آغا خان ایجنسی فار ہیبیٹاٹ پاکستان کی جانب سے درونیل، کریم آباد میں پینے کے صاف پانی کا منصوبہ مکمل، باقاعدہ افتتاح کے بعد آج کمیونٹی کے حوالے کیا گیا

کریم آباد (نمائند ہ چترال ٹائمز ) آغا خان ایجنسی فار ہیبیٹاٹ پاکستان (اکاہ) کی جانب سے درونیل، کریم آباد کے ۹۴ گھرانوں کے لئے  پینے کے صاف پانی کا ایک منصوبہ پایہ تکمیل کے بعد درونیل کریم آباد کے عوام کے حوالے کردیا گیا۔ افتتاحی تقریب سے خطاب کرتے ہوئے آر پی ایم ولی محمدخان نے کہا کہ  اکاہ  کی جانب سے رواں سال چترال میں اج ہم چوتھے پینے کے صاف پانی کا منصوبہ تکمیل کے بعد کمیونٹی کے حوالے کررہے ہیں۔یہ سب کچھ کمیونٹی کی مدد اور آغا خان ایجنسی فار ہیبیٹاٹ پاکستان کے اسٹاف کی انتھک محنت کا نتیجہ ہے۔ ان کا کہنا تھا کہ انسان کی مثبت سوچ ہمیشہ کامیابیوں کا سبب بنتا ہے، جبکہ تنقید برائے تنقید اور منفی سوچ معاشرے میں انارکی کے علاوہ فرد واحد کی زندگی میں بھی مسائل کو جنم دینے کا سبب بنتا ہے۔ آپ سب لوگوں کی مثبت سوچ کا نتیجہ ہے کہ آج ہم کروڑوں کا پراجیکٹ کامیابی سے مکمل کرنے کے بعد اپنی کیچن میں ڈبلیو ایچ او کے معیار کے مطابق صاف پانی کی فراہمی کو یقینی بنایا ہے۔یہ سہولت کراچی اور اسلام آباد میں دستیاب نہیں ہے۔ آپ لوگ خوش قسمت ہیں کہ آپ لوگوں چوبیس گھنٹے اس سے مستفید ہوں گے۔

بورڈ آف ڈائریکٹر محمد افضل نے کہا کہ ہمیں اپنے اداروں پر تنقید کے بجائے آگے بڑھ کر ان کی مدد کرنی چاہئے۔ اداروں کے اسٹاف کے ساتھ مل کر کام کرنے اور ان کی حوصلہ افزائی کرنے کا ثمر آج آپ لوگ صاف پانی کی صورت میں حاصل کرچکے ہیں۔ آپ لوگوں کی مدد اور حوصلہ افزائی کاسلسلہ جاری رہا تو اس سے بھی بڑے منصوبے آپ کے علاقے میں شروع ہوں گے۔

پریذیڈنٹ ریجنل کونسل لوئر چترال نے اپنے اختتامی خطاب میں کہا کہ امامت کے ادارے اپنی وژن کے مطابق بنی نوع انسان کے لئے سہولیات کی فراہمی کو یقینی بنانے میں اپنا کردار ادا کررہے ہیں۔ چترال کے لوگوں کو اب آگے بڑھ کر اپنی بساط کے مطابق اداروں کی مدد کرنی چاہئے۔ تاکہ ادارے بہتر طور پر مزید ضرورت مند لوگوں تک پہنچ کر بنیادی انسانی ضروریات کی فراہمی کو یقینی بنا سکیں۔

آج کی تقریب میں علاقے کے عمائدین،آغا خان ایجنسی فار ہیبیٹاٹ پاکستان کے اسٹاف اور مختلف دیہات سے آئے ہوئے لوگوں نے بڑی تعداد میں شرکت کی اور اپنے خیالات کا اظہار کرتے ہوئے چترال کی ترقی میں آغا خان ایجنسی فار ہیبیٹاٹ پاکستان کے کردار کو خراج تحسین پیش کیا۔

آغا خان ایجنسی فار ہیبیٹاٹ پاکستان کے زیراہتمام  کالاش ویلی میں سکول سیفٹی ڈے کے سلسلے میں اگاہی  پروگرام  کا انعقاد

