صوبائی کابینہ کا اجلاس، متعدد منصوبوں کیلئے گرانٹ کی منظوری کے ساتھ کم از کم اجرت 36 ہزار سے بڑھا کر 40 ہزار روپے ماہانہ کرنے کی منظوری دیدی گئی
پشاور (نمائندہ چترال ٹائمز) خیبرپختونخوا کابینہ کا 38واں اجلاس جمعہ کے روز وزیر اعلیٰ علی امین خان گنڈاپور کی صدارت میں منعقد ہوا۔ اجلاس میں کابینہ اراکین، چیف سیکرٹری، ایڈیشنل چیف سیکرٹریز، سینئر ممبر بورڈ آف ریونیو، ایڈمنسٹریٹو سیکرٹریز اور ایڈووکیٹ جنرل خیبرپختونخوا نے شرکت کی۔اجلاس کے فیصلوں سے متعلق وزیر اعلیٰ کے مشیر برائے اطلاعات و تعلقات عامہ بیرسٹر ڈاکٹر محمد علی سیف نے بتایاکہ کابینہ نے عوامی فلاح، صحت عامہ، امن و امان، سیاحت و آثارِ قدیمہ اورجنگلات سے متعلق اہم اقدامات اور مختلف قوانین میں ترامیم کی منظوری دی ہے۔جن میں بدلتے ہوئے میڈیا رجحانات اور تعلقات عامہ کے جدید تقاضوں سے ہم آہنگ صوبائی حکومت کی کمیونیکیشن سٹریٹجی کی منظوری بھی شامل ہے۔
مشیر اطلاعات نے مزید بتایا کہ کابینہ نے صوبائی ڈیزاسٹر مینجمنٹ اتھارٹی کو 1247.500ملین روپے گرانٹ کی فراہمی کی منظوری دی جو باجوڑ کے بعض دیہات میں شدت پسندوں کے خلاف کارروائیوں کے دوران رضاکارانہ طور پر نقل مکانی کرنے والے خاندانوں کو خوراک اور غیر خوراک امداد کی فراہمی پر خرچ ہو گی۔ وزیر اعلیٰ نے ہدایت کی کہ یہ فنڈز فوری جاری کیے جائیں تاکہ بے گھر خاندانوں کی ضروریات کا بہتر طریقے سے خیال رکھا جا سکے۔
بیرسٹر ڈاکٹرسیف نے کہا کہ امن و امان کے شعبے میں کابینہ نے ملک سعد شہید پولیس لائن کی دوبارہ تعمیر، داؤدزئی اور ویسٹ کینٹ پولیس اسٹیشنز کے لیے رہائشی ہاسٹلز، پشاور میں پانچ نئے تھانے اور آٹھ پولیس چوکیاں قائم کرنے کے نان اے ڈی پی منصوبے کی منظوری دی جس پر3625ملین روپے لاگت آئے گی۔ اس کے علاوہ نوشہرہ کے علاقے اکبرپورہ میں چار کنال زمین نئے تھانے کے لیے مختص کرنے کی منظوری دی گئی، صوابی میں نئی تعمیر شدہ سب جیل کو ڈسٹرکٹ جیل کا درجہ دینے،پرانی جیل سے قیدیوں کی منتقلی اور 165 پوسٹوں کی نئی جیل کو شفٹنگ کی منظوری بھی دی گئی۔
انہوں نے کہا کہ صحت کے شعبے میں مانسہرہ کے آر۔ ایچ۔سی، اوگی کو کیٹیگری-ڈی ہسپتال میں اپ گریڈ کرنے، آؤٹ سورس کئے گئے صحت مراکز کے لئے فنڈفلو میکانیزم اور رخسانہ مدر اینڈ چائلڈ ٹرسٹ ہسپتال کے لیے ایک کروڑ روپے کی منظوری دی گئی۔ اجلاس میں کالاش و بہائی برادری کے تہواروں کے لیے9.5ملین روپے کی منظوری دی گئی۔اسی طرح شہری ٹرانسپورٹ کے لیے بی آر ٹی پشاور کو مزید 50 بسوں کی خریداری کی منظوری دی گئی۔
