ڈپٹی کمشنر لوئر چترال کا لواری اپروچ روڈ کا معائنہ، تعمیراتی کام سات دن میں مکمل کرنے کی ہدایت

چترال (نمائندہ چترال ٹائمز) ڈپٹی کمشنر لوئر چترال راؤ ہاشم عظیم نے جمعہ کے روز ضلعی انتظامیہ کے افسران اور این ایچ اے حکام کے ہمراہ لواری اپروچ روڈ کا تفصیلی معائنہ کیا، جہاں انہوں نے جاری تعمیراتی کام کا باریک بینی سے جائزہ لیا۔

معائنہ کے دوران ڈپٹی کمشنر نے موقع پر موجود متعلقہ حکام کو واضح ہدایات جاری کرتے ہوئے کہا کہ تعمیراتی کام کو اعلیٰ معیار کے مطابق سات دن کے اندر ہر صورت مکمل کیا جائے۔ انہوں نے این ایچ اے کی موجودہ رفتار اور اب تک کی پیش رفت پر اطمینان کا اظہار کیا اور ٹیم کی کارکردگی کو سراہا۔

ڈپٹی کمشنر راؤ ہاشم عظیم نے ہدایت کی کہ منصوبے کی مؤثر نگرانی، کام کی رفتار میں مزید بہتری اور معیار کی سختی سے پاسداری کے لیے بروقت اور عملی اقدامات ہر حال میں یقینی بنائے جائیں، تاکہ عوام کو درپیش مشکلات کا جلد از جلد خاتمہ ممکن ہو سکے۔