بھلی بات یا خاموشی ……ڈاکٹر ساجد خاکوانی(اسلام آباد،پاکستان)

Posted on May 10, 2020May 28, 2025

بسم اللہ الرحمن الرحیم
(فہم حدیث نبوی ﷺ کے حوالے سے)
”حضرت ابوہریرہ سے روایت ہے کہ آپ ﷺ نے ارشاد فرمایاجو اللہ تعالی اور روزآخرت پر ایمان رکھتاہے اسے چاہیے کہ اچھی بات کرے یا خاموش رہے۔“

بظاہر دیکھنے سے اس حدیث مبارکہ کے دوحصے نظر آتے ہیں،پہلے حصے میں ایمانیات کے سبق کوتازہ کیاگیاہے،اور دوسرے حصے میں نفس مضمون کو بیان کیاگیاہے۔ایمانیات کے اگر چہ متعدد اجزاء ہیں لیکن اس حدیث مبارکہ میں محض دواجزاکے بیان کو کافی سمجھاگیاہے،توحیداور آخرت۔ان دونوں اجزائے ایمان کا نفس مضمون سے گہرا ربط بنتاہے۔جو شخص توحید کاماننے والا ہے وہ اس بات پر یقین رکھتاہے کہ اس دنیاکی تمام نعمتیں،صلاحیتیں،طاقتیں اور وسائل اس کے پاس اللہ تعالی کی امانت ہیں جنہیں ایک مقررہ مدت کے بعد واپس لے لیا جائے گا۔توحید کا اقراراس بات کا اثبات ہے کہ ایک انسان نے اپنی تمام تر ذہنی وجسمانی قوایااپنے رب کے سامنے ڈھیر کر لیے ہیں جسے دوسرے الفاظ میں قرآن نے یوں فرمایا کہ اللہ تعالی نے مسلمانوں کی جانیں اور انکے اموال جنت کے بدلے خرید لیے ہیں۔گویا توحید پر ایمان لانے والا اپنے ہاتھ،پاؤں،زبان،دل،دماغ،آنکھیں،کان وغیرہ سمیت اپنے کل اختیارات و امتیازات سے اللہ تعالی کی خاطر دستبردار ہوگیا،اب وہ پابند ہے کہ ان تمام اعضا و صلاحیتوں کو صرف اللہ تعالی کی رضا و خوشنودی کے لیے اسی طرح استعمال کرے جس طرح نبی ﷺ نے انہیں استعمال کر کے تو امت کو تعلیم دی۔حقیقت میں تو انسان کے جسم سمیت کل کائنات اللہ تعالی کی ہی ملکیت ہے لیکن یہ ایک امتحان ہے کہ کیا انسان اس حقیقت کو مان کر اس کے عملی تقاضے پوراے کرتا ہے کہ نہیں کرتاکیونکہ سورۃ ملک کی ابتدائی آیات میں اللہ تعالی نے فرمایا کہ اس اللہ تعالی نے یہ زندگی اور موت اس لیے پیدا کی کہ وہ تمہیں آزماکردیکھے تم میں سے کون اچھے اعمال کرتاہے۔

حدیث کے پہلے حصے میں دوسرا جزوایمان جس کا ذکر کیاگیاوہ آخرت کے دن پر ایمان لانا ہے۔دنیامیں عطا کی گئی تمام نعمتیں ایک وقت مقررہ پر واپس لے لی جائیں گی اورپھر روزمحشر انسان کو اسکی آرام گاہ سے اٹھاکرکھڑاکر دیا جائے گااور اس سے پوچھا جائے گا کہ اس نے رب کی عطا کردہ ان صلاحیتوں کو اپنی من مرضی کے مطابق استعمال کیایا اصل مالک کے بتائے ہو ئے احکامات کے مطابق استعمال کیا؟؟اس دن جس کا جواب درست ہوا یعنی جس نے رب کی عطا کردہ صلاحیتوں اور طاقتوں کو اس دنیامیں امانت سمجھااور ان کواسی طرح استعمال کیا جس طرح اصل مالک نے اپنے نبی علیہ السلام کے ذریعے حکم دیا تھا تب تو وہ اچھے انجام تک پہنچ جائے گالیکن بصورت دیگر یعنی نبی ﷺ کی تعلیمات سے ہٹ کر موج مستی،من مرضی اور ہوائے نفس کے مطابق جیسی چاہی زندگی گزاری اور ان صلاحیتون کو اپنی ہی ملک سمجھتارہا اور جیسے چاہا استعمال کیا تو پھر انجام بہت ہی ہولناک،وہشت ناک اور عبرت انگیز ہے۔

