تحریک حقوم عوام کو زلزلہ زدگان کو عدم ادائیگی،زرعی قرضوں کی ریکورئری اور ایس آر ایس پی بجلی گھر کی تعمیر میں تاخیر کے خلاف احتجاجی جلسہ
بونی (نمائندہ )تحریک حقوق عوام کا زلزلہ زدگان کو اعلان شدہ نقد امداد کی عدم ادائیگی ،زرعی قرضوں کی معافی کے اعلان کے باوجود عوام سے ریکورئری اور ایس آرایس پی کی طرف سے بنایا جانے والا بونی ایم ایچ پی کی کام میں تاخیر کے خلاف ایک احتجاجی جلسہ بونی چوک میں منعقد ہوا۔جلسہ سے خطاب کرتے ہوئے تحریک کے سینئر رہنما رحمت سلام لال نے اس بات پر سخت تشویش کا اظہار کیا کہ ڈی سی چترال نے زلزلہ متاثرین کے لئے مختص 85کروڑ روپے غائب کردیا اس کی تحقیقات کی آشد ضرورت ہے کہ ڈی سی نے خود اپنی زبان سے اس بات کا اقرار کیا تھا کہ زلزلہ متاثرین کو دینے کے لئے 85کروڑ روپے ان کے پاس موجود ہے،اب ڈی سی قوم کو بتا دیں کہ یہ 85کروڑ روپے کہاں ہیں۔جنرل سیکرٹری تحریک حقوق عوام شجاع الدین لال نے ایس آر ایس پی کی طرف سے بنایا جانے والا بونی ایم ایچ پی کی تعمیر میں تاخیر کرنے پر ایس آر ایس پی اور اس کے ٹھیکہ دار پر شدید تنقید کا اظہار کرکے مطالبہ کیا کہ اس سال کی اخر تک بونی کے عوام کو بجلی فراہم کریں بصورت دیگر عوام ایس آر ایس پی کے خلاف سخت احتجاج کرنے پر مجبور ہونگی۔آل ناظمین فورم اپرچترال کے صدر محمد پرویز لال نے وزیر اعظم میاں نواز شریف کی طرف سے زرعی قرضوں کی معافی کے بعد ایم این اے چترال نے25مئی2016کو مستوج کے مقام پر واضح طورپرزرعی قرضوں کی معافی کی تصدیق اور عوام کو یہ خوشخبری سنایا تھا کی ان کی کوششوں سے تمام سرکاری بینکوں کے قرضہ جات معاف ہوئے ہیں اور وہ فرسٹ مائیکرو فنانس بینک کی قرضہ جات کو بھی معاف کروالینگے،نہ ہونے کی صورت میں اپنی جیپ سے عوام کی قرضہ جات کو ادا کرونگا،انہوں نے کہا کہ اب تمام بینکوں نے غریب عوام سے سود سمیت ریکورئری شروع کر دی ہے،قرضے واپس نہ کرنے والوں کو گرفتار کیا جارہاہے۔اگر ان لوگوں کو گرفتار کیا گیا تو چترال کے عوام ایم این اے شہزادہ افتخار الدین کے ہوٹل کے سامنے دھرنا دینگے اور ایم این اے کو عوام سے اتنا بڑا جھوٹ بولنے پر معافی مانگ کر استعفیٰ دینے پر مجبور کرینگے۔
ڈیڑھ سال تک سرکاری اداروں کے ساتھ عزت کا تعلق قائم رکھا اور آئندہ بھی ادارتی تعلق قائم رکھیں گے مگر اسے ہماری کمزوری پر ہرگز محمول نہ کیا جائے۔ضلع ناظم مغفرت کا ضلع کونسل اجلاس سے خطاب
چترال (بشیر حسین آزاد) ضلع ناظم چترال مغفرت شاہ نے کہا ہے کہ ضلع کونسل اس ضلعے کا بااختیار ادار ہ ہے مگر بعض اداروں کے سربراہان اس ایوان اور اس کی بنیاد پر وجود میں آنے والی ضلعی حکومت کو اس حد تک لے جانے میں مصروف ہیں جہاں برداشت کی آخری حد ختم ہوجاتی ہے جس میں مقامی سربراہان کا کوئی قصور نہیں بلکہ انہیں لقمہ اوپر کے حلقوں سے مل جاتی ہیں اور اس بات کو واضح کرنے کی ضرورت ہے کہ ہمارے ہاں اہمیت رولز آف بزنس کا نہیں عوامی مفاد کا ہے اور ہمیں اس حدتک قدم لینے پر مجبور نہ کیا جائے۔ پیر کے روز ضلع کونسل چترال کے اجلاس سے خطاب کرتے ہوئے انہوں نے کہاکہ ہم نے ڈیڑھ سال تک سرکاری اداروں کے ساتھ عزت کا تعلق قائم رکھا اور آئندہ بھی ادارتی تعلق قائم رکھیں گے مگر اسے ہماری کمزوری پر ہرگز محمول نہ کیا جائے ۔ انہوں نے کہاکہ صوبائی حکومت نے بھی نان سیلری بجٹ کے ضمن میں ضلع کونسل کے فیصلے کو برقرار رکھا اور اس سلسلے میں کئی مہینوں کی غیر ضروری تاخیر کرکے سرکاری محکمہ جات کو مفلوج کرکے رکھ دیا گیا جبکہ اس نوعیت کی تاخیری حربے کو برداشت نہیں کی جائے گی۔ انہوں نے کہاکہ ترقیاتی بجٹ اس وقت ریلیز کئے جاتے ہیں جب چترال میں ورکنگ سیزن اپنی اختتام پر ہوتا ہے اور اس میں غیر معمولی تاخیرسوچے سمجھے منصوبے کے تحت کیا جارہا ہے جس کا اعادہ کرنے سے افسران کو گریز کرنا ہوگا اور نہ آئندہ کے لئے اس کا موقع دیا جائے گا۔ انہوں نے کہاکہ چترال میں گزشتہ سال کے تباہ کن سیلاب اور زلزلے کی نقصانات سے نمٹنے کے لئے درکار 16ارب روپے کے لئے پی پی اے ایف اور صوبائی حکومت کی تعاون سے اسلام آباد میں اگلے ماہ ایک ڈونر کانفرنس منعقد کی جارہی ہے جس کے نتیجے میں ایک ملٹی سیکٹر انٹیگریٹڈ پراجیکٹ کا قیام عمل میں لایا جائے گا۔ انہوں نے کہاکہ وزیر اعظم نواز شریف کو عنقریب ایک بار پھر چترال لانے کی کوششیں جاری ہیں جس میں وہ تاجکستان روڈ کے حوالے سے اہم اعلان کریں گے جبکہ ان کے گزشتہ دورہ چترال میں یونیورسٹی اور ہسپتال کے قیام کا ڈائریکٹو بہت جلد جاری ہوں گے اور 20کروڑ روپے کا گرانٹ بھی ریلیز ہوگی جسے ہاؤس کے مشورے پر ترقیاتی کاموں پر صرف کئے جائیں گے۔ اس سے قبل کنوینر مولانا عبدالشکور نے آئندہ کے لئے اجلاس کی کاروائی کے ضوابط طریقہ کار کی بائی لاز ایوان میں پیش کی جس پر ارکان کونسل نے ان کو پڑھنے کے بعد اگلے بحث اور منظوری کے لئے ملتوی کردیا۔ انہوں نے ضلع کونسل کے عارضی ملازمین کے تنخواہ جات کی منظوری کا معاملہ بھی ایوان کے سامنے پیش کردیا جس کی منظوری دی گئی۔ پی ٹی آئی سے تعلق رکھنے والے رکن کونسل رحمت غازی خان نے ضلع ناظم پر زور دیا کہ ضلعی حکومت اور کونسل کی حکم عدولی میں ملوث افسران کی نشاندہی کی جائے تاکہ ان کے خلا ف سب مل کر کاروائی کریں گے۔ انہوں نے مختلف محکمہ جات کے لئے قائم اسٹینڈنگ کمیٹیوں کو فعال بنانے اور ان کے لئے نئی پینل آف چیرمین مقرر کرنے کی تجویز دی۔ جماعت اسلامی سے تعلق رکھنے والے رحمت الٰہی نے دیار کی سوختنی لکڑی سے فرنیچر بنانے اور ڈاؤن اضلا ع میں فروخت کرنے پر پابندی چاہتے ہوئے قرارداد پیش کیا جس پر پی ٹی آئی کے محمودالحسن، انعام الحق اور رحمت غازی اور اے پی ایم ایل کے شہزادہ خالد پرویز نے اظہار خیال کیا جبکہ کنوینر نے رولنگ دیتے ہوئے کہاکہ اس میں ضروری تبدیلی کرکے دوبارہ پیش کیا جائے۔ جماعت اسلامی کے مولانا جمشید نے کنوینر پر زور دیا کہ وہ ہر اجلاس میں گزشتہ اجلاسوں میں ہاؤس میں پاس شدہ قراردادوں پر عملدرامد کے حوالے سے ہاؤ س کو اپ ڈیٹ کرے۔ پی ٹی آئی کے محمدیعقوب (کریم آباد) اور پی پی پی کے غلام مصطفی (مستوج ) نے ترقیاتی منصوبہ جات میں غیر معمولی تاخیر پر شدید تشویش کا اظہار کیا
