کرپشن کے خلاف اپرچترال کے ویلج چیئرمینز اور عمائدین علاقہ بھی سراپا احتجاج، ڈیزاسٹرفنڈز کی تحقیقات کا مطالبہ
اپرچترال ( شہزاد احمد ) ویلچ کونسل افس کوشٹ میں بدھ کے روز اویر سے لیکر کشم تک کے ویلج چیئرمینز، ویلج ممبرز، علاقے کے عمائدین سابق ناظمین اور پارٹی عہدیداران ایک جگہ جمع ہوئے اور حالیہ ڈزاسٹر فنڈ زمیں مبینہ کرپشن کے خلاف بھرپور احتجاج ریکارڈ کروایا ۔
شرکاء نے علاقے میں جاری ترقیاتی منصوبوں میں سنگین بے قاعدگیوں اور کرپشن پر شدید تحفظات کا اظہار کیا اور کہا کہ عوام سے وصول شدہ ٹیکس عوامی فلاح پر خرچ ہونے کے بجائے مافیا کے ہاتھوں ضائع ہو رہا ہے۔ سڑکوں اور بنیادی انفراسٹرکچر کی حالت بد سے بدتر ہوتی جا رہی ہے، جبکہ اربوں روپے کی کرپشن کی اطلاعات ہیں۔
اس موقع پر کرپشن کی تحقیقات کے لیے قائم کمیٹی پر بھی سخت سوالات اٹھائے گئے۔ مقررین کا کہنا تھا کہ کچھ اراکین خود کرپشن میں ملوث ہیں، اس لیے ایسی کمیٹی سے شفاف تحقیقات کی توقع رکھنا “بلی سے دودھ کی رکھوالی” کے مترادف ہے۔
شرکاء نے حالیہ واقعے پر تشویش کا اظہار کیا کہ چند روز قبل علاقے کے ایک منتخب چیئرمین نے عوامی تحفظات پر مبنی درخواست ڈی سی آفس میں دی، جہاں ان کے ساتھ نامناسب سلوک کیا گیا جس کی بھرپور مذمت کی گئی۔
شرکاء نے ڈپٹی کمشنر اپر چترال سے مطالبہ کیا کہ کرپشن کے خلاف غیر جانبدار اور شفاف کمیٹی تشکیل دی جائے اور مکمل تحقیقات کی جائیں۔ انہوں نے واضح کیا کہ ان کے پاس کروڑوں روپے کی کرپشن کے ٹھوس شواہد موجود ہیں، اور ضرورت پڑنے پر وہ ثبوت کے ساتھ سامنے آئیں گے۔
شرکاء نے انتظامیہ اپر چترال اور پی ٹی آئی حکومت سے بھی مطالبہ کیا کہ بغیر کام اور ورک ڈن کے جاری کی گئی رقوم کی تحقیقات کی جائیں، ادھورے منصوبے مکمل کرائے جائیں، اور جن علاقوں میں ٹھیکیدار کام چھوڑ کر فرار ہوئے وہاں ویلج کونسل سطح پر انکوائری کر کے ذمہ داران کے خلاف سخت کارروائی کی جائے۔