حدیث مبارکہ کے د وسرے حصے میں اچھی بات کرنے یا خاموش رہنے کی ترغیب دی گئی ہے۔قرآن نے فرمایا کہ”اور اس سے اچھی بات اور کس کی ہو سکتی ہے جس نے اللہ تعالی کی طرف دعوت دی،نیک عمل کیااور کہا کہ میں مسلمانوں میں سے ہوں۔“نیک بات کہنے کو روایات میں صدقہ سے بھی کہاگیاہے۔سب سے بہترین بات قرآن مجید کی تلاوت ہے جس کے بارے میں آپ ﷺ نے ارشاد فرمایا کہ ”تم میں سے بہترین شخص وہ ہے قرآن پڑھے اور پڑھائے“۔اس کے بعد اللہ تعالی ذکر بہترین بات ہے۔ایک حدیث مبارکہ میں آپ ﷺ کافرمان عالی شان ہے کہ ”دو کلمے ہیں،رحمان کوبہت ہی پسند ہیں،زبان پر بہت ہلکے ہیں لیکن میزان میں بہت بھاری ہوں گے وہ کلمے ہیں سبحان اللہ وبحمدہ سبحان اللہ العظیم“۔درس و تدریس،تعلیم و تعلم،تبلیغ و ارشاد اور حسن مناظرہ و مباحثہ بہترین باتیں ہیں جو انبیاء علیھم السلام کی سنت ہونے کے ساتھ ساتھ جن کے ذریعے معرفت کی روشنی اور ہدایت کا راستہ عالم انسانیت کو میسر آتا ہے۔دن بھر کے جملہ کاروباری،گھریلو،دفتری اور نجی معاملات میں اپنی گفتگو کو شریعت و سنت کے دائروں کے اندر رکھنا اور بے ہودگی و یاوہ گوئی سے اپنی زبان کو اس لیے محفوظ رکھنا کہ یہ اللہ تعالی کی امانت ہے اور روزآخرت اس زبان کا حساب چکایا جانا ہے گویا اس حدیث مبارکہ کا منشا ئے ارشاد ہے۔

بولنے پر پابندی نہیں لگائی گئی لیکن آپ ﷺ کا فرمان ہے کہ ”بہترین بات وہ ہے جو مختصر ہو اور مدلل ہو“۔خود آپ ﷺ نے اپنے بارے میں فرمایاکہ مجھے جامع کلمات عطا کیے گئے ہیں۔محسن انسانیت ﷺ بہت مختصر گفتگو کیاکرتے تھے،آپ ﷺ کے ایک ایک جملے میں معانی کے سمندر چھپے ہوتے تھے،آپ ﷺکے ارشادات،خطبات،پندونصائح،زجروتوابیخ اورمعاہدات گویا ایسے ہیں کہ موتی پروئے ہوئے ہوں۔صحابہ کرام فرماتے ہیں کہ آپ ﷺ کی محفل میں طویل خاموشی چھائی رہتی تھی،خود آپ ﷺ کو بھی بہت زیادہ باتیں کرنا پسند نہ تھیں اور مجلس میں موجود مسلمان بھی ادب و احترام کی خاطر خاموش رہا کرتے تھے اور صحابہ خواہش کرتے تھے کہ کوئی باہرسے آکرکچھ پوچھے تو ہم بھی نبی علیہ السلام کی گفتگو سنیں اور کبھی کسی نماز کے بعد کوئی عورت آپ ﷺ سے کچھ پوچھ لیاکرتی تھی اور اس بہانے باقی مسلمان بھی محسن انسانیت کی بات سن لیتے تھے۔ یہی امت کے لیے بہترین مثال ہے،کہ طویل گفتگوؤں سے پرہیز کیاجائے،لمبی لمبی تقریروں سے احتراز کیاجائے اور خوامخواہ کی نصیحتوں کے بوجھ تلے لوگوں کو نہ دبایا جائے باتیں جتنی زیادہ ہو ں گی گناہ بھی اتنے ہی زیادہ بڑھتے چلے جائیں گے کیونکہ لمبی بات اورباہمی بے مقصدگپ شپ بہت جلد محفل کو بے ہودگی کی جانب لے جاتی ہے۔

