ڈسٹرکٹ پولیس آفیسر لوئر چترال افتخار شاہ تبدیل، رفعت اللہ خان (پی ایس پی) نئے ڈی پی او لوئر چترال تعینات

Flt lt (R) Riffatullah Khan DPO Chitral

چترال (نمائندہ چترال ٹائمز) لوئر چترال کے ڈسٹرکٹ پولیس آفیسر افتخار شاہ کا تبادلہ کر دیا گیا ہے، جبکہ ان کی جگہ رفعت اللہ خان (پی ایس پی) کو نیا ڈی پی او لوئر چترال تعینات کر دیا گیا ہے۔ اس حوالے سے باقاعدہ اعلامیہ جاری کر دیا گیا ہے۔افتخار شاہ کا تبادلہ چترال سے پشاور سی پی او کردیا گیا ہے جہاں وہ ایس پی ٹریننگ اور ایڈمن کے طور پر خدمات انجام دیں گے۔

ڈی پی او افتخار شاہ چترال میں اپنی ذمہ داریوں کی انجام دہی کے دوران نہایت فرض شناس، دیانتدار اور پیشہ ور افسر کے طور پر جانے جاتے تھے۔ انہوں نے اپنے دورِ تعیناتی میں پولیس فورس میں نظم و ضبط، عوامی خدمت اور شفاف policing کو مرکزی ترجیح دی۔ پولیس اہلکاروں کے ساتھ ان کا مشفقانہ رویہ اور عوام کے ساتھ انتہائی خندہ پیشانی ان کی شخصیت کی نمایاں خصوصیات تھیں۔

افتخار شاہ کے دور میں چترال میں منشیات کے خلاف مؤثر اور مسلسل مہم چلائی گئی۔ منشیات فروشوں کے خلاف بلا امتیاز کارروائیاں کی گئیں، جسے عوامی حلقوں نے سراہا۔ اسی طرح ٹریفک نظام کی بہتری کے لیے بھی انہوں نے نمایاں اقدامات کیے۔ کم سن ڈرائیوروں اور موٹرسائیکلسٹ کے خلاف زیرو ٹالرنس پالیسی اپنائی گئی، جس کے نتیجے میں گزشتہ دو برسوں کے دوران موٹر سائیکل حادثات میں نمایاں کمی ریکارڈ کی گئی۔

عوامی حلقوں نے افتخار شاہ کی خدمات کو خراجِ تحسین پیش کرتے ہوئے اُمید ظاہر کی ہے کہ نئے تعینات ہونے والے ڈی پی او رفعت اللہ خان بھی چترال میں امن وامان، منشیات کے خاتمے اور ٹریفک اصلاحات کے سلسلے کو اسی عزم اور مؤثر حکمتِ عملی کے ساتھ آگے بڑھائیں گے۔