ضلعی انتظامیہ لوئر چترال کی کم عمر اور بغیر ہیلمٹ موٹرسائیکل چلانے والوں اور اضافی کرایہ وصول کرنے والے ٹرانسپورٹروں کے خلاف کریک ڈاؤن جاری
ضلعی انتظامیہ لوئر چترال کی کم عمر اور بغیر ہیلمٹ موٹرسائیکل چلانے والوں اور اضافی کرایہ وصول کرنے والے ٹرانسپورٹروں کے خلاف کریک ڈاؤن جاری
چترال (نمائندہ چترال ٹائمز ) ڈپٹی کمشنر لوئر چترال راو ہاشم عظیم کی خصوصی ہدایات پر، ضلع میں سڑکوں پر حفاظت کو یقینی بنانے کے لیے کم عمر اور بغیر ہیلمٹ موٹر سائیکل چلانے والوں کے خلاف وسیع کریک ڈاؤن جاری ہے،
اس مہم کے تحت، ایڈیشنل اسسٹنٹ کمشنر دروش خلیل اللہ نے ٹریفک پولیس کے ہمراہ دروش کے مختلف علاقوں میں کاروائی کی، متعدد موٹر سائیکل سواروں کو روکا گیا جو قانونی عمر سے کم تھے یا حفاظتی ہیلمٹ کے بغیر موٹر سائیکل چلا رہے تھے۔کاروائی کے دوران کم عمر اور بنا ہیلمٹ و لائسنس کے بائیکرز کے خلاف قانونی کاروائی عمل میں لائی گئ۔
یہ کاروائی چترال شہر ودیگر علاقوں میں بھی جاری ہے، ڈپٹی کمشنر نے سختی سے ہدایت کی ہے کہ کم عمر موٹرسائیکلسٹ اور بیغیر ہیلمیٹ موٹرسائیکل چلانے والوں کے خلاف موثر قانونی کاروائی عمل میں لائی جائے ۔
دریں اثنا ایڈیشنل اسسٹنٹ کمشنر دروش، خلیل اللہ نے ٹریفک پولیس کے ہمراہ سرکاری کرایوں پر عملدرامد کا بھی جائزہ لیا۔ ڈپٹی کمشنر کی ہدایت پر دورانِ معائنہ، مسافروں سے اضافی کرایہ وصول کرنے والے ڈرائیورز سے اضافی رقم مسافروں کو واپس کروائی گئی اور ڈرائیورز کے خلاف قانونی کاروائی عمل میں لائی گئی۔
