یوم آزادی کے موقع پر گورنر حاجی غلام علی اورنگران وزیراعلیٰ خیبرپختونخوا کا پیغام
یوم آزادی کے موقع پر گورنر حاجی غلام علی اورنگران وزیراعلیٰ خیبرپختونخوا کا پیغام
پشاور (چترال ٹایمزرپورٹ ) گورنرخیبرپختونخوا حاجی غلام علی نے 76ویں یوم آزادی کے پر مسرت موقع پرا پنے پیغام میں پوری پاکستانی قوم اور بالخصوص صوبہ خیبرپختونخواو ضم اضلاع کے عوام کو جشن آزادی کی مبارک باددی ہے اورکہاہے کہ آج کے دن پوری قوم، برصغیر کے مسلمانوں کو مملکتِ خداداد پاکستان کے قیام کیلئے بے مثال جدوجہد اور لازوال قربانیوں پر خراج تحسین پیش کرتی ہے۔ آج کے دن ہمیں یہ عہدکرناہوگاکہ پاکستان کو صحیح معنوں میں بانی پاکستان قائد اعظم محمد علی جناح اور مصور پاکستان حضرت علامہ اقبال کے خوابوں کی عملی تعبیربنانے کیلئے ہم سب ملکر کردار اداکریں گے اور ملک کو درپیش چیلنجز کا اتفاق اوراتحاد سے مقابلہ کریں گے۔
آزادی اللہ تعالی کی بہت بڑی نعمت ہے اور ہمیں اس کی قدر کرنی چاہئیے، ہمیں ذاتی، گروہی اور تفرقہ بازی سے بالاتر ہوکر یکسوئی، ہم آہنگی اور اتحاد کے ساتھ آگے بڑھناہوگا۔ مملکت خداداد پاکستان ہمارے اکابرین کی جدوجہد وقربانیوں کانتیجہ ہے جس کی حفاظت بحیثیت مسلمان و پاکستانی قوم ہم سب نے متحد ہوکرکرنی ہے۔ہم آج ایک آزاد ملک میں سانس لے رہے ہیں، جس کے لئے ہم اللہ تعالیٰ کا جتنا بھی شکر ادا کریں کم ہے تاہم جب تک ہم معاشی طور پر ایک خودمختار ریاست نہیں بنتے، تب تک مکمل آزادی کا یہ خواب حقیقت بننے سے محروم رہے گا۔کسی بھی قوم کیلئے اندرونی خلفشار، باہمی تقسیم اور انتشار سے بڑھ کر کوئی چیز خطرناک نہیں ہوسکتی، کیونکہ ایسے منفی عناصر نہ صرف مِلی وحدت اور قومی سالمیت کو نقصان پہنچاتے ہیں بلکہ معاشرے کو اسکے مقصد سے بھی محروم کر دیتے ہیں۔ الحمدللہ آج ہمارے ملک کی سلامتی، خودمختاری مضبوط ہے جس کو ہم نے اپنی ملک کی سرحدوں کے محافظوں کے ساتھ ملکر مضبوط سے مضبوط تربناناہے۔
میں اس موقع پر افواج پاکستان اوردیگرسیکیورٹی اداروں کے جوانوں کوبھی خراج تحسین پیش کرتاہوں،شہدا نے مادر وطن کی سلامتی کے لیے جانوں کا نذرانہ پیش کیاہے،افواج پاکستان اور قانون نافذ کرنے والے اداروں کی قربانیاں کبھی نہیں بھولیں گے۔آئیں مل کر عہد کریں کہ ہم اپنے پیارے وطن کو جس کی بنیادکلمہ توحیدہے، اپنے اباو اجداد کے نظریات کے عین مطابق ایک فلاحی ریاست بنائیں گے اور اس مملکت خدادادکی نظریاتی اور جغرافیائی حفاظت کیلئے کسی بھی قربانی سے دریغ نہیں کریں گے۔
14 اگست (یوم آزادی)کے موقع پر نگران وزیراعلیٰ خیبرپختونخوا کا پیغام
پشاور ( چترال ٹایمز رپورٹ ) نگران وزیر اعلی خیبر پختونخوا محمد اعظم خان نے وطن عزیز کی آزادی کے موقع پر پوری قوم باالخصوص خیبرپختونخوا کے عوام کو دلی مبارکباد دیتے ہوئے کہا ہے کہ مملکت خدادادکی بقاءو سلامتی اور اس کی ترقی و خوشحالی کے لیے تجدیدِ عہد کا دن ہے، پاکستان بلا شبہ برصغیر کے مسلمانوں کی ایک طویل جدوجہد اور عظیم قربانیوں کا ثمر ہے، آج ہم اپنے اسلاف کی ان قربانیوں اور جدو جہد کو خراج عقیدت پیش کرتے ہیں اور اس عزم کا اعادہ کرتے ہیں کہ ہم وطن عزیز کو ایک عظیم ملک بنانے کے لئے ان نظریات پر کار بند رہیں گے جو اس مملکت خداداد کے حصول کی بنیاد ہیں۔ پاکستان کی 76 ویں سالگرہ کے موقع پر یہاں سے جاری اپنے ایک بیان میں وزیر اعلی نے کہا ہے کہ پاکستان کا قیام لاکھوں مسلمانوں کی قربانیوں کا نتیجہ ہے جن کی وجہ سے آج ہم پر امن فضا میں سانس لے رہے ہیں۔ یہ بلاشبہ ہمارے اسلاف کا ہم پر ایک عظیم احسان ہے، اس لئے اب اس مملکت خداداد کو حقیقی معنوں میں ایک آ زاد فلاحی ریاست اور ترقیافتہ ملک بنانا ہم سب کا اجتماعی فریضہ ہے۔ اس مقصد کیلئے معاشرے کے تمام طبقات کو اپنا کردار ادا کرنا ہوگا۔ انہوں نے کہا کہ وطن سے محبت کا اولین تقاضا ہے کہ ہم علاقائی ، نسلی اورلسانی امتیازات اور تمام تر ذاتی وابستگیوں سے بالاتر ہو کر ملک کی حقیقی آزادی اور ترقی کیلئے یکجا ہو جائیں۔ہم آزادی کیلئے پیش کی گئی لاکھوں قربانیوں کی قیمت تو نہیں چکاسکتے البتہ آزادی کے حقیقی مقاصد حاصل کرکے اپنے اسلاف کے خواب کو شرمندہ تعبیر کر سکتے ہیں۔ اس مقصد کے لیے ملک کو داخلی ، خارجی اور مالی بحرانوں سے نکالنے اور معاشی استحکام کیلئے ایک آزادانہ اور دیرپا حکمتِ عملی کی ضرورت ہے کیونکہ مالی خودکفالت اور معاشی استحکام ناقابل تسخیر قومی دفاع کیلئے ناگزیر ہے۔آئیں آج کے دن ہم سب اس عہد کی تجدید کریں کہ ہم بانیان پاکستان کے وژن کے مطابق پاکستان کو ایک عظیم ملک بنانے کے لئے اپنا کردار بطریق احسن ادا کریں گے اور ہم قومی مفادات کو سیاسی اور ذاتی مفادات پر ترجیح دیں گے۔ اس موقع پر وزیر اعلی نے تحریک آزادی کے شہداءسمیت پاکستان کے دفاع و سلامتی کیلئے اپنی جانوں کا نذرانہ پیش کرنے والے مسلح افواج، پولیس اور دیگر اداروں کے جوانوں کو بھی خراج عقیدت پیش کیا ہے۔