خاموشی کا حکم حدیث مبارکہ کا آخری حصہ ہے۔خاموشی وہ عمل ہے جس کا تعلق زبان کی حفاظت سے ہے۔ایک موقع پر آپ ﷺ نے ارشاد فرمایا کہ”تم مجھے دو چیزوں کی ضمانت دو میں تمہیں جنت کی ضمانت دیتاہوں ایک وہ جو دو جبڑوں کے درمیان ہے اور دوسری وہ جو دو ٹانگوں کے درمیان ہے“۔ایک موقع پر محسن انسانیت ﷺنے فرمایاکہ ”لوگ اپنے جبڑوں کے بل دوزخ میں دھکیلے جائیں گے“،یعنی زبان کی کمائی انسان کو دوزخ میں لے جائے گی۔زبان کے بارے میں قرآنی آیات اوردیگر بہت سے اقول رسول اللہ ﷺ کی روشنی میں زبان کی ہولناکیاں انسان کے برے انجام کی خبر دیتی ہیں۔غیبت،جھوٹ،خوشامد،افواہیں اڑانا،نام بگاڑنا،مال بیچنے کے لیے جھوٹی قسمیں کھانا،تہمت اور گالی وغیرہ وہ سب امور ہیں جو زبان کے راستے انسان کو بالآخر دوزخ کی وادی میں دھکیلنے کا باعث بن سکتے ہیں،اس حدیث مبارکہ میں آپ ﷺ نے خاموشی کا حکم دے کر گویا ان آفات السان سے بچنے کی تعلیم فرمائی ہے۔

حقیقت یہ ہے کہ زبان ہی انسان کی پہچان ہوتی ہے،انسان کے اندر جو کچھ بھی ہوتا ہے وہ زبان کے راستے ہی باہر سے دیکھاجاسکتاہے،اور انسان کی شخصیت اسکی زبان کے پیچھے چھپی ہوتی ہے، جب تک انسان خاموش رہتاہے اسکی خامیاں پردے میں رہتی ہیں،اسکی شخصیت کا بھرم قائم رہتاہے،اسکی بھلائیاں اجاگر ہوتی رہتی ہیں،اسے بھلا مانس سمجھاجاتاہے اور خاموشی کا عمل اسے لوگوں سے اور لوگوں کو اس کے شر سے محفوظ کر دیتاہے۔یہی خاموشی غصے کا بھی بہترین علاج ہے اور اگر بصورت دیگراس زبان کو کھلا چھوڑ دیا جائے تو یہ اپنوں کو غیر بنادیتی ہے،دوستوں کو دشمن بنادیتی ہے،امن کو فساد میں بدل دیتی ہے اور انسانوں کو انسانوں سے جداکرنے کا باعث بن جاتی ہے۔کتنی مشہور بات ہے کہ تلوارکازخم مندمل ہوجاتا ہے لیکن زبان کا گھاؤ بہت گہراہوتا ہے،انسانوں کے درمیان شکایات کی بہت بڑی وجہ زبان ہی ہوتی ہے۔حسن خلق کی زبان سے انسان دوسروں کو اپنے گرد ایسے اکٹھاکرسکتاہے جیسے مقناطیس لوہے کے ذرات کو اپنی جانب کھینچ لیتاہے جبکہ بدخلقی و بدزبانی وہ عادت ہے جس سے ڈنگنے والے کا زہر بچھواور سانپ کے زہر سے بھی زیادہ تکلیف دہ اور دیرپاہوتاہے۔

