انسان وختو سوم جستہ تان ذمہ داریان سار غافل بیتی اسور۔ ہتوغو ذہنہ ہیہ لو نو بہچی شیر کی، مہ ہیہ دنیوتے ویشیکو وجہ کیاغ اوشوئے؟ کیا لوٹ اوتھوم مہ کریمہ شیر؟ ہمی لووان روخحی اوا تن مقصدی توریکو بوما؟ ہیہ چقہ سوال ہتوغو ذہنار نیسی شینی۔ انسان دنیو تانتے شیرین جوشی،فانی اشناریان اشتو دے،دولتو چہ نیک نامیو لالیچہ بہچی تان خالقو سار بو دودیری بی اسور۔ ہوتے کندوری خسارہ بویان ہیس ہے لوو ہوش نوما کوئے۔ کوریکو کہ تان زندگیو ختم بیکو بارا ہیس دونیکو بچے تیار تن نکی۔ خالق لم یزالو پروشٹہ حاضری دیکو روخحی اسور۔ ہنیسے قیامت بو دودیری شیر، سف گناہان کوریکار اچی تھوبہ کوروم رے بیغام اسور۔ مگم ہیہ برا نو دونیران کی تھوبہ متے نصیب کی نو ہوئے کیچہ بوم؟ مہ عمر ہرونی شیرا کی زندگیا مزے کوری اکھابیریو دی تان چیتہ شخحیم؟ ہیہ ای لوٹ حقیقت کی اسپہ ویبشارو دنیوتے ویشینو بتی شیر،ہے چقہ ہموغار بیک دی اسپہ ہوستو کوروم نو۔ کیا وخت کی حکم ہوئے ای لمحو دی اچی پروشٹی کوریکو نو بوسی۔ نہ دنیا اسپہ حاجتہ گوئے نہ روئے اسپہ اچی نیزیکو بونی۔ کیا حالتہ وا کورا دی کی اسیتام راہے بیلک بوئے۔ تھے کو اسپہ تان کورمان واذمہ داریان سار غافل بیتی اسوسی؟ عباداتن صحیح کوسیانا؟ معاملات کیا حدا پت خالقو حکمو مطابقہ شینی؟ فرائض ادا کوراوا قرٓانو تعلیماتن سوراعمل کوریکو بوسیانا؟ واجباتو چے سنتان ادائگی نبی پاکﷺ اسوہ حسنو مطابقہ شیرا کی نوا؟
خالق اسپہ خلیفتہ الارض کوری اسپہ سورا بو لوٹ مہربانی کوری اسور۔ فرشتہ گنان چکے اسپتے سجدہ کوریتائے، ہوسک راہو اسپہ پشیکو بچین ای لا کھوچے بیشیرچھور ہزار پیغمبر دنیوتے ویشیتاے۔ چھور ٓاسمانی کتابان سوم جوستہ بو امبوخ صحیفہ نازل اریر۔ جو دنیو سرداروﷺ دنیو تے ویشیتائے۔ اللہ پاکو حبیب اسپہ بچین چھوئے تا انوس دعا کوریتائے،فریاد اریر،کیڑیتائے کی اے ما خا لق مہ امتو سورا رحم کورے۔۔۔۔۔ ہیتان سورا ٓازمائش وا عذاب مو انگئیے۔۔۔ ہیتان شکلو بدیل مو کورے۔۔۔۔۔۔ قیامتو انوس سفو تان ژانو عمل بوئے مگم اسپہ نبی ﷺ تان امتو سار غائر خور کیا لو نو دوئے۔ امتو بچین اللہ پاکو پروشٹہ ٓاہ و زاری کوئے وا شفاعت کوروئے۔ دونیک ضروری کی اسپہ ہمی مہربانیان بدلو کیچہ کوری اوختیسیان؟ عبادت کوریکو بچین اسپہ تیار نو، معاملاتہ جو نمبری، خوروحقو ٓاسانیہ ژیبوسی، غریبو وا مسکینوسوم مدد کوریک اسپہ نیزدا کیا ضروری نو، حھوغوو سورو مژیکو ژاغا سورو شکیکوت تیار۔ انسانی ژانو اسپہ پروشٹہ حیثیت نکی ،روئے ماریک اسپہ بچین مگاس ماریکو سار دی ٓاسان، حلال و حرامو موژی فرق نو بہچی شیر۔ کیاغ کی اسپہ خوش یا جام سریتائے ہتو حلال جشوسی۔ دینو چے اسلامو حکمو کار کوریک اسپتے سفو سار گیران سریر، ہیتان سورا عمل کوریک پھار شار۔ دنیو کیا خرابی ہش نو بہچی شیر کی ہسے اسپہ موژا نو بوئے، وا دی اسپہ شرم نو بیکو تے ٓافرین۔۔۔ خالق وخت وختہ اسپہ خبردار کویان مگم ہتو دی ہوش کوریکو کیا راہ نکی ، ہمی گناہان سوم ہرونی پروشٹی بی اسوسی کی تھوبہ یادی تان نو گویان۔ دنیو اشتو دے نیمیژو وختو دی الیسیان ،ہیہ ہوو یاد کوریک ضروری کی ہے نیمیژو قضا کوریکو اسپہ کیا حیثیت شیر ؟خالق سجدہ کوریکو توفیقو پھوک پھوک کوری اسپہ سار اچی گنیران۔ ہش مو بار کی اسپہ غفلتو وجہین تھوبو دروازہ دی باند بونی ۔۔۔۔۔۔۔۔۔۔۔