وا نمیژ خامیئک دی گوئ – تحریر گل خان گل
لوٹ نمیژ خامیئکوتین ای جو بس بہچی اشوئ لوٹ دیہو موژی ہتے وسہ توریرو ݯیق سو لوٹو تن خوشانیان سوم مصروف بیتی نمیژ خامیکو بھر پور تیاریان کوراؤ اشونی وا بعض وسہ توریرو قربانیوتے مال دی گانی استانی وا کا خصوصی مال حالیےاستانی کی ہیہ عیدا قربانی کوروسی رے ۔وا کندوری دورین ژورگنیار گانی ژیژاوا پت جو تروئ جوڑا نوغ سہ روپہ چالائ دی کوری استانی ۔سفو ہردی خوشان کی ہیہ عیدا تن بیروان پاشیسی ہتیتان دورین بیسی ۔وا کوس دورا بو قیمتی طحام دی پاچئیکو بندوبست دی اوشوئ ۔وا چارہ دار بیروان مݰکیکو تیاری دی اشوئ وا کوس دوری ناموسو پاشیکو یعنی لوٹ نمائیشو انتظام دی کورونو بیتی اشوئ ۔تنخواہ درار گانی کاروبای’ علاقو جاگیردار وا خور چارہ دار تان عیدو پاچین ہر رنگا تیاری کوری استانی وجہ ہیہ کی ہرایوالی تان نانگ نموسو تن دولتو تن حسن جمالو پاشیکو امتظارا استانی ۔۔۔
مگم ہے لوٹ دیہو موژا ای کمہ ہروݰ بے وسہ ناچار بے زبان غریب کھوشونو روئ دی استانی کی ہے قربانیو نیمژ صرف نامو سورا ہیتانتے معلوم اشوئ کی ہتیتان ہے دورو ݯیݯقان دی ارزوچےارمان ہروݰ تان اشونی کیچہ کی لوٹ دورو ہے ݯیݯقان ۔
ہے ݯیݯقان موژی کوس شرین تت نو استائ کوس شرین نان۔کا ویسورو دی اشونی ۔وا کا ویے اولاد دی ۔کوستے مزدوری میلاؤ نو باؤ آشوئ کوس وسہ نو اشوئ ۔وا کوس وزینوتے بوت نو اشوئ بس ہے بے وس روئ تن سورو وا تان دݰمان اژیلیان ہݰ رے دلاسہ دیاؤاستانی کی وا نمیژ خامیک دی بوئ ہیہ نمیژ خامیکا پسہ ہے پرانو چالاہان سورا تان گزارا کورور ۔
وا کا نفسو پاچین وام دار بیتی تن دشمان اژلیان خوشانیان ژونو ماراوشتانی ۔۔کا دولتو سورو لیݯھاو استانی وا کوستے غیچہ تاریکوتے میسر نو اشوئ ۔
بس زندگیو ہیہ سفارا کاندوری نمیژ ہروݰ تان بیتی شوخسی گیتی شینی وا کاندوری شوخسی گونی ۔
مگر تتے گلائ ہرونی شیر اے حضرت احساس تان گوڑو کتاجپان درے خورو دسہ دریرو چالایان لوڑی تہ ژان پولوئلی اشوئ وا تان دیدانگا پوچیرو طعامان پوشی خورو ویے بوتو دور دی تہ اندینی گیلیک اشوئ وا
تان انجیرو کاوݰان پوشی خورو دسہ دریرو بخ پونگی ݯاکینیان لوڑیلک دی اشوئ تہ اے چھور بسو زندگیو احساس ۔اے نرم ملائم بسترا اوریئک احساسان خورو بخ ژینہ ای چستان تہ غیچی گیلیک دی اشوئ ۔
تو بو خود غرض کیہ اے دولتو پوجاران اے بے حس احساس ہمی نانگو ناموس سف نو بہچونی تہ
لوٹ دوریو نمیژ خامیک دی شخسور مہ ناچار کم دست مجبورو گیاک نمیژ دی گوئ ۔۔۔