شرین تتو گیلائی – نیوشاک جی کے ضوان
شرین تتو گیلائی – نیوشاک جی کے ضوان
تہ اندرینی نو گونی اے مہ شرین ژاو ۔اوا دی تن جوانیہ
تہ سر دی بو مست اسیتام مہ گوڑو دی عوغ نوئی بوغاوتائی مہ دبدبہ عشوئی مگر کیوت کی تو زندگیا ہاٶ
تھے مہ ہتے دبدبہ مہ ہتے مستی تہ سم وابسطہ ہونی ۔تو مہ ہر ہتے خوشپان تن سوم چاکیتاٶ ۔تھے مہ سری مہ روخݯیتاو مہ ہر ارزوچے ارمان تا توری روپھیتانی ۔مہ محنتو چے مشقتو سلسلہ تہ ہوسیکو پروشہ خسمت بیکو ژاغہ دوراگیتی تہ پوشی طاقت وار وا ہمورو ہونی۔ تن ہر وسہ تہ پاچین نوغ اشٹوکھینوکان تن دورو دکان اریتام ۔ تن لوسنوکو دی تہ لاسییتام ۔ تان ݯھوئی پوریتام ۔دنیو ہر رنگہ فہلوتے تہ وجہین اوا برداشت اریتام ۔توغیچھاری بوسن رے تتے ہر دم دعا کورکو ہوستہ ویچھیتام تہ کوری اے مہ شرین ژاو تو عوژیکو نا مہ میھ ڈانگ ہوے رے تن سورا فخر اریتام تو لوٹ بیتی جوان بیتی مہ صائیب گار بوس رے اے مہ زندگی تہ ہر ای فرضو اوا غیژی پورا اریتام تن سورا ومان دی اریتام پھورگنیکار گنی تہ سونتو کوری تہ علموتعلیمو میدانہ پروشٹی اویتام ۔ کیوت کی تہ شون شہ ہونی تہ بازاوا طاقت اوتیتائی تہ فہل مہ پاچین پھوک نوژان بیکہ پرائی ۔ تہ خواہشات پھوک زیاد ہونی مہ وسایلان پروشٹہ ۔خیر تن سورا سختی انگیتی ہتیتان دی پورا اریتام ۔
کیوت کی تو بالغ ہو تھےتن خواہشو مطابقہ زندگی مشکیتاو تہ شون شہ باٶ ہنی مہ کپال ایشپیرو باٶ ہائی۔ تہ بازو طاقت وار باٶ ہنی مہ ہتے طاقت وار بازو لش بیتی تھاریکہ پرانی مہ بویکو غونہ نݰکا کوری لوسنوک انگیتی تہ بوکو پیچھیک لش لش باٶ خلص ہوئی تہ ورزون نیسی تو عولیکا پراٶ ۔مہ تہ وفا تہ سر محبت طلب کورک غیچ ہمیشہ پھوکیئے تہ ویشکی تن متوجع ہونی ۔مہ رونزک ہوست تن اللّہو پروشٹہ تہ پچین تہ خیرو چے عفیتو مشکی تان بہچی اسوم اللّہ پاک تہ سورا عوݰک گنو مو تیار رے ۔کیچہ کی قول شیر ۔
ٰٰنان تتان ہردی اژیلیو سوری اژیلیو ہردی در بوختو رے ٰٰٰٰ ٰ
اے مہ شرین ژاو مہ عیچ دی کھور بیتی شینی ۔مہ کار قائی ۔مہ ڈیک کمزور بیتی رانزونیان ۔ڈوک زراو بپ بیتی
ݯھونݱیردارو غون کپ ہوتام ۔ وتھوکو سہاراوتے ہوتام کیہ ای ویݰکی تو متے سہارا نو بوسہ؟ مہ فہل دی تہ ݯیقیو غون تیز بیتی شیر ۔کیچہ کی تہ ݯیقی عشوئی ہر لوو سوم تو کرواوتاٶ ۔اوا دی تہ شرین تت ہتے مرحلا توری اسوم ۔تہ دی تن ہوستی چاکیے بو نوحݯیہ تہ ڈوکیے اوا فخرو سورا کوساوتام ۔مہ امید بویان مہ دی گوروم بویان مہ شرین ژاٶ کیہ سہارا بویا رے۔
تو مہ حقہ بے وفا کی ہوو مہ کا اسور ۔اسمان ژانگ زمین ڈانگ بوئی وا ۔اوا اویل تہ اللّہو اچی تہ سہارو طلب ۔
اے مہ شرین ژاو ای نصیحت تہ تین ہمیت سف زندگیو موخو گیاگ کݰمان تو سری کی کیݰیتاٶ سری لیس گوم کی کیݰیتاٶ گوم ۔