انہوں نے بتایا کہ ماحول دوست سیاحت کے فروغ کے لیے نوشہرہ میں ملک کے سب سے بڑے سفاری پارک کے قیام کی منظوری دی گئی جس کے لیے 560 ایکڑ زمین محکمہ وائلڈ لائف کے حوالے کی گئی۔ اسی طرح ٹانک کے علاقے بند پیرو میں 14 ہزار 718 ایکڑ بنجر زمین پرجنگلات اگانے اور وائلڈ لائف کے تحفظ کے لیے اسے محکمہ جنگلات کے حوالے کرنے کا فیصلہ کیا گیا۔بیرسٹر ڈاکٹر سیف نے کہا کہ کابینہ نے ڈیرہ اسماعیل خان میں چشمہ ریسٹ ہاؤس کے تاریخی حصے کو محکمہ آثار قدیمہ کے حوالے کرنے، اسلام آباد میں خیبرپختونخوا آرٹس اینڈ کرافٹس ڈسپلے سنٹر قائم کرنے اور ڈیموں والے اضلاع میں ترقیاتی کاموں کے لیے نیٹ ہائیڈل پرافٹ کا حصہ 10 فیصد سے بڑھا کر 15 فیصد کرنے کی منظوری دی۔ نیٹ ہائیڈل پرافٹ کے لیے کابینہ کمیٹی بھی تشکیل دی گئی جو فنڈ کے منصفانہ استعمال کے لئے سفارشات مرتب کرے گی۔بیرسٹرڈاکٹر سیف کے مطابق دیگر فیصلوں میں ہیلتھ کیئر کمیشن رولز آف رجسٹریشن و لائسنسنگ کی منظوری، خیبر پختونخوا کمیشن آن دی سٹیٹس آف وومن رولز 2017 اور اسٹامپ ایکٹ 1899 میں ترامیم شامل ہیں۔
انہوں نے کہا کہ کابینہ نے کم از کم اجرت 36 ہزار سے بڑھا کر 40 ہزار روپے ماہانہ کرنے کی منظوری بھی دی۔مزید برآں ڈیرہ اسماعیل خان میں نادرا آفس کے قیام کے لیے عمارت کی فراہمی، صوبائی محتسب کے لیے ایم بی ایس-2 سکیل، ڈیرہ اسماعیل خان کے ایک مریض کے گردہ کی ٹرانسپلانٹ کے لیے 60 لاکھ روپے امداد اور اسلام آباد میں منعقد ہونے والے نیشنل یوتھ گیمز 2025 میں صوبائی دستے کی شمولیت کے لیے خصوصی گرانٹ کی منظوری بھی دی گئی۔
انہوں نے کہا کہ کابینہ اجلاس کوفوڈ سیکورٹی کے حوالے سے گندم اور دیگر اجناس کی صورتحال پر بھی بریفنگ دی گئی۔ اجلاس کو بتایا گیا کہ گزشتہ ہفتے کے دوران بعض اجناس خاص کر گندم کی قیمتوں میں اضافہ دیکھنے میں آیا ہے تاہم صوبے میں گندم کے ذخائر اطمینان بخش ہیں اور ضرورت کے مطابق مزید خریداری کا فیصلہ کیا جائے گا۔ اجلاس میں افغانستان کے زلزلہ متاثرین کیلئے 10 کروڑ روپے امداد کی منظوری کا فیصلہ بھی کیا گیا جبکہ حالیہ دہشتگردی کے واقعات میں شہداء، ملک میں سیلابی صورتحال کے دوران اور افغانستان میں زلزلے سے جاں بحق افراد کے درجات کی بلندی اور زخمیوں کی صحت یابی کیلئے خصوصی دعا بھی کی گئی۔