پاکستان ٹیلی کمیونیکشن اتھارٹی کی ٹیم کا اپرچترال کا دورہ، مختلف علاقوں کے ٹیلی نار موبائل سروس کے مسائل دوہفتوں کے اندر حل کرنے کی یقین دہانی، مقامی قیادت کی طرف سے ایم این اے غزالہ انجم کی کاوشوں کو سراہا گیا
اپرچترال ( نمائندہ چترال ٹائمز ) اپر چترال میں عرصہ دراز سے جاری مواصلاتی مسائل، خصوصاً ٹیلی نار کی ناقص سروس کے حل کے لیے آج ایک خصوصی کھلی کچہری کا انعقاد ٹی ایم اے ہال مستوج میں عمل میں لایا گیا۔ جس کی صدارت حسیب الرحمن خان خلیل ڈپٹی کمشنر اپر چترال نے کی۔ اجلاس میں پاکستان ٹیلی کمیونیکیشن اتھارٹی (PTA) کے نمائندے،ٹیلی نار، جاز، یوفون اور پی ٹی سی ایل ایکسچینج کے نمائندگان، منتخب نمائندگان، علاقائی عمائدین اور مختلف سیاسی و سماجی جماعتوں کے رہنماوں نے شرکت کی۔
عوام کی اکثریت نے شدید تحفظات کا اظہار کرتے ہوئے بتایا کہ ٹیلی نار نیٹ ورک کی مسلسل کمزور سروس سے روزمرہ کی زندگی مفلوج ہو چکی ہے۔ ایزی لوڈ کے ضیاع سے مالی نقصان ہو رہا ہے جبکہ عزیز و اقارب سے رابطہ بھی مشکل بن چکا ہے۔
انٹرنیٹ بندش کے باعث طلبہ و طالبات کی آن لائن تعلیم، مختلف مقابلہ جاتی امتحانوں کے لئے ان لائن فارم جمع کرنے میں مشکلات اور دفاتر کے ان لائن سرکاری امور شدید متاثر ہو رہے ہیں۔ جس کی وجہ سے بار بار دفاتر کے چکر لگانے سے عوام اذیت میں مبتلا ہورہے ہیں۔شرکاء نے جاز کی بہتر سروس پر اطمینان کا اظہار کرتے ہوئے درخواست کی کہ اس کا دائرہ کار اپر چترال کے دیگر علاقوں تک بڑھایا جائے۔
ڈپٹی کمشنر اپر چترال نے پی ٹی اے اور تمام نیٹ ورک کمپنیوں کو عوامی شکایات کا سنجیدگی سے نوٹس لینے کی ہدایت کی اور تمام مسائل کے فوری حل پر زور دیا۔
انہوں نے واضح کیا کہ ناقص سروسز نہ صرف دفتری نظام کو متاثر کر رہی ہیں بلکہ عوام کی روزمرہ زندگی، تعلیم، کاروبار اور سیاحت جیسے اہم شعبے بھی شدید متاثر ہو رہے ہیں۔
ڈپٹی کمشنر نے پی ٹی اے سے گزارش کی کہ وہ اپر چترال میں دیگر پرائیویٹ نیٹ ورک کمپنیوں کو سرمایہ کاری کی جانب راغب کرے کیونکہ چترال-بونی-مستوج-شندور روڈ کی تکمیل کے بعد خطے میں سیاحتی سرگرمیوں میں غیر معمولی اضافہ متوقع ہے جو نیٹ ورک کمپنیوں کے لیے نفع بخش موقع ثابت ہو سکتا ہے۔
پاکستان ٹیلی کمیونیکیشن اتھارٹی کے نمائندوں نے یقین دلایا کہ تمام شکایات پر سنجیدگی سے عمل درآمد کیا جائے گا اور اپر چترال کے عوام کو جلد بہتری کی صورت میں خوش خبری دی جائے گی۔
دریں اثنا پاکستان مسلم لیگ اپرچترال کے عمائدین پرنس سلطان الملک ، پرویز لال ودیگر نے ایم این اے غزالہ انجم کی اس سلسلے میں کاوشوں کو سراہتے ہوئے کہا ہے کہ انکی انتھک کوششوں کی وجہ سے پی ٹی اے کی ٹیم اپر چترال میں ٹیلی نار کی ناقص سروس ، پی ٹی سی ایل اور دیگر موبائل نیٹ ورک کی سروس بہتر بنانے اور جہاں جہاں ٹیلی نار کی ٹاورز نہیں وہاں پر فوری ٹاورز نصب کروانے اور جن جن ٹاورز میں سولرز یا جنریٹرز کے مسلے ہیں یا جہاں کمزور سیگنل کے مسلے ہیں یا جہاں تھری جی فور جی کے مسلہ مسائل ہیں ان سب مسلوں کوحل کرنے کی عرض سے اپر چترال کے دورے پر بونی تشریف لائے
اس موقع پر پی ٹی اے کے اعلیٰ حکام نے اپر چترال سے آئے ہوئے تمام عمائدین سے انکے علاقے کی ٹیلی نار سے متعلق شکایت سنے اور دو ہفتے کے اندر سارے مسلے مسائل حل کروانے کا وعدہ کیا گیا ہم پر امید ہیں کہ انشاللہ بہت جلد اپر چترال میں ٹیلی نار اور پی ٹی سی ایل سے متعلق لوگوں کی شکایات کا ازالہ مستقل بنیادوں پر حل کیا جائے گا خاص کر دور دراز علاقوں تریچ بالا تریچ پائین ، ریچ کھوت ، واشیچ ، نیشکوہ مداک ،زائینی قاقلشٹ اور گہکیر ٹاورز کی خصوصی ذگر کیاگیا نیز بریپ ٹاور ، یارخون لشٹ بروغل ٹاور اور بونی ٹاور کیلئے بھی مسلم لیگ ن کے جنرل سیکرٹری پرنس سلطان الملک کی طرف سے خصوصی درخواست پیش کی گئی جن کو ترجیحی بنیادوں پر حل کرنے کا بھی وعدہ کیا گیا ۔
