چترال کے مسائل کو حل کرنا اولین ترجیح ہوگا جبکہ چترال میرا دوسرا گھر ہے- گورنرخیبرپختونخوا
چترال (نمائندہ چترال ٹایمز ) جمعیت علمائے اسلام لویر چترال کے قائدین ضلعی امیر مولانا عبدالرحمن اور ٹاؤن تھری چترال کے سیکرٹری، آل پارٹیز اسٹئیرنگ کمیٹی کے سابق سیکرٹری اور جمعیت طلبائے اسلام کے سابق مرکزی رہنما فضل الرحمن اور دوسروں نے جمعرات کے روز گورنر ہاؤس پشاور میں خیبر پختونخوا کے گورنر حاجی غلام علی سے ملاقات کی اور انہیں چترال کے عوام کی طرف سے گورنر شپ کا عہدہ سنھبالنے پر مبارک باد پیش کی اور نیک خواہشات کا اظہار کیا۔ اس موقع پر فضل الرحمن نے گورنر کو یونیورسٹی آف چترال کو درپیش مسائل سے آگاہ کرتے ہوئے انہیں یونیورسٹی کوایکٹ کے مطابق باقاعدہ قائم کرنے سمیت اس کی تعمیر کاکا م فی الفور شروع کرنے کا مطالبہ کیا اور لویر اور اپر چترال اور خصوصاً چترال ٹاؤن میں بجلی کے بحران کا خاتمہ کرنے پر زور دیا اور کہاکہ بجلی کی قلت کی وجہ سے عوام کا جینا دوبھر ہوگیا ہے۔ اس موقع پر چترال میں این ایچ اے کے زیر اہتمام تعمیر اور مرمت ہونے والے سڑکوں میں معیار اور رفتار پر خصوصی توجہ دینے کی ضرورت پر بھی زور دیا گیا۔ گورنر غلام علی نے وفد کو یقین دلایاکہ چترال کے مسائل کو حل کرنا ان کا اولین ترجیح ہوگا جبکہ چترال ان کا دوسرا گھر ہے اور اس بنا پر وہ چترال کے جملہ مسائل سے باخبر ہیں۔ اس موقع پر فضل الرحمن نے گورنر کو چترال کا روایتی تخفہ چترالی چوغہ اور چترال ٹوپی بھی پیش کی۔