ضلع ناظم  کی طرف سے ورلڈ فوڈ پروگرام کو چترال میں گلگت بلتستان کے طرز پر گندم پر سب سڈی کی فراہمی کی تجویز 
چترال ( بشیر حسین آزاد) ضلع ناظم چترال مغفرت شاہ نے کہا ہے کہ انہوں نے ورلڈ فوڈ پروگرام کو چترال میں گلگت بلتستان کے طرز پر گندم پر سب سڈی کی فراہمی کی تجویز پیش کردی ہے جس سے انہوں نے اصولی طور پر اتفاق کرلیا ہے اور بہت جلد ہی چترالی عوام کو اس حوالے سے خوشخبری سننے کو ملے گی۔ ایک پریس ریلیز میں انہوں نے کہا ہے کہ اتوار کے روز اپنے دفتر میں ورلڈ فوڈ پروگرام کے صوبائی سربراہ بائی مانکے سانکوہ اور پروگرام کے ہیڈ نعمت اللہ خان کے ساتھ نشست میں انہوں نے ورلڈ فوڈ کی ٹیم پر واضح کردیا کہ چترال موسمیاتی تبدیلی اور عالمی حدت سے متاثر ضلع ہے جہاں بڑے پیمانے پر قدرتی آفات رونما ہونے کی وجہ سے غذائی قلت اور غیر یقینی صورت حال کی کیفیت پید اہوگئی ہے اور اس صورت حال میں سبسڈائزڈ ریٹ پر گندم کی فراہمی سے واحد ذریعہ ہے جس سے غذائی قلت پر قابو پایا جاسکتا ہے۔ انہوں نے کہاہے کہ گزشتہ کئی سالوں کے دوران چترال میں قدرتی آفات نے لوگوں کی پہلے سے کمزور معیشت کو تباہ کرکے رکھ دیا ہے اور غذائی قلت کے خطرات منڈلارہے ہیں جبکہ قدرتی آفات کا سلسلہ ابھی جاری ہے اور گزشتہ سال کی طرح کئی دیہات سیلاب کی زد میں ہیں ۔ ضلع ناظم نے کہا ہے کہ گزشتہ سال کی طرح ضلعے کے چند یونین کونسلوں میں چھوٹے پیمانے پر سرگرمیوں کی بجائے اس مقصد کے لئے مختص فنڈز کو گندم کی سبسڈی کی طرف منتقل کرنا ناگزیر ضرورت بن گئی ہے۔ 
کالاش زبان و ثقافت کا تحفظ‘‘کی تکمیل  پراجیکٹ کے مقامی پارٹنر ایون اینڈ ویلیز ڈیویلپمنٹ پروگرام  کے زیراہتمام تقریب
چترال ( بشیر حسین آزاد) دنیا کی منفرد تہذیب وثقافت کے حامل کالاش قبیلے کی زبان کلاشہ کو معدومیت کے خطرے سے باہر نکال لیا گیا ہے جس پر کالاش اقلیت نے امریکی عوام کا شکریہ ادا کیا ہے جوکہ یو ایس ایڈ کے ایک پراجیکٹ کے ذریعے یہ کام انجام دیا اور تاریخ میں پہلی بار اس کو تحریر ی شکل دے دی جوکہ ابھی تک حروف تہجی سے نااشنا تھی۔یوایس ایڈ کی مالی معاونت سے گزشتہ ایک سال سے جاری پراجیکٹ “کالاش زبان و ثقافت کا تحفظ”کی تکمیل پر پراجیکٹ کے مقامی پارٹنر ایون اینڈ ویلیز ڈیویلپمنٹ پروگرام (اے وی ڈی پی ) کے زیر اہتمام تقریب میں کالاش عمائدیں اور خواتین نے کہاکہ کالاش زبان اور ثقافت اب تک ایک نسل سے دوسری نسل تک سینہ بہ سینہ روایات سے منتقل ہوتی رہی تھی لیکن جدید زمانے میں کالاش کے نوجوان نسل کا بڑی تعداد میں وادی سے باہر رہنے ، جدید تعلیم حاصل کرنے ، جدید ٹیکنالوجی کے اپنانے اور کالاش بزرگوں کی وفات کی وجہ سے اس زبان کی معدومیت کا خطرہ بڑھ گئی تھی۔ اس موقع پر تینوں کالاش وادیوں بمبوریت، بریر اور رمبور کے نمائندوں شاہی گل، حضرت گل، میربادشاہ، عرب گل، شیر محمد کالاش، شیر وزیر کالاش، لک رحمت نے کہاکہ کالاش زبان کو تحریر ی صورت مل جانا کالاش کی تاریخ میں ایک سنگ میل کی حیثیت رکھتی ہے ۔ انہوں نے کہاکہ پرانے نسل کے کالاش بزرگ کالاش کی لوک روایات ، لوک کہانیو ں اور روایات کو اپنے ساتھ لے کر ایک ایک ہوکر دفن ہورہے تھے اور کالاش کا ثقافتی ورثہ ان کے ساتھ ہی دفن ہورہا تھا۔ انہوں نے کہاکہ اکثر کالاش گیت ان کے مذہب کی بنیاد بنتے تھے اور تحریر ی صورت نہ ہونے پر ان کا مذہب بھی خطرے میں پڑگئی تھی۔ کالاش عمائیدین نے حکومت پاکستان سے مطالبہ کیا کہ نادرا کے ڈیٹا بیس اور پاسپورٹ میں کالاش مذہب کے اندراج کو یقینی بناکر کالاش قوم کو الگ شناخت دے دیا جائے۔ تقریب کے مہمان خصوصی اور چترال پریس کلب کے صدر ظہیرا لدین نے کہاکہ زبان اور ثقافت کا آپس میں گہرا رشتہ اور تعلق ہوتا ہے اور اس وجہ سے کالاش زبان کا تحفظ دراصل کالاش کلچر کے تحفظ کی طرف ایک قدم ہے ۔ انہوں نے کہاکہ کالاش زبان کو پہلی مرتبہ تحریری شکل میں لانے اور اس کے لئے حروف تہجی تیار کرنے سے مسئلہ حل نہیں ہوتا بلکہ اصل کام کا آغاز اب ہوا چاہتا ہے اور تعلیم یافتہ کالاش لوگوں پر یہ فرض عائد ہوتی ہے کہ وہ کالاش زبان و ادب کی بنیاد رکھیں اور اسے ترقی دینے میں کوئی کسر نہ چھوڑیں۔ اپنی صدارتی خطاب میں ضلع کونسل کے اقلیتی رکن عمران کبیر نے کہاکہ کالاش قبیلہ کے لئے قلم اور سیاہی کوئی نئی بات نہیں جوکہ چٹرمس تہوار کے لئے خود ہی مقررہ دن کو قلم تراشتے اور اپنی ہاتھوں سے سیاہی بناکر دیوار وں پر نقش ونگار بناتے ہیں ۔ انہوں نے کہاکہ اس کے باوجود کالاش لوگ لکھنے سے ناواقف ہیں جس کی وجہ سے ان کی زبان اور ثقافت معدومیت کے خطرے سے دوچار تھی جسے محفوظ بنانے کے لئے اے۔وی۔ ڈی ۔ پی اور یو ایس ایڈ کی کاوشیں قابل قدر ہیں جوکہ کالاش تاریخ میں ہمیشہ کے لئے یاد رکھے جانے کے قابل ہے۔ انہوں نے اس امر پر اطمینان کا اظہار کیا کہ اس پراجیکٹ کے نتیجے میں کالاش زبان کے علاوہ کالاش کے لوک گیتوں، لوک کہانیوں اور کہاوتوں کو بھی محفوظ کرلئے گئے ہیں۔ اس سے قبل اے وی ڈی پی کے سابق سربراہان محکم الدین محکم اور رحمت الٰہی نے خطاب کرتے ہوئے تنظیم کی کارکردگی اور کالاش تہذیب وثقافت کے لئے اس کے خدمات پر روشنی ڈالی ۔ انہوں نے کہاکہ اے وی ڈی پی نہ صرف کالاش وادیوں اور ایون گاؤں میں دیہی ترقی کے کاموں اور غربت میں کمی لانے کے منصوبوں میں مصروف رہی ہے بلکہ دنیا میں مشہور ومعروف کالاش کلچر کے تحفظ اور ترقی میں بھی کلیدی کردار ادا کرتی رہی ہے۔ اس موقع پر اے کے آر ایس پی کے منیجر فرید احمد بھی موجود تھے۔