تورکہو میں صحت سہولیات کی عدم دستیابی کے خلاف احتجاجی مظاہرہ، ڈپٹی کمشنر کی یقین دہانی پر احتجاج ختم کردیا گیا
اپرچترال ( نمائندہ چترال ٹائمز ) اپر چترال کے رورل ہیلتھ سنٹر شاگرام میں طبی عملے اور میڈیکل افسران کی عدم دستیابی کے خلاف اہالیان علاقہ کی جانب سے احتجاج کی اطلاع ملتے ہی ڈپٹی کمشنر اپر چترال محمد عمران خان نے فوری نوٹس لیتے ہوئے ڈسٹرکٹ ہیلتھ آفیسر اپر چترال ڈاکٹر فرمان ولی کے ہمراہ تورکہو شاگرام کا ہنگامی دورہ کیا اور احتجاجی مظاہرین سے براہِ راست ملاقات کی۔
مظاہرین نے ڈپٹی کمشنر کو آگاہ کیا کہ ہسپتال میں ڈاکٹروں اور دیگر ضروری طبی عملے کی شدید کمی کے باعث عوام کو سخت مشکلات کا سامنا ہے جبکہ مریضوں کو بروقت اور معیاری علاج کی سہولت میسر نہیں آ رہی، جس کے باعث علاقہ مکینوں میں شدید تشویش پائی جاتی ہے۔
ڈپٹی کمشنر نے موقع پر عوامی تحفظات کو بغور سنا اور رورل ہیلتھ سنٹر شاگرام کی مجموعی صورتحال کا تفصیلی جائزہ لیتے ہوئے فوری ریلیف کے طور پر کیٹگری ڈی ہسپتال بونی سے دو ڈاکٹروں کو عارضی بنیادوں پر شاگرام ہسپتال میں تعینات کرنے کے احکامات جاری کیے، تاکہ عوام کو فوری طبی سہولت فراہم کی جا سکے۔
اس موقع پر ڈپٹی کمشنر نے مظاہرین کو یقین دہانی کرائی کہ ایٹا (ETA) ٹیسٹ کے ذریعے ڈاکٹروں کی بھرتی کا عمل جاری ہے اور اس حوالے سے صوبائی حکومت کے ساتھ مؤثر انداز میں معاملہ اٹھایا جائے گا تاکہ نئے بھرتی ہونے والے ڈاکٹروں کی بروقت پوسٹنگ ممکن بنائی جا سکے۔ انہوں نے مزید کہا کہ اپر چترال کے کوٹے پر بھرتی ہونے والے ڈاکٹروں کی رورل ہیلتھ سنٹر شاگرام میں تعیناتی کو یقینی بنانے کے لیے سیکرٹری صحت کو باقاعدہ مراسلہ ارسال کیا جائے گا۔
ڈپٹی کمشنر کی یقین دہانی پر احتجاجی مظاہرین نے اپنا احتجاج وقتی طور پر ختم کرنے کا اعلان کیا اور اس امید کا اظہار کیا کہ ضلعی انتظامیہ صوبائی حکومت کے تعاون سے رورل ہیلتھ سنٹر شاگرام میں درپیش طبی مسائل کے مستقل اور پائیدار حل کے لیے سنجیدہ اور عملی اقدامات کرے گی۔
