شیرین تتو گیلائی ۔ نیویشاک: جی کے رضوان
تہ اندرینی نو گونی اے مہ شیرین ژاؤ۔۔۔اوا دی تان جوانیہ تہ سار دی بو مست اسیتام، مہ گوڑو دی اوغ نوئیی بوغاؤتائے، مہ دبدبہ اوشوئے مگر کیاوتکی تو زندگیہ ہاٶ تھے مہ ہتے دبدبہ، مہ ہتے مستی تہ سوم وابسطہ ہونی۔ تو مہ ہر ہتے خوشپان تان سوم ݯاکئیتاٶ، تھے مہ ساری مہ روخڅئیتاؤ، مہ ہر آرزوچے ارمان تا توری روپھیتانی۔ مہ محنت اوچے مشقتو سلسلہ تہ ہوسیکو پروشٹہ خسمت بیکو ژاغا دورا گیتی تہ پوشی طاقت وار وا ہومورو ہونی۔ تان ہر وسع تہ بچین نوغ اشٹوکھینوکان تان دُورو دکان اریتام۔ تان لوسنوکو دی تہ لاسئیتام۔ تان ݯھوئی پوریتام۔ دنیو ہر رنگہ فہلوتے تہ وجہین اوا برداشت اریتام۔ توغیچھاری بوسان رے تتے ہر دم دعا کوراکو ہوستہ ویچھئیتام، تہ کوری اے مہ شیرین ژاؤ تو اژیکو نا مہ میھ ڈانگ ہوئے رے تان سورا فخر اریتام، تو لوٹ بیتی جوان بیتی مہ صاحب گر بوس رے اے مہ زندگی! تہ ہر ای فرضو اوا غیژی پورا اریتام۔ تان سورا ومان دی اریتام، پھورگنیکار گنی تہ سنتو کوری تہ علمو، تعلیمو میدانہ پروشٹی آویتام۔
کیاوتکی تہ شون ݰا ہونی، تہ بازوا طاقت اوتیتائے، تہ فہل مہ بچین پھوک نوژان بیکہ پرائے ۔ تہ خواہشات پھوک زیاد ہونی مہ وسائلان پروشٹہ۔ خیر تان سورا سختی انگیتی ہتیتان دی پورا اریتام ۔کیاوتکی تو بالغ ہوو تھے تان خواہشو مطابقہ زندگی مݰکیتاؤ، تہ شون ݰا باٶ ہانی، مہ کپال ایشپیرو باٶ ہائے، تہ بازو طاقتور باٶ ہانی، مہ ہتے طاقت وار بازو لش بیتی تھارئیکہ پرانی، مہ بوئیکو غونہ نݰکہ کوری لوسنوک انگیتی تہ بوکو پیڅھیک لش لش باٶ خلاص ہونی، تہ ورازون نیسی تو اولئیکہ پراٶ۔ مہ تہ وفا، تہ سار محبت طلب کوریک غیچ ہمیشہ پھوکئے تہ ویݰکی تان متوجہ ہونی۔ مہ رونځاک ہوست، تان اللّہو پروشٹہ تہ پچین تہ خیرو اوچے عافیتو مݰکی تان بہچی اسوم۔ اللّہ پاک تہ سورا اوݰک گانو مو تاریار رے۔۔ کیچہ کی قول شیر۔
نان تتان ہردی اژیلیو سوری، اژیلیو ہردی در بوختو رے۔۔۔
اے مہ شرین ژاؤ! مہ غیچ دی کھور بیتی شینی۔ مہ کار قائیی بیتی شینی۔ مہ ڈیک کمزور بیتی رانځونیان۔ ڈُوک زراو بپ بیتی ݯھونݱیردارو غون کپ ہوتام۔ ویتھوکو سہاروتے ہوتام کیہ ای ویݰکی تو متے سہارا نو بوسہ؟ مہ فہل دی تہ څیقیو غون تیز بیتی شیر۔کیچہ کی تہ څیقی اوشوئے ہر لوؤ سوم تو کرواؤتاٶ۔ اوا دی تہ شیرین تت ہتے مرحلا توری اسوم۔ تہ دی تان ہوستی ݯاکئے بو نواہڅیہ تہ ڈوکئے اوا فخرو سورا کوساؤتام۔ مہ امید بویان، مہ دی گوروم بویان مہ شیرین ژاٶ کیہ سہارا بویا رے۔
تو مہ حقہ بے وفا کی ہوؤ مہ کا اسور؟ آسمان ݱانگ زمین ڈانگ بوئے وا ۔ اوا اوّل تہ اللّٰہو اچی تہ سہارو طلب۔ اے مہ شرین ژاؤ! ای نصیحت تہ تین ہمیت سف زندگیو موخو گیاگ کݰمان تو سیری کی کیݰیتاٶ سیری لیس وا گوم کی کیݰیتاٶ گوم۔