ریجنل پولیس آفیسر ملاکنڈ کا لوئر چترال کا دورہ، پولیس سہولیات اور منصوبوں کا جائزہ
لوئر چترال (نمائندہ چترال ٹائمز ) ریجنل پولیس آفیسر ملاکنڈ ڈی آئی جی سید فدا حسن شاہ (PSP) نے لوئر چترال کا دورہ کیا، جہاں پولیس لائن پہنچنے پر ان کا پرتپاک استقبال کیا گیا۔
ڈسٹرکٹ پولیس آفیسر لوئر چترال رفعت اللہ خان، ایس پی انویسٹی گیشن اقبال کریم، ڈی ایس پی ہیڈکوارٹر اقبال الدین سمیت دیگر سینئر افسران نے معزز مہمان کا استقبال کرتے ہوئے انہیں خوش آمدید کہا۔ اس موقع پر پولیس کے چاق و چوبند دستے نے آر پی او کو سلامی پیش کی۔
آر پی او ملاکنڈ نے پولیس لائن میں یادگارِ شہداء پر حاضری دی، پھول چڑھائے اور شہداء کے درجات کی بلندی کے لیے فاتحہ خوانی کی۔ انہوں نے کہا کہ پولیس شہداء ہماری فورس کا فخر ہیں اور ان کی قربانیاں ہمیشہ یاد رکھی جائیں گی۔
دورے کے دوران انہوں نے پولیس لائن میں جاری تعمیراتی کاموں کا تفصیلی جائزہ لیا، کام کے معیار اور رفتار پر اطمینان کا اظہار کیا اور متعلقہ حکام کو ہدایت کی کہ منصوبے مقررہ وقت کے اندر مکمل کیے جائیں۔ اس موقع پر نئے تعمیر شدہ پولیس میس اور بیرکس کا بھی افتتاح کیا گیا۔
بعد ازاں آر پی او نے پولیس سہولت مرکز زرگراندہ کا دورہ کیا، جہاں عوام کو فراہم کی جانے والی مختلف سہولیات، سروس ڈیلیوری، شکایات کے اندراج اور رہنمائی کے نظام کا جائزہ لیا۔ انہوں نے عملے کو ہدایت کی کہ عوام کو بروقت، شفاف اور باوقار انداز میں خدمات فراہم کی جائیں۔
اس موقع پر پولیس سہولت مرکز میں نئے تعمیر شدہ ملٹی پرپز ہال کا بھی افتتاح کیا گیا۔ آر پی او نے اسے عوامی سہولت کے فروغ کی جانب اہم پیش رفت قرار دیتے ہوئے کہا کہ ایسے اقدامات پولیس اور عوام کے درمیان اعتماد کو مزید مضبوط بناتے ہیں۔