حدیث مبارکہ میں محسن انسانیتﷺنے اچھی بات یا خاموشی کی ترغیب دے کر انسانی معاشرے کو بہت سی اخلاقی آلودگیوں سے محفوظ کر دیاہے۔ایک موقع پر ایک شخص نے حضرت ابوبکرؓ کو بہت برابھلاکہا،جب تک تو حضرت ابوبکرؓخاموش رہے آپ ﷺ وہاں بیٹھے رہے لیکن جب حضرت ابوبکرؓکاپیمانہ صبر لبریزہوگیااور انہوں نے بھی جواباََ کچھ کہ دیاتو محسن انسانیت عالم ناراضگی میں وہاں سے چل دیے،حضرت ابوبکر آپﷺ کے پیچھے پیچھے چلے آئے اوربڑے ادب و احترام و لجاجت سے عرض کی وہ اتنی دیر سے برابھلاکہ رہاتھااور جب میں نے جواب دیاتوآپ ﷺ ناراض ہو گئے؟؟آپ ﷺ نے فرمایا جب تک وہ برابھلاکہ رہاتھا آپ کی طرف سے فرشتہ اسکا جواب دے رہاتھااور جب آپ نے خود جواب دینا شروع کر دیا تو فرشتے کی جگہ شیطان آگیااور جہاں شیطان ہو وہاں میں نہیں بیٹھ سکتا۔بہت سی باتوں اور زیادتیوں کے جواب میں خاموشی بہترین انتقام ہوتا ہے اور یہ خاموشی اللہ تعالی اور اسکے رسول ﷺ کی خاطر اختیار کی جائے تو آخرت میں بھی کامیابی کی ضمانت بن سکتی ہے۔

بدھ مذہب میں روزہ…… ڈاکٹر ساجد خاکوانی (اسلام آباد،پاکستان)

Posted on May 8, 2020May 28, 2025

بسم اللہ الرحمن الرحیم
”بدھ“سنسکرت زبان کالفظ ہے جس کامطلب روشنی،جاگنایا بیداری وغیرہ ہے۔یہ نام اس مذہب کے بانی ”سری مہاتماگوتم بدھ“سے منسوب ہے۔اس نام کامذہب دنیامیں گزشتہ ڈھائی ہزارسالوں سے موجود ہے۔یہ مذہب کچھ عقائد اور چندفلسفیانہ اخلاقیات وروایات کا مجموعہ ہے جس کالب لباب اندرونی سچائی کاحصول ہے جسے ”دھیان“،”گیان“اور ”نروان“کی اصطلاحات سے یاد کیاجاتاہے۔اس مذہب میں عبادات کی جگہ پر کچھ روحانی کسرتیں رائج ہیں،جنہیں زیادہ تر تنہائی میں اور کبھی کبھی مذہبی بھگشو دائرے کی شکل میں مل کر بھی اداکرتے ہیں۔”تری پٹک“کے نام سے مذہبی کتب بھی موجود ہیں لیکن ان کے استنادکی کوئی ٹھوس بنیاد معدوم ہے۔قدیم ہندوستان سے جنم لینے والایہ مذہب مشرقی ایشیائی علاقوں تک پھیلتارہا۔اس وقت دنیابھرکے کم و بیش سات فیصدلوگ اس مذہب کے پیروکارہیں جو کمیت کے اعتبار سے دنیائے انسانیت کاچوتھابڑامذہب بنتاہے۔فی العصر سری لنکا،برمایامیانمار،کمبوڈیا،لوئس،تھائی لینڈ،کلمیکیا اورمنگولیاسمیت تبت اور ہمالیہ کی وادیوں میں اس مذہب کے پیروکار بکثرت موجودہیں۔عام طورپراس مذہب میں خداکاتصورموجودنہیں یاکہیں کہیں کائنات کے اندرکسی بالاترقوت کادھندلاسامبہم اشارہ ملتاہے۔شایداسی وجہ سے مغرب کے خدابیزار سیکولر،لبرل،ہیپی،اتھیسٹ ہوس پرست طبقہ میں یہ مذہب کافی مقبول ہے۔

