پی ڈی ڈبلیو پی اجلاس میں ضلع چترال بالائی اور زیریں میں آفات سے متاثرہ انفراسٹرکچر کی تعمیر نو اور بحالی سمیت 75 ارب سے زائد کے 44 ترقیاتی منصوبوں کی منظوری

پشاور ( نمائندہ چترال ٹائمز ) وزیر اعلی خیبر پختونخوا علی امین خان گنڈاپور کی خصوصی ہدایت پر ضلع بنوں کے لیے ایک ارب کی لاگت سے واٹر سپلائی اور سینی ٹیشن کی ایک انتہائی اہم سکیم کی منظوری دی گئی۔ منصوبے سے تقریباً 84ہزار322 رہائشیوں کو پانی کی فراہمی یقینی ہو جائیگی۔ مزید برآں، تقریباً 6ہزرا لوگوں کو صفائی کی بہتر خدمات تک رسائی حاصل ہوگی، جس سے صحت عامہ اور حفظان صحت میں نمایاں اضافہ ہوگا۔ منصوبہ ضلع کی ایک اہم ضرورت کو پورا کرے گا اور یہ شہریوں کے معیار زندگی کو بہتر بنانے کے لیے حکومت کے عزم کی عکاسی کرتا ہے۔صوبائی ترقیاتی ورکنگ پارٹی کا تیسرا اجلاس ایڈیشنل چیف سیکرٹری محکمہ منصوبہ بندی اور ترقیات خیبرپختونخوا اکرام اللہ خان کی زیر صدارت منعقد ہوا۔

اجلاس میں پی ڈی ڈبلیو پی کے اراکین اور متعلقہ محکموں کے افسران نے شرکت کی۔ فورم نے صوبے کی ترقی کے لیے صحت، ریلیف اینڈ ریہیبلیٹیشن،ٹرانسپورٹ، تعلیم،داخلہ، سپورٹس، لائیوسٹاک اور آبپاشی سے متعلق 44 اہم منصوبوں کی منظوری دی۔منظورشدہ منصوبوں میں ایرنم پی ای ٹی- سی ٹی و سائکلوٹروم پروجیکٹ کی اپ گریڈیشن،بنوں، مردان اور کوہاٹ میں محفوظ خون کی منتقلی کے مراکز کا قیام، اے ڈی پی اسکیم کی تکمیل کے لیے اضافی فنڈز کی فراہمی “سینار، سوات کی اپ گریڈیشن”، انٹیگریٹڈ ڈیزیز سرویلنس ریسپانس سسٹم،خواتین اور بچوں کے ہسپتال کی تعمیر نو اور کیٹگری ڈی ہسپتال غازی ہری پور کو کیٹگری سی ہسپتال میں اپ گریڈ کرنا،حیات آباد پشاور میں فیکلٹی آف پیرا۷ میڈیکل اینڈ الائیڈ ہیلتھ سائنس کمپلیکس کی تعمیر، کوہاٹ انسٹی ٹیوٹ آف میڈیکل سائنسز (KIMS) کا قیام،خیروبہ سمال ڈیم کھیرو خیل پکا لکی مروت کے لیے فزیبلٹی اسٹڈی اور تفصیلی ڈیزائن، کوہاٹ بند بانڈہ ڈیم کے لیے فزیبلٹی اسٹڈی اور تفصیلی ڈیزائن، محکمہ آبپاشی میں ویب سائٹ کے لیے کمپیوٹر سیل کا قیام اور اصلاحات کے اقدامات، سرکاری ملازمین کے لیے ہاؤسنگ فاؤنڈیشن کا قیام، ورسک گریویٹی کینال کے ساتھ ساتھ کینال پیٹرول روڈ کی بحالی و بہتری، جنوبی اضلاع میں فارسٹ نالج پارکس،ضم شدہ علاقوں میں موسمیاتی سمارٹ اور صنفی حساس مویشیوں کی انٹروینشن کے ذریعے روزگار کے مواقع،انٹیگریٹڈ لائیو سٹاک ڈویلپمنٹ پروگرام خیبرپختونخوا (فیز-I)،کھیلوں کی سہولیات کا قیام، اپ گریڈیشن اور بحالی،کرک اور تخت نصرتی میں مشترکہ جوڈیشل کمپلیکس کی تعمیر، خیبر پختونخوا کے مختلف اضلاع میں اضافی سہولیات اور تعمیرات، جوڈیشل کمپلیکس درگئی کی توسیع کے لیے اراضی کا حصول، ڈائریکٹوریٹ آف انفارمیشن کی استعداد کار میں اضافہ و سوشل میڈیا سیل خیبرپختونخوا کا قیام، خیبرپختونخوا کے جیلوں میں اضافی و مسنگ سہولیات کی تعمیر،ضلع لکی مروت لوئر و اپر کوہستان کولئی پالس میں ایمرجنسی ریسکیو سروس (ریسکیو 1122) خیبرپختونخوا کا قیام، ضلع شمالی وزیرستان کے لیے خصوصی انٹیگریٹڈ ایریا ڈویلپمنٹ پیکیج، خیبرپختونخوا کے نئے ضم شدہ اضلاع میں ایمرجنسی ریسکیو سروسز (1122) سب اسٹیشنز کی توسیع،ضلع چترال بالائی اور زیریں میں آفات سے متاثرہ انفراسٹرکچر کی تعمیر نو اور بحالی، پبلک پالیسی اینڈ سوشل پروٹیکشن ریفارمز یونٹ،خیبر انسٹی ٹیوٹ آف چائلڈ ہیلتھ اینڈ چلڈرن ہسپتال (ڈسٹرکٹ) پشاور،ضلع شانگلہ میں (12 کلومیٹر) سڑکوں کی فزیبلٹی اسٹڈیز، ڈیزائن اور بحالی جس میں مارتونگ سے ڈیڈل،شکولائی سے انوار (3 کلومیٹر)، آورائی سے کنڈونہ (2Km) اور فضا سے علیگرام (1Km)، شہید چوک تیمرگرہ میں گریڈ سے الگ انٹرسیکشن کا فزیبلٹی سٹڈیز، ڈیزائن اور تعمیر، ضلع نوشہرہ جہانگیرہ بائی پاس اور نظام پور روڈ تا چارپانی گاؤں کی تعمیر و بحالی، ہزارہ ڈویژن میں تکنیکی اور اقتصادی طور پر فیزیبل 170 کلومیٹر سڑکوں کی تعمیر،07 ضم اضلاع میں ٹرانسپورٹ سہولت مراکز کا قیام، جی ٹی روڈ پشاور پر ٹرانسپورٹ کمپلیکس کی تعمیر اور قیام، دارالعلوم حقانیہ اکوڑہ خٹک کی تعمیر و بحالی،ضلع شمالی وزیرستان خصوصی انٹیگریٹڈ ایریا کے لیے ترقیاتی پیکیج، ڈی آئی خان دریا خان روڈ پر آر سی سی پل کی تعمیر،لنڈی کوتل میں تحصیلِ بلڈنگ کمپلیکس کی تعمیر، مانسہرہ میں پائیدار وسائل کے انتظام شرکت کے طریقہ کار کے ذریعے پائیدار اربن ڈویلپمنٹ کو فروغ دینا شامل ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایمرجنسی ریسکیو سروس 1122 خیبر پختونخوا میں خالی آسامیوں پر بھرتیوں کے لئے انٹرویوزکی تاریخ کا اعلان

