حالیہ زلزلہ سے ہونیوالی جانی و مالی نقصانات پر خیبرپختونخوا کے عوام افغانستان کے عوام کے غم میں برابر کے شریک ہیں، حاجی غلام علی

گورنر حاجی غلام علی کی قونصلیٹ جنرل امارات اسلامی افغانستان پشاور آمد،قونصل جنرل حافظ محب اللہ شاکر سے ملاقات

گورنر نے افغان قونصل جنرل سے افغانستان میں حالیہ زلزلہ سے 2500 انسانی اموات پر اظہار تعزیت کی، 5 ہزار سے زائد عمارتوں کے تباہ ہونے سمیت مالی نقصانات پر اظہار افسوس کیا

پشاور ( چترال ٹائمزرپورٹ ) گورنر خیبر پختونخوا حاجی غلام علی نے بدھ کے روز افغان قونصلیٹ جنرل پشاور کا دورہ کیا اور پشاور میں تعینات افغانستان کے قونصل جنرل حافظ محب اللہ شاکر سے انکے دفتر میں ملاقات کی۔ گورنر نے افغان قونصل جنرل سے افغانستان کے صوبہ ہرات میں حالیہ زلزلہ سے 2500 قیمتی جانی اموات پر اظہار تعزیت کی، 5 ہزار سے زائد عمارتوں کے تباہ ہونے سمیت مالی نقصانات پر اظہار افسوس کیا۔گورنرنے کہاکہ اپنی اور خیبر پختونخوا کے عوام کیجانب سے افغانستان حکومت و عوام سے حالیہ زلزلہ کے جانی و مالی نقصانات پر اظہار تعزیت کرتا ہوں۔ حالیہ زلزلہ سے ہونیوالے جانی و مالی نقصانات پر خیبرپختونخوا کے عوام افغانستان کے عوام کے غم میں برابر کے شریک ہیں۔انہوں نے کہاکہ افغانستان برادر ہمسایہ اسلامی ملک ہے،طرفین کے عوام ایکدوسرے کے غم و خوشی میں برابر کے شریک ہیں۔اس موقع پر افغان قونصل جنرل نے اظہار ہمدردی کیلئے تشریف لانے پر گورنر خیبر پختونخوا حاجی غلام علی کا شکریہ ادا کیا۔انہوں نے کہاکہ خوشی، غم میں ساتھ دینے اور افغان مہاجرین کی خدمت و عزت دینے پر خیبرپختونخوا حکومت و عوام کے شکر گزار ہیں۔ملاقات میں افغان قونصل جنرل نے افغان مہاجرین کی باعزت واپسی سے متعلق گورنر کو اپنی تجویز پیش کی جس پر گورنر نے افغان قونصل کیجانب سے پیش کیجانیوالی تجویز کو وزیراعظم پاکستان تک پہنچانے کی یقین دہانی کرائی، اس موقع پر افغان قونصلیٹ جنرل میں میڈیا سے گفتگو کرتے ہوئے گورنر کا کہنا تھا کہ افغان قونصلیٹ جنرل دورہ کا مقصد اپنی اور خیبر پختونخوا حکومت کیجانب سے افغانستان میں حالیہ زلزلہ سے جانی و مالی نقصانات پر اظہار تعزیت پیش کرنا تھا، انہوں نے کہا کہ غیر قانونی طور پر مقیم افغان مہاجرین کی باعزت وطن واپسی ریاست پاکستان کا فیصلہ ہے۔صوبے ریاستی فیصلے پر عملدرآمد میں افغان مہاجرین کا عزت و احترام یقینی بنائیں گے۔انہوں نے کہا کہ پاکستان بالخصوص خیبرپختونخوا حکومت اور عوام افغان مہاجرین کی کئی دہائیوں سے مہمان نوازی کر رہے ہیں, افغانستان کے عوام سے عزت و احترام اور بھائی چارے کا رشتہ ہے، افغانستان و پاکستان کے عوام کی تہذیب، ثقافت، روایات مشترک ہیں، ہم پوری کوشش کریں گے کہ افغان مہاجرین کو وطن واپسی میں کسی مشکلات و تکالیف کا سامنا نہ کرنا پڑے۔ گورنر کے دورہ افغان قونصل جنرل پشاور کے دوران جمعیت علمائے اسلام کے جنرل سیکرٹری مولانا عطاء الحق درویش اور سابق صوبائی وزیرمولانا امان اللہ حقانی جبکہ افغان قونصلیٹ جنرل کے سیکرٹری سوئم مولوی محمد رضا رحمانی، محمد طاہر نافذ اور محمد سعید ہاشمی بھی موجود تھے۔#