ضلعی انتظامیہ اپر چترال سڑکوں کی مانیٹرنگ کے حوالے سے متحرک، ڈپٹی کمشنر عمران خان کا روزانہ کی بنیاد پر چترال بونی مستوج روڈ کا معائنہ، سردیوں سے پہلے مقررہ حدف مکمل کرنیکی ہدایت
اپرچترال ( نمائندہ چترال ٹائمز ) اپر چترال میں جاری چترال بونی مستوج روڈ پر تعمیراتی کاموں کی نگرانی مزید تیز کر دی گئی ہے، اسی سلسلے میں ڈپٹی کمشنر اپر چترال محمد عمران خان نے آج ہفتے کے روز چترال ۔بونی۔مستوج۔شندور روڈ کے مختلف حصوں کا تفصیلی معائنہ کیا۔ دورے کے دوران انہوں نے کمپکشن، ملبہ ہٹانے کے کام اور ریٹیننگ وال کی تعمیر کا جائزہ لیا۔
ڈپٹی کمشنر نے موقع پر موجود متعلقہ ٹھیکہ دار کو سختی سے ہدایت کی کہ تمام جاری کاموں کو جلد از جلد مکمل کیا جائے اور کسی بھی قسم کی غیرضروری تاخیر برداشت نہیں کی جائے گی۔ انہوں نے واضح کیا کہ جیسے ہی کمپکشن اور ریٹیننگ وال کی تعمیر مکمل ہو جائے، اسی وقت اسفالٹ بچھانے کا عمل شروع کیا جائے تاکہ ٹریفک کی روانی اور عوام کی مشکلات میں کمی لائی جا سکے۔
ڈپٹی کمشنر نے کہا کہ ضلعی انتظامیہ روزانہ کی بنیاد پر سڑکوں کی کوالٹی، رفتار اور حفاظتی اقدامات کا جائزہ لے رہی ہے، تاکہ تمام ترقیاتی منصوبے مقررہ مدت میں اعلیٰ معیار کے ساتھ پایۂ تکمیل تک پہنچ سکیں۔ انہوں نے اس عزم کا اعادہ کیا کہ عوامی سہولت اور روڈ سیفٹی کو ہر حال میں اولین ترجیح دی جائے گی۔اس موقع پر ڈپٹی کمشنر نے اس اُمید کا اظہار کیا کہ بہت جلد بونی پل سے لیکر چرون تک ترکول بچھانے کا کام شروع کیا جائیگا ، تاکہ ایک طرف ٹریفک میں روانی کے ساتھ ملحقہ اداروں خصوصا تعلیمی اداروں کے طلبا وطالبات کو روزانہ کی گردوغبار سے نجات دلایا جاسکے گا۔
دریں اثنا ڈپٹی کمشنر نے گزشتہ دنوں بونی تورکہو روڈ پر بھی کا م کا معائنہ کیا اور ٹھیکہ دار کو سختی سے ہدایت کی کہ وہ مقدار ، معیار اور مقررہ وقت کے اندر کام مکمل کرے تاکہ علاقے کے عوام کی مشکلات میں کمی آسکے۔
