چترال میں گرمی کی شدت میں اضافہ، اپر چترال کے متعدد مقامات پر دریاکی کٹائی کا سلسلہ جاری، جنالی کوچ میں فارسٹ بلڈنگ اور گرین لشٹ میں رہائشی مکانات خالی کردیے گئے، چترال بونی روڈ بھی کٹائی کی زد میں
چترال (نمائندہ چترال ٹائمز ) چترال کے طول وعرض میں حالیہ گرمی کی شدت میں اضافے کے باعث دریائے چترال میں اونچے درجے کا سیلاب ہے، جس کے نتیجے میں مختلف مقامات پر دریا کی کٹائی کا سلسلہ بھی جاری ہے، گرین لشٹ ریشن کےمقام پر متعدد گھروں کو خالی کرکے محفوظ مقامات پر منتقل کردیا گیا ہے، گرین لشٹ کے مقام پر چترال بونی مستوج روڈ بھی دریاکی کٹائی کی زد میں ہے،
چترال بونی روڈ بمقام گرین لشٹ میں دریائے یارخون کی کٹائی سے متاثر ہونے سے متعلق اطلاع ملنے پر ڈپٹی کمشنر اپر چترال حسیب الرحمن خان خلیل کی ہدایات پر یونس خان اسسٹنٹ کمشنر مستوج نے اج تحصیلدار مستوج الیاس احمد اور تحصیلدار موڑکہو/ تورکہو معراج الدین کے ہمراہ گرین لشٹ کا دورہ کیا اور روزمرہ کے حالات اور معاملات کا جائزہ لیا۔
چونکہ دریائے یارخون کی کٹائی سے چترال بونی روڈ بمقام گرین لشٹ متاثر ہونے کا احتمال موجود ہے لہذا روڈ کی حفاظت کے لئے مناسب اقدامات اٹھانا وقت کا اہم تقاضہ ہے ۔
اسسٹنٹ کمشنر نے این،ایچ،اے کے حکام کو ہدایت کی کہ وہ ایک لمحہ ضائع کئے بے غیر مذکورہ روڈ کی بروقت حفاظت کے لئے موثر حکمت عملی وضع کرے تاکہ چترال بونی روڈ ٹریفک کے لئے کھلا رہے اور روڈ منقطع ہونے کا اندیشہ نہ ہوں۔
دریں اثنا جنالی کوچ بونی میں واقع محکمہ فارسٹ کے دفاتر بھی دریائے چترال کی کٹاؤ کے زد میں اگئے ہیں، ریسکیو 1122کی ٹیم اور والنٹیئرز ضروری سامان کی محفوظ مقام میں منتقلی میں حصہ لے رہے ہیں
اس کے ساتھ ہی جنالی کوچ میں زرعی زمینات کے ساتھ ساتھ اسکول اور کالج بلڈنگ بھی کٹائی کی زد میں آنے کے خدشے کا اظہار کیا جارہاہے۔
