شندورفسیٹول کے انعقاد کے حوالے سے اعلیٰ سطح اجلاس، اس سال جولائی کے بجائے جون میں فیسٹول منعقد کرنے کا فیصلہ
پشاور(نمائندہ چترال ٹائمز) شندور پولو فیسٹیول کے انعقاد کیلئے تیاریوں کو حتمی شکل دینے کیلئے سیکرٹری محکمہ سیاحت، ثقافت، آثارقدیمہ و عجائب گھر خیبرپختونخوا سعادت حسن کی زیرنگرانی محکمہ سیاحت کے کانفرنس ہال میں اجلاس منعقد ہوا جس میں ڈپٹی سپیکر خیبرپختونخوا اسمبلی محترمہ ثریا بی بی نے شندور پولو فیسٹیول کی تاریخوں کا اعلان کرتے ہوئے کہاکہ شندور پولو فیسٹیول 11 جون سے 13 جون 2026 تک شندور پولو گراؤنڈ اپر چترال میں منعقد ہوگا۔ سطح سمندر سے 12ہزار200 فٹ بلندی پر واقع شندور پولو فیسٹیول کے انعقاد کیلئے تیاریوں کو حتمی شکل دینے کیلئے سیکرٹری محکمہ سیاحت، ثقافت، آثارقدیمہ و عجائب گھر خیبرپختونخوا سعادت حسن کی زیرنگرانی محکمہ سیاحت کے کانفرنس ہال میں اجلاس منعقد ہواجس میں ڈپٹی سپیکر خیبرپختونخوا اسمبلی، کمشنر ملاکنڈ ڈویژن، آرپی او ملاکنڈ، ڈائریکٹر جنرل خیبرپختونخوا کلچراینڈٹورازم اتھارٹی شہریار محمود، ایڈیشنل سیکرٹری رحیم اللہ محسود، ڈپٹی کمشنرلوئر و اپر چترال، ڈائریکٹر جنرل نیشنل ہائی وے اتھارٹی، 144 ونگ چترال،ڈی پی اوز لوئر اور اپر چترال، صدرپولو ایسوسی ایشن چترال، چترال چیمبر آف کامرس کے عہدیدار، پاکستان انٹرنیشنل ایئرلائن اور ڈی جی ایوایشن خیبرپختونخوا سمیت مختلف عہدیداران شریک تھے۔
ڈپٹی سپیکر خیبرپختونخوا اسمبلی ثریا بی بی نے مزید گفتگو کرتے ہوئے کہاکہ شندور پولو فیسٹیول کے انعقاد کیلئے تمام ادارے مل کر احسن طریقے سے اقدامات کریں تاکہ ایونٹ کا کامیاب انعقاد ممکن بنایا جا سکے۔ انہوں نے پی آئی اے کے عہدیداران سے بھی کہاکہ شندور پولو فیسٹیول کے دوران پاکستان انٹرنیشنل ایئرلائنز کی چترال کیلئے خصوصی پروازیں چلانے کیساتھ ساتھ چترال میں سیاحت کے فروغ کیلئے ملکی و غیر ملکی سیاح رخ کرتے ہیں تو باقاعدگی کیساتھ فلائٹس چلائی جائیں تاکہ سیاحوں کو کم وقت میں بہترین سروس کی فراہمی یقینی بنائی جا سکے۔ سیکرٹری محکمہ سیاحت و ثقافت سعادت حسن نے گفتگو کرتے ہوئے کہاکہ شندورمیں منعقد ہونے والا تاریخی شندور پولو فیسٹیول ایک بڑا ایونٹ ہے جس کیلئے تمام سٹیک ہولڈرز مل کر کامیاب انعقاد کو یقینی بنائینگے۔
اجلاس میں چترال چیمبر آف کامرس اینڈ انڈسٹری کے صدر حاجی محبوب اعظم و سرپرست اعلی سرتاج احمد خان نے بھی خصوصی شرکت کیْ۔اجلاس میں اس سال 11 سے 13 جون کو ہونے والے شندور پولو فیسٹول کے انتظامات کے حوالے سے تجاویز پیش کی گئیں۔
اس موقع پر چترال چیمبر آف کامرس اینڈ انڈسٹری کی طرف سے حاجی محبوب اعظم نے کا کہنا تھا کہ شندور فیسٹیول محض ایک کھیل تک محدود نہیں رہنا چاہیے بلکہ اسے چترال کی مقامی صنعتوں کو فروغ دینے کا ذریعہ بنانا چاہیے انھوں نے کہا کہ شندور کے مقام پر چترال کی مقامی مصنوعات کیلۓ خصوصی اسٹالز اور نمائش کا اہتمام کیا جاۓ تاکہ دنیا بھر سے سیاح یہاں کے دستکاری خشک میوہ جات اور ثقافتی اشیاء سے روشناس ہو سکیں اور اس حوالے سے چیمبر آف کامرس اپنا بھرپور رول ادا کرے گا۔