بمبوریت (نمائندہ چترال ٹائمز)  آغا خان ایجنسی فار ہیبیٹاٹ پاکستان نے سکول سیفٹی ڈے کی مناسبت سے گورنمنٹ ہائر سکینڈری سکول بمبوریت میں اگاہی پروگرام کا انعقاد کیا جس میں زندگی کے تمام شعبوں سے تعلق رکھنے والے افراد اور سکول کے بچوں نے بڑی تعدادمیں شرکت کی۔ پروگرام میں سکول کے بچوں نے نعت مقبول کے علاوہ سکول سیفٹی ڈے کی مناسبت سے انگریزی اور اردو میں تقاریر پیش کئے جبکہ قدرتی آفات سے آگاہی کے لئے سکول کے بچوں میں ماحولیات اور قدرتی آفات سے متعلق کوئز کمپیٹشن کا مقابلہ بھی ہوا جس میں جتینے والے طلبہ کو شیلڈ اور مختلف قسم کے انعامات سے نوازا گیا۔ پروگرام میں طلبہ اور کمیونٹی ایمرجنسی ریسپانس ٹیم (CERT) نے مل کر عملی مشق کا مظاہرہ بھی کیا۔ جسے شرکاء نے بہت سراہا۔

منیجر ایمرجنسی منیجمنٹ جاوید احمد نے سکول سیفٹی ڈے کی تاریخ و اہمیت اور آغا خان ایجنسی فار ہیبیٹاٹ پاکستان کے کردار کے بارے میں تفصیلی بریفنگ کے دوران کہا کہ ڈینش ایمبسی کالاش ویلی میں Increasing Communities’ Resilience to Climate Change (ICRCC) پروجیکٹ کے ذریعے مختلف ترقیاتی کاموں میں AKAHP کی مدد کررہا ہے۔ سال 2024 کے لئے Fostering safer learning environment for a resilient future کے تھیم کے تحت AKAHP اور ڈینش ایمبسی باہمی تعاون سے سکول سیفٹی ڈے منا رہے ہیں۔ان کا کہنا تھا کہ آغا خان ایجنسی فار ہیبیٹاٹ پاکستان ملک کے مختلف علاقوں میں انسانی زندگی میں بہتری لانے کے لئے بہت سارے ترقیاتی کاموں میں دہائیوں سے مصروف عمل ہے جس میں بنیادی انسانی ضروریات کی فراہمی سے لے کر قدرتی آفات کے دوران جانی و مالی نقصانات سے بچانے کے لئے ہر ممکن کوشش شامل ہے۔یاد رہے کہ آغا خان ایجنسی فار ہیبیٹاٹ پاکستان سکول سیفٹی کا یہ دن 2008 سے منارہی ہے جس میں ہر سال مختلف سکولوں میں بچوں میں قدرتی آفات کے بارے میں آگاہی اور بچاؤ کی مہم چلائی جاتی ہے۔ شاہد حسین، ڈی ڈی او ایجوکیشن ڈیپارٹمنٹ (میل) نے اپنی خطاب میں کہا کہ اغا خان ایجنسی فار ہیبیٹاٹ پاکستان کی کوششوں کے نتیجے میں اس سال سکول سیفٹی ڈے چترال کے تمام سکوں میں منایا گیا۔ اور ڈسٹرکٹ ایجوکیشن ڈیپارٹمنٹ نے اس سلسلے میں تمام سکوں کو نوٹیفکیشن جاری کیا۔
تقریب سے اختتامی خطاب میں ڈی جی کالاش ویلی ڈیویلپمنٹ اتھارٹی منہاس الدین نے کہا کہ آج سے بیس سال قبل ہم قدرتی آفات سے نمٹنے کے لئے اتنے سارے معلومات نہیں رکھتے تھے جتنی اب ہے۔ اس آگاہی میں چترال میں سب سے بڑا کردار AKAHP کا ہے۔ ہم توقع رکھتے ہیں کہ آغاخان ایجنسی فار ہیبیٹاٹ پاکستان آئندہ بھی اپنے اس بہترین کام کو جاری رکھے گا۔

تقریب میں مختلف یونیورسٹیوں کے پروفیسر، لیکچرارز اور زندگی کے تمام شعبوں سے تعلق رکھنے والے افراد شامل تھے جن میں منہاس الدین، ڈی جی، کے وی ڈی اے، شاہد حسین، ڈی ڈی ای او، ڈاکٹر خان عالم، پروفیسر ڈیپارٹمنٹ آف فزکس پشاور یونیورسٹی، ڈاکٹر عادل پروفیسر اسلامیہ کالج، ڈاکٹر رحمن اللہ، بریسٹر طاہر اور ڈاکٹر منیر عالم جیسے چیدہ چیدہ افراد نے شرکت کی اور AKAHP کے عوام میں آگاہی پھیلانے کے اس مہم کو سراہا۔ اور توقع کا اظہار کیا کہ آگاہی کا یہ سلسلہ ہمیشہ جاری رہے گا۔ تقریب کا اختتام اگا ہی واک سے ہوا، جسمیں شرکاء نے بڑھ چڑھ کر حصہ لیا۔