چترال ماڈل کالج نے صوبائی سطح کے فٹبال مقابلے کے فائنل میں جمرود کو 4–0 سے شکست دیکر ٹائٹل اپنے نام کرلیا

پشاور(نمائندہ چترال ٹائمز) چترال ماڈل کالج کی فٹبال ٹیم نے پشاور میں منعقدہ صوبائی سطح کے فٹبال مقابلوں میں شاندار کارکردگی کا مظاہرہ کرتے ہوئے صوبائی چیمپئن بننے کا اعزاز حاصل کر لیا۔ فائنل میچ میں چترال ماڈل کالج نے جمرود کی ٹیم کو 4–0 گول سے شکست دے کر ٹائٹل اپنے نام کیا۔

میچ کے دوران چترال ماڈل کالج کے کھلاڑیوں نے بہترین ٹیم ورک، نظم و ضبط اور جارحانہ کھیل پیش کیا، جس کے باعث مقابلہ یکطرفہ رہا۔ شائقین نے کھلاڑیوں کی مہارت اور کھیل کے اعلیٰ معیار کو خوب سراہا۔

اس تاریخی کامیابی پر اساتذہ، طلبہ، کھیلوں سے وابستہ حلقوں اور اہلِ چترال کی جانب سے ٹیم کو بھرپور مبارکباد دی جا رہی ہے۔ تعلیمی و سماجی حلقوں کا کہنا ہے کہ اس کامیابی سے نہ صرف کالج بلکہ پورے چترال کا نام صوبائی سطح پر روشن ہوا ہے۔

کالج انتظامیہ نے ٹیم کے کھلاڑیوں اور کوچز کی محنت کو سراہتے ہوئے اس عزم کا اظہار کیا ہے کہ آئندہ بھی کھیلوں کے فروغ اور نوجوان ٹیلنٹ کی حوصلہ افزائی کے لیے ہر ممکن تعاون جاری رکھا جائے گا۔