بھوکاپیاسارہنا بدھ مت کی بنیادی سنیاسی روحانی آزمائشوں میں سے ایک ہے۔ابتدائی طورپر بدھ بھگشوصرف ان تعلیمات کی پابندی کرتے تھے جو ”وناؤں“میں لکھے ہیں اور ان کے مجموعے کو”پرتی موسکا“کہتے ہیں۔ان تعلیمات کے مطابق کسی بدھ بھگشوکو دوپہر کے بعد کھانا کھانے کی اجازت نہیں تھی اورایسا کرناپاپ سمجھاجاتاتھا۔بدھ مذہب کے مطابق بعد دوپہرکاوقت مراقبے کے لیے ہوتاہے جس کے لیے”سوترا“کی اصطلاح استعمال کی جاتی ہے۔”سوترا“اگرچہ سنسکرت کا لفظ ہے لیکن اشتراک تلفظ کی بناپریہ عربی لفظ”سطر“کے ہم معنی ہو سکتاہے،”سطر“لکھے گئے متن میں ایک طرف سے دوسری طرف تک الفاظ کی عبارت کو کہتے ہیں۔اس سے صاف اندازہ کیاجاسکتاہے کہ ابتدائی زمانے میں تعلیم و تعلم ہی مراقبہ ہوتاتھاجو کہ عصر کے وقت ہواکرتاتھا،یہی روایت اسلام کے ابتدائی ایام میں بھی نظرآتی ہے۔بدھ مت کی اس روایت کو اگرچہ روزہ تو نہیں کہ سکتے لیکن اس سے یہ مطلب ضرورنکالا جاسکتاہے کی کسی بھی مذہبی رسم کی ادائگی کے لیے پیٹ کاخالی ہو نا ضروری ہے۔بدھ بھگشوؤں کے لیے تودوپہرکے بعد کھاناکھانامنع تھاہی لیکن عام لوگ بھی جب کبھی کسی مراقبے یا پوجاپاٹ میں آتے توان کے لیے بھوکے پیٹ آنا ہی پسندیدہ سمجھاجاتاتھا۔

سری مہاتماگوتم بدھ نے آٹھ راستے نصیحت کیے تھے جن پر چل کر نروان حاصل کیاجاسکتاہے۔نروان کی اصطلاح کم و بیش پورے بدھ مت کواپنے اندر سمیٹے ہوئے ہے لیکن مختصراََیہ سمجھ لیناکافی ہے کہ نروان کامقصدآزادی،چھٹکارااورپریشانیوں سے نجات ہے اور نروان وہ مقام ہے جہاں آتما یعنی روح اس دنیاکی آلائشوں سے نجات حاصل کر کے پوتریعنی صاف شفاف ہوجاتی ہے۔نروان حاصل کرنے کے آٹھ راستوں میں سے سب سے اہم راستہ ”درمیانی راستہ“ہے۔اس درمیانی راستے کے لئے ”دھم کک پوتن سوت“کی اصطلاح استعمال کی جاتی ہے جس کالب لباب افراط و تفریط سے بچتے ہوئے وسطی راستہ سے معاملات کا نبھانا۔اسی مفہوم کی ایک حدیث بنویﷺ بھی موجود ہے کہ ”خیرالامور اوسطھا“کہ بہترین کام میانہ روی والے ہوتے ہیں۔بدھ مت میں ”درمیانی راستہ“کاسب سے اولین تقاضہ لذتوں کو خیرآباد کہناہے اور شم و زیرشکم کے مزوں سے بچتے ہوئے زہدکے راستے کواختیارکرناہے۔”درمیانی راستے“کی اس منزل کے حصول کے لیے بدھ بگشؤں کوانتہائی اوراخیرسادگی اورسخت ترین روزوں کے عمل سے گزرناپڑتاہے۔ ان روزوں کے دوران پھلیوں کی یخنی کے یومیہ چندقطروں پر کئی کئی دنوں تک زندہ رہناہے۔بدھ مت میں ان روزوں کی انتہایہ سمجھی جاتی ہے کہ چیلا یعنی سالک روزوں کے بعد محض اس قابل ہو کہ بمشکل اپنے پاؤں پر کھڑاہوسکے۔روزہ جن کسرتوں کا ایک حصہ ہے ان کامجموعہ ”جھانیا‘کہلاتاہے۔ان کسرتوں میں مذکورہ پابندیوں کے ساتھ ساتھ مسلسل جاگتے رہناسمیت ان تمام امور سے اجتناب ضروری ہوتاہے جن کے ذریعے نفس کو کسی طرح کی راحت،آسودگی اورآرام میسرآتاہو۔