أپشاور (نمائندہ چترال ٹائمز ) ریسکیو 1122 خیبر پختونخوامیں 2022 کو مشتہر کی جانے والی خالی اسامیوں پر انٹرویوز 15 اکتوبر2025 سے منعقد کئے جائیں گے۔ ان اسامیوں کے لئے ایٹا نے فیزیکل ٹیسٹ مارچ تا جولائی 2022 اور تحریری امتحان ستمبر تا اکتوبر 2022 منعقدکر کے مکمل کئے ہیں۔ڈائریکٹر جنرل ایمرجنسی ریسکیو سروس 1122خیبر پختونخواطیب عبداللہ نے کہا ہے کہ انٹرویو منعقد کرنے کے لئے سمری کی منظوری دی گئی ہے اور بھرتی کا یہ سارا عمل صوبائی حکومت کی میرٹ کی پالیسی پر سختی سے عمل پیرا ہو کر انصاف،میرٹ اور شفافیت کی بنیاد پر مکمل کیا جار رہا ہے۔ انہوں نے کہا کہ تاریخ میں پہلی بار ریسکیو1122 کے انٹر ویوز سوشل میڈیا لنک کے ذریعے لائیو نشر کیے جائیں گے۔ علاوہ ازیں شفافیت کے مزید اقدامات کے طور پر احتساب کے سرکاری اداروں بشمول نیب، انٹی کرپشن اور بین الاقوامی ٹرانسپرنسی انٹرنیشنل اور سول سوسائٹی کے اداروں سمیت میڈیا کے نمائندو ں کو بھی انٹر ویوز کے عمل کا مشاہدہ کرنے کے لئے مدعو کیا جارہا ہے۔
۔۔۔۔۔۔۔۔۔۔

خیبر پختونخوا پبلک سروس کمیشن نے پراونشل منیجمنٹ سروس کے انسروس کوٹا کے تحت 7 امیدواروں کی تعیناتی کی منظوری

پشاور (نمائندہ چترال ٹائمز ) خیبر پختونخوا پبلک سروس کمیشن نے پراونشل منیجمنٹ سروس کے انسروس کوٹا کے تحت 7 امیدواروں کی تعیناتی کی منظوری دی ہے۔ان امید واروں میں زون3 چترال سے وجاہت المجاہد، زون2 مردان سے عرب گل،زون 1 مہمند سے زار محمد، زون2 پشاور سے محمد شارق خان،زون3 مالاکنڈ سے اعجاز احمد، زون5 مانسہرہ سے محمد طارق رشیداور وجاہت رضا قریشی شامل ہیں۔یا د رہے کہ انسروس کوٹا کے تحت 36 اسامیوں کی تشہیر کی گئی تھی جس کے لئے 7 امیدوار کامیاب ہوئے جبکہ 29 اسامیوں کو دوبارہ مشتہر کیا جائے گا۔