان اور رضا کاروں نے مل کر درخت لگائے، تاکہ ماحول کی بہتری کی کوششوں کو مزید تقویت دی جا سکے۔
9 بجتیہی سکول کے اٹریئم میں انڈور پروگرام کا آغاز ہوا، جہاں طلباء نے مختلف پرفارمنسز اور پریزنٹیشنز پیش کیں۔ پروگرام کی میزبانی دسویں جماعت کے طلباء جواد علی، آفاق احمد اور عماد الدین نے کی۔ قرآن مجید کی تلاوت کا شرف محمد سہراب الدین کو حاصل ہوا، جب کہ طالب علم سید افتخار حسین شاہ نے نعت شریف پیش کی، جس نے محفل کو روحانی رنگ دیا۔ اس کے بعد پرنسپل آغا خان ہائیر سیکنڈری سکول چترال طفیل نواز صاحب نے مہمانوں کو خوش آمدید کہا اور گلوبل اسماعیلی سویک ڈے کے مقاصد، اہمیت اور ضرورت پر ایک جامع اور پُرمعز گفتگو کی.
پروگرام میں ماحولیاتی مسائل پر طلباء کی پریزنٹیشنز نے سامعین کو سوچنے پر مجبور کیا۔ دسویں جماعت کے طلباء نے جانوروں کے حد سے زیادہ شکار، جنگلات کی بے دریغ کٹائی، اور چراگاہوں میں زیادہ چرائی جیسے اہم ماحولیاتی مسائل پر تفصیل سے روشنی ڈالی۔ بارہویں جماعت کے طلباء نے ماحولیاتی تبدیلی پر ایک ٹاک شو پیش کیا، جسے سامعین نے بے حد سراہا.
پروگرام میں تخلیقی مواد بھی شامل تھا، جس میں کرم علی کرم کی شاعری، عالمی حدت کے موضوع پر حسن مرتضیٰ کی اردو تقریر اور
A diary entry on the flora of AKHSS
کے موضوع پر گفتگو پیش ہوئی۔ اس کے علاوہ، دسویں جماعت کے طلباء کی طرف سے تیار کردہ ایک ویڈیو ڈرامہ “فطرت کا انتقام ” بھی چلایا گیا، جس میں ماحولیات سے متعلق برتی جانے والی بے حسی کے بھیانک انجام کو نہایت خوبی کے ساتھ دکھایا گیا.
آخر میں سکول کے میوزک کلب نے چترال کا ایک قدیم لوک گیت پیش کیا جس نے پروگرام میں دلکش رنگ بھرا. اس کے بعد مہمانان نے اپنے خیالات کا اظہار کیا۔ مہمان خصوصی ڈسٹرکٹ فارسٹ آفیسر جناب عبدالمجید نے ماحولیاتی تحفظ اور پائیداری پر گفتگو کی اور سکول کی اس کوشش کو سراہا کہ وہ نوجوانوں میں ماحولیاتی مسائل کے بارے میں آگاہی پیدا کر رہا ہے۔ اس کے بعد صدر ریجنل کونسل ظفر الدین صاحب نے دن کی اہمیت پر خطاب کیا
وائس پرنسپل نسرین نیت نے آخر میں مہمانوں کا شکریہ ادا کیا۔
سکول کے دوسری شفٹ میں زیر تعلیم طالبات نے پروگرام کے اسی خاکے کی پیروی میں یہ دن منایا اور پورے جوش و خروش کے ساتھ اس میں شرکت کی.