بدھ مت میں کی تعلیمات میں ایک دن میں صرف ایک وقت کے کھاناکھانااورباقی سارادن بھوکے رہنے کو بھی روزہ سمجھاجاتاہے۔”ڈھو ٹانگا“نامی یہ روایت تھائی لینڈ کے جنگلات میں رہنے والے ”تھیرواد“فرقے کے بدھ بھگشؤں کی ہوتی تھی۔”ڈھوٹانگا“ایک ایسی روایتی اصطلاح ہے جس کا مطلب دنیاسے بے رغبتی پیداکرناہے حتی کی اپنے جسم کو بھی نظراندازکردینا اس روایت کاایک حصہ ہے۔اسی روایت کے تحت بدھ بھگشؤں کو زندہ رہنے کے لیے محنت مزدوری کرنے اور کمانے کی یاتجارت و ملازمت کی اجازت نہیں ہوتی اور انہیں اپنی روح اور جسم کا رشتہ برقراررکھنے کے لیے دربدر بھیگ مانگنی ہوتی ہے۔بعض اوقات یہ بدھ بھگشواجتماعی طورپر بھی بھیک مانگتے ہیں اور ان میں سے کسی ایک کے ہاتھ میں ”پیالہ“ہوتاہے۔اس کشکولی ”پیالے“کے گرد بھی بدھ مت کے بے پناہ فلسفے گردش کرتے ہیں۔بہرحال اگر کوئی صاحب خانہ اس پیالے میں کچھ ڈال دے تو یہ بدھ بھگشو اسے اپنے پیٹ میں انڈیل لیتے ہیں۔اور اگر ان بھگشؤں میں سے کسی کوتوکھانے کو مل جائے اور کسی کی باری آنے تک وہ”پیالہ“خالی ہو جائے یا پھر سارادن مانگتے رہنے کے باوجود کوئی بھیک نہ ملے تو بدھ مذہب کے مطابق یہ اس دن کاروزہ ہو گا۔چین کے بدھ بھگشوبھی کم و بیش اسی طرح کاروزہ رکھتے ہیں صرف اس فرق کے ساتھ کہ ان کے ہاں دنوں کی مخصوص تعدادکا تعین کیاجاتاہے۔اس طرح کے چینی روزے کو”زوہاجی“یا ”بھگوان زہی“کہتے ہیں اوریہ مشرقی ایشیائی ”مہایانا“بدھ مت میں رائج ہیں۔اس روایت کے مطابق آٹھ دن کاروزہ،چھ دنوں کاروزہ اور تین دنوں کاروزہ بھی رکھاجاتاہے،ان کے علاوہ جو بڑے بدھ بھگشوہیں وہ بدھ تقویمی سال کے پہلے،پانچویں اور نویں مہینے کے اول نصف ایام بھی روزوں سے گزارتے ہیں اور ان ایام میں گوشت اور مچھلی سے مکمل پرہیزہوتاہے۔جب کہ جاپانی بدھ مت میں یہ روزے ایک ہفتے کے دورانیے کے ہی ہوتے ہیں۔

