چترال( چترال ٹائمز رپورٹ) ٹورازم کارپوریشن خیبرپختونخوا کے زیراہتمام چترال کے کالاش میں منعقد ہونے والے چلم جوشٹ (جوشی) فیسٹیول شروع ہوگیا، فیسٹیول 16مئی تک جاری رہے گا تاہم فیسٹیول کے پہلے روز دودھ کی رسم ہوئی ، ٹورازم کارپوریشن خیبرپختونخوا کے تعاون سے صوبہ کے سیاحتی مقام کالاش میں منعقد ہونے والے جوشی فیسٹیول کو بھرپور انداز میں منایا جارہا ہے ، اس سلسلے میں سیاحوں کیلئے ٹینٹ ویلیج کیساتھ ساتھ سیاحوں میں سیاحتی مقام میں صفائی برقرار رکھنے کیلئے صفائی مہم کا بھی انعقاد کیاجائے گا مہم کالاش کی تین وادیوں میں امسال کی جائے گی ، تفصیلات کے مطابق چترال کے شہر کالاش میں بہار کی آمد پر منایا جانے والا کالاش قبیلے کا مشہور تہوار (جوشی)چلم جوشٹ 14 مئی سے شروع ہوگیا،پہلے روز کالاشی خواتین نے دودھ پلانے اور تقسیم کرنے کی رسم (چیرک پی پی ) منائی ، ٹورازم کارپوریشن خیبرپختونخوا نے سیاحوں کی سہولیات اور انہیں کسی بھی قسم کی تکلیف سے بچانے کیلئے ٹینٹ ویلیج بنائی ہے تاکہ سیاحوں کی کثیر تعداد کی موجودگی میں کسی کو کوئی مشکل درپیش نہ ہوسکے اور سیاحوں کو بہترین سہولیات فراہم کی جاسکیں ،جوشی فیسٹیول کالاش قبیلے کا سب سے اہم تہوار ہے کیونکہ اس تہوار کے اعلان کیساتھ سردیوں کے تکلیف دہ حالات کو رخصت کیا جاتا ہے اور بہار کا استقبال کیا جاتا ہے ۔ مال مویشیوں کو گرمائی چراگاہوں پر لے جانے کی تیاری ہوتی ہے اور مویشیوں کے دودھ کی فراوانی ہوتی ہے ، تہوار میں پچ انجیئک کی رسم ادا کی جاتی ہے اس رسم میں پانچ سے سات سال کے بچوں کو کالاش کے نئے کپڑے پہنا کر ان کو بپتسمہ دیا جاتا ہے جبکہ گل پاریک کی رسم بھی ہوتی ہے جس میں گاؤں کے تمام زچہ و بچہ پر ایک نوجوان دودھ چھڑکتا ہے اور خواتین اس نوجوان کو چیہاری کا ہار پہناتی ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
،دریں اثنا چترال ٹاون میں جاری ملکی پولوٹورنامنٹ بارش کی وجہ سے 16مئی تک موخر کردی گئی ہے ۔ گزشتہ چند دنوں سے چترال میں وقفے وقفے سے بارش کی وجہ سے پولو گراونڈ تالات کا منظر پیش کررہا ہے ۔ اور ساتھ کیچڑ میں گھوڑوں کی پھسلن کے خدشے کے سبب پولو کمیٹی نے آج کے فائنل میچ کو 16مئی تک موخر کردیا ہے ۔
