چترال کے میدانی علاقوں میں گزشتہ دو دنوں سے وقفے وقفے سے بارش جبکہ پہاڑی علاقوں میں برفباری جاری، ایک سرکاری ملازم جان بحق، کچے مکانات کو جذوی نقصان پہنچنے کی اطلاع، جاتی سردی واپس لوٹ آئی
چترال (نمائندہ چترال ٹائمز ) چترال کے میدانی علاقوں میں گزشتہ دو دنوں سے وقفے وقفے سے بارش جبکہ بالائی اور پہاڑوں پر برفباری جاری ہے۔ جس کے نتیجے میں ایک شخص جان بحق جبکہ متعدد مقامات پر کچے مکانات کی دیواریں گرنے کے اطلاعات ہیں۔ بارش کے دوران اپرچترال کے مرکزی مقام مستوج خاص میں ایک افسوسناک سانحہ پیش آیا جہاں پہاڑی پتھر گرنے سے ایک شخص جان بحق ہوگئے ہیں،
عینی شاہدین کے مطابق گورنمنٹ ہائیرسیکنڈری سکول مستوج کے درجہ چہارم کے ایک ملازم ابراہم جان (المعروف گرم جان ) ولد محمد علی آج سکول ڈیوٹی پر جاتے ہوئے راستے میں ( شابوک شاخینی کے مقام ) پہاڑی پتھر کے زد میں اکر موقع پر ہی جان بحق ہوگئے ہیں۔ جس کو بعد آزاں آبائی قبرستان درالوٹ مستوج میں سپردخاک کردیا گیا
دودنوں سے جاری بارش کے باعث جاتی سردی بھی دوبارہ واپس لوٹ آئی ہے۔ لوگ دوبارہ گرم کپڑے زیب تن کرنے پر مجبور ہوگئے ہیں جبکہ اکثر افراد گھروں میں ہی محصور ہوگئے ہیں۔ اپرچترال کے بالائی علاقوں شندور پاس، بروغل، کھوت ویلی اور تریچ بالا کے پہاڑی علاقوں میں برفباری کے اطلاعات ہیں ۔
File Photo: Ibrahim Jan Late
اسی طرح لوئیر چترال کے میدانی علاقوں میں تیز بارش اور پہاڑی علاقوں میں برفباری جاری ہے، جہاں مختلف مقامات پر پتھر گرنے اور لینڈ سلائڈنگ کے باعث سڑکیں جذوی طور پر بند ہیں۔ جبکہ لواری ٹنل سے اخری اطلاع تک ٹریفک جاری ہے۔ تاہم عشریت، دروش ، براڈام ودیگر مقاما ت کے ندی نالوں میں پانی کی بہاو میں نمایاں اضافہ دیکھنے کو مل رہا ہے ،جس سے چترال پشاور روڈ کسی بھی وقت بند ہونے کا خدشہ ظاہر کیا جارہاہے ۔ اسی خدشے کے پیش نظر ضلعی انتظامیہ کی طرف مسافروں کو غیر ضروری سفر سے گریز کرنے کی ہدایت دی گئی ہے ۔
ڈپٹی کمشنر راو ہاشم عظیم نے تمام متعلقہ ادارواں کو الرٹ رہنے اور مشینری اسٹینڈ بائی رکھنے کی ہدایت کی گئی ہے۔ اسی طرح لوئیر چترال کے مختلف علاقوں میں کچھے مکانات اور دیواروں کو جذوی نقصان پہنچنے کی اطلاعات ہیں۔ محکمہ موسمیات کے مطابق اگلے چوبیس گھنٹوں میں خیبرپختونخوا، بالائی پنجاب، اسلام آباد،کشمیر،گلگت بلتستان ، شمال مشرقی بلوچستان میں کہیں کہیں جبکہ جنوبی پنجاب میں چند مقامات پر تیز ہواؤں اور گرج چمک کے ساتھ بارش (پہاڑوں پربرفباری) کا امکان ہے۔اس دوران بعض مقامات پر تیز/موسلادھار بارش (چند مقامات پر ژالہ باری) کی توقع ہے۔
