چترال (نمائندہ چترال ٹائمز)انٹرنیشنل فٹبال مقابلوں میں پاکستان کی نمائندگی کرنے والی دخترچترال کرشمہ علی نے نیشنل یوتھ کونسل کا حصہ بننے پر وزیراعظم عمران خان کا شکریہ ادا کیا ہے۔جاری شدہ نو ٹی فکیشن کے مطابق پہلی دفعہ قائم نیشنل یوتھ کونسل میں ہر شعبہ زندگی سے نمائندگی دی گئی۔
چترال سے خاتون فٹبالرکرشمہ علی کونیشنل یوتھ کونسل کاحصہ بنانے پروزیراعظم عمران خان کاشکریہ اداکرتے ہوئے کہاکہ ملکی تاریخ میں پہلی بار وزیراعظم عمران خان نے نیشنل یوتھ کونسل قائم کر دی۔جس میں چترال سمیت خیبرپختونخواکے خواتین کے مسائل حل کرنے کی ہرممکن کوشش کیاجائے گی۔ چترال ٹائمزڈاٹ کام سے گفتگو کرتے ہوئے انہوں کہاکہ چترال میں خودکشی کے واقعات تشویشناک صورت اختیار کر لی ہے جس کے تدارک کیلئے سنجیدہ اقدامات اْٹھانے کی اشد ضرورت ہے۔انہوں نے کہاکہ معاشرتی رویوں کی وجہ سے کسی بھی طبقے سے تعلق رکھنے والی خواتین کو مردوں کے مقابلے میں زیادہ مسائل کا سامنا کرنا پڑتا ہے، خواتین کے ساتھ زیادتی، قتل، تشدد اور کم عمری کی شادیوں کے واقعات میں اضافہ ہورہاہے۔ کرشمہ علی نے کہاکہ خواتین کے ساتھ ہونے والے نامناسب سلوک اور ان پر تشدد کے حوالے سے قانون سازی کی جائے گی اورخواتین کو مختلف مسائل میں قانون اور متعلقہ اداروں سے رجوع اور اس کے طریقہ کار سے آگاہ کیا جائے گا۔انہوں نے کہاکہ ملکی خواتین کو قومی سطح پر فیصلہ سازی میں شامل کیا جائے گا، کونسل وفاقی اور صوبائی حکومتوں کے ساتھ مل کر کام کریگا۔ نوجوانوں کی فلاح وبہبود میں وفاقی حکومت نے اہم سنگ میل عبورکرلیا، پہلی بارنوجوانوں کو قومی فیصلہ سازی میں شراکت دار بنایا جا رہا ہے۔