بدھ مت میں روزے کاآغاز خشک روٹی کھاکر کیاجاتاہے،اور روزانہ کی بنیادپر صرف پانی کی محدود مقدار لینے کی اجازت ہوتی ہے۔روزے کااختتام دلیے جیسے کھانے پر کیاجاتاہے۔ابتداََ یہ مشق تھوڑے دنوں کے لیے کی جاتی ہے لیکن بعد میں دنوں کی تعداد متواتر بڑھائی جاتی رہتی ہے۔اس سلسلے کا آخری مرحلہ بہتر(72)دنوں کے روزے کاہوتاہے لیکن اس کے لیے کسی بزرگ گرو کاساتھ ہونا ضروری سمجھاجاتاہے جو پہلے ان سخت قسم کے جاں گسل مرحلوں سے گزرچکاہو۔چنانچہ بدھ میں یہ تصورعام ہے روزہ ہرکس و ناکس پر لازم نہیں ہے۔بدھ مت میں روزہ کے دوران بالکل بھوکاپیاسارہنے کے تصورات بھی ملتے ہیں اور بہت محدود کھانے پینے کی اجازت کے تصورات بھی ملتے ہیں اور صرف چنیدہ اشیا جیسے شہد،میٹھااور گھی کے کھانے پینے کے تصورات بھی موجود ہیں اور صرف کچھ چیزوں سے پرہیز کے خیالات بھی موجود ہیں۔روزے کامقصد تمام بدھ مکاتب فکرمیں ایک ہی ہے کہ جسم جتناکمزور ہو گا روح اتنی طاقتورہوگی اور بلندیوں کی طرف اور نجات کی طرف پرواز میں آسانی اور سہولت ہوگی۔

سری مہاتماگوتم بدھ کے بارے میں ایک رائے یہ بھی ہے کہ وہ اللہ تعالی کے سچے نبی تھے۔لیکن چونکہ قرآن و حدیث نبویﷺ میں ایسی کوئی واضع راہنمائی موجود نہیں اس لیے یہ بات خیالات کی حدتک توٹھیک ہوسکتی ہے لیکن اسے عقائد میں جگہ نہیں مل سکتی۔تاہم آج ان کے پیروکار بدھاکی اصل تعلیمات سے کتنی دور نکل چکے ہیں اس کا بھی مشاہدہ آسانی سے کیاجاسکتاہے۔بدھ مت کی کتب میں یہاں تک لکھاہے کہ راہ چلتے نہایت احتیاط سے چلو کہ مباداکوئی چیونٹی پاؤں کے نیچے آکر مر جائے۔اس حد تک دوسروں کو اپنے آپ سے محفوظ و مامون رکھنے والا مذہب اور اس کا بانی اور اسکی تعلیمات بہت قیمتی اور مقدس ہوں گے۔لیکن اس مذہب کے ماننے والے بدھوں نے ماضی قریب میں برماکے اندر جس طرح مسلمانوں کا قتل عام کیا،ان کی بستیوں کی بستیاں جلائیں اور انہیں ملک بدر کیا اور طرح طرح کے نئے طریقوں سے ان پر تشددکر کے انہیں موت کے گھاٹ اتارا کہ یہ سب کچھ دیکھنے اور پڑھنے کے بعد یقین ہی نہیں آتا کہ یہ اسی سری مہاتما گوتم بدھ کے پیروکارہیں جن کی تعلیمات میں انسانیت کوٹ کوٹ کر بھری ہوئی تھی۔اگر ظلم کی کہانی کسی حکومت کی لکھی گئی ہوتی تو بھی اصراف نظر ممکن تھا لیکن افسوس تویہ ہے کہ بے پناہ تشدداور خلاف انسانیت افعال کے ذمہ دار براہ راست بدھ بھگشو ہی تھے جنہوں نے عام بدھوں کو اپنے پیچھے لگاکر انسانیت کا جنازہ نکالا۔روزوں کے نتیجے میں ایسی روحانی پاکیزگی اور حصول نروان کو کیاکیجئے کہ جب انسان کی پہچان ہی اندرسے نکل جائے۔کتنی صاف و شفاف تعلیمات ہیں محسن انسانیتﷺکی کہ جس ہستی نے روحانی پاکیزگی کو تقوی سے مستعارکیااور مسلمانوں اور غیرمسلموں کے لیے ایک ہی عالمی انسانی معیارات پیش کیے کہ کل انسان ایک آدم کی اولاد ہیں اور عزت کاحق داروہی ہے جو زیادہ متقی و پرہیزگارہے،صلی اللہ علیہ وآلہ وسلم۔