اگلے جشن شندور تک ہم چترال بونی مستوج شندور روڈ کو پختہ کرنے کے خواہاں ہیں اور اس سلسلے میں ،میں اپنی تمام تر کوششوں کو بروئے کار لا رہا ہوں۔چیف سیکریٹری
صوبے کی بزنس کمیونٹی کے ساتھ خصوصی بیٹھک ہوگی، چیف سیکرٹری ندیم اسلم چوہدری
بزنس کمیونٹی کے مسائل کو حل کرنے میں پیش رفت ہوئی تو معاشی ترقی کو کوئی نہیں روک سکتا، سرتاج احمد خان
پشاور(نمایندہ چترال ٹایمز )ریجنل کوارڈینیٹر ایف پی سی سی آئی سرتاج احمد خان نے گزشتہ روز چیف سیکرٹری خیبر پختونخوا ندیم اسلم چوہدری سے ان کے دفتر میں تفصیلی ملاقات کی ، چیف سیکرٹری کو صوبے کی بزنس کمیونٹی کے مسائل بارے تفصیل سے آگاہ کیا اور ان مسائل کو حل کرنے کے حوالے سے ایک خصوصی اجلاس کا مطالبہ کیا جسے چیف سیکرٹری نے قبول کرتے ہوئے منگل کے روزکو ایک گرینڈ میٹنگ ترتیب دینے کا وعدہ کیا جس میں صوبہ بھر کی بزنس کمیونٹی اور چیمبرز کے لیڈر شپ شرکت کریں گے۔کوارڈینیٹر سرتاج احمد خان نے اس موقع پر چترال کی تعمیر و ترقی بالخصوص سیلاب کے بعد کی صورت حال، چترال میں سیاحت کے فروع اور شندور میں پی ایس ایل طرز کا پولو ٹورنامنٹ کے انعقاد کے حوالے سے بھی تفصیلی تبادلہ خیال کیا ۔انہوں نے سیلاب کے بعد کی تباہ حالی بالخصوص روڈ انفراسٹرکچر کی خرابی کے حوالے سے چیف سیکرٹری کو آگاہ کیا۔ اس موقع پر فیصلہ ہوا کہ منگل کو چترال کے حوالے سے الگ سے خصوصی میٹنگ کا انعقاد کیا جائے گا اور جمعرات تک چیف سیکرٹری بنفس نفیس چترال کا دورہ کرکے ان مسائل و مشکلات کے آزالے کے لئے اقدامات کا جائزہ لیں گے۔اس موقع پر چیف سیکرٹری نے کہا کہ اگلے جشن شندور تک ہم چترال بونی مستوج شندور روڈ کو پختہ کرنے کے خواہاں ہیں اور اس سلسلے میں ،میں اپنی تمام تر کوششوں کو بروئے کار لا رہا ہوں۔ انہوں نے امید ظاہر کی کہ آنے والے موسم گرما تک اس سڑک کو مکمل کیا جائے گا۔ انہوں نے چترال کی ترقی کے لئے جامع انداز سے کام کرنے کے عزم کا بھی اظہار کیا۔